लुका 20
20
येशुइ आङ्ज्याइ बारेला टीःक्योक
(मत्ती २१:२३-२७; मर्कुस ११:२७-३३)
1ङीःमा चीग येशु कोन्ज्योइ मन्दीरला मीःक्याला लोप्तेरा एःके ओःले कोन्ज्योइ याःबु लेःङ्गो लाःतेरा एःके। ओः तेःकासु छेस्यो पुजाहारीक्या, छ्येइ ठीमगीइ लोबेनक्या ओःले छेस्यो मीःक्या डीक्ती खुङसाःला ओःङ्सी, 2ओःले खुङला टीःसी, “ङीःला लोःप, ख्याइ काःलाःम्ले आङ्ज्या ज्योर्ती दी लेःगाक्या पेःउबा? दीखो आङ्ज्या ख्याला सुइ तेर्पा?”
3येशुइ खुङक्याला लेःन लोदी लाःसी, “ङाःङ ख्याक्याला ताम चीग टीःगे। ङाःला लोःप ले, 4युहन्नाइ बप्तीस्मा तेर्केन आङ्ज्या काःलाःम्ले ज्योर्पा, कोन्ज्योलाःम्ले की मीःलाःम्ले?” 5खुङक्या नाःङ्लारा एःन्डुले ताम लाःकाला स्युःसी, “कोन्ज्योलाःम्ले लाःका लाःना ‘ख्याक्याइ चीले युहन्नाला सेमल्हुक मालुक्योक ले?’ लाःती खुङगीइ टीःउए। 6इःनाङ मीःलाःम्ले लाःका लाःना दी थाम्जेर मीःक्याइ उःला तोःइ क्याःप्ती सेकेन एः चीलेलाःना खुङक्याइ युहन्ना कोन्ज्योइ लेःङ्गो तेर्केन मीः एःके लाःती सेमल्हुक लुउए।” 7ओः सोङ्गारा, खुङक्याइ येशुला लाःसी, “ङीः मेसेए खुङगीइ सुलाःम्ले ज्योर्पा?” 8ओःले येशुइ लाःसी, “ओःन्डु एःना ङाःइ काःलाःम्ले आङ्ज्या ज्योर्तीमारा दी थाम्जेर लेःगा पेःदेरा एःपा, ङाःङ ख्याक्याला मेःलाःप।”
माःताक्पा कीसानक्याइ पेदाम
(मत्ती २१:३३-४६; मर्कुस १२:१-१२)
9ओः तीङ्ला येशुइ मीःक्याला दीखो पेदाम लाःसी, “मेःन्दा चीग मीःइ राःङगीइ सीःङ्ला अङ्गुर चुदी ओः अङ्गुर सीःङ कीसानक्याला पीमाला तेर्सी, ओःले माःङ्बुरा लोः राःङ्सा देशला काःल्दी तेःसी। 10अङ्गुर छेमीःजीक खुङगीइ मेःन्दा चीग लाबुला राःङगीइ बो लेःङ्गाला ओः कीसानक्यासाःला ताङ्सी। इःनाङ ओः कीसानक्याइ ओःखोला रोप्ती चीङ मातेर्पा लोताङ्सी। 11खुङगीइ फीर्च्या राःङ्सा लाबुला ताङ्सी। कीसानक्याइ खुङलाङ रोप्सी, ङोःछाबु जोसी ओःले तोङ्राङ लाःक्पा लोदी ताङ्सी। 12ओः तीङ्ला खुङगीइ राःङ्सा मेःन्दा चीग लाबुला ताङ्सी। ओःखोलाङ खुङक्याइ मागा जोदी क्युर्तेर्सी।
13ओःले ओः अङ्गुर सीःङगीइ तोःप्ताइ लाःसी, ‘ताः ङाः ची पेःजे? ङाः राःङगीइ च्याःम्बु पेःक्योक पुःला ताङे। ङाःइ पुःला नी खुङक्याइ सेःसा पेःडो।’ 14इःनाङ ओः कीसानक्याइ खुङला थोङ्दी खुङक्या एःन्डु लाःकाला स्युःसी, ‘दीखो नी सीःङगीइ तोःप्ताइ पुः इःङे। उः दीखोला सेका ओःले दीखोइ नोःर स्याःक्या उःइदीरा ओःङेन एः।’ 15ओःले खुङक्याइ ओः तोःप्ताइ पुःला अङ्गुर सीःङगीइ फीला टीःती खेर्सी ओःले सेसी। ताः ओः अङ्गुर सीःङगीइ तोःप्ताइ खुङक्याला ची पेःडो ले?
16खुङ राःङरा ओःङ्दी ओः माःताक्पा कीसानक्याला सेकेन एः ओःले राःङगीइ सीःङ राःङ्सा कीसानक्याला पीमा तेर्केन एः।” दीखो कोःदी मीःक्याइ लाःसी, “ओःन्डु नी नाःमाङ माःकाल्ज्युक!”
17ओःले येशुइ खुङक्याछ्योले तादी लाःसी, “ओःन्डु एःना छ्येइ पेज्याला प्रुःक्योक दी तामक्याइ लेःन ची इःङे ले?
‘खीम जोगेन्दीइ लेःगा म्याः लाःती क्युर्क्योक तोःरा
ओःखो तोःरा खीमगीइ चारकीइ मुल तोः काःल्सी।’#भजन ११८:२२
18ओः तोःखाला ताःप्केन्दी थाम्जेर केःती सीगेन एः, ओःले काःखो मीःखाला ओः तोः ताःक्पा, ओःखोइ ओः मीःला चाम्बा जोगेन एः।”
च्याल्गो च्याल्गेन्दी की मेच्याल्गेन्दी?
(मत्ती २२:१५-२२; मर्कुस १२:१३-१७)
19छ्येइ ठीमगीइ लोबेनक्या रा छेस्यो पुजाहारीक्याइ दी ताम खुङक्याइ वीरुद्धला लाःक्योक इःङे लाःती छोर्सी ओःले येशुला ओःलारा जुम्ङेन ठीवा चेसी, इःनाङ खुङक्या मीःक्या ङीमु जीबा पेःसी। 20ओः सोङ्गारा, खुङक्याइ येशुला जुम्जेला लाःम तागाला स्युःसी। खुङक्याइ मीःक्याला रेःमुक तेर्ती ताःक्पा मीः च्योःङ्रा पेःच्युसी ओःले येशुला जुम्जेला ताङ्सी। खुङक्याइ येशुइ ताम जुम्दी खुङला रोमी हाकीमगीइ आङ्ज्याला तेर्चे सेम पेःसी। 21ओः मीःक्या काःल्दी येशुला टीःसी, “ए लोबेन, ङीःला टेःम्बा एः ख्याइ लाःक्योक ताम ओःले ख्याइ लोप्क्योक डीक्पु एः। ख्याइ काःखोङ मीःला छ्योम्बो छ्यामे मेःबेए इःनाङ ख्याइ नी मीःक्याला कोन्ज्योइ तेःन्दामगीइ लाःम लोप्कुए। 22ताः लोःप, उःइ रोमी क्याःल्बु कैसरला च्याल्गो च्याल्जे डीक्पु एःपा की म्याःपा?” 23खुङक्या च्याङ्बु चाक्योक छोर्ती येशुइ खुङक्याला लाःसी, 24“ङाःला रोमी टाङ्गा डेबा चीग तेङ्दो ले। ओःला सुइ मीःन ओःले छेन्दा एःपा?” खुङक्याइ लाःसी, “कैसर क्याःल्बुइदी।” 25ओःले येशुइ लाःसी, “ओः सोङ्गारा, ची कैसरकीइदी इःङे ओःखो कैसरलारा तेर ओःले ची कोन्ज्योइदी इःङे ओःखो कोन्ज्योलारा तेर।” 26खुङक्याइ येशुला मीःक्याइ तोःङ्ला काःन्दीङ तामला जुम्माःखु ओःले खुङगीइ लेःन लोक्योक थोङ्दी खुङक्या याःमाछाक नेती खाजुम्बाले तेःसी।
सीक्योकलाःम्ले सेन्गेन्दीइ बारेला टीःक्योक
(मत्ती २२:२३-३३; मर्कुस १२:१८-२७)
27ओः तीङ्ला चीङ सदुकीक्या येशुसाःला ओःङ्सी। खुङक्याइदी मीःक्या सीमीःजीक फीर्च्या मेसेन एः लाःकुके। 28खुङक्याइ येशुला टीःसी, “ए लोबेन, मोशाइ उःला प्रुःतेर्क्योक ठीम च्योःङ्राले सुइदीङ आता पुःपोःमोरा माःकाःल्बा सीसी लाःना, आताइ लागी पुःपोःमो काःल्ज्युक लाःती नोःइ नामाला याःर्का क्याःप्कोःउए।#व्यवस्था २५:५-६ 29ताः मेःन्दा तीःन आतानोःक्या एःके। छेस्योइ याःर्का क्याःप्सी ओःले खुङ पीःजा माकेबारा सीसी। 30ओः सोङ्गारा, पाःर्पा नोःइ नामाला याःर्का क्याःप्सी, ओःले खुङाङ पीःजारा माकेबा सीसी। 31ओःले पाःर्केबा नोःइ नामाला याःर्का क्याःप्सी। ओःन्डुरा पेःदी ओः थाम्जेर मेःन्दा तीःनगीइ ओः नामाला याःर्का क्याःप्सी ओःलेङ पीःजारा माकेबा सीसी। 32तीङ्ला ओः पेःन्पीःजाङ सीसी। 33ओः सोङ्गारा, मीःक्या सीक्योकलाःम्ले सेन्गासुना ओः पेःन्पीःजा सुइ पेःमे ओःङ्गुबा? खुङला नी मेःन्दा तीःनगीइरा याःर्का क्याःप्ती एःके।”
34येशुइ खुङक्याला लेःन लोदी लाःसी, “दी जाम्बुलीङला एःक्योक मीःक्याइ याःर्का क्याःप्कुए। 35इःनाङ सीक्योकलाःम्ले सेन्दी तीङ्ला ओःङेन कोन्ज्योइ क्याःल्खापला डोजेला डीक्पु काःल्क्योक मीःक्याइ नी याःर्का मेःक्याःपए। 36खुङक्या फीर्च्या मीसीगेन एः चीलेलाःना खुङक्या स्वर्गदुत च्योःङ्रारा ओःङेन एः। खुङक्या सीमीःजीक फीर्च्या सेन्क्योक सोङ्गारा कोन्ज्योइ पुःपोःमोक्या इःङे। 37ओःले सीक्योकक्या सेन्गुए लाःकेन ताम मोशाइ याःबुले तेङ्तेर्सी। बार्ती तेःक्योक पुःङ्माइ पेदामला खुङगीइ प्रभु कोन्ज्योला ‘अब्राहामगीइ कोन्ज्यो, इसहाककीइ कोन्ज्यो ओःले याकुबकीइ कोन्ज्यो’#प्रस्थान ३:१-६ लाःती लाःसी। 38खुङ नी सीक्योकक्याइ कोन्ज्यो मीःङे, इःनाङ सोम्बोक्याइ कोन्ज्यो इःङे, चीलेलाःना थाम्जेर खुङगीइ लागीरा सोम्बो एः।” 39ओःले लाःले छ्येइ ठीमगीइ लोबेनक्याइ लाःसी, “लोबेन, ख्याइ डीक्पु लाःसी।” 40ओः तीङ्ला ओः मीःक्याइ खुङला राःङ्सा चीङ टीःजेला आ क्याःप्चे माःखु।
थार्च्युगेन ख्रीष्ट सुइ छार्क्युफुर्क्यु
(मत्ती २२:४१-४६; मर्कुस १२:३५-३७)
41येशुइ खुङक्याला टीःसी, “मीःक्याइ थार्च्युगेन ख्रीष्टला काःन्डुले दाऊदकीइ छार्क्युफुर्क्यु लाःकुबा? 42-43चीलेलाःना दाऊदकीइ प्रुःक्योक भजनगीइ पेज्याला राःङगीइरा एःन्डुले लाःती एः,
‘प्रभु कोन्ज्योइ#20:42-43 प्रभु कोन्ज्योइ दीला ग्रीक तामलादी प्रभु लाःती प्रुःदी एः। ङाःइ प्रभुला लाःसी:
ङाःइ ख्याइ टाःलाङक्याला ख्याइ काङ्बा वाःला माःख्योङथुप ख्या ङाःइ च्याःबु लाःक्पाछ्योले तेः।’#भजन ११०:१
44दाऊद राःङगीइरा ख्रीष्टला ‘प्रभु’ लाःमीःजीक काःन्डुले ख्रीष्टला दाऊदकीइ छार्क्युफुर्क्यु लाःकेन्दी?”
छ्येइ ठीमगीइ लोबेनक्या ङीमु च्यागाताःक्पु पेःदो
(मत्ती २३:१-३६; मर्कुस १२:३८-४०)
45ओःले थाम्जेर मीःक्याइ कोःदेरा एःकासुना येशुइ राःङगीइ योबाक्याला लाःसी, 46“छ्येइ ठीमगीइ लोबेनक्यालाःम्ले च्यागाताःक्पु पेःदी तेः। खुङक्या नी छेन्दी केःलाक्या#२०:४६ छेन्दी केःलाक्या दी केःलाक्यादी छ्येइ ठीमगीइ लोबेनक्याइ केःङेन रीःङ्बु छेन्दी केःलाक्या एःके। केःङ्दी छुरफार डोजे सेम थेकुए, छोङ्साला मीःक्याइ राःङला सेःसा पेःदी फ्या छाल्ज्युक लाःती सेम पेःउए ओःले यहुदीक्याइ जोम्साखीमक्याला ओःले डेनक्याला चोइ तेःसा छोल्गुए। 47खुङक्याइ नी मोःराङ्मुक्याइ खीमक्या फ्रोउए ओःले मीःला तेङ्जेला चीग्रा रीःङ्बु प्रार्थना पेःउए। ओःन्डुबाक्याइ माःङ्बु सजाय ज्योर्केन एः।”
Currently Selected:
लुका 20: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
