प्रेरीत 11
11
पत्रुसकीइ यरुशलेमगीइ कोःम्साला बयान तेर्क्योक
1राःङ्सा क्युःपाइ मीःक्याइयाङ कोन्ज्योइ तामला सेमल्हुक लुसी लाःती प्रेरीतक्याइ ओःले यहुदीया क्षेत्रला एःक्योक राःङ्सा आतानोःक्याइ कोःसी। 2पत्रुस यरुशलेमला ओःङ्मीःजीक सेमल्हुक लुगेन चीङ यहुदीक्याइ खुङ ङीमु माःताक्पा च्याःङ्गाला स्युःसी ओःले एःन्डु लाःसी, 3“ख्योइ नी खतना माःबेक्योक मीःक्या ङीमुरा तेःसी ओःले खुङक्या ङीमुरा साःसी।” 4ओः सोङ्गारा, तोःङ्ला ची ची ताम काःल्दी एःके ओःखो ताम पत्रुसकीइ खुङक्याला लाःकाला स्युःसी, 5“ङाः योप्पा क्याःसाला प्रार्थना पेःदेरा एःकासुना दर्शन चीग थोङ्सी। ङाःइ नाःम्खालीङलाःम्ले छ्योम्बो तन्ना च्योःङ्रा सुःरसीःलारा ताःम्दी माःर्ला पाप्तेरा पेःक्योक ङाःइ थोङ्सी ओःले ओःखो ङाः एःक्योक ठाउँला ओःङ्सी। 6ङाःइ ओः नाःङ्ला याःबुले तसुना ओःला सोगेन बस्तुक्या, रीःदाकक्या, टोःपा टीःती डोगेन पशुक्या ओःले च्याःज्युङ्माक्या एःके। 7ओः तीङ्ला ङाःइ एःन्डु लाःक्योक के चीग कोःसी, ‘ए पत्रुस, लोःङ ओःले दीक्याला सेती सोः।’ 8ङाःइ लाःसी, ‘मीःङे प्रभु! उःइ छ्येइ ठीमला साःजे मेःयोङे लाःक्योक एःन्डुबा चीबु स्याःक्या ङाःइ नाःमाङ साःदी म्याः!’ 9नाःम्खालीङलाःम्ले फीर्च्या एःन्डुबा के ओःङ्सी, ‘कोन्ज्योइ चाङ्मा जोक्योक स्याःक्याला ख्योइ चीबु माःलाःप।’ 10खेप सुमथुप एःन्डुबा काःल्सी ओःले ओः तीङ्ला थाम्जेर स्याःक्या फीर्च्या नाःम्खालीङला खेर्सी। 11ओः तेःकासुरा कैसरीयालाःम्ले ङाःला केक्याःप्काला ताङ्क्योक मेःन्दा सुम मीःक्या ङाः तेःक्योक खीमला ओःङ्सी। 12चाङ्मा लाइ ओः मीःक्या ङीमुरा तुःक्पु मानेबारा सुङ लाःती ङाःला लाःसी। प्रभुला सेमल्हुक लुगेन दीखो मेःन्दा टुःक आतानोःक्याङ ङाः ङीमु ओःङ्सी ओःले ङीः थाम्जेर कर्नेलीयसकीइ खीम नाःङ्ला काःल्सी। 13कर्नेलीयसकीइ राःङगीइ खीमला स्वर्गदुत चीग थोङ्क्योक ताम ङीःला लाःसी। ओः स्वर्गदुतकीइ खुङला एःन्डुले लाःसी लो, ‘योप्पा क्याःसाला एःक्योक पत्रुस लाःकेन सीमोनला केक्याःप्काला ताङ्दो। 14खुङगीइ ख्योला याःबु लेःङ्गो लाःकेन एः ओःले ओः लेःङ्गोलाःम्ले ख्यो ओःले ख्योइ थाम्जेर फेबेक्या थार्केन एः।’
15ओःले ङाःइ ओः मीःक्या ङीमु ताम लाःकाला स्युःदी एःके, तोःङ्ला काःन्डुले चाङ्मा ला उःक्याखाला ओःङ्दी एःके ओःन्डुलेरा खुङक्याखालाङ ओःङ्सी। 16ओःले प्रभुइ लाःक्योक ताम ङाःइ टेःम्बा साल्सी, ‘युहन्नाइ नी छ्युइ बप्तीस्मा तेर्ती एःके, इःनाङ ख्योक्याइ लाःना चाङ्मा लाइ बप्तीस्मा ज्योर्केन एः।’ 17उःक्याइ प्रभु येशु ख्रीष्टला सेमल्हुक लुसी ओःले कोन्ज्योलाःम्ले चाङ्मा ला ज्योर्सी। ओःन्डुलेरा ओः राःङ्सा क्युःपाइ मीःक्याइयाङ खुङखाला सेमल्हुक लुदी खुङलाःम्लेरा चाङ्मा ला ज्योर्सी। एःन्डुले कोन्ज्यो राःङगीइरा खुङक्याला चाङ्मा ला तेर्कुए लाःना ङाःइ खुङला काःन्डुले कागेन्दी?”
18दी ताम कोःदी प्रभुला सेमल्हुक लुगेन यहुदी आतानोःक्याइ पत्रुसला माःताक्पा च्याःङ्जे पोःर्सी ओःले कोन्ज्योला एःन्डु लाःती प्रशंसा पेःसी, “ताः नी कोन्ज्योइ राःङ्सा क्युःपाइ मीःक्यालाङ स्याबा पेःदी लाःयो पोःर्चे ओःले नाःमाङ मीसीगेन मीःजी ज्योर्केन मौका तेर्ती एः।”
एन्टीओखीया क्याःसाइ कोःम्सा
19स्तीफनसला सेमीःजीक ओःङ्क्योक तुःक्पुइ पेःगासुना प्रभुला सेमल्हुक लुगेन चीङ मीःक्या छुरफारला टाःम्दी एःके। खुङक्या फोनीके, साइप्रस ओःले एन्टीओखीयाथुप काःल्सी इःनाङ यहुदीक्याला चीग्रा लेःङ्गो लाःसी। 20इःनाङ साइप्रस ओःले कुरेनीलाःम्ले ओःङ्क्योक प्रभुला सेमल्हुक लुगेन काःजे मीःक्यादी एन्टीओखीयाला काःल्दी राःङ्सा क्युःपाइ मीःक्यालाङ प्रभु येशुइ बारेला लेःङ्गो लाःसी। 21प्रभुइ ल्हे खुङक्या ङीमु एःके ओःले माःङ्बुरा मीःक्याइ सेमल्हुक लुसी ओःले प्रभुछ्योले लोःसी।
22दी लेःङ्गो यरुशलेमगीइ कोःम्साला लेप्मीःजीक खुङक्याइ बरनाबासला एन्टीओखीयाला ताङ्सी। 23खुङ ओःला काःल्सी ओःले मीःक्याला कोन्ज्योइ काःजे मोलाम तेर्क्योक थोङ्दी खुङ केःदाङ काःल्सी, ओःले खुङक्या थाम्जेरला सेम नाःङ मीःजीकरा प्रभुला सेमल्हुक लुदी तेःचेला उत्साह तेर्सी। 24बरनाबासदी चाङ्मा ला ओःले सेमल्हुककीइ काःङ्क्योक याःबु मीः एःके ओःले खुङगीइ पेःगासुना माःङ्बुरा मीःक्याइ प्रभुला सेमल्हुक लुसी।
25ओः तीङ्ला बरनाबास शाऊलला छोल्गाला टार्सस क्याःसाला काःल्सी। 26खुङगीइ शाऊलला फ्रेमीःजीक एन्टीओखीया क्याःसाला ख्योङ्सी। खुङक्या ङीक्कारकीइ लोः काःङ्रा कोःम्साइ मीःक्या ङीमु फ्रेतेरा तेःसी ओःले मीःक्याइ छ्योम्बो छोबाला लोप्काला स्युःसी। एन्टीओखीया क्याःसालारा तोःङगीइ खेप प्रभुला सेमल्हुक लुगेनक्याला ख्रीष्टीयान लाःती लाःसी।
27ओः तेःकासु कोन्ज्योइ लेःङ्गो तेर्केन चीङ मीःक्या यरुशलेमलाःम्ले एन्टीओखीयाला काःल्सी। 28खुङक्या नाःङ्ला अगाबस मीःन पेःक्योक मेःन्दा चीग मीः एःके। चाङ्मा लाइ खुङला जाम्बुलीङ काःङ्रा मुःगी क्याःप्केन एः लाःती छोर्च्युदी एःके। खुङगीइ कोःम्साला लाःङ्दी दी ताम लाःतेर्सी। (ओः मुःगीदी तीङ्ला रोमी शासक क्लौडीयाइ पालोला क्याःप्सी।) 29अगाबसकीइ लाःक्योक ताम कोःदी प्रभुइ योबाक्याइ यहुदीया क्षेत्रला एःक्योक आतानोःक्याला राःङ राःङगीइ काःजे खुबा ओःजे डेबा खुङक्याला ताङेन ठीवा चेसी। 30खुङक्याइ डेबाक्या तुःसी ओःले ओः डेबा यरुशलेमगीइ कोःम्साइ छेस्योक्याला बरनाबास ओःले शाऊलगीइ लाःक्पाला ताङ्तेर्सी।
Currently Selected:
प्रेरीत 11: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
