प्रेरीत 12
12
हेरोद क्याःल्बुइ तुःक्पु तेर्क्योक
1ओः ङीःमाक्याला हेरोद अग्रीपा क्याःल्बुइ कोःम्साइ चीङ आतानोःक्याला जुम्दी खुङक्याखाला तुःक्पु तेर्काला स्युःसी। 2खुङगीइ युहन्नाइ आता याकुबला तरवारकीइ सेच्युसी। 3दी लेःगाइ पेःगासुना यहुदीक्या केःदाङ काःल्क्योक थोङ्दी खुङगीइ पत्रुसलाङ जुम्सी। दी तामदी खमीर मालुक्योक खुरा साःगेन मेःलीङगीइ तीःजीला काःल्दी एःके। 4हेरोदकीइ पत्रुसला चेङाङला लुसी ओःले मेःन्दा सीः सीः एःक्योक छोबा सीः थेक्याला खुङगीइ कोःरालु पेःच्युसी। हेरोदकीइ खुङला नीस्तार मेःलीङ सीःङ्मीःजीक मीःक्याइ तोःङ्ला ख्योङ्दी ठीम पेःगेन सेम पेःदी एःके। 5पत्रुस चेङाङला एःकासुना कोःम्साइ मीःक्याइ खुङगीइ लागी तेन्दुरा कोन्ज्योला प्रार्थना पेःदी तेःसी।
पत्रुस चेङाङलाःम्ले थेङ्क्योक
6हेरोदकीइ पत्रुसला मीःक्याइ तोःङ्ला ठीम पेःजे छोल्गेन ङीःमाइ तोःङ्गीइ कुःङ्मु पत्रुस मेःन्दा ङी थेक्याइ कील्ला ङ्याःल्दी तेःती एःके। खुङला ङीथाल च्याल्दाइ ताःम्दी एःके ओःले थेक्या चेङाङगीइ कोःला रुःङ्दी तेःती एःके। 7खेप चीगलारा प्रभुइ मेःन्दा चीग स्वर्गदुत ओःला थोङ्सी ओःले कोठा साङ्बु काःल्सी। स्वर्गदुतकीइ पत्रुसकीइ सोःबाला फुल्सी ओःले “गेबु लोःङ!” लाःती ङीचुलाःम्ले लाङ्सी। ओः तेःकासुरा खुङला ताःम्क्योक च्याल्दा खुङगीइ लाःक्पालाःम्ले सीःदी ताःप्सी। 8ओःले स्वर्गदुतकीइ लाःसी, “कारा चीङ्दो ओःले लेखाम केःङ्दो।” पत्रुसकीइ ओःन्डुरा पेःसी ओःले स्वर्गदुतकीइ लाःसी, “फोँस्योक केःङ्दो ओःले ङाः ङीमु स्यो।” 9पत्रुस स्वर्गदु ङीमुरा ब्य्राङ्दी काःल्सी, इःनाङ स्वर्गदुतकीइ पेःक्योक दी ताम तेःन्दामरा इःङे लाःती खुङगीइ छोर्ती म्याःके। खुङगीइ नी मीलामला दर्शन थोङ्देरा एः लाःती ठीवा चेती एःके। 10खुङक्या छोबा ङी थेक्यालाःम्ले काःल्दी च्याइ मुल कोःला लेप्सी। ओः कोः राःङ्रा फ्यासी ओःले खुङक्या फीला थेङ्दी गल्ली चीगकीइ लाःमले काःल्सी, ओःले खेप चीगलारा स्वर्गदुतकीइ पत्रुसला पोःर्ती काःल्सी।
11ओःले पत्रुसकीइ राःङला काःल्क्योक ताम छोर्सी ओःले लाःसी, “ताः ङाःइ छोर्सी दी ताम तेःन्दामरा इःङेन दुबा! प्रभुइ स्वर्गदुतला ताङ्दी ङाःला हेरोद क्याःल्बुइ लाःक्पालाःम्ले ओःले यहुदीक्याइ ची पेःजे सेम पेःदी एःके ओः थाम्जेरलाःम्ले ङाःला थार्च्युदी एः।”
12दी ताम छोर्मीःजीक खुङ मर्कुस लाःकेन युहन्नाइ आमाइ खीमला काःल्सी। ओःला माःङ्बुरा मीःक्या जोम्दी प्रार्थना पेःदेरा एःके। 13पत्रुसकीइ कोः तुःङ्गासुना रोदा लाःकेन मेःन्दा चीग लाबु पेःन्पीःजा कोः फ्यागाला ओःङ्सी। 14खुङगीइ पत्रुसकीइ के ङोःसेमीःजीक केःदाङ काःल्दी कोःरा माःफ्याबा नाःङ्ला छ्योङ्देरा काःल्सी ओःले लाःसी, “पत्रुस कोःला लाःङ्दी तेःती एः।” 15खुङक्याइ ओः पेःन्पीःजाला लाःसी, “ख्यो ङ्योबा ना ची ना?” इःनाङ ओः पेःन्पीःजाइ ओःखो पत्रुसरा इःङे लाःतीरा तेःसी। ओःले खुङक्याइ लाःसी, “ओःखो नी पत्रुसकीइ स्वर्गदुत इःन्स्वाँ।”
16इःनाङ पत्रुसकीइदी कोः तुःङ्दीरा तेःसी, ओःले खुङक्याइ कोः फ्यागासुना खुङलारा थोङ्दी खुङक्या याःमाछाक काःल्सी। 17पत्रुसकीइ खुङक्याला खाजुम तेः लाःती लाःक्पाइ लाःदाप पेःसी ओःले प्रभुइ खुङला काःन्डुले चेङाङलाःम्ले तेङ्दी ख्योङ्बा ओः थाम्जेर ताम खुङक्याला लाःसी। ओः ताम याकुब ओःले राःङ्सा आतानोःक्यालाङ लाःतेर लाःती खुङ ओःलाःम्ले काःल्सी।
18ङामु नाःम लाःङ्मीःजीक पत्रुसला ची काःल्दुबा लाःती चेङाङला कोःरालु पेःगेन थेक्या नाःङ्ला छ्योम्बो होहल्ला काःल्सी। 19हेरोदकीइ ओःखो छोर्मीःजीक खुङगीइ थेक्याला पत्रुसला छोल्च्युसी, इःनाङ खुङला फ्रेमाःखु। ओः सोङ्गारा, खुङगीइ थेक्याला टीःगासुना खुङक्याइ चीङ लाःमाःखुरा खुङक्याला मृत्युदण्ड तेर्च्युसी।
हेरोद सीक्योक
ओः तीङ्ला हेरोद यहुदीयालाःम्ले ओःङ्दी कैसरीयाला काःल्सी ओःले ओःलारा तेःसी। 20खुङला टुरोस ओःले सीदोनगीइ मीःक्या ङीमु माःङ्बुरा सीःताङ लाःङ्दी एःके। ओः सोङ्गारा, खुङक्या थाम्जेर हेरोद क्याःल्बुला फ्रेती डीक्चेला काःल्सी चीलेलाःना खुङक्याइ देशला साःगेन स्याःक्या हेरोद क्याःल्बुइ देशलाःम्ले खेर्कुके। तोःङ्ला खुङक्याइ क्याःल्बुइ मीः बलस्तसला खुङक्याइ लाःक्पाला लेःङ्सी ओःले क्याःल्बु ङीमु ताम लाःकाला काःल्सी।
21दाम्क्योक ङीःमाला क्याःल्बुइ केःङेन केःला केःङ्दी हेरोद राःङगीइ छेसाला तेःसी ओःले मीःक्याला भाषण तेर्सी। 22मीःक्याइ केतेङ्देरा “दीखो लाःकेन्दी नी ल्हा इःङे, मीः मीःङे!” लाःतेरा क्याःल्बुला क्यासी। 23ओः तेःकासुरा प्रभुइ स्वर्गदुतकीइ हेरोदला माःङ्बुरा नेःपा जोतेर्सी चीलेलाःना खुङगीइ कोन्ज्योला सेःसा माःबे। ओःले खुङ बु क्याःप्ती सीसी।
24इःनाङ कोन्ज्योइ लेःङ्गोदी टाःम्देरा काःल्सी ओःले येशुला सेमल्हुक लुगेन मीःक्या फेल्देरा काःल्सी।
25बरनाबास रा शाऊलगीइ यरुशलेमला सहयोगकीइ डेबा क्याल्मीःजीक एन्टीओखीयाला लोःदी ओःङ्सी। खुङक्याइ मर्कुस लाःकेन युहन्नालाङ खुङक्या ङीमुरा ख्योङ्सी।
Currently Selected:
प्रेरीत 12: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
