मत्ती 18
18
थाम्जेर भन्दा छ्योम्बो सु इःङे?
(मर्कुस ९:३३-३७; लुका ९:४६-४८)
1ओः तेःकासु योबाक्या येशुसाःला ओःङ्दी टीःसी, “नाःम्खालीङगीइ क्याःल्खापला थाम्जेर भन्दा छ्योम्बो सु इःङे?” 2खुङगीइ छीमी पीःजा चीगला केक्याःप्ती खुङक्याइ कील्ला लाःङ्च्युसी, 3ओःले लाःसी, “तेःन्दामरा ङाः ख्योक्याला लाःके, राःङगीइ सेम दी छीमी पीःजाइदी च्योःङ्रा माःजोथुप, ख्योक्या नाःमाङ नाःम्खालीङगीइ क्याःल्खापला स्युःजे मेःज्योर्केन एः। 4ओः सोङ्गारा, राःङला दीखो पीःजा च्योःङ्रा याङ्छाबु जोगेन मीःरा नाःम्खालीङगीइ क्याःल्खापला थाम्जेर भन्दा छ्योम्बो ओःङेन एः। 5ओःले ङाःइ मीःनला एःन्डुबा पीःजाला तोःङ्ज्याङ पेःगेन्दीइ ङाःलाङ तोःङ्ज्याङ पेःउए।
तीःक्पा पेःच्युगेन तामक्या
(मर्कुस ९:४२-४८; लुका १७:१-२)
6सुइयाङ ङाःला सेमल्हुक लुगेन दी छ्यामेक्याला लाःयो पेःच्युसी लाःना, ओःखोइ जीङ्बाला छ्योम्बो लाःगोर प्याङ्दी चाङ्बुला क्युर्तेर्ना याःबु ओःङे। 7दी जाम्बुलीङला धीक्कार, चीलेलाःना मीःक्याला लाःयो पेःच्युगेन तामक्या दीला माःङ्बुरा एः। लाःयो पेःच्युगेन एःन्डुबा तामक्या नी ओःङ्गुए, इःनाङ काःखोइ राःङ्साला लाःयोला पेःच्युबा ओःखोला काःन्डुबा जीबा लाःङ्जे च्योःङ्रा ओःङेन एः!
8ख्योइ लाःक्पा की काङ्बाइ ख्योला लाःयो पेःच्युए लाःना ओःखोला तुप्ती क्युर्तेर। ङीक्कार लाःक्पा काङ्बा एःती ङ्याल्वाइ नाःमाङ मीसीगेन मेःला लेप्चे भन्दा नी लाःक्पा चीग ओःले काङ्बा चीग एःती नाःमाङ मीसीगेन मीःजीला स्युःजे ख्योइ लागी याःबु इःङे। 9ख्योइ मीइ ख्योला लाःयो पेःच्युए लाःना ओःखोला तेङ्दी क्युर्तेर। ङीक्कार मी एःती ङ्याल्वाला स्युःजे भन्दा मी चीग एःती नाःमाङ मीसीगेन मीःजीला स्युःजे ख्योइ लागी याःबु इःङे।
तोर्क्योक लुःककीइ पेदाम
(लुका १५:३-७)
10च्यागाताःक्पु पेःदी तेः, ख्याक्याइ दी छीमीक्या नाःङ्ला मेःराङ चीगलाङ ङ्याप्च्युक माःबे, चीलेलाःना ङाः ख्याक्याला लाःके, खुङक्याला ताजेला स्वर्गदुतक्या नाःम्खालीङला तेःकेन ङाःइ आबा कोन्ज्योइ तोःङ्लारा एः।
11चीलेलाःना ङाः मीःइ पुः नी तोर्क्योक मीःक्याला थार्च्युजेला ओःङ्क्योक इःङे।#१८:११ काःजे ग्रीक तामगीइ तोःङ्गीइ कोन्ज्योइ छेला दीखो पद म्याः।
12ख्याक्याइ ची ठीवा साल्गुबा? क्याः चीग लुःक एःकेन मीःइ चीग तोर्सी लाःना ओःखोइ ची पेःउस्वाँ? ओःखोइ खाल सीः रा चीर्कुःथाल लुःकक्याला छोसालारा पोःर्ती ओः तोर्क्योकला माःफ्रेथुप मेःछोल्बा ले? 13ओःखोला फ्रेमीःजीक खाल सीः रा चीर्कुःथाल मातोर्क्योक लुःकक्याइ लागी भन्दाङ फ्रेक्योक लुःक चीगकीइ लागी खुङ माःङ्बुरा केःदाङ ओःङेन एः। 14एःन्डुलेरा नाःम्खालीङला तेःकेन ख्याक्याइ आबा कोन्ज्योइयाङ दीखो छीमीक्या नाःङ्ला सुङ मातोर्च्युक लाःकुए।
सुइयाङ लाःयो पेःगासुना
(लुका १७:३)
15प्रभुला सेमल्हुक लुगेन मेःन्दा चीगकीइ ख्योइ वीरुद्धला लाःयो पेःसी लाःना, खुङ चीग्रा चीग एःकासुना खुङगीइ लाःयो पेःदी एः लाःती लाःतेर। खुङगीइ ख्योइ ताम कोःसी लाःना, खुङ ख्यो राःङगीइदी काःल्सी। 16इःनाङ ओःखोइ ख्योइ ताम माःको लाःना राःङ ङीमु राःङ्सा मेःन्दा चीग-ङी मीःक्या ङीमुरा खेर्ती सुङ चीलेलाःना छ्येइ पेज्याला लाःक्योक च्योःङ्रारा, थाम्जेर च्याःङ्क्योक माःताक्पाक्यादी तेःन्दामरा इःङे लाःती मेःन्दा ङी सुम पाङ्बुक्याइ दास्यी तेर्कोःउए।#व्यवस्था १९:१५ 17ओःजे पेःदीङ ख्योक्याइ ताम खोइ माःको लाःना, कोःम्साला काःल्दी ख्योइ थाम्जेर ताम लाःतेर। ओःले खुङक्याइ तामाङ ओःखोइ माःको लाःना खोला कोन्ज्योला सेमल्हुक मीलुगेन्दी ओःले च्याल्गो तुःगेन्दीला च्योःङ्रा पेःदी पोःर्तेर।
18तेःन्दामरा ङाः ख्याक्याला लाःके, ख्योक्याइ दी साजाम्बुलीङला ची ताःम्बा, ओःखो नाःम्खालीङलाङ ताःम्ङेन एः। ओःले ख्योक्याइ दी साजाम्बुलीङला ची ताङ्बा, ओःखो नाःम्खालीङलाङ ताङेन एः। 19ओःले ङाः ख्योक्याला फीर्च्या लाःके, दी साजाम्बुलीङला ख्योक्या मेःन्दा ङी डीक्ती चीङ लाङ्सी लाःना, ओःखो नाःम्खालीङला तेःकेन ङाःइ आबा कोन्ज्योइ ख्योक्याला ओःखो तेर्केन एः, 20चीलेलाःना काःला मेःन्दा ङी सुम ङाःइ मीःनला जोम्बा, ङाः खुङक्याइ ङीमु ओःङेन एः।”
क्षमा मेतेर्केन लाबुइ पेदाम
(लुका १७:४)
21ओःले पत्रुस येशुसाःला ओःङ्दी लाःसी, “प्रभु, सुइयाङ ङाःइ वीरुद्धला माःताक्पा पेःदीरा तेःसी लाःना ओःखोला ङाःइ काःजे खेप क्षमा तेर्कोःउबा? खेप तीःनथुप?”
22येशुइ खुङला लाःसी, “ङाः ख्योला लाःके, खेप तीःन मीःङे, इःनाङ खाल सुम रा च्युप्तीःन खेप क्षमा तेर्कोःउए। 23चीलेलाःना नाःम्खालीङगीइ क्याःल्खाप मेराःङ चीग क्याःल्बु च्योःङ्रा इःङे, खुङगीइ राःङगीइ लाबुक्या ङीमु हीसाब लेःङेन सेम पेःसी। 24ओः क्याःल्बुइ हीसाब लेङ्जेला हजार च्यु सेरकीइ टाङ्गा डेबा पेःलेन खेर्केन मेःराङ चीगला खुङसाःला ख्योङ्सी। 25इःनाङ ओः मीः ङीमु पेःलेन च्याल्गेन डेबा म्याःके। ओः सोङ्गारा, ओः क्याःल्बुइ खोला, खोइ पेःमे, पुःपोःमोक्या ओःले खो ङीमु एःक्योक थाम्जेर क्युःक्या चोङ्दी खोइ च्याल्कोःन पेःलेन लाङ्दो लाःती राःङगीइ लाबुक्याला आज्ञा तेर्सी। 26ओः मीःइ क्याःल्बुइ तोःङ्ला पीमु चुदी वासी पेःसी, ‘ताःक्पु, चीङ ङीःमाथुप कुःतेर्ना, ङाः थाम्जेर पेःलेन च्याल्गे।’ 27क्याःल्बुइ सेमला नीङ च्योःदी ओःङ्सी ओःले खुङगीइ खोइ थाम्जेर पेःलेनक्या माफ पेःतेर्सी ओःले खुङला ताङ्तेर्सी।
28इःनाङ ओः मीः थेङ्दी डोगासुना राःङगीइ रोः लाबुक्या नाःङ्ला मेःराङ चीगला फ्रेसी, खुङला ओःखोइ क्याः चीग ङुलगीइ टाङ्गा डेबाइ पेःलेन एःके। ओः मीःइ खुङला जीङ्बाला जुम्दी लाःसी, ‘ख्योइ ङाःइ पेःलेन ताःसेरा च्याल्दो!’ 29ओः लाबु रोःइ पीमु चुदी वासी पेःदेरा खुङला लाःसी, ‘चीङ ङीःमाथुप कुःतेर्ना, ङाः ख्याइ थाम्जेर पेःलेन च्याल्गे।’ 30इःनाङ खोइ माःङीन। पेःलेन माच्यालथुप खुङगीइ रोःला चेङाङला लुतेर्सी।
31राःङ्सा लाबुक्याइ ओः थाम्जेर ताम थोङ्दी खुङक्या माःङ्बुरा तुःङाल पेःसी। ओःले खुङक्याइ क्याःल्बुसाःला काःल्दी दी थाम्जेर ताम खुङला लाःतेर्सी। 32ओःले क्याःल्बुइ ओः लाबुला केक्याःप्ती लाःसी, ‘ए माःरीक्पा लाबु, ख्योइ ङाः ङीमु वासी पेःसी, ओःले ङाःइ ख्योला ख्योइ पेःलेन माफ पेःतेर्सी। 33ङाःइ ख्योला नीङ च्योःक्योक च्योःङ्रारा ख्योयाङ राःङ ङीमु लेःगा पेःगेन रोःला नीङ च्योःमेःको ले?’ 34ओःले क्याःल्बुला माःङ्बुरा सीःताङ लाःङ्सी ओःले ओः लाबुइ च्याल्कोःन पेःलेन थाम्जेर माच्यालथुप खोला दण्ड तेर्ती चेङाङला कागेन आज्ञा तेर्सी।”
35ओः तीङ्ला येशुइ योबाक्याला लाःसी, “ख्योक्याइ राःङगीइ सेममीःजीक थाम्जेरला क्षमा मातेर लाःना नाःम्खालीङला तेःकेन ङाःइ आबा कोन्ज्योइयाङ ख्योक्याला ओःन्डुरा पेःगेन एः।”
Currently Selected:
मत्ती 18: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
