मरकुस 5

दुष्ट आत्माई भुंजो मेह्‍णु ठीक करण

मत्ती 8:28-34; लूका 8:26-39

1पता यीशु त तसे चेले तथे पार गिरासेनि मेह्‍णु के इलाके अन्तर पुजे। 2त जपल यीशु नाव पुठा भीं आ त तिखेईंए यक दुष्ट आत्माई भुंजो मेह्‍णु, कब्र पुठा एई कइ तेस जोई मिआ। 3से कब्र पुठ बिश्ताथ त कोई तेस शंकीड़ी बइ बि ना बन्हि सकतेथ। 4किस कि जपल बि मेह्‍णु तस हथकड़ी या शंकीड़ी बइ बन्‍हतेथ, से शंकीड़ी टोड़ कइ तस टुकुड़ टुकुड़ कइ छताथ त हाथकड़ी टोड़ छताथ। तोउं त, कोई बि तस वश अन्तर न कइ बटताथ। 5से दन रात कब्रे कुड त फाट पुठ हुशेरि देन्ता रेहन्ताथ, त अपफ पुठ घोड़िआ देन्ता रेहन्ताथ।

6से दूरारी यीशु हेर कइ दौड़ा, त तसे खुर बिने। 7-9त यीशु तेस जे बोलु, “ए दुष्ट आत्मा, अस मेह्‍णु अन्तरा भीं निस!” तेस अन्तरा दुष्ट आत्माई जोरी जोई बोलु, “ए यीशु, परमपिता परमेश्वरे कोईया, मोउं तोउ जोई की कम? अउं तोउ परमेश्वरे सोह दिआन्ता कि मोउं कष्ट न दे”। यीशु तेस केआं पुछु, “तें नओं की असु?” तेन बोलु “में नओं ‘सेना’#5:7-9 यूनानी भाषा अन्तर “लेजियोन” लिखो असु, जेसे मतलब “चोउर केआं छे हजार सपाही के यक दल” असा। असु; किस कि अस सुआ असे।” 10तोउं तेन तसे सुआ छनेअरे किउ, “असी इस इलाके केआं बाहर न लंघा।” 11तठि फाट पुठ सूरी के यक बोडा मुहारा चरुण लगो थिआ। 12तेन्हि दुष्ट आत्माई तेसे छनेअरे कर कइ बोलु, “असी ओन्हि सूरी के अन्तर लंघा, तोउं अस अन्हि अन्तर घेई घेन्ते।” 13त तेन तेन्हि जे निआंग दिती त दुष्ट आत्मा निस कइ सूरी अन्तर घेई गई त से फाटे जिन्‍घाल केआं धड़ाम कर कइ तथ अन्तर झड़े त डूब कइ मर गे। तेस मुहारा अन्तर कम से कम दुई हजार सूर थिए।

14त सूरी चारणे बाड़ी दौड़ दी कइ ग्रां त शेहर पूरी खबर शुणाई छइ। त तठि जे भुओ थी, तेस हेरण जे मेह्‍णु एई गे। 15त यीशु भेएड़ पूज कइ तेन्हि से मेह्‍णु काआ, जेस अन्तर दुष्ट आत्माई पूरी सेना थी। तसे सुदबुद हेर कइ त झिणे डबो हेर कइ से डर गे#5:15 मेह्‍णु तेस दुष्ट आत्माई भुंजो मेह्‍णु हेर कइ न डरे, पर तस ठीक करणे बाड़ा यीशु हेर कइ डरे। किस कि से ठीक कर कइ यीशु हरालो थिआ कि से कत ताकतवर असा।। 16होर ई सोब हेरणे बाड़ी तेस दुष्ट आत्माई भुंजो मेह्‍णु बारे त सूरी के पूरा हाल तेन्हि मेह्‍णु शुणाई छड़ा। 17तोउं से सम्हाई यीशु छनेअरे कर कइ बोलुण लगे, “छने, हें इलाके केआं घेई गा।”

18त जपल यीशु नाव पुठ चढ़ुंण लगा त दुष्ट आत्माई भुंजो मेह्‍णु तसे छनेअरे कर कइ बोलु “मोउं अपफ जोई बिशण दे”। 19पर तेन तेस जे ना किआ त बोलु, “अपु गी अपु मेह्‍णु केईं घेई गा त तेन्हि बताण दे कि तोउ पुठ दाह कर कइ प्रभु तोउ जे की बोडा कम किओ असे।” 20त से घेई कइ दिकापुलिस इलाके अन्तर इस बोकी प्रचार करुण लगा कि यीशु मोउं जे की बोडा कम किओ असा। तसे बोक शुण कइ सोब मेह्‍णु हैरान भोई घेन्तेथ।

यीशु यक बीमार जिल्हाणु ठीक करीण त मरो कुई दुबारी जीआण

मत्ती 9:18-26; लूका 8:40-56

21तोउं यीशु जपल नाव पुठ तथे पार एई गा, त यक बोडा हुसुड़ा फि तेस केईं किठि गा। से तथे औत पुठ ईं थिआ। 22तोउं अराधनालय मुखिया अन्तरा, जयार नओएं यक मेह्‍णु आ, त यीशु हेर कइ तसे खुरी पुठ बिश गा। 23त ईं बोल कइ तसे छनेअरे करण लगा कि “में मठड़ी कुई मरणे बाड़ी असी। तु एई कइ तेस पुठ अपु हथ रख त से ठीक भोई कइ जीन्ती रिहेल।” 24त यीशु तेस जोई घेण लगा। होर सुआ हुसुड़ा बि तसे पता पता गा। अत हुसुड़ा थिआ कि मेह्‍णु तेस पुठ बि झड़ घेन्तेथ।

25हुसुड़े अन्तर यक जिल्हाणु थी, जेस बाराह साल केआं अखियई बीमारी थी। 26तेन हर यक वैदी केईं घेई घेई अपु सोब रुपेई खर्च छओ थिए। तोउं बि तस कोई फरक नेओथ लगो, बल्कि तसे बीमारी सुआ बधो थी। 27से यीशु बारे बोक शुण कइ हुसुड़े अन्तर तसे पता आई त तसे झिणे छुए। 28किस कि से बोतीथ, “अगर अउं तसे झिणे बि छुई छउं, त अउं ठीक भोई घेन्ति”। 29त तिखेईंए तसे अखियई बीमारी बन्न भोई गई। तेस लगु कि से ठीक भोई गई। 30यीशु तिखेईंए पता लग गा कि तेस केआं मेह्‍णु ठीक करणे शक्ति निसि, त हुसुड़ा अन्तर पतूं मुड़ कइ तेन पुछु, “में झिणे केन छुए?” 31तसे चेली तेस जे बोलु, “ए गुरु, तु त हेरण लगो असा कि हुसुड़ा तोउ पुठ कीं झड़ण लगो असा, तोउं बि किस बोता कि ‘अउं केन छुआ?’” 32तोउं बि यीशु तेस हेरण जे, जेन ए कम किओ थिउ, चोहरो कना अपु नजर घुमाई। 33त से जिल्हाणु ईं जाण कइ कि से कीं ठीक भुई, डरोरी त ठरकती आई, त तसे खुरी पुठ बिश कइ सोब बोक सच्ची सच्ची बोल छइ। 34यीशु तेस जे बोलु, “कुईए, तेईं मोउं पुठ विश्वास किआ, तोउं त तु ठीक भोई गई: मठे गा, त अपु ख्याल रख।”

35से होता बोलुणे लगो थिआ कि अराधनालय मुखिये गीहा कुछ मेह्‍णु एई कइ बोलु, “तें कुई त मर गई। अब गुरु किस दुख देन्ता?” 36तेन्के बोके कोई परवाह ना कर कइ यीशु अराधनालये मुखिया जे बोलु, “डर नउ; बस मोउं पुठ विश्वास कर”। 37तोउं तेन पतरस, याकूब, त तसे भाई यूहन्ना छड़ दी कइ, होर कोई अपफ जोई साते न नीए। 38से अराधनालय मुखिये गी पुजे त तेन मेह्‍णु रोलो-गाश कते का। 39त तेन अन्तर घेई कइ तेन्हि जे बोलु, “ए कुई मरो नेईं; उंघो असी।#5:39 ए कुई सच्चे मर गो थी। पर यीशु जे, जे परमेश्वर थिआ, मरुण बि उंघणे ईं असु। तोउ त से ईं बोता। यूहन्ना 11:11-14 अन्तर बि यीशु लाजारे बारे बि इहांणि बोता। त तुसी किस हल्ला किओ असा त रोलुण लगो असे?” 40ई बोक शुण कइ से तसे मजाक बणाण लगे। पर तेन सोब बाहर लाई छड़े त कुई ईया बोउ त अपु साथी जुए तठि गे, जेठि कुई थी। 41तोउं तेन कुई हथ टाइ कइ तेस जे बोलु, “तलीता कूमी!” जेसे मतलब असा, “ए कुईए, अउं तोउ जे बोता कि खड़ भो!” 42तिखेईंए कुई झट खड़ भोई कइ हंटण लगी। से कुई बाराह साले थी। ई हेर कइ मेह्‍णु सुआ हैरान भोई गे। 43फि तेन तेस कुई ईया बोउ जे निआंग दी कइ बोलु, “इसे बारे केसे जे किछ बोलीण।” तोउं तेन तेन्हि जे बोलु, “एस कुई किछ खिलाण दिए।”

Currently Selected:

मरकुस 5: pgg

Highlight

Copy