यूहन्ना 5

लकवे बीमारी मेह्‍णु ठीक करण

1तढ़ेया पता, यहूदी मेह्‍णु के केसे यक त्योहार जे यीशु यरुशलेम शेहर जे गा। 2तठि, यरुशलेम शेहर अन्तर ढडुड़ नओएं मोटे दुआरे#5:2 यरुशलेम शेहरे चोउर कना यक घोड़े भिथ भुन्तीथ, त तठि मेह्‍णु एण घेण जे सुआ दुआर भुन्तेथ। हर यक दुआरे नओं भुन्तुथ। “ढडुड़” तेन्हि दुआरी बुच यक असा जे शेहरे उत्तर-पूर्व दिशा थिउ। त शयद इनिम्बाई मेह्‍णु ढडुड़ त होरे जानवरी के बाजार जे घेन्तेथ। भेएड़ यक लाबु असा, जेस जे इब्रानी भाषा अन्तर “बेतहसदा” बोते, त तठि पंज छपिर#5:2 मण्डप जिमि केआं धिक खड़िया बणान्तेथ जीं स्टेज भुन्ता, ताकि होरे जानवरी त कीड़े मकोड़े होर पाणि केआं बच सकियेल। एसे पुठे छत भुन्तीथ पर कोई भिथ नेईं। छत थमी पुठ भुन्तीथ। असी। 3तठि सुआ बीमार मेह्‍णु, अन्हे, लटे, त लकवे बीमारी बाड़े मेह्‍णु बिशतेथ। 4(किस कि कपले कपले परमेश्वर केआं स्वर्गेदूत एई कइ तेस लाबु पाणि हिलान्तेथ। त जे बि बीमार मेह्‍णु पाणि अन्तर पेहले घेन्ताथ, से ठीक भोई घेन्ताथ।) 5तठि यक ईं मेह्‍णु थिआ, जे अठती साल केईआं बीमार थिआ। 6यीशु तस हेर कइ त ईं पता लाई कइ कि से सुआ सालुं केआं तठि असा, तस केआं पुछु, “कि तु ठीक भुण चहन्ता ना?” 7तेन बीमार मेह्‍णु तस जे बोलु, “साहब! में ईं कोई नेईं जे जपल पुओणि हिलतु, त मोउं पाणि अन्तर छड़ाल। मोउं तठि पुजणे पेहले ईं होरा कोउं जेईं पाणि अन्तर घेई घेन्ता।” 8यीशु तस जे बोलु, “खड़ भो, त अपु बछाण घिन कइ हंट!” 9से मेह्‍णु तपले ईं सुसुरी गा त अपु बछाण घिन कइ हंटण लगा।

10पर ए भक्ति करणे रोज थिआ त यहूदी नेते तस जे, जे ठीक भोई गो थिआ, बोलुण लगे कि, “भक्ति करणे रोज बछाण घिन कइ हंटण हें नियमे खिलाफ असु।” 11त तेन तेन्हि जे बोलु, “जेन अउं ठीक किआ, तेन मोउं जे बोलु कि ‘खड़ भो त अपु बछाण घिन कइ हंट।’” 12त तेन्हि तस केआं पुछु, “से मेह्‍णु कोउं भो, जेन तोउ जे अपु बछाण घिन कइ हंटणे बोलु?” 13पर जे ठीक भोई गो थिआ, तस पता नेओथ कि से यीशु थिआ। किस कि तेस जगाह सुआ हुसुड़ा भुणे बझई जुए यीशु तठिआ नश गो थिआ।

14तोउं पता यीशु तस देहेर अन्तर मेईंया त तस जे बोलु, “शुण, तु अब ठीक भोई गो असा, त पाप ना कर। ना त की बुझुं, तोउ पेहले केआं बि भयंकर बुखता एण असी।” 15तोउं तेन मेह्‍णु यहूदी नेते केईं घेई कइ बोताउ कि, “जेन अउं ठीक किआ, तस नओं ‘यीशु’ अउं।”

कुआ केआं जीवन

16इस बझई जुए यहूदी नेते यीशु परेशान करण लगे, किस कि से ईं ईं कम भक्ति करणे रोज कताथ। 17त यीशु तेन्हि जे बोलु, “में बोउ, परमपिता परमेश्वर अपल तकर कम करण लगो असा, त अउं बि कम कता।” 18तोउं त यहूदी नेते तस मुकाण जे हउ बि कोशिश करण लगे, किस कि से ना सद भक्ति करणे रोजे नियम तोड़ताथ, पर परमेश्वर जे अपु बोउ बोल कइ अपफ जे परमेश्वर ईं बणान्ताथ। 19त यीशु तेन्हि जे बोलु, “अउं तुसी जे बोता कि कुआ, अपफ कुछ कइ ना सकता। पर से सद अपु बोउ हेर कता। किस कि जीं जीं कम बोउ कता, तीं कुआ बि कता। 20किस कि बोउ कुआ ट्यारा असा, त से जे जे कम कता से सोब कुआ हरालता। त तेन एनि कमी केआं बि बोडे बोडे कम तस हरालता, ताकि तुस हैरान भुओल। 21किस कि जीं बोउ मरो मेह्‍णु कें धे जीवन देन्ता, तीं कुआ बि जेस से चहन्ता, तसे धे जीवन देन्ता। 22त बोउ अपफ केसे पंची ना कता, पर पंची करणे सम्हाई कम कोईये धे दुतो असे, 23ताकि सम्हाई मेह्‍णु जीं बोउए इज्जत कते, तीं कोईये बि इज्जत करे। जे कोईये इज्जत ना कता, से बोउए इज्जत ना कता, किस कि तेन कुआ लंघो असा। 24अउं तुसी जे बोता, जे में बोक शुण कइ मोउं लंघाणे बाड़े पुठ विश्वास कता, तस अमर जीवन मेता। तस पुठ कोई सज्जा नेईं, बल्कि मरण केआं बच कइ तस अमर जीवन मेओ असा। 25अउं तुसी जे बोता कि से टेम एण लगो असा, त पूज बि गो असा, जपल मरो मेह्‍णु परमेश्वरे कोईये अवाज शुणते, त जे शुणते से जीन्ते। 26किस कि जीं बोउ केआं जीवन असा, तीं तेन कोईये धे बि जीवने हक दुतो असा। 27होर त होर, तेन तसे धे पंची करणे हक बि दुतो असा, किस कि से मनखे कुआ भो। 28त हैरान ना भो! किस कि से टेम एन्ता, जपल जे मेह्‍णु कब्र अन्तर#5:28 यहूदी मेह्‍णु मुओ मेह्‍णु फुकते नोउ पर पथि छते। से विश्वास कते कि यक रोज सोबी परमेश्वर अगर खड़िन्‍ते त परमेश्वर तेन्के पंची कता। असे, में अवाज शुण कइ तठिआ बाहर निस्ते। 29जेन्हि बि भलु किओ असु, से अमर जीवन लिए दुबारी जी घेन्ते, त जेन्हि बि बुरु किओ असु, से अमर सज्जाई लिए दुबारी जी घेन्ते।”

यीशु मसीहे उगाह

30“अउं अपफ कुछ कइ ना सकता; जीं अउं शुणता, तीं पंची कता। त में पंची सही असी, किस कि अउं अपु मर्जी ना, बल्कि जेन अउं लंघो असा तसे मर्जी तोपता। 31अगर अउं अपफ अपु बारे उगाह देन्ता, त में उगाही कोई ना मानता।#विधि 17:6; 19:15; मत्ती 18:16 32पर होरा यक असा, जे में बारे उगाही देन्ता, तसे उगाही सही असी। 33#यूहन्ना 1:19-27; 3:27-30तुसी यूहन्ना केईआं ईं पुछो थिउ त तेन तुसी जे यक सच्ची उगाही दिती।#यूहन्ना 1:19-27; 3:27-30 34पर अउं अपु बारे मेह्‍णु उगाह ना चहन्ता। फि बि ई बोक तोउं करण लगो असा कि तुस बच घियेल। 35यूहन्ना जपल तकर जीन्ता थिआ से यक टगड़ा दीया थिआ#5:35 यूहन्ने परमेश्वरे सच्चाई यक टगड़ा दीये ईं मेह्‍णु हराला, त परमेश्वरे बोक मेह्‍णु बतेई। यहूदी नेती कुछ रोजे लिए त तसे बोक मनी, पर अपु मन ना बदला।। त तुसी कुछ देर लिए तसे बोक पुठ खुशी मनाई। 36पर मोउं केईं जे उगाह असा, से यूहन्ना केईआं बि बोडा असा; किस कि जे कम बोउए मोउं करण जे दुतो असे, मतलब जे कम अउं एचेल करण लगो असा, सेईंए में उगाह असे कि परमपिता परमेश्वरे अउं लंघो असा। 37#मत्ती 3:17; मरकुस 1:11; लूका 3:22त जेन बोउए अउं लंघो असा, तेन में बारे उगाह दुतो असा। तुसी से ना त कदी शुणो असे ना कदी काओ असे। 38तुस तसे वचन अपु दिल अन्तर ना रखते, किस कि तुस मोउं पुठ विश्वास ना कते जेन से लंघो असा 39तुस धरमे कताब अन्तर त तोपते किस कि तुस सोचते कि अमर जीवन तठि मेता। तेस अन्तर बि में बारे उगाह असे। 40तोउं बि तुस अमर जीवन लिए मोउं केईं ना एण चहन्ते। 41अउं मेह्‍णु केआं इज्जत ना चहन्ता। 42पर मोउं तुं पता असा कि तुस परमेश्वर जुए परेम ना कते। 43अउं अपु बोउए नओं पुठ अओ असा, फि बि तुस मोउं ना मानते, पर अगर कोई अपु नओं पुठ एईयाल त तुस तस मानते। 44इस पुठ कोई शक नेईं कि तुस विश्वास किस ना कइ सकते। किस कि तुस यकी होरी केआं त इज्जत पान्ते, पर परमेश्वर केआं इज्जत पाण जे तुं कोई इच्छा नेईं। 45ई ना समझे कि अउं तुसी परमपिता परमेश्वरे अगर दोष लान्ता: पर तुसी पुठ दोष लाणे बाड़ा होरा असा, मतलब मूसा तुसी पुठ दोष लान्ता, जेस पुठ तुसी उम्मीद रखो असी। 46किस कि अगर तुस मूसा बोक मानते त में बि मानतेथ, किस कि तेन में बारे लिखो असु। 47पर अगर तुस तसे लिखो बोकी पुठ विश्वास ना कते, त में बोकी पुठ कीं कइ विश्वास कते?”

Currently Selected:

यूहन्ना 5: pgg

Highlight

Copy