लुका 21
21
मोःराङ्मुइ फुल्क्योक भेटी
(मर्कुस १२:४१-४४)
1कोन्ज्योइ मन्दीरकीइ छुरफारला येशुइ तागासुना छ्युक्पु मीःक्याइ कोन्ज्योइ मन्दीरकीइ एःन लुगेन काःमला भेटी लुदेरा पेःक्योक थोङ्सी। 2खुङगीइ मेःन्दा चीग प्राङ्ना मोःराङ्मुइयाङ साःङ्गीइ छ्यामे टाङ्गा ङी डेबा लुक्योक थोङ्सी। 3दीखो थोङ्दी येशुइ लाःसी, “तेःन्दामरा ङाः ख्याक्याला लाःके, दी प्राङ्ना मोःराङ्मुइ राःङ्सा थाम्जेरकीइ भन्दा माःङ्बु भेटी लुदी एः। 4चीलेलाःना राःङ्साक्याइ नी राःङगीइ ल्हाक्योक नोःरलाःम्ले तीबी चीग लुदी एः, इःनाङ दी मोःराङ्मुदी प्राङ्ना एःनाङ राःङगीइ साःदी सेन्कोःन नोःरलाःम्ले थाम्जेर लुदी एः।”
कोन्ज्योइ मन्दीर रोःम्गेन एः लाःती येशुइ लाःक्योक
(मत्ती २४:१-१४; मर्कुस १३:१-१३)
5चीङ योबाक्याइ कोन्ज्योइ मन्दीरकीइ याःबु याःबु तोःक्या ओःले मीःक्याइ कोन्ज्योला फुल्क्योक भेटीक्याइ बारेला ताम लाःकाला स्युःसी। येशुइ खुङक्याला लाःसी, 6“एःन्डुबा तीःनाम ओःङेन एः, ओः तीःनामला ताःसे ख्याक्याइ थोङ्क्योक दी कोन्ज्योइ मन्दीरकीइ तोः चीगखाला राःङ्सा तोःचीगकाङ मीःलीकेन एः, थाम्जेर रोःम्ङेन एः।”
7खुङक्याइ टीःसी, “लोबेन, दी थाम्जेर नाःम ओःङेन एःपा? ओःले एःन्डुबा ओःङ्जे छोल्गेन तीःनामगीइ चुःन्डुलदी ची ओःङ्गुबा ले?” 8येशुइ लाःसी, “च्यागाताःक्पु पेःदो, ख्योक्याला सुइयाङ स्योप माःक्युःर्च्युक, चीलेलाःना माःङ्बुरा मीःक्या ङाःइ मीःनला ‘ख्रीष्ट ङाःरा इःङे’ लाःतेरा ओःङेन एः ओःले ‘तीःनाम ओःङ्दी एः’ लाःकेन एः, फीर्च्या खुङक्याइ तीङ्ला माःन्डो। 9ओःले माकक्या ओःले सीःन्दाक्या कोःदी माःजी, सीःङ्जे तोःङ्ला ओः थाम्जेर तामक्या ओःङ्रा कोःउए। इःनाङ ओः तेःकासुरा नी जाम्बुलीङ मीःसीःङेन एः।”
10ओःले येशुइ लाःसी, “देश देशकीइ कील्ला ठुक्पा ओःङेन एः, क्याःल्खाप चीगकीइ राःङ्सा क्याःल्खापला माक क्याःप्केन एः। 11छ्योम्बो छ्योम्बो सायुक्या डोगेन एः, माःङ्बुरा ठाउँक्याला मुःगी क्याःप्केन एः, छ्योम्बो छ्योम्बो नाःजाक्या क्याःप्केन एः ओःले नाम्सार्गाला जीबा लाःङ्जे च्योःङ्रा ओःले याःमाछाककीइ चुःन्डुलक्या थोङेन एः।
12इःनाङ दी थाम्जेर तामक्या ओःङ्जे तोःङ्ला मीःक्याइ ख्योक्याला जुम्ङेन एः ओःले तुःक्पु तेर्केन एः, ओःले ख्योक्याला यहुदीक्याइ जोम्साखीमक्याला माःताक्पा च्याःङ्जेला खेर्तेर्केन एः ओःले चेङाङला लुगेन एः। ङाःइ मीःनगीइ पेःसुना ख्योक्याला क्याःल्बु ओःले हाकीमक्याइ तोःङ्ला लाःङ्च्युगेन एः। 13ओःखो ख्योक्याला ङाःइ बारेला लाःकेन मौका ओःङेन एः। 14ओःले ख्योक्या थार्चेला ची लाःकोःउबा लाःती तोःङ्लारा तुःङाल माःबे। 15चीलेलाःना ख्योक्याइ लाःकोःन ताम ओःले नावा ङाः ख्योक्याला तेर्के ओःले ख्योक्याला माःरीक्पा पेःगेनक्याइ ख्योक्याइ लाःक्योक तामला टाः पेःमीःखुगेन एः। 16राःङगीइ आबा आमा, आतानोः, छ्योरीक्या ओःले रोःक्याइयाङ ख्योक्याला जुम्दी तेर्केन एः ओःले ख्योक्या लाःलेइला नी खुङक्याइ सेचेला तेर्केन एः। 17ङाःइ पेःसुना थाम्जेरकीइ ख्याक्याला ङ्याप्च्युक पेःगेन एः। 18इःनाङ खुङक्याइ ख्योक्याइ गोइ टा चीगकाङ पोमीःखुगेन एः। 19ख्याक्या ङाःला सेमल्हुक लुदी तेः ओःले ख्याक्याइ नाःमाङ मीसीगेन मीःली ज्योर्केन एः।
यरुशलेम सीःङ्दा चेकेन एः लाःती येशुइ लाःक्योक
(मत्ती २४:१५-२१; मर्कुस १३:१४-१९)
20ओःले ख्याक्याइ नाःम यरुशलेमला थेक्याइ पीःल तुम्क्योक थोङ्सी लाःना ताः दीखो क्याःसाइ सीःङ्दा ओःङेन तीःनाम ओःङ्सी लाःती ख्याक्याइ सेदो। 21ओः तेःकासु यहुदीया क्षेत्रला एःकेनक्या काःङछ्योले छ्योङ्ज्युक, क्याःसा नाःङ्ला एःकेनक्या क्याःसा पोःर्च्युक ओःले युःलक्याला एःकेनक्या क्याःसाला माःस्युःज्युक। 22चीलेलाःना ओः सजाय ज्योर्केन ङीःमाक्याला छ्येइ पेज्याला प्रुःक्योक थाम्जेर ताम छाङेन एः। 23ओः ङीःमाक्याला जुबु ङीःपाक काःल्क्योक पेःन्पीःजाक्या ओःले पीःजाक्याला ओःमा थुङ्च्युगेन पेःन्पीःजाक्याला छ्योम्बो काःबु ओःङेन एः। देशकाःङरा जीबा लाःङ्जेराःरा तुःक्पु ओःङेन एः ओःले कोन्ज्योइ दण्ड दी मीःक्याखाला लेप्केन एः। 24खुङक्या लाःलेइला तरवारकीइ तुप्ती सेकेन एः, ओःले लाःलेइला कैदी जोदी देश देशक्याला खेर्केन एः। ओःले राःङ्सा क्युःपाइ मीःक्याइ तीःनाम माःसीःङथुप खुङक्याइ यरुशलेमला माःइबाले शासन पेःदी ज्यागेन एः।
मीःइ पुः ओःङेन ङीःमाक्या
(मत्ती २४:२९-३१; मर्कुस १३:२४-२७)
25ङीःमा, दागार्मु ओःले कार्माक्याला याःमाछाककीइ चुःन्डुलक्या थोङेन एः। चाङ्बु केताङ्क्योक ओःले छ्योम्बो छ्योम्बो छालक्याइ पेःगासुना जाम्बुलीङला थाम्जेर राःङ्सा क्युःपाइ मीःक्या माःङ्बुरा जीबा ओःले तुःङाल पेःगेन एः। 26जाम्बुलीङला ओःङेन तामक्याइ जीबाइ मीःक्याइ ला तोर्केन एः चीलेलाःना नाम्सार्गाइ थाम्जेर ल्हेक्याला कोन्ज्योइ दार्च्युगेन एः। 27ओः तीङ्ला ङाः मीःइ पुःला मुक्पाला छ्योम्बो ल्हे ओःले महीमाला ओःङ्देरा पेःक्योक मीःक्याइ थोङेन एः। 28दीखो तामक्या डोगाला स्युःमीःजीक लोःङ ओःले राःङगीइ गो क्यादी याःरला तादो, चीलेलाःना ख्याक्याला गेबुरा थार्च्युगेन एः।”
नेभाराइ तोःङ्बोलाःम्ले सेकोःन ताम
(मत्ती २४:३२-३५; मर्कुस १३:२८-३१)
29ओःले येशुइ खुङक्याला दीखो पेदाम लाःसी, “नेःभाराइ तोःङ्बो ओःले राःङ्सा थाम्जेर तोःङ्बोक्याला तादो, 30ओःखोक्याला लाःप्ती बुगाला स्युःमीःजीक ख्याक्याइ यार्खुङ ओःङ्जेरा छोल्दु लाःती छोर्कुए। 31ओःन्डुलेरा ङाःइ लाःक्योकदी थाम्जेर तामक्या काःल्देरा पेःक्योक थोङ्गासुना कोन्ज्योइ क्याःल्खाप ओःङ्जेरा छोल्दु लाःती ख्याक्याइ छोर्केन एः। 32तेःन्दामरा ङाः ख्याक्याला लाःके, दी थाम्जेर ताम माःछाङनथुप दी तीःनामगीइ मीःक्या मीसीगेन एः। 33नाम्सार्गा रा जाम्बुलीङ सीःङेन एः, इःनाङ ङाःइ लाःक्योक तामक्या नाःमाङ मीःसीःङेन एः।
च्यागाताःक्पु पेःदो
34च्यागाताःक्पु पेःदी तेः, माःङ्बु डेनज्याङ पेःगेन्दी माःबे, थुङेन्दी जीगेन्दी माःबे ओःले मीःलीइ तुःङाल माःबे। मीःङे लाःना नी ओः ङीःमा ख्याक्याखाला एक्कासी जीङ्थाक च्योःङ्रा पेःदी ओःङ्डो। 35चीलेलाःना दीखो जाम्बुलीङला तेःकेन थाम्जेर मीःक्याला ओःन्डुबारा ओःङेन एः। 36ओः सोङ्गारा, च्यागाताःक्पु पेःदी तेः, ओः थाम्जेर काःल्जे छोल्क्योक जीबा लाःङ्जे च्योःङ्रा तामक्यालाःम्ले सेन्जेला ओःले ङाः मीःइ पुःइ तोःङ्ला लाःङ्जेला लेःइ लागी कोन्ज्यो ङीमु तेन्दुरा प्रार्थना पेःदो।” 37ओः ङीःमाक्याला येशुइ छाकालला कोन्ज्योइ मन्दीरला ताम लोप्कुके ओःले कुःङ्मुदी क्याःसालाःम्ले थेङ्दी जैतुन काःङला तेःकाला डोउके। 38ओःले थाम्जेर मीःक्या ङामुरा कोन्ज्योइ मन्दीरला खुङगीइ लोप्क्योक ताम कोःजेला ओःङ्गुके।
Currently Selected:
लुका 21: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
