युहन्ना 10
10
याःबु कोःरालु ओःले खुङगीइ लुःकक्या
1येशुइ लाःसी, “तेःन्दामरा ङाः ख्याक्याला लाःके, लुःककीइ कोःरीला कोःलाःम्ले माःस्युःबा राःङ्सालाःम्ले स्युःगेन मीःदी कुमेन ओःले च्याःक्पा इःङे। 2इःनाङ कोःलाःम्ले स्युःगेन मीःदी लुःककीइ कोःरालु इःङे। 3खुङला कोःरी ह्रुङेन्दीइ कोः फ्यातेर्कुए। लुःकक्याइ खुङगीइ के कोःउए, ओःले खुङगीइ राःङगीइ लुःकक्याला मीःन तेङ्दी केक्याःप्कुए ओःले खुङगीइ लुःकक्याला पाङ्ला तेङ्दी खेर्कुए। 4खुङगीइ राःङगीइ लुःकक्या थाम्जेर पाङ्ला तेङ्मीःजीक खुङ तोःङ तोःङ्ला डोउए, ओःले लुःकक्यादी खुङगीइ तीङ तीङ्ला डोउए चीलेलाःना लुःकक्याइ खुङगीइ के ङोःसेउए। 5कोःरालुइबाहेक राःङ्साइ केक्याःप्सी लाःना लुःकक्या खुङगीइ तीङ्ला मेःन्डोए। बरु ओःखोइ के ङोःमासेगारा लुःकक्या जीबाइ छ्योङ्गुए।”
6येशुइ दी पेदाम खुङक्याला लाःसी, इःनाङ खुङगीइ लाःचे छोल्क्योक दी ताम खुङक्याइ ङोःमासे।
तेःन्दामगीइ कोः
7ओः तेःकासु येशुइ फीर्च्या खुङक्याला लाःसी, “ङाः ख्याक्याला तेःन्दामरा लाःके, लुःककीइ कोःरीला स्युःगेन कोः ङाःरा इःङे। 8ङाः भन्दा तोःङ्ला ओःङेन्दी थाम्जेर कुमेनक्या ओःले च्याःक्पाक्या एःके, इःनाङ लुःकक्याइ खुङक्याइ ताम माःको। 9कोः ङाःरा इःङे। काःन्दीङ मीःक्या ङाःलाःम्ले नाःङ्ला स्युःसी लाःना खुङक्या सेन्ङेन एः, ओःले खुङक्या फी नाःङ पेःजे ज्योर्केन एः, ओःले खर्कला चा साःजे ज्योर्केन एः। 10कुमेन नी कुजेला, सेचेला ओःले सीःङ्दाक थाजेला चीग्रा ओःङ्गुए। ङाः दी ख्याक्याइ नाःमाङ मीसीगेन मीःली ज्योर्च्युक ओःले ओःखो माःङ्बुरा पेःदी ज्योर्च्युक लाःती ओःङ्क्योक इःङे।
येशु याःबु कोःरालु
11याःबु कोःरालु ङाःरा इःङे। याःबु कोःरालु राःङगीइ लुःकक्याइ लागी सीजेलाङ तयार ओःङ्गुए। 12इःनाङ लुःक ताजेला ज्याक्योक लाबुदी तेःन्दाम कोःरालु मीःङे। ओःखोइ फारा ओःङ्क्योक थोङ्सी लाःना लुःक पोःर्ती छ्योङ्गुए चीलेलाःना लुःकक्या खुङगीइदी मीःङे। ओःले फाराइ लुःकक्याला थाप ताःप्कुए ओःले लुःकक्याला पाःरास्यारा जोतेर्कुए। 13लुःक ताजेला ज्याक्योक लाबुदी लाबु चीग्रा इःङे, ओः सोङ्गारा, खुङ छ्योङ्गुए ओःले खुङला लुःकक्याइदी चीङ वास्ता मेःबेए।
14-15ङाः याःबु कोःरालु इःङे। आबाइ ङाःला ओःले ङाःइ आबाला ङोःसेक्योक च्योःङ्रारा, ङाः राःङगीइ लुःकक्याला ङोःसेगे, ओःले ङाःइ लुःकक्याइ ङाःला ङोःसेउए। ओःले ङाः लुःकक्याइ लागी सीजेलाङ तयार एः। 16ङाःइदी राःङ्सा लुःकक्याङ एः, ओःखोदी दी कोःरीइदी मीःङे। ओः लुःकक्यालाङ ङाःइ ख्योङ्कोःन एः, ओःले खुङक्याइ ङाःइ के कोःगेन एः, ओःले थाम्जेर लुःकक्या छोबा चीग ओःङेन एः। ओःले थाम्जेर लुःकक्याइ कोःरालुदी चीग्रा चीग ओःङेन एः।
17ङाःइ आबाइ ङाःला च्याःम्बु पेःउए चीलेलाःना राःङगीइ मीःली फीर्च्या लेःङेन पेःदी ङाःइ राःङगीइ मीःली क्याप च्योल्गे। 18सुइयाङ ङाःलाःम्ले ङाःइ मीःली खेर्चे मीःखुए, इःनाङ ङाः राःङगीइ सेमगीइ राःङगीइ मीःली क्याप च्योल्गे। राःङगीइ मीःली क्याप च्योल्गेन आङ्ज्या ङाः ङीमु एः, ओःले फीर्च्या लेःङेन आङ्ज्याङ ङाः ङीमु एः। ङाःइ आबाइ दीखोरा पेःदो लाःती ङाःला आज्ञा तेर्ती एः।”
19दी ताम कोःदी यहुदीक्याइ कील्ला फीर्च्या खाफ्यासी। 20खुङक्या नाःङ्ला माःङ्बुरा मीःक्याइ एःन्डु लाःसी, “दीखोला हेन्डी क्याःप्ती एः, ओःले दी ङ्योदी एः। ख्याक्या दीखोइ ताम चीले कोःउबा?” 21इःनाङ राःङ्साक्याइ लाःसी, “हेन्डी क्याःप्क्योक मीःइ एःन्डुबा ताम लाःचे मीःखुए। हेन्डीइ मी मेःथेङेन मीःला काःन्डुले मी थोङेन्दी जोखुउबा ले?”
यहुदीक्याइ गोछेस्योक्याइ येशुला इन्कार पेःक्योक
22ओः तेःकासु सेर्काइ दावा एःके, ओःले यरुशलेमला कोन्ज्योइ मन्दीर क्याप च्योल्गेन मेःलीङ ओःङ्दी एःके। 23येशु कोन्ज्योइ मन्दीर नाःङ्ला सोलोमनगीइ दलानला डोदेरा एःके। 24यहुदीक्या खुङगीइ छ्योसीःराछ्योले जोम्सी ओःले खुङला टीःसी, “नाःमथुप ख्याइ ङीःला तोःपाःर्केला ज्याउबा? ख्यो थार्च्युगेन ख्रीष्ट इःङे लाःना ङीःला थेकारा लाःतेर।”
25येशुइ लाःसी, “ङाःइ तोःङ्लारा ख्याक्याला लाःसीःङ्दी एः, इःनाङ ख्याक्याइ ङाःला सेमल्हुकरा मीलुए। ङाःइ आबाइ मीःनला ङाःइ पेःक्योक लेःगाक्याइरा ङाः सु इःङे लाःती तेःङ्तेर्कुए। 26इःनाङ ख्याक्या ङाःइ लुःक मीःङे, ओः सोङ्गारा, ख्याक्याइ ङाःला सेमल्हुक मीलुए। 27ङाःइ लुःकक्याइदी ङाःइ केला कोःउए। ङाः ओः लुःकक्याला ङोःसेउए ओःले ओः लुःकक्याइ ङाःला ब्य्राङ्गुए। 28ङाः खुङक्याला नाःमाङ मीसीगेन मीःली तेर्के। खुङक्या नाःमाङ मेसीगेन एः ओःले सुइयाङ खुङक्याला ङाःलाःम्ले फ्रोदी खेर्चे मीःखुगेन एः। 29ओः खुङक्याला ङाःइ लाःक्पाला तेर्केन ङाःइ आबा थाम्जेर भन्दा छ्योम्बो एः, ओःले आबाइ लाःक्पालाःम्ले नी खुङक्याला सुइयाङ फ्रोदी खेर्चे मीःखुगेन एः। 30आबा रा ङाः चीग्रा इःङे।”
31यहुदीक्याइ खुङला क्याःप्चे लाःती फीर्च्या तोः तुःसी। 32येशुइ खुङक्याला लाःसी, “ङाःइ आबाइ पेःदो लाःक्योक माःङ्बुरा याःबु लेःगाक्या ङाःइ ख्याक्याइ तोःङ्ला पेःतेर्सी। ओः लेःगाक्या नाःङ्ला काँःदी लेःगाइ लागी ख्याक्याइ ङाःला तोःइ क्याःप्चे चाल्क्योक?” 33यहुदीक्याइ खुङला लेःन लोदी लाःसी, “ख्याइ पेःक्योक याःबु लेःगाइ लागी ङीः ख्याला तोः मेःक्याप, इःनाङ कोन्ज्योइ वीरुद्धला माःताक्पा ताम लाःक्योक सोङ्गारा, चीलेलाःना ख्या मीः एःनाङ राःङला कोन्ज्यो लाःती लाःकुदु।”
34येशुइ खुङक्याला लेःन लोदी लाःसी, “ची ख्याक्याइ छ्येइ ठीमला कोन्ज्योइ एःन्डु लाःती म्याःपा ले, ‘ख्याक्या ल्हाक्या इःङे’#भजन ८२:६? 35कोन्ज्योइ दीला सुः ङीमु ताम लाःपा, खुङक्याला ल्हाक्या इःङे लाःती एः लाःना (छ्येइ पेज्याला प्रुःक्योक ताम तेन्दुरा तेःन्दाम एः) 36आबाइ ङाःला दाम्सी ओःले जाम्बुलीङला ताङ्क्योक सोङ्गारा ङाःइ ङाः कोन्ज्योइ पुः इःङे लाःकासुना काःन्डुले ङाःइ कोन्ज्योइ वीरुद्धला लाःपा? 37ङाःइ पेःक्योक लेःगाक्या ङाःइ आबइदी मीःङे लाःना ख्याक्याइ ङाःला सेमल्हुक लुमेःको। 38इःनाङ ओः लेःगाक्या ङाःइ आबाइदी इःङे लाःना ख्याक्याइ ङाःला सेमल्हुक मीलुनाङ ओः लेःगाक्याला तादी सेमल्हुक लुदो, ओःले आबा ङाः ङीमु एः ओःले ङाः आबा ङीमु एः लाःकेन ताम ख्याक्याइ छोर्केन एः।” 39दी ताम कोःदी खुङक्याइ येशुला फीर्च्या जुम्जे छोल्सी, इःनाङ येशु खुङक्याइ लाःक्पालाःम्ले स्योर्सी।
40येशु फीर्च्या यर्दन लुःङ्बाइ फार्केनला युहन्नाइ तोःङ्ला बप्तीस्मा तेर्केन ठाउँला काःल्सी ओःले खुङ ओःलारा तेःसी। 41माःङ्बुरा मीःक्या खुङसाःला ओःङ्सी, ओःले खुङक्याइ लाःसी, “युहन्नाइ नी चीङ चुःन्डुलक्या मातेङ, इःनाङ खुङगीइ दी मीःइ बारेला ची काःजे लाःती एःके ओःखो तेःन्दामरा इःङेन दुबा।” 42एःन्डुले ओः ठाउँगीइ माःङ्बुरा मीःक्याइ खुङखाला सेमल्हुक लुसी।
Currently Selected:
युहन्ना 10: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
