लुका 1
1
लुकाइ येशुइ बारेला प्रुःक्योक लेःङ्गो
1माःङ्बुरा मीःक्याइ उःक्याइ कील्ला येशुइ बारेला काःल्क्योक तामक्याइ बारेला खुङक्याइ प्रुःदी एः। 2ओः प्रुःक्योक तामक्यादी तोःङमीःजीकरा राःङगीइ मीइ थोङेन्दी ओःले दीखोइ बारेलारा याःबु लेःङ्गो फेल्गेन्दी मीःक्याइ उःक्याला लाःती एःके। 3ओःले थीयोफीलसज्यु, ङाःइयाङ दीखोइ बारेला तोःङमीःजीकरा याःबुले छोल्दी एः ओःले ख्याला दीखोइ बारेला मेलोइरा प्रुःजेला ङाःला डीक्पु नेसी। 4ताः दीखो पेज्या टोःदी ख्याला लोप्क्योक तामक्या थाम्जेर तेःन्दामरा एःकेन दुबा लाःती ख्याला टेःम्बा ओःङेन एः।
स्वर्गदुतकीइ बप्तीस्मा तेर्केन्दी युहन्नाइ केबुइ बारेला लाःक्योक
5यहुदीया क्षेत्रइ क्याःल्बु हेरोदकीइ पालोला जकरीया मीःन पेःक्योक पुजाहारी एःके। खुङ अबीया लाःकेन पुजाहारी छोबाइ मीः एःके, ओःले खुङगीइ पेःमे हारुनगीइ छार्क्युफुर्क्यु एःके। खुङगीइ मीःन एलीशीबा एःके। 6खुङक्या ङीक्कार कोन्ज्योइ तोःङ्ला ताःक्पा एःके, ओःले खुङक्याइ प्रभु कोन्ज्योइ थाम्जेर आज्ञाक्या ओःले ठीमक्या ङीःन्गुके। 7खुङक्याइदी पीःजाक्या म्याःके चीलेलाःना एलीशीबा पीःजा केमीःखुन्दी काःल्दी एःके, ओःले खुङक्या माःङ्बुरा काःपु काःमु काःल्दी एःके।
8थाङ्मा चीग जकरीया राःङगीइ छोबाइ पालोला कोन्ज्योइ मन्दीरला पुजाहारीइ लेःगा पेःदेरा एःके। 9पुजाहारीइ ठीम च्योःङ्राले चीट्ठा लुगासुना कोन्ज्योइ वेदीला साङ च्युगेन लेःगा जकरीयाइ ज्योर्ती एःके। 10साङ च्युगेन तीःजीला माःङ्बुरा मीःक्याइ पोर्चोम फीला प्रार्थना पेःदेरा एःके। 11ओःजेरा तीःजीला प्रभु कोन्ज्योइ स्वर्गदुत साङ च्युगेन वेदीइ च्याःबुछ्योले लाःङ्दी तेःक्योक थोङ्सी। 12स्वर्गदुतला थोङ्दी जकरीया जीबाइ हालेसी। 13इःनाङ स्वर्गदुतकीइ खुङला लाःसी, “ए जकरीया, ख्या माःजी, कोन्ज्योइ ख्याइ वासी कोःदी एः। ख्याइ पेःमे एलीशीबाइ पुः चीःग केगेन एः। ख्याइ खुङगीइ मीःन युहन्ना ज्यो। 14ओः तेःकासु ख्याला केःदाङ ओःले खाम्साङ्बु ओःङेन एः ओःले माःङ्बुरा मीःक्याङ खुङगीइ केबुला केःदाङ पेःगेन एः, 15चीलेलाःना खुङ कोन्ज्योइ तोःङ्ला छ्योम्बो मीः ओःङेन एः। खुङगीइ अङ्गुरकीइ नीःङ्गार ओःले राःङ्सा डुइ आराक मीःथुङेन एः, ओःले राःङगीइ आमाइ टोःपाला एःकासुनारा खुङ चाङ्मा लाइ काःङेन एः। 16खुङगीइ इस्राएली क्युःपाइ माःङ्बुरा मीःक्याला प्रभु कोन्ज्योछ्योले लोगेन एः। 17खुङगीइ मीःलीला ओःले ल्हेला एलीया च्योःङ्रा प्रभुइ तोःङ्ला ओःङ्दी खुङगीइ लाःम जोगेन एः। खुङगीइ आबाक्याइ सेम पुःपोःमोक्याछ्योले लोगेन एः ओःले कोन्ज्योला मीःनीङेनक्याला ताःक्पाक्याइ नावाछ्योले लोगेन एः। एःन्डुले खुङगीइ मीःक्याला प्रभुइ लागी तयार जोगेन एः।”
18जकरीयाइ स्वर्गदुतला लाःसी, “दीखो ताम तेःन्दामरा इःङे लाःती ङाःइ काःन्डुले छोर्चे? ङाः काःपु काःल्सीःङ्दी एः ओःले ङाःइ पेःमेङ काःमु काःल्सीःङ्दी एः।” 19स्वर्गदुतकीइ लेःन लोदी लाःसी, “ङाः गाब्रीएल इःङे, ङाः कोन्ज्यो ङीमु तेःकुए। खुङगीइरा ङाःला ख्या ङीमु ताम लाःचेला ओःले दीखो याःबु लेःङ्गो लाःचेला ताङ्क्योक इःङे। 20ङाःइ लाःक्योक ताम राःङगीइ तीःनामला छाङेन एः। इःनाङ ङाःइ लाःक्योक तामला ख्याइ सेमल्हुक मालुक्योक सोङ्गारा दीखो ताम माःकालथुप ख्याइ के मेःथेङेन एः।”
21कोन्ज्योइ मन्दीरकीइ फीला इल्दोकला मीःक्या जकरीयाला कुःदी तेःती एःके ओःले जकरीयाइ चीले कुःल्बु पेःबा लाःती मीःक्या याःमाछाक नेती एःके। 22जकरीया फीला ओःङ्गासुना खुङ मीःक्याइ ङीमु ताम लाःमाःखु। ओःले खुङक्याइ जकरीयाइ कोन्ज्योइ मन्दीर नाःङ्ला दर्शन थोङ्दुबा लाःती छोर्सी। खुङगीइ ताम लाःमाःखुगारा ओः मीःक्याला लाःक्पाइ लाःदाप पेःसी।
23खुङगीइ पुजा पेःगेन पालो सीःङ्मीःजीक खुङ खीमला काःल्सी। 24चीङ ङीःमा तीङ्लारा खुङगीइ पेःमे एलीशीबा जुबु ङीःपाक काःल्सी। ओः तीङ्ला खुङगीइ पेःमे दावा ङाःथुप काःलाङ माःकाःल्बा खीमलारा तेःसी, ओःले एःन्डु लाःसी, 25“प्रभुइ ङाःला नीङ च्योःदी एः, चीलेलाःना पुःपोःमो मेकेगेन्दी लाःकेन ङाःइ मीःन खुङगीइ तेङ्तेर्ती एः।”
येशुइ केबुइ बारेला लाःक्योक
26एलीशीबा जुबु ङीःपाक काःल्क्योक दावा टुःक डोगासुना कोन्ज्योइ गाब्रीएल स्वर्गदुतला गालील क्षेत्रइ नासरत लाःकेन क्याःसाला ताङ्सी। 27खुङ मेःन्दा चीग कन्या पेःन्पीःजासाःला काःल्दी ओःखोइ याःर्का क्याःप्केन ताम दाऊदकीइ छार्क्युफुर्क्युइ मेःन्दा चीग योसेफ लाःकेन मीः ङीमु टीसीःङ्दी एःके। ओः पेःन्पीःजाइ मीःन मरीयम एःके।
28ओः स्वर्गदुत ओः पेःन्पीःजासाःला काःल्सी ओःले लाःसी, “टासीदेले! प्रभु कोन्ज्योइ ख्याला माःङ्बुरा सेम थेती एः। खुङ ख्या ङीमु एः।” 29स्वर्गदुतकीइ लाःक्योक तामगीइ खुङ हालेःसी ओःले स्वर्गदुतकीइ ची लाःचे छोल्क्योक इःन्स्वाँ लाःती ठीवा साल्गाला स्युःसी। 30ओःले स्वर्गदुतकीइ लाःसी, “मरीयम, माःजी, कोन्ज्योइ ख्याला माःङ्बुरा नीङ च्योःदी एः। 31ताः कोःदो, ख्या जुबु ङीःपाक ओःङेन एः ओःले पुः चीग केगेन एः। ओः पुःइ मीःन येशु ज्योः। 32खुङ छ्योम्बो मीः ओःङेन एः ओःले खुङला थाम्जेर भन्दा छ्योम्बो कोन्ज्योइ पुः लाःकेन एः। प्रभु कोन्ज्योइ खुङला खुङगीइ फामा दाऊद च्योःङ्रारा क्याःल्बु जोगेन एः। 33ओःले खुङगीइ इस्राएलखाला तेन्दुइ लागी क्याःल्खाप पेःगेन एः, ओःले खुङगीइ क्याःल्खाप नाःमाङ मीःसीःङेन एः।” 34दीखो कोःदी मरीयमगीइ स्वर्गदुतला लाःसी, “ङाः कन्यारा एः, ओःले दीखो काःन्डुले ओःङ्गुबा?” 35स्वर्गदुतकीइ लाःसी, “कोन्ज्योइ चाङ्मा ला ख्याखाला ओःङेन एः, ओःले प्रभु कोन्ज्योइ ल्हेइ टीःप्सुक ख्याखाला लेप्केन एः। ओः सोङ्गारा, केगेन पीःजाला चाङ्मा ओःले कोन्ज्योइ पुः लाःती लाःकेन एः। 36फीर्च्या कोःदो, ख्याइ छ्योरी एलीशीबा काःमु काःल्दी एःनाङ खुङ जुबु ङीःपाक काःल्दी एः। मीःक्याइ खुङला पीःजा केमीःखुन्दी लाःनाङ खुङगीइ टोःपाला दावा टुःककीइ पुः एः। 37चीलेलाःना कोन्ज्योइ पेःमीःखुन ताम चीङ म्याः।” 38ओःले मरीयमगीइ लाःसी, “तादो, ङाः प्रभु कोन्ज्योइ लाबु इःङे, ख्याइ लाःक्योक च्योःङ्रारा ङाःला काःल्ज्युक।” ओःले ओः स्वर्गदुतकीइ खुङला पोःर्ती काःल्सी।
मरीयम एलीशीबाला फ्रेकाला काःल्क्योक
39चीङ ङीःमा तीङ्ला मरीयम गेबु गेबु यहुदीया क्षेत्रला एःक्योक काःङ्गीइ युःल चीगला काःल्सी। 40ओःला खुङ जकरीयाइ खीम नाःङ्ला काःल्दी एलीशीबाला टासीदेले लाःसी। 41मरीयमगीइ दीखो लाःक्योक कोःसुनारा एलीशीबाइ टोःपाला एःक्योक पीःजा फीर्काला स्युःसी, ओःले एलीशीबा चाङ्मा लाइ काःङ्सी।
42ओःले खुङगीइ छ्योम्बो के तेङ्दी लाःसी, “पेःन्पीःजाक्या नाःङ्ला ख्याइ काःजे मोलाम ज्योर्ती एः, ओःले ख्यालाःम्ले केगेन पीःजाइ काःजे मोलाम ज्योर्ती एः! 43ङाःला कोन्ज्योइ एःन्डुबा नीङ च्योःदी एः की ङाःइ प्रभुइ आमाङ ङाः च्योःङ्राला फ्रेकाला ओःङ्दी एः। 44ख्याइ ङाःला टासीदेले लाःसुना ङाःइ टोःपाला एःक्योक पीःजा केःदाङगीइ फीर्सी।
45प्रभु कोन्ज्योइ ख्याला लाःक्योक ताम ओःङ्गुए लाःती सेमल्हुक लुगेन्दी ख्याइ काःजे मोलाम ज्योर्ती एः!”
मरीयमगीइ प्रशंसाइ लु
46ओःले मरीयमगीइ लाःसी,
“ङाःइ सेमगीइ प्रभु कोन्ज्योइदी प्रशंसा पेःउए
47ओःले ङाःइ लाइ ङाःला थार्च्युगेन्दी कोन्ज्यो ङीमु केःदाङ पेःउए।
48चीलेलाःना खुङगीइ ङाः च्योःङ्रा याङ्छाबु लाबुलाङ नीङ च्योःदी एः।
ताःमीःजीक थाम्जेर मीःक्याइ ङाःला मोलाम ज्योर्क्योक लाःकेन एः।
49चीलेलाःना छ्योम्बो ल्हे एःक्योक कोन्ज्योइ ङाःइ लागी छ्योम्बो लेःगा पेःतेर्ती एः।
खुङगीइ मीःन चाङ्मा एः।
50ओःले खुङला जीबा पेःगेन थाम्जेर मीःक्याला खुङगीइ नीङ च्योःउए।
51खुङगीइ लाःक्पाइ छ्योम्बो ल्हेइ लेःगा पेःदी एः। खोक्नाकक्याला खुङगीइ थार्साम-थुर्सुम जोदी एः।
52खुङगीइ छ्योम्बो ल्हे एःक्योक क्याःल्बुक्याला छेसालाःम्ले पाप्ती एः,
इःनाङ याङ्छाबुक्याला खुङगीइ चोला क्यादी एः।
53खुङगीइ तोःपा तोक्योकक्याला याःबु स्याःक्या तेर्ती डाङ्च्युदी एः,
इःनाङ खुङगीइ छ्युक्पुक्यालादी तोङ्राङ लाःक्पा लोताङ्दी एः।
54कोन्ज्योइ नीङ च्योःगेन ताःम्ज्या पेःक्योक टेःम्बा साल्दी
खुङगीइ राःङगीइ लाबु इस्राएलला रोः पेःदी एः।
55ओःले खुङगीइ अब्राहाम ओःले अब्राहामगीइ छार्क्युफुर्क्युक्याला
तेन्दुइ लागी नीङ च्योःदी एः।”
56मरीयम एलीशीबा ङीमु दावा सुम जे तेःसी ओःले खुङ खीमला लोःसी।
बप्तीस्मा तेर्केन्दी युहन्ना केक्योक
57ताः एलीशीबाइ पीःजा केगेन्दी ङीःमा ओःङ्सी ओःले खुङगीइ पुः केसी। 58प्रभु कोन्ज्योइ खुङला एःजे माःङ्बु नीङ च्योःक्योक थोङ्दी खुङगीइ छ्योरीक्या ओःले टोःङ्रीक्या खुङ ङीमु केःदाङ पेःसी। 59पीःजा ङीःमा केः लेप्मीःजीक खुङगीइ खतना पेःजेला थाम्जेर टोःङ्रीक्या ओःले छ्योरीक्या ओःङ्सी, ओःले खुङगीइ मीःन खुङगीइ आबाइ मीःन च्योःङ्रारा जकरीया ज्याजे छोल्दी एःके। 60इःनाङ खुङगीइ आमाइ लाःसी, “मीःङे, दीखोइ मीःन नी युहन्ना ज्याकोः।” 61खुङक्याइ एलीशीबाला लाःसी, “ख्याइ छ्योरीक्या नाःङ्ला नी एःन्डुबा मीःन एःक्योक सुङ म्याः।” 62ओः सोङ्गारा, खुङक्याइ पीःजाइ आबाला पीःजाइ मीःन ची ज्यागेन्दी लाःती लाःक्पाइ लाःदाप पेःसी। 63खुङगीइ प्रुःगेन पाटी चीग लाङ्सी ओःले “दीखोइ मीःन युहन्नारा ज्याकोः” लाःती प्रुःतेर्सी। खुङक्या थाम्जेर याःमाछाक्का काःल्सी। 64ओः तेःकासुरा खुङगीइ के थेङ्सी ओःले खुङ ताम लाःकाला स्युःसी ओःले खुङगीइ कोन्ज्योइ प्रशंसा पेःगाला स्युःसी। 65दी थाम्जेर थोङ्दी टोःङ्रीक्या याःमाछाक्का काःल्देरा कोन्ज्योला जीबा पेःसी। ओः तीङ्ला दी तामक्याइ बारेला यहुदीया क्षेत्रइ काःङछ्योइ युःलक्याला टाःम्सी। 66एःन्डुबा ताम कोःगेनक्या थाम्जेरकीइ सेम सेमलारा लाःसी, “दीखो पीःजा तीङ्ला काःन्डुबा ओःङ्गुस्वाँ?” चीलेलाःना प्रभु कोन्ज्योइ ल्हे खुङ ङीमु एःके।
जकरीयाइ प्रशंसाइ लु
67युहन्नाइ आबा जकरीया चाङ्मा लाइ काःङ्सी ओःले कोन्ज्योलाःम्ले लेःङ्गो लाःकाला स्युःसी,
68“इस्राएलगीइ प्रभु कोन्ज्योइदी प्रशंसा काःल्ज्युक,
चीलेलाःना खुङ राःङगीइ मीःक्याला थार्च्युजेला ओःङ्दी एः।
69खुङगीइ उःइ लागी राःङगीइ लाबु दाऊदकीइ छार्क्युफुर्क्युलाःम्ले
मेःन्दा चीग छ्योम्बो ल्हे एःक्योक थार्च्युगेन्दी ताङ्दी एः।
70-71खुङगीइ उःला उःइ टाःलाङगीइ लाःक्पालाःम्ले
ओःले उःला हेला पेःगेनक्याइ लाःक्पालाःम्ले थार्च्युगेन एः
लाःकेन ताम राःङगीइ लेःङ्गो तेर्केन्दी चाङ्मा मीःक्यालाःम्ले ताःम्ज्या पेःसीःङ्दी एःके।
72खुङगीइ उःइ फाफामुक्या ङीमु पेःक्योक चाङ्मा ताःम्ज्या टेःम्बा साल्दी
उःला नीङ च्योःदी एः।
73ओः ताःम्ज्या खुङगीइ उःइ फामा अब्राहाम ङीमु पेःदी
74उःला टाःलाङगीइ लाःक्पालाःम्ले थार्च्युजेला, ओःले जीबा माःबेबा
75उःइ थाम्जेर ज्याथुपरा चाङ्मा पेःदी ओःले ताःक्पा पेःदी खुङगीइ मेःबा पेःच्युजेला ओः ताःम्ज्या पेःदी एःके।”
76“ए ङाःइ पुः, ख्याला थाम्जेर भन्दा छ्योम्बो कोन्ज्योइ लेःङ्गो तेर्केन्दी लाःकेन एः।
चीलेलाःना ख्या प्रभुइ लाःम तयार जोजेला खुङगीइ तोःङ तोःङ्ला डोगेन एः।
77ओःले ख्याइ प्रभुइ मीःक्याला लाःयोलाःम्ले क्षमा ज्योर्तीमाराङ थार्चे ज्योर्केन एः लाःती लोप्केन एः। 78चीलेलाःना उःइ कोन्ज्यो नीङ च्योःगेन्दी ओःले च्याःम्बु पेःगेन्दी इःङे।
ओः सोङ्गारा, खुङगीइ थार्पाइ साङ्बु नाःम्खालीङलाःम्ले उःसाःला ताङेन एः
79ओःले नाक्जुकला तेःकेन्दीक्या ओःले सीजेइ जीबाला तेःकेन्दीक्याला साङ्बु तेर्केन एः,
ओःले ओः साङ्बुइ उःइ काङ्बा खाम्साङ्बुइ लाःमला खेर्केन एः।”
80ओःले ओः पीःजा जुबुला छार्तेरा ओःले लाला राःम्बु काःल्देरा काःल्सी ओःले इस्राएलीक्याइ कील्ला प्रचार पेःगाला माःस्युःथुप खुङ उजाड ठाउँलारा तेःसी।
Currently Selected:
लुका 1: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
