लुका पेज्याइ ङोःसी
पेज्याइ ङोःसी
दीखो पेज्यादी लुका लाःकेन्दी मीः चीगकीइ प्रुःक्योक इःङे। खुङदी मेन मेन्ज्यु पेःगेन्दी मेःन्दा चीग डाक्टर एःके। खुङगीइ येशुइ बारेला काःल्क्योक तामक्या लाःचेला थीयोफीलस लाःकेन मीःला दी याःबु लेःङ्गोइ पेज्या प्रुःदी ताङ्दी एःके। दीखो याःबु लेःङ्गोइ पेज्याला येशुइ बारेला एःन्डुले प्रुःदी एः- येशु इस्राएलीक्या नाःङ्ला दी साजाम्बुलीङला केसी ओःले खुङगीइ याःबु चेपा, खुङगीइ लाःक्योक ताम, खुङगीइ पेःक्योक याःमाछाककीइ लेःगाक्या, खुङ सीक्योक ओःले फीर्च्या सीक्योकलाःम्ले सेन्क्योक तामगीइरा खुङ कोन्ज्योइ पुः ओःले थार्च्युगेन ख्रीष्ट एःके लाःकेन ताम तेङ्तेर्ती एः। खुङ नी तुःक्सी ओःले प्राङ्ना थाम्जेर मीःक्याला याःबु लेःङ्गो लाःचेला आबा कोन्ज्योइ दी साजाम्बुलीङला ताङ्दी एःके। दीखो याःबु लेःङ्गोदी ची लाःना येशुला सेमल्हुक लुगेनक्याइ राःङ राःङगीइ लाःयोइ क्षमा ज्योर्च्युक ओःले सीमीःजीक तीङ्ला नाःम्खालीङला कोन्ज्यो ङीमुरा तेन्दुइ लागी तेःचे ज्योर्च्युक लाःती खुङगीइ ठा बगाइतीसी।
दीखो पेज्याला याःबु लेःङ्गोइ तामक्या माःङ्बुरा प्रुःदी एः, दीखो पेज्याइ तोःङ्गीइ बोक्याला येशु केक्योक ताम ओःले तीङ्गीइ बोक्याला खुङ नाःम्खालीङला काःल्क्योक तामक्या प्रुःदी एः। येशु नाःम्खालीङला काःल्मीःजीक खुङला सेमल्हुक लुगेन मीःक्या बड्तीदेरा काःल्क्योक ओःले थाम्जेरछ्योले फेल्देरा काःल्क्योक तामक्या लुकाइ “प्रेरीतक्याइ लेःगा” लाःकेन पेज्याला प्रुःदी एः। दीखो पेज्याइ ङी रा टुःककीइ बोक्याला एःन्डुबा पेदामक्या प्रुःदी ए, ओः पेदामक्या दीखो याःबु लेःङ्गोइ पेज्याला चीग्रा एः। ओः पेदामक्यादी- स्वर्गदुतकीइ लेःङ्क्योक लु रा येशु केगासुना कोःरालुक्याइ खुङला तागाला ओःङ्क्योक (२:८-२०), येशु पीःजा एःकासुना कोःम्साला काःल्क्योक (२:४१-५०), याःबु सामारी (१०:२५-५०) ओःले तोर्क्योक पुःइ पेदाम (१५:११-३१)। दी पेदामक्या थाम्जेर याःबु लेःङ्गो इःङे।
थीमी सुची
ङोःसी १:१-४
बप्तीस्मा तेर्केन्दी युहन्नाइ केबु, येशुइ केबु ओःले खुङ पीःजा एःकासुनाइ तामक्या १:५–२:५२
बप्तीस्मा तेर्केन्दी युहन्नाइ पेःक्योक लेःगाइ बारेला ३:१-२०
येशुइ बप्तीस्मा लेःङ्क्योक ओःले खुङगीइ परीक्षा ३:२१–४:१३
गालीलला येशुइ पेःक्योक लेःगाइ बारेला ४:१४–९:५०
गालीलमीःजीक यरुशलेमथुप ९:५१–१९:२७
यरुशलेमला अन्तीम हप्ता १९:२८–२३:५६
येशु सीक्योकलाःम्ले सेन्दी नाःम्खालीङला काःल्क्योककीइ बारेला २४:१-५३
Currently Selected:
लुका पेज्याइ ङोःसी: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.