यूहन्ना 4

यीशु त से सामरी जिल्हाणु

1-2(तेन्हि दिनि यीशु अपफ मेह्‍णु ना चुसताथ, तसे चेले चुसतेथ।) पर तसे बारे मेह्‍णु ईं बोते फरीसी शुणे कि “यीशु यूहन्ना केआं बि ज्यादा चेले बणान्ता त तेन्हि पाणि अन्तर चुसता”। एस बोकी यीशु पता लग गा। 3त से यहूदिया राज्य छड़ दी कइ गलील राज्य जे दुबारी घेई गा। 4त तस सामरिया राज्य बइ घेणे जरूरी थिउ। 5त से सूखार नओएं यक सामरी शेहर पुजा, जे तेस जिमि भेएड़ असा जे पुरखे याकूबे#4:5 सामरी मेह्‍णु बि इस्राएले जाती थिए। पर किस कि ए गैर यहूदी जुए मी कइ बिशतेथ त इस्राएले मेह्‍णु से रशुणिन्तेथ। तोउं बि सामरी मेह्‍णु याकूब अपु पुरखा मानतेथ। अपु कुआ यूसुफे धे सुआ सौ सालुं पेहले दुतो थी। 6तठि याकूबे खुआ बि थिआ। त हंट हंट कइ बक भुणे बझई जुओई, यीशु तस खुए भेएड़ बिश गा। तपल दिसाई कोई बाराह बजो थी।

7-8तसे चेले तपल कुछ खांजे खरीदण जे ग्रां गो थिए। त यक सामरी जिल्हाणु पुओणि नेण जे तठि आई। यीशु तस जे बोलु, “छने, मेन्धे पीण जे धिक पुओणि दे!” 9तेन बोलु, “तुस यहूदी जाति भोई कइ बि मोउं केआं कीं मगण लगो असे? अउं त यक सामरी भो!” (तेन ई बोक इस बझई जुए बोली, किस कि यहूदी मेह्‍णु सामरी मेह्‍णु जुए कुछ लेण देण ना रखते।)

10त यीशु बोलु, “भिलिआ, तोउ कि पता असा ना अउं जे तोउ केआं पीण जे पोण मगण लगो असा, कोउं भो? तु जाणती ना परमेश्वरे की वर दुतो असा? अगर तोउ सच्चे पता भुन्ताथ त तु मोउं केआं मगतीथ त अउं तेन्धे जीवन देण बाड़ु पुओणि देन्ताथ।” 11तेन जिल्हाणु बोलु, “भाई साहबा! तुसी केईं त बाल्टी नेईं। पुठे केआं पुओणि बि सुआ टुन असु। त ए जीवन देण बाड़ु पुओणि तुसी केईं कोढ़िआ आउ? 12तुस की हें पुरखा याकूब केआं बोडा असे ना, जेन हें धे ए खुआ दिता त तेन अपफ, अपु गभुर त गुओरु इस खुए केआं पिआउ?” 13यीशु जवाब दिता, “जे बि एस पाणि पीन्ता, तस दुबारी टिश लगती। 14पर जे पुओणि अउं देन्ता, अगर तस कोई पियाल त तस कदी टिश ना लगती। पर से तस अन्तर यक पुओणि सुजले ईं बण कइ तसे धे अमर जीवन देन्ता।” 15तपल तेन जिल्हाणु तस जे बोलु, “भाई साहबा! छने मेन्धे ईं पुओणि दिए, ताकि मोउं कदी टिश ना लगियेल त मोउं पुओणि नेण जे इठि एणे जरूरत ना पड़ियेल।”

16यीशु तस जे बोलु, “गा त अपु धाणि इए भिआ।” 17त तेन जिल्हाणु बोलु, “मेईं कोई धाणि नेईं रखो।” यीशु तस जे बोलु, “आं आं! तु सही बोलुण लगो असी कि तोउ केईं कोई धाणि नेईं। 18किस कि तेईं पंज पंज धाणि रख छओ असे, त अभेईं बि जे असा, से तें धाणि ना भो।” 19त तेन जिल्हाणु तस जे बोलु, “महाराज! मोउं लगता कि तुस यक भविष्य वक्ता भो। 20हें सामरी के पुरखी इस फाटे चोटि पुठ#4:20 फाटे चोटि नओं गरीजिम थिउ। जीं यहूदी मेह्‍णु जे यरुशलेम खास थिआ, तीं सामरी मेह्‍णु जे गरीजिम थिउ। केहि साल पेहले तठि तेन्के यक देहेर भुन्ताथ। परमेश्वरे पूजा की, पर तुस यहूदी मेह्‍णु बोते कि असी सद यरुशलेम अन्तर ईं पूजा करीण लौती।” 21यीशु बोलु, “भिलिआ! में बोक मान कि से टेम एण लगो असा, जपल मेह्‍णु परमपिता परमेश्वरे पूजा ना त इस फाटे चोटि पुठ होर ना यरुशलेम अन्तर कते। 22तुस सामरी तसे पूजा कते जेसे बारे तुसी कुछ पता नेईं, पर अस यहूदी तसे पूजा कते जेस अस जाणते; किस कि परमेश्वरे यहूदी जाति बेलि मनख बचाणे वादा किओ असा। 23पर से टेम एणे बाड़ा असा त एई बि गो असा, जपल परमपिता परमेश्वरे सच्चे भक्त तसे पूजा तसे आत्माई मदते बेलि त परमेश्वरे बोलो सच्चाई बेलि कते, किस कि परमपिता परमेश्वर ईं पूजा करणे बाड़ा तोपता। 24परमेश्वर आत्मा भो, त ए जरूरी असु कि तसे पूजा करणे बाड़े बि शुची आत्माई मदते बेलि त परमेश्वर बोलो सच्चाई बेलि तसे पूजा करे।” 25त तेन जिल्हाणु तस जे बोलु, “मोउं पता असा कि मसीह, जेस ‘ख्रिस्तुस’ बोते, एणे बाड़ा असा; जपल से एन्ता, त असी सोब बोक शिचालता।” 26यीशु तस जे बोलु, “अउं, जे तोउ जे बोक करण लगो असा, से भो”।

27तिखेईंए, तसे चेले एई गे त ई हेर कइ हैरान भोई गे कि से एस सामरी जिल्हाणु जुए बोक करण किस लगो असा। तोउं बि केनि जेईं ना पुछा “तोउ कि लौतु” या “किस तस जुए बोक करण लगो असा।” 28तोउं, से जिल्हाणु अपु घाड़ु छड़ दी कइ ग्रां जे घेई गई त मेह्‍णु जे बोलुण लगी, 29“इएर एईए! तस मेह्‍णु हेरे, जेन में किओ हर यक कमे बारे मोउं बोताउ। ए मसीह त ना भो?” 30त शेहर केआं मेह्‍णु यीशु केईं एण लगे।

31तपल, यीशु चेले तस जे बोलुण लगे, “ए गुरु, तुस कुछ खाण दिए!” 32पर तेन तेन्हि जे बोलु, “मोउं केईं ई खांजे असु, जेसे बारे तुसी कोई पता नेईं।” 33त चेले अपफ बुच बोलुण लगे, “शेहरे मेह्‍णु तसे धे खांजे कुछ दुतो त नेईं?” 34पर यीशु तेन्हि जे बोलु, “मोउं खांजे खाणे बेलि ना, बल्कि परमेश्वरे इच्छा मानणे बेलि त तसे कम पूरा करणे बेलि ताकत मेती। 35तुस ना बोते ना कि फसल लुणुण जे होता चोउर मेहने बाकी असे? पर अउं तुसी जे बोता अभेईं ए लुणणे भोई गो असी। जे मेह्‍णु एण लगो असे एन्हि हेरे। से पक्को फसले ईं असे। 36लुणणे बाड़े अपु मजूरी पान्ते त अमर जीवने लिए परमेश्वर केईं जे मेह्‍णु अण्हुण लगो असे, ताकि बाणे बाड़े त लुणणे बाड़े दुहिए मी कइ खुशी मनाई बटियेल। 37आं आं! ईं यक उजवाण नेईं ना कि ‘बांता कोउं त लुणता कोउं?’ से यकदम सच्चु असु, 38किस कि अउं तुसी फसल लुणुण जे तेस बग लंघा, जेठि तुसी कोई कष्ट नेईं किओ; पर होरी किओ थिआ। तेन्के कमे फल तुसी मेण लगो असा।”

39तेस शेहरे सुआ सामरी मेह्‍णु तेस जिल्हाणु बोलुणे बेलि यीशु पुठ विश्वास किआ। किस कि तेन उगाही दुतो थी कि “जे जे कम मेईं किओ थिए, एनि से सोब मोउं बोताउ।” 40जपल से सामरी तस केईं ए त तस जे हथ जोड़ कइ छनेअरे की कि तेन्हि जुए बिशे। त से दुई रोज तकर तठि तेन्हि जुए बिशा। 41तसे शिक्षा बेलि होरे बि सुआ मेह्‍णु तेस पुठ विश्वास किआ। 42त तेस जिल्हाणु जे बोलु “अब अस सद तें बोलुणे बेलि विश्वास ना कते; किस कि असी अपफ तस केईआं शुणु त पता लग गा कि ए सेईंए मनख बचाणे बाड़ा भो।”

यीशु यक राजे अधिकारी कुआ ठीक करण

43तेन्हि दुई रोजी पता, यीशु त तसे चेले तठिआ घेई कइ गलील राज्य जे गे। 44यीशु अपफ बोलो थिउ कि “केसे बि भविष्य वक्ते अपु देश अन्तर लेएखे लान्ते”#मत्ती 13:57; मरकुस 6:4; लूका 4:24 45त जपल से गलील राज्य पुजा त गलीले मेह्‍णु तसे अग्रोई जे ए, किस कि जे जे चमत्कारे कम तेन यरुशलेम शेहर अन्तर यहूदी के बचणे त्योहारे#4:45 से बचणे त्योहार जे “फसह” बोतेथ। सुआ जाणकारी नेण जे शब्द संग्रह हेरे। टेम किओ थिए, तेन्हि से सोबी काओ थिए।#यूहन्ना 2:23

46तोउं यीशु गलील राज्ये काना शेहर जे दुबारी आ, जेठि तेन पुओणि अराख बणो थिआ।#यूहन्ना 2:1-11 तठि यक राजे अधिकारी थिआ, जेसे कुआ कफरनहुम शेहर#4:46 कफरनहुम शेहर काना शेहर केआं कोई 42 किलोमिटर दूर थिआ त हंट कइ घेण जे दुई रोजे टेम लगताथ। अन्तर बीमार थिआ। 47यीशु यहूदिया राज्य केआं गलील राज्य जे एई गो असा, शुण कइ तेन यीशु केईं घेई कइ तस जे हथ जोड़ुण लगा त बोलु, “छने, एई कइ में कुआ ठीक करीण दिए! से मरणे बाड़ा असा।” 48यीशु बोलु, “जोउं तकर तुस सोब बोडे चमत्कार ना हेरते, तोउं तकर में बोक ना मानते।” 49राजे अधिकारी तस जे बोलु, “साहब! में कुआ मरुण केआं पेहले चले।” 50यीशु तस जे बोलु, “घिए, तुं कुआ ठीक भोई घेन्ता”। त तेन राजे अधिकारी यीशु बोलुण पुठ विश्वास किआ त तठिआ घेई गा।

51होउस ब्यागे से बते थिआ दे तसे नौखर तस मेई गे त बोलु, “तुं कुआ ठीक भुण लगो असा।” 52त तेन तेन्हि केआं पुछु, “कपल केआं से ठीक भुण लगा?” त तेन्हि तस जे बोलु, “कोई ही दिसाई यक बज केआं तसे सेक मुक गा।” 53त से राजे अधिकारी बिझ गा कि ईं तिखेईं भुण लगु जपल यीशु तेस जे बोलु, “तें कुआ ठीक भोई घेन्ता।” त अपु सम्हाई टब्बर जोई मी कइ तेन यीशु पुठ विश्वास किआ। 54ए दोका चमत्कारे कम थिआ, जे यीशु यहूदिया राज्य केआं एई कइ गलील राज्य अन्तर किआ।

Currently Selected:

यूहन्ना 4: pgg

Highlight

Copy