युहन्ना 1
1
कोन्ज्योइ वचन मीः काःल्क्योक
1थाम्जेर भन्दा तोःङ्ला वचन एःके। वचन कोन्ज्यो ङीमु एःके ओःले वचन कोन्ज्यो रा एःके। 2थाम्जेर जोजे तोःङ्ला खुङ कोन्ज्यो ङीमु एःके।
3वचनलाःम्लेरा कोन्ज्योइ थाम्जेर स्याःक्या जोसी। जोक्योक स्याःक्या नाःङ्ला खुङबीना चीगकाङ जोदी म्याःके। 4खुङला मीःली एःके, ओःले ओः मीःलीरा मीःक्याइ ज्योती एःके। 5ओः ज्योती नाक्जुकला स्यार्कुए। नाक्जुककीइ नाःमाङ ज्योतीला क्याःल्मीःखुए।
6कोन्ज्योइ ताङ्क्योक मेःराङ चीग मीः एःके, ओःखोइ मीःनदी युहन्ना#१:६ युहन्ना दी युहन्नादी दीखो छ्येइ पेज्या प्रुःगेन युहन्ना मीःङे, बप्तीस्मा तेर्केन युहन्ना इःङे। एःके। 7थाम्जेर मीःक्याइ ओः ज्योतीला ङोःसेज्युक ओःले सेमल्हुक लुज्युक लाःती कोन्ज्योइ खुङला ज्योतीइ बारेला लाःचेला ताङ्दी एःके। 8युहन्ना राःङरादी ओः ज्योती म्याःके, इःनाङ ओः ज्योतीला मीःक्याला ङोःसेच्युजेला खुङ ओःङ्दी एःके। 9थाम्जेर मीःक्याला तेःन्दामगीइ ताम तेङ्तेर्केन तेःन्दामगीइ ज्योती जाम्बुलीङला ओःङ्देरा एःके।
10खुङ जाम्बुलीङला एःके, जाम्बुलीङ खुङलाःम्लेरा जोसी, जोनाङ जाम्बुलीङगीइ मीःक्याइ खुङला ङोःमासे। 11खुङ राःङगीइ मीःक्यासाःलारा ओःङ्सी, इःनाङ खुङगीइ राःङगीइ मीःक्याइ खुङला ग्रहण माःबे। 12इःनाङ काःजेइ खुङला ग्रहण पेःबा ओःले खुङगीइ मीःनला सेमल्हुक लुबा, ओःखोक्याला खुङगीइ कोन्ज्योइ छार्क्युफुर्क्यु ओःङेन आङ्ज्या तेर्सी। 13खुङक्या ठालाःम्ले, जुबुइ सेमलाःम्ले, ओःले काःन्दीङ मीःइ सेमलाःम्ले मीःङे इःनाङ कोन्ज्यो राःङगीइरा खुङक्याला खुङगीइ छार्क्युफुर्क्यु जोक्योक इःङे।
14वचन मीः काःल्सी ओःले उःइ कील्ला तेःसी। खुङ अनुग्रह रा तेःन्दामगीइ काःङ्दी एःके। ङीःइ खुङगीइ छ्योम्बो महीमा थोङ्सी। दी महीमादी आबालाःम्ले ओःङ्क्योक चीग्रा चीग पुःइदी च्योःङ्रा एःके।
15युहन्नाइ खुङगीइ बारेला पाङ्बु तेर्तेरा छ्योम्बो केतेङ्दी लाःसी, “ङाःइ खुङगीइ बारेला लाःती एःके, ‘ङाः भन्दा तीङ्ला ओःङेन्दी खुङ ङाः भन्दा छ्योम्बो एः, चीलेलाःना खुङ ङाः भन्दा तोःङ्लारा एःके।’”
16खुङ ङीमु कोःकेन भन्दा माःङ्बुरा अनुग्रह एःक्योक सोङ्गारा उःइ माःङ्बु भन्दा माःङ्बु मोलाम ज्योर्ती एः। 17चीलेलाःना छ्येइ ठीम मोशालाःम्ले तेर्सी, इःनाङ अनुग्रह रा तेःन्दामदी येशु ख्रीष्टलाःम्ले ओःङ्सी। 18कोन्ज्योला सुइयाङ नाःमाङ थोङ्दी म्याः। आबा ङीमुरा एःकेन चीग्रा चीग पुःइरा, खुङ राःङ्रा कोन्ज्योङ इःङे लाःती खुङला तेङ्तेर्ती एः।
बप्तीस्मा तेर्केन युहन्नाइ तेर्क्योक लेःङ्गो
(मत्ती ३:१-१२; मर्कुस १:१-८; लुका ३:१-१८)
19यरुशलेमलाःम्ले यहुदीक्याइ पुजाहारीक्या ओःले लेबीक्याला युहन्नासाःला “ख्या सु इःङे?” लाःती टीःगाला ताङ्सी। 20खुङगीइ लेःन लोजेला इन्कार माःबे, इःनाङ थेकारा लाःसी, “ङाः थार्च्युगेन ख्रीष्ट मीःङे।”
21खुङक्याइ टीःसी, “ओःन्डु इःना ख्या सु इःङे ले? ची ख्या एलीया इःङे?”
युहन्नाइ लाःसी, “ङाः मीःङे।”
खुङक्याइ टीःसी, “ची ख्या मोशाइ लाःक्योक कोन्ज्योइ लेःङ्गो तेर्केन मीः इःङे ले?”
युहन्नाइ लेःन लोदी लाःसी, “मीःङे।”
22ओः सोङ्गारा, खुङक्याइ युहन्नाला फीर्च्या टीःसी, “ख्या सु इःङे? ङीःला लोःप ले, ङीःला ताङेनक्यासाःला ङीःइ लेःन खेर्कुए। ख्या राःङगीइ बारेलादी ची लाःकुबा ले?”
23युहन्नाइ लाःसी, “कोन्ज्योइ लेःङ्गो तेर्केन यशैयाइ लाःक्योक च्योःङ्रा ङाः ‘प्रभु ओःङेन लाःम तयार जोदो’#यशैया ४०:३ लाःती उजाड ठाउँला केताङेन के इःङे।”
24दी ताम टीःगाला ओःङ्क्योक मीःक्याला फारीसीक्याइ ताङ्दी एःके। 25खुङक्याइ युहन्नाला टीःसी, “ख्या ख्रीष्टाङ मीःङे, एलीयाङ मीःङे, ओः कोन्ज्योइ लेःङ्गो तेर्केन्दीङ मीःङे लाःना, चीले बप्तीस्मा तेर्कुबा ले?” 26युहन्नाइ लेःन लोदी लाःसी, “ङाः नी छ्युइ बप्तीस्मा तेर्कुए, इःनाङ ख्याक्याइ कील्ला ख्याक्याइ ङोःमासेक्योक मेःराङ चीग एः। 27ङाःइ भन्दा तीङ्ला ओःङेन्दी खुङरा इःङे। ङाः नी खुङगीइ लेखामगीइ टाःवा सीजेलाङ डीक्पु म्याः।”
28दी थाम्जेर ताम यर्दन लुःङ्बाइ फार्केनला युहन्नाइ बप्तीस्मा तेर्तेरा पेःक्योक ठाउँ बेथानीयाला काःल्दी एःके।
कोन्ज्योइ थुमा
29ङार्तो च्योःङ्रा येशुला राःङछ्योले ओःङ्देरा पेःक्योक थोङ्दी युहन्नाइ लाःसी, “तादो, थाम्जेर जाम्बुलीङला लाःयोलाःम्ले थार्च्युगेन कोन्ज्योइ थुमा! 30खुङगीइ बारेला ङाःइ लाःती एःके, ‘ङाःइ तीङ्ला मेःराङ चीग ओःङ्देरा एः, खुङ ङाः भन्दा छ्योम्बो एः चीलेलाःना खुङ ङाः भन्दा तोःङ्लारा एःके।’ 31तोःङ्ला ङाःइ खुङला ङोःसेदी म्याःके, इःनाङ खुङला इस्राएलीक्याइ कील्ला ङोः सेच्युजेलारा ङाः छ्युइ बप्तीस्मा तेर्तेरा ओःङ्क्योक इःङे।”
32युहन्नाइ एःन्डु लाःतेरा पाङ्बु तेर्सी, “ङाःइ चाङ्मा लाला तुःङकुःकुर च्योःङ्रा नाःम्खालीङलाःम्ले पाःप्ती ओःङ्दी खुङखाला तेःक्योक थोङ्सी। 33दी तोःङ्ला ङाःइ खुङला ङोःसेदी म्याःके, इःनाङ काःखोइ ङाःला छ्युइ बप्तीस्मा तेर लाःती ताङ्बा, खुङगीइरा ङाःला लाःसी, ‘काःखोखाला चाङ्मा ला पाःप्ती ओःङ्दी तेःक्योक थोङ्बा, चाङ्मा लाइ बप्तीस्मा तेर्केन्दीदी खुङरा इःङे।’ 34ङाःइ थोङ्दी एः ओःले खुङरा कोन्ज्योइ पुः इःङे लाःती पाङ्बु तेर्ती एः।”
येशुइ तोःङगीइ योबाक्या
35ङार्तो च्योःङ्रा फीर्च्या युहन्ना ओः ठाउँला राःङगीइ मेःराङ ङी योबाक्या ङीमु लाःङ्दी तेःती एःके। 36खुङगीइ येशुला डोदेरा पेःक्योक थोङ्दी लाःसी, “तादो, कोन्ज्योइ थुमा!” 37खुङगीइ लाःक्योक दी ताम कोःदी ओः मेःराङ ङी योबाक्या येशुइ तीङ्ला काःल्सी। 38येशुइ लोःदी तासी, ओःले खुङक्या राःङला ब्य्राङ्देरा ओःङ्क्योक थोङ्दी खुङक्याला टीःसी, “ख्याक्या ची चाल्देरा एःपा?” खुङक्याइ लाःसी, “लोबेन, ख्या काःला तेःकुबा?” 39येशुइ खुङक्याला लाःसी, “स्यो ओःङ्दी तादो।” खुङक्या येशु तेःकेन ठाउँला डोगासुना कुःङ्सेइ सीः बाज्तीसीःङ्दी एःके। ओःले खुङक्या ओः ङीःमु ओःलारा खुङ ङीमु तेःसी।
40युहन्नाइ लाःक्योक ताम कोःदी येशुला ब्य्राङेन ओः मेःराङ ङी नाःङ्ला मेःराङ चीग सीमोन पत्रुसकीइ नोः अन्द्रीयास एःके। 41खुङगीइ थाम्जेर भन्दा तोःङ्ला राःङगीइ नोः सीमोनला फ्रेसी, ओःले खुङला लाःसी, “ङीःइ मसीहला फ्रेती एः।” (“मसीह” लाःक्योकदी थार्च्युगेन ख्रीष्ट इःङे।) 42खुङगीइ सीमोनला येशुसाःला ख्योङ्सी। येशुइ खुङला तादी लाःसी, “ख्यो योआनेसकीइ पुः सीमोन इःङे, ख्योइ मीःन केफास (दीखो लाःक्योकदी पत्रुस इःङे।) लाःकेन एः।”
येशुइ फीलीप रा नथानेलला केक्याःप्क्योक
43ङार्तो च्योःङ्रा येशुइ गालील क्षेत्रला डोगेन ठीवा चेसी। खुङगीइ फीलीपला फ्रेसी ओःले खुङला लाःसी, “ङाःइ तीङ्ला स्यो।” 44अन्द्रीयास रा पत्रुस च्योःङ्रारा फीलीपाङ बेथसेदा क्याःसाइ मीः एःके। 45फीलीपकीइ नथानेलला फ्रेती लाःसी, “मोशाइ छ्येइ ठीमला ओःले कोन्ज्योइ लेःङ्गो तेर्केनक्याइयाङ प्रुःक्योक मीः उःइ फ्रेती एः। खुङ योसेफकीइ पुः नासरतकीइ येशु इःङे।”
46नथानेलगीइ खुङला लाःसी, “ची नासरतलाःम्ले चीङ याःबु ताम ओःङ्खुउबा ले?”
फीलीपकीइ खुङला लाःसी, “ओःङ्दी तादो।”
47येशुइ नथानेलला राःङसाःला ओःङ्देरा पेःक्योक थोङ्दी खुङगीइ नथानेलगीइ बारेला लाःसी, “तादो, खुङ तेःन्दामरा इस्राएली इःङे, खुङगीइ नाःमाङ स्योप मीःक्युःर्केन एः।”
48नथानेलगीइ येशुला टीःसी, “ख्याइ ङाःला काःन्डुले ङोःसेबा?”
येशुइ खुङला लाःसी, “फीलीपकीइ ख्याला केक्याःप्चे तोःङ्ला, नेभाराइ तोःङ्बो वाःला ङाःइ ख्योला थोङ्दी एःके।”
49नथनेलगीइ खुङला लाःसी, “लोबेन, ख्या कोन्ज्योइ पुः इःङे, ख्या इस्राएलीक्याइ क्याःल्बु इःङे!”
50येशुइ खुङला लाःसी, “ङाःइ ख्योला नेभाराइ तोःङ्बो वाःला थोङ्सी लाःक्योक सोङ्गारा ख्योइ सेमल्हुक लुक्योक इःङे? ख्याइ दी भन्दा ताःरुङ छ्योम्बो तामक्या थोङेन एः।” 51ओःले येशुइ खुङला लाःसी, “तेःन्दामरा, ङाः ख्याक्याला लाःके, ख्याक्याइ नाःम्खालीङ फ्याक्योक ओःले कोन्ज्योइ स्वर्गदुतक्या मीःइ पुःखाला जादेरा ओःले पाःप्तेरा पेःक्योक थोङेन एः।”
Currently Selected:
युहन्ना 1: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
