युहन्ना 11
11
लाजरस सीक्योक
1बेथानीया युःलला लाजरस मीःन पेःक्योक मीः नेःपा काःल्दी एःके। ओः युःलला मरीयम ओःले खुङगीइ आजी मार्था तेःकुके। 2दी मरीयमगीइरा येशुइ काङ्बाला तीङ्ला अत्तर टुःल्तेर्ती राःङगीइ टाइ काङ्बा फ्यातेर्ती एःके ओःले नेःपा काःल्क्योक लाजरसदी खुङगीइ नोः एःके। 3दी आजी ङीइ येशुसाःला एःन्डु लाःती लेःङ्गो ताङ्सी, “प्रभु, ख्याइ च्याःम्बु पेःक्योक रोः नेःपा एः।”
4इःनाङ दी लेःङ्गो कोःदी येशुइ लाःसी, “दी नेःपाइ खुङ मीसीगेन एः, इःनाङ कोन्ज्योइ महीमाइ लागी दी काःल्क्योक इःङे, ओःले दीलाःम्ले कोन्ज्योइ पुःइ महीमा ओःङेन एः।” 5येशुइ मार्था, खुङगीइ नोःमो मरीयम ओःले लाजरसला च्याःम्बु पेःउके। 6लाजरस नेःपा एः लाःक्योक कोःमीःजीक खुङ राःङ एःक्योक ठाउँला ताःरुङ ङीःमा ङी ओःलारा तेःसी। 7ओः तीङ्ला येशुइ योबाक्याला लाःसी, “ताः उः फीर्च्या यहुदीयाला लोःदी डोगा।”
8योबाक्याइ खुङला लाःसी, “लोबेन, चीङ ङीःमा तोःङ्ला चीग्रा ओःलाइ मीःक्याइ ख्याला तोःइ क्याःप्चे छोल्दी एःके, ओःले फीर्च्या ख्या ओःलारा डोगेन्दी?”
9येशुइ लाःसी, “ङीःमा चीगला घण्टा चीङ्ङी ओःङ्गुए, मीःङे ले? ङीःमाला डोगेन मीःला ङाःर्तोक मेःक्यापए चीलेलाःना खुङगीइ दी जाम्बुलीङगीइ ज्योती थोङ्गुए। 10इःनाङ कुङ्मु डोगेन्दीला ङाःर्तोक क्याःप्कुए चीलेलाःना ओः मीः ङीमु साङ्बु मेःयुङ एः।” 11ओः तीङ्ला येशुइ लाःसी, “उःइ रोः लाजरस ङीचु लोःदी एः, इःनाङ खुङला ङीलाःम्ले लाङ्जेला ङाः ओःला डोगे।”
12योबाक्याइ खुङला लाःसी, “प्रभु, खुङ ङीचु लोःदी एः लाःना नी खुङ टाःगेन एः।”
13येशुइ लाजरस सीसीःङ्दी एः लाःचे छोल्क्योक एःके, इःनाङ योबाक्याइदी लाजरस तेःन्दामरा ङीचु चीग्रा लोःदी एः लाःती टेःम्बा साल्दी एःके। 14ओः सोङ्गारा, येशुइ थेकारा लाःसी, “लाजरस सीसीःङ्दी एः। 15ख्याक्याइ माःङ्बु सेमल्हुक लुज्युक लाःती ङाः ओःला म्याःक्योकला ङाःला केःदाङ काःल्दी एः। ताः उः खुङसाःला डोगा।” 16ओःले जाँउले लाःकेन थोमाइ राःङगीइ योबा रोःक्याला लाःसी, “लोबेन ङीमुरा उःक्या थाम्जेर डोगा ओःले खुङ ङीमुरा सीगा।”
येशुइ लाजरसला सोम्बो लोक्योक
17येशु बेथनीयाला ओःङ्गासुना लाजरसला तुःर्साला ज्याक्योक ङीःमा सीः काःल्सीःङ्दी एःके। 18बेथानीया यरुशलेममीःजीक कीलोमीटर सुम जे थारीङ्बुला एःके। 19यहुदीया क्षेत्रालाःम्ले माःङ्बुरा मीःक्या मार्था ओःले मरीयमला नोः सीक्योककीइ तुःक्पुला सान्त्वना तेर्चेला ओःङ्दी एःके। 20येशु ओःङ्देरा एः लाःक्योक कोःदी मार्था खुङला लाःमरा फ्रेचेला काःल्सी, इःनाङ मरीयमदी खीमलारा तेःसी। 21येशुला फ्रेती मार्थाइ लाःसी, “प्रभु, ख्या दीला एःपा ना नी ङाःइ नोः सीजे म्याःके। 22इःनाङ ताःसेङ ख्याइ कोन्ज्योला ची लाङ्बा, ओःखो खुङगीइ ख्याला तेर्कुए लाःती ङाःइ सेदी एः।”
23येशुइ मार्थाला लाःसी, “ख्योइ नोः फीर्च्या सोम्बो लोःगेन एः।”
24मार्थाइ लाःसी, “इःङे प्रभु, अन्त्यइ ङीःमाला थाम्जेर सोम्बो लोःगासुना खुङ सोम्बो लोगेन एः लाःती ङाःइ सेदी एः।”
25येशुइ लाःसी, “सीक्योक्याला सोम्बो लोगेन्दी ओःले मीःली तेर्केन्दी ङाःरा इःङे। ङाःला सेमल्हुक लुगेनक्या सीनाङ खुङक्या सोम्बो लोःगेन एः।#११:२५ मीःक्याला सीक्योकलाःम्ले सोम्बो जोगेन्दी ओःले मीःक्याला मीःली तेर्केन्दी ङाःरा इःङे लाःती येशुइ लाःचे छोल्क्योक। 26ओःले ङाःला सेमल्हुक लुमीःजीक सेनक्योकक्या नाःमाङ मीसीगेन एः। ची ख्या दी तामला सेमल्हुक लुउबा?”
27मार्थाइ लाःसी, “इःङे प्रभु, ख्या जाम्बुलीङला ओःङेन कोन्ज्योइ पुः थार्च्युगेन ख्रीष्ट इःङे लाःती ङाः सेमल्हुक लुगे।”
28एःजे लाःमीःजीक मार्था काःल्सी ओःले राःङगीइ नोःमो मरीयमला खाजुम्माले केक्याःप्ती लाःसी, “लोबेन ओःङ्दी एः, ओःले खुङगीइ ख्योला केक्याःप्तेरा एः।” 29दी ताम कोःलुङ म्याःपा मरीयम याःरला लाःङ्सी ओःले खुङला फ्रेचेला काःल्सी। 30ओः तीःजी थुप येशु युःलला लेःप्ती म्याःके। खुङ मार्थाइ फ्रेक्योक ठाउँलारा एःके। 31खीमला मरीयमला सान्त्वना तेर्चेला ओःङ्क्योक यहुदीक्याइ खुङ गेबुरा लाःङ्दी फीला काःल्योक थोङ्दी, खुङ ओः तुःर्साला ङुःजेला काःल्क्योक इःङ्स्वाँ लाःती खुङगीइ तीङ्ला काःल्सी।
32मरीयम येशु एःक्योक ठाउँला लेप्मीःजीक खुङगीइ येशुला थोङ्सी ओःले खुङगीइ तोःङ्ला पीमु चुदी लाःसी, “प्रभु, ख्या दीला एःक्योक एःना नी ङाःइ नोः सीजे म्याःके।” 33मरीयम ङुःदी तेःती एःके ओःले खुङ ङीमु ओःङ्क्योक मीःक्याङ ङुःदेरा एःके। दीखो थोङ्दी येशुला सेम मीःजीकरा माःङ्बुरा तुःक्पु नेसी। 34येशुइ खुङक्याला टीःसी, “ख्याक्याइ खुङला काःला ज्यादी एःपा?” खुङक्याइ लाःसी, “प्रभु, ओःङ्दी तादो।” 35ओः तेःकासु येशुङ ङुःसी। 36ओः सोङ्गारा, मीःक्याइ लाःसी, “तादो, येशुइ खुङला काःजे च्याःम्बु पेःउके।” 37इःनाङ काँःदी-काँःदीइ लाःसी, “ची मी मेःथोङेन्दीला थोङेन्दी ज्योगेन्दी दीखोरा मीःङे ले? ची दीखोइ लाजरसला सीजेलाःम्ले थार्च्युजे मीःखुजेके ले?”
38येशुला फीर्च्या सेम मीःजीकरा माःङ्बुरा तुःक्पु नेसी ओःले तुःर्साला काःल्सी। ओः तुःर्सा फुक चीगला एःके। ओःखोइ खा छ्योम्बो तोःइ कादी एःके। 39येशुइ लाःसी, “ओः तोः तेङ्दो।”
लाजरसकीइ आजी मार्थाइ खुङला लाःसी, “ए प्रभु, दी तीःजी थुपला नी ओःखो टीःमा खासीःङ्स्वाँ, चीलेलाःना खो सीक्योक ङीःमा सीः काःल्सीःङ्सी।”
40येशुइ खुङला लाःसी, “सेमल्हुक लुसी लाःना ख्योइ कोन्ज्योइ महीमा थोङेन एः लाःती ङाःइ लाःक्योक मीःङे ले?”
41खुङक्याइ तुःर्साइ खालाःम्ले तोः तेङ्सी ओःले येशुइ नाःम्खालीङछ्योले तादी लाःसी, “थुजीछे एः आबा, ख्याइ ङाःइ वासीला कोःसी। 42ख्याइ ङाःइ ताम तेन्दुरा कोःउए लाःती ओःखो ङाःइ छोर्ती एः। इःनाङ ख्याइ ङाःला जाम्बुलीङला ताङ्क्योक इःङे लाःकेन ताम दीला एःक्योक मीःक्याइ सेमल्हुक लुज्युक लाःती ङाः ख्याला दी वासी पेःदेरा एः।” 43ओःले दी ताम लाःमीःजीक येशुइ छ्योम्बो केला केक्याःप्सी, “ए लाजरस, फीला स्यो!” 44ओःले सीक्योक लाजरस लाःङ्दी फीला ओःङ्सी। खुङगीइ लाःक्पा मीःजीक काङ्बाथुप रेःकीककीइ ताःम्दी एःके। येशुइ मीःक्याला लाःसी, “रेःकीक सीदी खुङला डोजे तेर।”
येशुला जुम्जे छोल्क्योक
45मरीयमसाःला ओःङ्क्योक माःङ्बुरा यहुदीक्याइ येशुइ पेःक्योक लेःगा थोङ्दी खुङखाला सेमल्हुक लुसी। 46इःनाङ काःजेइदी फारीसीक्यासाःला काःल्दी येशुइ पेःक्योक लेःगाइ बारेला लाःतेर्सी। 47ओः सोङ्गारा, छेस्यो पुजाहारीक्या ओःले फारीसीक्याइ महासभाइ मीःक्याला केक्याःप्ती खुङक्याला लाःसी, “ताः उः ची पेःगा? चीलेलाःना दी मीःइ नी माःङ्बुरा याःमाछाककीइ लेःगाक्या पेःदेरा एः। 48उःइ दीखोला एःन्डुरा पेःजे तेर्सी लाःना थाम्जेरकीइ दीखोखालारा सेमल्हुक लुगेन एः ओःले रोमी थेक्या ओःङ्दी उःइ मन्दीरला रोम्ङेन एः ओःले उःइ क्युःपालाङ सीःङ्दा चेकेन एः।”#११:४८ येशुला माःङ्बुरा मीःक्याइ ब्य्राङ्सी लाःना खुङक्याला यहुदीक्याइ छेस्योक्याइ नीयन्त्रण पेःजे मीःखुए लाःती जीबा पेःउके। इस्राएलला रोमीक्याइ साशन पेःउके, ओः सोङ्गारा, रोमी थेक्या ओःङ्दी यहुदीक्याला सीःङ्दाक जोगेन एः लाःती ठीवा साल्गुके।
49इःनाङ खुङक्या नाःङ्ला मेःराङ चीग कैयाफा मीःन पेःक्योक मीः एःके। खुङ राःङरा ओः लोःइ चोइ पुजाहारी एःके। खुङगीइ लाःसी, “ख्याक्या चीङ मेसेए! 50देशकीइ थाम्जेर मीःक्या सीःङ्दा चेती डोजे भन्दा नी मीःक्याइ लागी मेःराङ चीग सीजे याःबु इःङे लाःकेन ताम ख्याक्याइ छोर्ती म्याःपा?” 51दी ताम खुङगीइ राःङलाःम्ले लाःती म्याःके, इःनाङ खुङ ओः लोःइ चोइ पुजाहारी एःक्योक सोङ्गारा येशु यहुदी क्युःपाइ मीःक्याइ लागी सीगेन एः लाःकेन ताम खुङगीइ भवीष्यवाणी पेःदी एःके। 52येशु यहुदीक्याइ लागी चीग्रा मीःङे, इःनाङ पाःरास्यारा काःल्योक कोन्ज्योइ मीःक्याला रुःप चीःजेला सीगेन एःके। 53ओः ङीःमामीःजीकरा खुङक्याइ येशुला सेकेन ठीवा चेसी। 54ओः सोङ्गारा, येशु फीर्च्या यहुदीक्याइ कील्ला मीःक्याइ थोङेन पेःदी माःकाल, इःनाङ ओःलाःम्ले उजाड ठाउँगीइ थामाला एःक्योक एफ्राइम लाःकेन क्याःसाला काःल्सी, ओःले ओःला योबाक्या ङीमु तेःसी।
55यहुदीक्याइ नीस्तार मेःलीङ ओःङ्जे चाल्दी एःके, रा युःल युःललाःम्ले माःङ्बुरा मीःक्या राःङला चाङ्मा जोजे लाःती मेःलीङ छुजे तोःङ्लारा यरुशलेमला काःल्सी। 56खुङक्याइ येशुला छोल्सी। खुङक्या कोन्ज्योइ मन्दीरला छुरफारले लाःङ्दी तेःकासुना चीगकीइ राःङ्साला लाःलुङ चासी, “ख्याक्याला ची नेकुबा? ची खुङ मेःलीङला ओःङ्डो ले?” 57छेस्यो पुजाहारीक्या ओःले फारीसीक्याइदी येशुला जुम्जेला खुङ काःला एःपा लाःती सुइयाङ छोर्सी लाःना लेःङ्गो ना लाःती आज्ञा तेर्ती एःके।
Currently Selected:
युहन्ना 11: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
