मत्ती 17
17
येशुइ जुबु राःङ्सारा काःल्क्योक
(मर्कुस ९:२-१३; लुका ९:२८-३६)
1ङीःमा टुःक तीङ्ला येशुइ पत्रुस, याकुब ओःले खुङगीइ नोः युहन्नाला राःङ ङीमुरा खेर्ती खुङक्या चीग्रा थोम्बो काःङ्ला काःल्सी। 2युःला लेप्मीःजीक योबाक्याइ तासुना तासुनारा येशुइ जुबु राःङ्सारा काःल्सी। खुङगीइ छेन्दा ङीःमा च्योःङ्रा चम्कीइतीगाला स्युःसी ओःले खुङगीइ केःलाङ मीरा खेर्केन पेःदी कार्मु काःल्सी। 3ओःले खेप चीगलारा मोशा रा एलीया थोङ्सी ओःले खुङक्या येशु ङीमु ताम लाःकाला स्युःसी।#१७:३ कोन्ज्योइ मोशाला इस्राएलीक्याला तेर्चेला छ्येइ ठीम तेर्सी। ओःले एलीयादी कोन्ज्योइ लेःङ्गो तेर्केनक्या नाःङ्ला थाम्जेर भन्दा छ्योम्बो एःके। ओः मेःन्दा ङीइ कोन्ज्यो राःङ ओःले मीःक्याइ कील्ला पेःक्योक तोःङगीइ ताःम्ज्या इःङे, ओः ताःम्ज्यादी छ्येइ ठीम ओःले कोन्ज्योइ लेःङ्गो तेर्केनक्या। 4दीखो थोङ्दी पत्रुसकीइ येशुला लाःसी, “ए प्रभु, उः दीला एःक्योक याःबु काःल्दु। ख्याला सेम एःना ङाः दीला सुमथाल चाङ्मा पाल जोगे, चीग ख्याला, चीग मोशाला ओःले चीग एलीयाला।”
5खुङ एःन्डुले ताम लाःतेरा एःकासुना चम्कीलो मुक्पा ओःङ्सी ओःले ओःखोइ टीःप्सोककीइ खुङक्याला उप्सी, ओःले मुक्पालाःम्ले एःन्डुबा के ओःङ्सी, “दीखो ङाःइ च्याःम्बु पेःक्योक पुः इःङे, दीखो ङीमु ङाः माःङ्बुरा केःदाङ एः। खुङगीइ लाःक्योक कोःदो ओःले ङीःन्दो।” 6योबाक्याइ दी के कोःमीःजीक, खुङक्या माःङ्बुरा जीसी ओःले साला खाप्लु क्याःप्सी। 7इःनाङ येशु ओःङ्दी खुङक्याला देदी लाःसी, “याःरला लोःङ, माःजी।” 8ओःले खुङक्या याःरला तागासुना नी ओःला येशु बाहेक राःङ्सा सुलाङ माःथोङ।
9काःङलाःम्ले थुलला पाःप्तेरा एःकासुना येशुइ खुङक्याला लाःसी, “तादो, ङाः मीःइ पुः सीक्योकलाःम्ले सोम्बो माःलोथुप ख्योक्याइ थोङ्क्योक दी तामगीइ बारेला सुलाङ माःलाःप।”
10योबाक्याइ येशुला टीःसी, “छ्येइ ठीमगीइ लोबेनक्याइ चीले एलीया थार्च्युगेन ख्रीष्ट भन्दा तोःङ्ला ओःङ्कोःउए लाःकुबा?” 11खुङगीइ योबाक्याला लाःसी, “एलीया तेःन्दामरा ओःङ्कोःउए, ओःले खुङगीइ थाम्जेर तामक्या फीर्च्या टीगेन एः। 12इःनाङ ङाः ख्योक्याला लाःके, एलीया तोःङ्लारा ओःङ्सीःङ्दी एः, ओःले मीःक्याइ खुङला ङोःमासे, इःनाङ खुङक्याइ एलीयाला ची सेम थेपा ओःखोरा पेःसी। ओःन्डुलेरा ङाः मीःइ पुःलाङ खुङक्याइ तुःक्पु तेर्केन एः।” 13ओः तीङ्ला येशुइ बप्तीस्मा तेर्केन युहन्नाइ बारेला ताम लाःक्योक दुबा लाःती योबाक्याइ सेसी।
येशुइ हेन्डी क्याःप्क्योक स्याराला टाःच्युक्योक
(मर्कुस ९:१४-२९; लुका ९:३७-४३)
14ओःले येशु राःङगीइ मेःन्दा सुम योबाक्या ङीमु मीःइ पोर्चोम एःक्योक ठाउँला लोःदी ओःङ्गासुना, मेःराङ चीग मीःइ येशुइ तोःङ्ला पीमु चुसी, 15ओःले लाःसी, “प्रभु, ङाःइ पुःखाला नीङ च्योःतेर, चीलेलाःना ओःखोला छारे नाःजा क्याःप्ती एः, ओःले माःङ्बुरा तुःक्पु ज्योर्तेरा एः। ओःखो नाःमचीग मेःला स्युःउए, नाःमचीग छ्युला स्युःउए। 16ङाःइ खोला ख्याइ योबाक्यासाःला ख्योङ्सी, इःनाङ खुङक्याइ ओःखोला टाःच्युमाःखु।” 17येशुइ लाःसी, “ए सेमल्हुक मीलुगेन्दी ओःले माःताक्पा मीःक्या, नाःमथुप ङाः ख्याक्या ङीमु तेःचे? नाःमथुप ङाःइ ख्याक्या ङीमु साइतीगा? ओःखोला दीला ङाःसाःला खेर्च्यो।” 18येशुइ ओः हेन्डीला हाप्स्याल तेङ्सी, ओःले हेन्डी ओःखोलाःम्ले थेङ्दी काःल्सी। ओःले ओःखो स्यारा ओः तेःकासुरा टाःसी।
19ओःले योबाक्या येशुसाःला ओःङ्सी ओःले खाजुम्बाले टीःसी, “ङीःक्याइ ओः हेन्डीला चीले तेङ्जे माःखुबा?” 20येशुइ लाःसी, “ख्योक्याइ माःङ्बु सेमल्हुक मालुक्योक सोङ्गारा इःङे। तेःन्दामरा ङाः ख्योक्याला लाःके, ख्योक्या ङीमु पाल्गाइ बुदी चीग जे छ्योम्बो सेमल्हुक लुसी लाःना दी काःङ्ला दीलाःम्ले फार्ला सुङ लाःसी लाःनाङ, दीखो डोगेन एः। ख्योक्याइ चीङ पेःजे खुगेन एः। 21[इःनाङ एःन्डुबा खालगीइ हेन्डीदी प्रार्थना ओःले खा चाङ्मा तेःती चीग्रा तेङ्जे खुउए।”]#१७:२१ काःजे ग्रीक तामगीइ तोःङ्गीइ कोन्ज्योइ छेला दीखो पद म्याः।
येशुइ फीर्च्या राःङ सीगेन बारेला लाःक्योक
(मर्कुस ९:३०-३२; लुका ९:४३-४५)
22येशु ओःले थाम्जेर योबाक्या गालील क्षेत्रला जोम्मीःजीक, येशुइ खुङक्याला लाःसी, “ताः ङाः मीःइ पुःला जुम्दी मीःक्याइ लाःक्पाला तेर्केन एः। 23खुङक्याइ ङाःला सेकेन एः, इःनाङ ङीःमा सुम तीङ्ला ङाः फीर्च्या सीक्योकलाःम्ले सोम्बो ओःङेन एः।” दीखो ताम कोःदी योबाक्याइ सेमला माःङ्बुरा तुःङाल काःल्सी।
येशुइ मन्दीरकीइ च्याल्गो च्याल्क्योक
24येशु ओःले खुङगीइ योबाक्या कफर्नहुमला ओःङ्मीःजीक, कोन्ज्योइ मन्दीरकीइ च्याल्गो तुःगेनक्याइ ओःङ्दी पत्रुसला टीःसी, “ची ख्याक्याइ लोबेनगीइ कोन्ज्योइ मन्दीरकीइ च्याल्गो मेच्याल्बा?”#१७:२४ थाम्जेर यहुदी ख्य्वापीःजाक्याइ यरुशलेमला एःक्योक कोन्ज्योइ मन्दीरला कोःकेन खर्चइ लागी च्याल्गो च्याल्कोःउके। 25खुङगीइ लाःसी, “चीले मेच्याल्गेरा, च्याल्गुए।”
पत्रुस खीमला स्युःमीःजीक येशुइ तोःङ्ला लाःसी, “सीमोन, ख्योइ ची ठीवा साल्गुबा? जाम्बुलीङगीइ क्याःल्बुक्याइ च्याल्गो सुलाःम्ले तुःउबा? राःङगीइ खीमगीइ फेबेक्यालाःम्ले की राःङ्सा मीःक्यालाःम्ले#१७:२५ राःङ्सा मीःक्यालाःम्ले ओः तेःकासु, क्याःल्बुक्याइ राःङगीइ क्याःल्खापकीइ मीःक्या ओःले क्याःल्दी ख्योङ्क्योक क्याःल्खापकीइ मीःइक्यालाःम्ले च्याल्गो तुःउके। इःनाङ खुङक्याइ नाःमाङ राःङगीइ खीमगीइ फेबेक्यालाःम्ले मीःतुके।?” 26पत्रुसकीइ लेःन लोदी लाःसी, “राःङ्सा मीःक्यालाःम्ले।” येशुइ खुङला लाःसी, “ओःन्डु इःङे लाःना खुङगीइ राःङगीइ खीमगीइ फेबेक्याइ नी च्याल्मेःकोन दु। 27इःनाङ खुङक्या उःक्या ङीमु सीःताङ माःबेज्युक। ओः सोङ्गारा, छोला सुङ ओःले बल्छी क्योःप, ओःले तोःङ्ला पार्तीक्योक ङ्याः तेङ्दी ओःखोइ खाफ्यादो, ओःले ख्योइ ङुलगीइ टाङ्गा चीग डेबा ज्योर्केन एः। ओःखो खेर्ती ख्यो रा ङाः ङीक्कारकीइ च्याल्गो च्याल्तेर।”
Currently Selected:
मत्ती 17: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
