युहन्ना 2
2
काना क्याःसाला काःल्क्योक याःर्का
1नाङ च्योःङ्राइ ताम इःङे, गालील क्षेत्रइ काना युःलला याःर्का एःके। येशुइ आमा ओः याःर्काला काःल्दी एःके। 2येशु ओःले खुङगीइ योबाक्यालाङ ओः याःर्काला केःक्याःप्ती एःके।
3याःर्काला तेर्केन अङ्गुरकीइ नीःङ्गार सीःङ्क्योक सोङ्गारा येशुइ आमाइ खुङला लाःसी, “खुङक्या ङीमु अङ्गुरकीइ नीःङ्गार म्याः।” 4येशुइ खुङला लाःसी, “आःमा, ङाःइ ची पेःकोःन्दी ङाःला माःलाःप। ङाःइ तीःनाम ताःरुङथुप ओःङ्दी म्याः।” 5ओः तीङ्ला येशुइ आमाइ लाबुक्याला लाःसी, “येशुइ ची लाःपा ओःखोरा पेःदो।”
6ओः थामालारा तोःइ टुःकथाल छ्युगुमक्या एःके। ओःखोक्याला तेःमेइ क्याः रेः रेः लीटर छ्यु स्योङ्गुके। एःन्डुबा छ्युगुमक्यादी यहुदीक्याइ राःङला चाङ्मा जोगेन लेःगाला चालाइतीउके। 7येशुइ लाबुक्याला लाःसी, “छ्युगुमक्या छ्युइ काङ्दो।” खुङक्याइ छ्यगुमगीइ खाथुपरा छ्युइ काङ्तेर्सी।
8ओः तीङ्ला येशुइ खुङक्याला लाःसी, “दी तीबी चीग खेर्ती डेनगीइ नाइकेला खेर्ती तेर।” खुङक्याइ तीबी चीग खेर्ती खुङला तेर्सी। 9नाइकेइ छ्यु प्व्राः ताःगासुना नी ओःखो अङ्गुरकीइ नीःङ्गार काःल्सीःङ्दी एःके। इःनाङ ओः नीःङ्गार चीलाःम्ले जोदी एःके, ओः ताम खुङगीइ छोर्ती म्याःके। ओःखो नी ख्योङेन लाबुक्याइ चीग्रा छोर्ती एःके। ओः सोङ्गारा, डेनगीइ नाइके माःक्पा सेम्बाला केक्याःप्सी, 10ओःले लाःसी, “राःङसाक्याइ नी तोःङ्ला सीःम्बु नीःङ्गार थुङ्जे तेर्कुए ओःले डोम्बोक्याइ माःङ्बुरा थुङ्सीःङ्मीःजीक चीग्रा माःसीःम्बा नीङ्गार तेर्कुए, इःनाङ ख्याइ नी ताःसेथुप थाम्जेर भन्दा सीःम्बुदी ज्यादी दु।”
11खुङगीइ याःमाछाककीइ चुःन्डुलक्या नाःङ्ला दीखो तोःङ्गीइ चुःन्डुल इःङे। खुङगीइ दी चुःन्डुल गालीलगीइ काना क्याःसाला पेःसी। एःन्डुले खुङगीइ राःङगीइ महीमा प्रकट पेःसी, ओःले खुङगीइ योबाक्याइ खुङखाला सेमल्हुक लुसी। 12ओः तीङ्ला खुङ राःङगीइ आमा, नोःक्या ओःले योबाक्या ङीमु कफर्नहुम युःलला काःल्सी, ओःले चीङ ङीःमा ओःला तेःसी।
येशुइ कोन्ज्योइ मन्दीर चाङ्मा जोक्योक
(मत्ती २१:१२-१३; मर्कुस ११:१५-१७; लुका १९:४५-४६)
13यहुदीक्याइ नीस्तार मेःलीङ ओःङ्जे चाल्दी एःके। ओः तेःकासु येशु यरुशलेमला काःल्सी। 14खुङगीइ कोन्ज्योइ मन्दीरला लाङ, लुःक ओःले पुःर्कालीङ चोङेनक्या ओःले डेबा चेःगेनक्याइ छोङ पेःदेरा पेःक्योक फ्रेसी। 15दीखो थोङ्दी येशुइ थाक्पाक्यालाःम्ले कोर्रा जोसी ओःले ओःला एःक्योक थाम्जेर लाङक्याला ओःले लुःकक्याला कोन्ज्योइ मन्दीरलाःम्ले त्याःतेर्सी, ओःले डेबा चेःगेनक्याइ डेबा टाम्तेर्सी ओःले च्योर्तेनक्या रील्तेर्सी। 16पुःर्कालीङ चोङेनक्याला खुङगीइ लाःसी, “दीलाःम्ले दी थाम्जेरला खेर! ङाःइ आबाइ खीमला छोङ्साइ खीम माःजो!”
17खुङगीइ योबाक्याला छ्येइ पेज्याला प्रुःक्योक दी ताम टेःम्सुल काःल्सी, “ए कोन्ज्यो, ख्याइ खीमगीइ लागी ङाःइ जोस सेम नाःङ्ला मेः च्योःङ्रारा बार्ती एः।”#भजन ६९:९
18ओःले यहुदीक्याइ गोछेस्योक्याइ खुङला टीःसी, “ची ख्याला एःन्डुबा पेःगेन आङ्ज्या एःपा? ख्या ङीमु दी आङ्ज्या एः लाःती दास्यी तेर्चेला ची ख्याइ काःन्दीङ याःमाछाककीइ चुःन्डुल चीग तेङ्जे खुउबा?” 19येशुइ लाःसी, “दी मन्दीरला रोम्दो ओःले ङाः दीखोला ङीःमा सुमला फीर्च्या जोगे।” 20खुङक्याइ लाःसी, “ची ख्याइ ङीःमा सुमलारा जोजे खुउबा ले? दी मन्दीर जोजेला नी खाल ङी रा टुःक लोः लाग्तीदी एःके!”
21इःनाङ येशुइ लाःतेरा एःक्योक मन्दीरदी खुङगीइ राःङगीइ जुबुइ बारेला एःके। 22येशु सीक्योकलाःम्ले सोम्बो लोःमीःजीक खुङगीइ योबाक्याइ येशुइ लाःक्योक दी ताम टेःम्बा साल्सी। ओःले खुङक्याइ छ्येइ पेज्याला प्रुःक्योक ओःले येशुइ लाःक्योक तामला सेमल्हुक लुसी।
23येशु नीस्तार मेःलीङगीइ डेनगीइ तीःजीला यरुशलेमला एःकासुना, खुङगीइ पेःक्योक चुःन्डुलक्या थोङ्दी माःङ्बुरा मीःक्याइ खुङगीइ मीःनला सेमल्हुक लुसी। 24इःनाङ येशुइ खुङक्याखाला सेमल्हुक मालु, चीलेलाःना खुङगीइ थाम्जेर मीःक्याला याःबु पेःदी ङोःसेदी एःके। 25खुङगीइ मीःइ सेमगीइ ताम सेक्योक सोङ्गारा सुइयाङ खुङला मीःक्याइ बारेला लाःचेला आवश्याक म्याःके।
Currently Selected:
युहन्ना 2: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
