मरकुस 6

यीशु पुठ अपु ग्रां मेह्‍णु विश्वास ना करण

मत्ती 13:53-58; लूका 4:16-30

1कफरनहुम शेहर केआं निस कइ यीशु अपु ग्रां नासरत जे आ, त तसे चेले बि तस जुए थिए। 2भक्ति करणे रोज से अराधनालय अन्तर घेई कइ उपदेश देण लगा। त तसे उपदेश शुण कइ सुआ जेईं हैरान भोई कइ बोलुण लगे, “अस केईं ईं ज्ञान कोठिआ आ, भला? ए सोब बोक अस केनि शिचाली, त बोडे बोडे चमत्कारे कम करण जे केन शक्ति दिती? 3ए कि सेईंए मिस्त्री न भो ना,#मत्ती 13:55 जेसे ई मरियम भिन्थ? असे भाई कि याकूब, योसेस, यहूदा त शमौन नेईं ना? कि असे भेण इठि हें भेएड़ न बिश्ति ना?” मेह्‍णु से अपणा नउ त तेस पुठ विश्वास बि ना किआ। 4पर यीशु तेन्हि जे बोलु, “केसे बि भविष्य वक्ते सद अपु शेहर, अपु रिश्ते नाते त अपु गी इज्जत ना भुन्ति।”#यूहन्ना 4:44 5किस कि मेह्‍णु तस पुठ विश्वास ना किआ त तेनि तठि कोई बोडा चमत्कारे कम कइ न बटे, पर थोड़े ईं बीमार मेह्‍णु सुसुरेरि छड़े। 6त से तेन्के अविश्वास पुठ हैरान भोई गा। पता से चोहरो कनारी ग्रां घेई कइ मेह्‍णु शिचालण लगा।

बाराह चेले लंघाण

मत्ती 10:5-15; लूका 9:1-6

7पता यीशु बाराह चेले अपु भेएड़ भिए त तेन्हि दुष्ट आत्मा नशाणे शक्ति दिती त से दुई दुई कर कइ लंघाण लगा। 8तेन तेन्हि जे निआंग दिती, “बथ जे सद लठि नीए। होर किछ न नेण; न रौठि, होर न झोड़ा, न बटुए अन्तर रुपेई, 9होर दुई दुई कमीरी बि ना नेण। पर बूटे लाण दिए”। 10होर, तेन तेन्हि जे बोलु, “जे तुस केसेरी गी घियेल, त तेस जगाई केआं घेणे तकर तठि बिशे। 11जेस जगाई मेह्‍णु तुसी न धराल या तुं न शुणाल, तठिआ घेन्त पेंत अपु खुरी के तड़वाई के धूड़ ठुटकी छड़े कि तुं धूड़ तेन्के खिलाफ उगाह दियेल।”#लूका 10:10-11

12त तेन्हि घेई कइ प्रचार किआ त मेह्‍णु शिचाले कि मन बदलीण दिए। 13तेन्हि सुआ दुष्ट आत्मा बि नशाण छइ, त सुआ बीमार मेह्‍णु पुठ तेल लाई कइ से बि ठीक किए।#याकूब 5:14

यीशु गलील राज्य केआं बाहर घेण

(6:14—8:26)

राजा हेरोदेस मेह्‍णु चुसुणे बाड़ा यूहन्ना मारुण

मत्ती 14:1-12; लूका 9:7-9

14अपल तकर, यीशु शिक्षा त कमे बारे हर जगाई खबर फैल गो थी। त राजा हेरोदेसे बि तसे चर्चा शुणी, किस कि कुछ मेह्‍णु बोतेथ#6:14 कुछ प्रतिलिपि अन्तर “हेरोदेस बोलु” लिखो असु। “मेह्‍णु चुसुणे बाड़ा यूहन्ना मरो तेन्हि अन्तरा दुबारी जीन्ता भोई गो असा, तोउं त तेस केआं ईं बोडे बोडे चमत्कार भुण लगो असे।”#मत्ती 16:14; मरकुस 8:28; लूका 9:19 15होरे मेह्‍णु बोतेथ, “ए त एलिय्याह भविष्य वक्ता भो”। पर होर कुछ मेह्‍णु बोलु, “पुराणे जमाने भविष्य वक्ते ईं कोई यक जेईं असा”। 16पर राजा हेरोदेसे मेह्‍णु के ईं बोक शुण कइ बोलु, “जेस यूहन्ने म्युकुड़ मेईं कटाओ थी, सेईंए जीन्ता भोई गो असा!”

17-18भुओ ई थिउ कि राजा हेरोदेसे अपु भाई फिलिप्पुसे जुएली “हेरोदियास” जुओई ब्याह किओ थिआ। पर यूहन्ने हेरोदेस जे बोलु, “तोउ, अपु भाई जुएली रखीण हें नियमे खिलाफ असी।” इस बझई जुए हेरोदेस मेह्‍णु लंघाए त यूहन्ना टोवाई कइ जेहेल अन्तर छइ छो थिआ।#लूका 3:19,20 19पर हेरोदियास यूहन्ने जोई खुनक रखतीथ त तस मरवाण चहन्‍तीथ; पर तीं न भोई सकुं। 20किस कि हेरोदेस पता थिआ कि यूहन्ना धर्मी त शुचा मेह्‍णु भो; त से तेस बचाई रखुंण चहन्ताथ। हांलाकि से तसे बोक शुण कइ डरताथ। तोउं बि से मज्जे जोई शुणताथ।

21पर हेरोदियास यक मौका मेई गा, जपल हेरोदेसे अपु जमली रोज अपु सम्हाई मन्त्री, सेनापति त गलील राज्ये बोडे बोडे मेह्‍णु जे धाम की। 22तपल हेरोदियासे कुई अन्तर आई, त नच कइ हेरोदेस त तेस जोई बिशो सम्हाई मेहमान खुश कइ छड़े। तोउं राजे खुश भोई कइ कुई जे बोलु, “जे बि तोउ लौतु, मग! अउं तेन्धे दी छता”। 23तोउं तेन सोह किए कि “तु आधा राज्य बि मगियेल त अउं तेन्धे देन्ता।” 24तेन कुई बाहर घेई कइ अपु ईया केआं पुछु, “मोउं की मगुण?” तसे ईये बोलु, “मेह्‍णु चुसुणे बाड़ा यूहन्ने म्युकुड़”। 25त से कुई झट राजे केईं आई त तसे जे बोलु, “अउं चहन्ती कि तुस अभेईं यक मंगाई अन्तर मेह्‍णु चुसुणे बाड़ा यूहन्ने म्युकुड़ कट कइ मेन्धे दिए।” 26ई शुण कइ राजा सुआ उदास भोई गा, पर अपु सोहे त साते बिशो मेहमानी के बझई जोई तेन “ना” कइ ना बटा। 27त राजे झट यक सपाही निआंग दी कइ लंघा कि जेहेल अन्तर यूहन्ने म्युकुड़ काट कइ घिन आई। 28तेन जेहेल अन्तर घेई कइ तसे म्युकुड़ कटु, त यक मंगाई अन्तर अण्ह कइ तेस कुई धे दुतु, त कुई अपु ईये धे दुतु।

29ई शुण कइ यूहन्ने चेले आए त तेन्हि तसे लाश नी कइ कब्र अन्तर छइ।

यीशु पंज हजार मेह्‍णु रौठि खिलाण

मत्ती 14:13-21; लूका 9:10-17; यूहन्ना 6:1-14

30पता जपल प्रतिनिधि#6:30 “प्रतिनिधि” यीशु चुणो से बाराह चेले असे, जेन्के धे तेन खास हक त कम दुतो थिउ। यीशु केईं किठिए, त जे कुछ तेन्हि किउ त शिचालु, से सोब तेस जे बताउ। 31किस कि तेस केईं सुआ मेह्‍णु एन्ते घेन्ते रेहन्तेथ, त तेन्हि खांजे खाण जे बि टेम न मेताथ, तोउं त यीशु तेन्हि जे बोलु, “चले, केसे अरुणि धार घेन्ते। तठि धिक अराम कते।” 32त यीशु होर तसे चेले नाव पुठ चढ़ कइ यक अरुणि धार जे घेण लगे। 33पर सुआ जेईं से घेन्ते काई छड़े, त पिछाण छड़े। से सोबी शेहरे मेह्‍णु किठे भोई कइ ता जे दौड़े, त तेन्हि केआं पेहले पूज गे।

34जपल से नाव पुठा भीं आ त तेन सुआ हुसुड़ा का, त तेन्हि पुठ दाह एई गई, किस कि से जीं तेन्हि ढडुड़ के ईं थिए, जेन्के कोई पुहाल न भुन्ता।#मत्ती 9:36 त से तेन्हि सुआ चीजे बारे शिचालुण लगा।

35जिखेईं चेरे भोई गोउ त तसे चेले तेस केईं ए त बोलुण लगे, “ए गुरु! ई अरुणि धार भो, त पचेदी टेम भोई गो असा। 36अन्हि लंघाई छड़ कि चोहरो कनारे ग्रां त शेहर घेई कइ, अपफ जे खाणे पीणे जोड़ लाए।” 37तेन जवाब दिता “तुसे अन्के धे खाण जे दिए”। तेन्हि तेस जे बोलु, “की देण? अत मेह्‍णु रौठि खिलाणे लिए अठ मेहने मजूरी बराबर रुपेई लगते। त कि अस अत रुपेई दी कइ एन्हि रौठि खिलेउं ना?” 38तेन तेन्हि जे बोलु, “घेई कइ हेरे कि तुसी केईं कति रौठि असी।” तेन्हि हेर कइ बोलु, “पंज रौठि त दुई मछली असी”। 39तोउं तेन तेन्हि जे निआंग दिती कि सोबी घास पुठ लाईन जोई बिशाणी दिए। 40त सम्हाई मेह्‍णु सौए सौए त पंझाए पंझाए लेन अन्तर बिश गे। 41तेन से पंज रौठि त दुई मछली नी, त स्वर्गे कना जे हेर कइ परमेश्वरे धन्यवाद किआ। तोउं रौठि टुकड़ेरी टुकड़ेरी कइ चेली कें धे देन्ता रेहा कि से मेह्‍णु बुच बांटे। त से दुई मछली बि तेन्हि सोबी कें धे बांट छड़ी। 42तोउं सम्हाई मेह्‍णु खाई कइ रज्जि गे।

43पता तेन्हि बचो तेन्हि टुकुड़ के त मछली के बाराह चाउं भरे। 44जेन्हि बि तठि रौठि खेई, तेन्हि बुछ पंज हजार सद मड़दे थिए।

यीशु पोण पुठ हंटुण

मत्ती 14:22-23; यूहन्ना 6:16-21

45तोउं यीशु झठ अपु चेले नाव पुठ चढ़ाए त तथे पार घेण जे त तेस केआं अगर जपल बैतसैदा ग्रां पुजुण जे बोलु। त यीशु मेह्‍णु अपु अपु ग्रां जे लंघाए। 46मेह्‍णु लंघाणे पता, से फाट पुठ दुआ करण जे गा। 47जपल झवादी भुई त चेली के नाव तथे बुच थी, त यीशु अकेला औत पुठ थिआ। 48जपल तेन हेरु कि चेली के मुंह कनारा ब्यार लगो थी, होर तेन्हि नाव चलाण अवज भोई गो थी, त राति लगभग टाई बज से तथ पुठ हंटते हंटते तेन्के भेएड़ आ; त से तेन्हि केआं अगर घेण चहन्ताथ। 49पर तेन्हि चेली जपल से तथ पुठ हंटते का त तेन्हि समझु कि ए भूत भो, त से लियारी देण लगे; किस कि से तेस हेर कइ डर गो थिए। 50पर तेन झट तेन्हि जोई बोक की त बोलु, “हिम्मत करे : अउं भो, डरे नउ!” 51तोउं से तेन्हि केईं नाव पुठ आ, त ब्यार बन्न भोई गई : ई हेर कइ से चेले ती हैरान भोई गे, 52किस कि से तेन्हि पंज हजार मेह्‍णु रौठि खिलाणे चमत्कारे बारे समझोरे नेओथ त तेन्के मन नकठर भोई गो थिए।

यीशु सुआ बीमार मेह्‍णु ठीक करण

मत्ती 14:34-36

53यीशु त तसे चेले तथ पार भोई कइ गन्नेसरत इलाके पुजे, त नाव औत पुठ छाइ छइ। 54जिखेईं से सोब जेईं नाव पुठा भीं आए, त मेह्‍णु से झट पिछाण छड़ा। 55त औत-कोत बइ पूरे इलाके अन्तर दौड़े, त जत बि बीमार मेह्‍णु थिए, तेन्हि डानी पुठ कर कइ जेठि जेठि मेह्‍णु शुणतेथ से असा, तठि तठि पुजान्‍तेथ। 56त जेठि कोठि से ग्रां शेहर अन्तर घेन्ताथ, बीमार मेह्‍णु बाहर रख कइ तसे छनेअरे कतेथ कि से तेन्हि अपु झिणि के पलो ईं छूण दे। त जतु जेईं बि तेस छुन्‍तेथ, से सोब सुसुरी घेन्तेथ।

Currently Selected:

मरकुस 6: pgg

Highlight

Copy