यूहन्ना 6

यीशु पंज हजार केआं ज्यादा मेह्‍णु खांजे खिलाण

मत्ती 14:13-21; मरकुस 6:30-44; लूका 9:10-17

1इन्हि बोकी केआं पता, यीशु गलीले तथे औत गा। (अस जे तिबिरियासे तथ बि बोते) 2त सुआ मेह्‍णु के हुसुड़ा तसे पता घेण लगा, किस कि से जे जे चमत्कारे कम बीमार मेह्‍णु पुठ कताथ तस से हेरतेथ। 3-4तपल यहूदी मेह्‍णु के बचणे त्योहार बि नीड़ा एई गो थिआ। त यीशु यक फाट पुठ चढ़ कइ अपु चेली जुए तठि बिशा। 5त यीशु हेरु कि इएर-ओवर केआं सुआ मेह्‍णु तस केईं एण लगो असे; त तेन फिलिप्पुस जे बोलु, “इन्हि मेह्‍णु जे अस रौठि कोठिआ खरीद सकियेल?” 6पर तेन ई बोक तस परखुण जे बोलो थी, किस कि तस पता थिआ कि से की करणे बाड़ा थिआ। 7त फिलिप्पुसे तस जे बोलु, “गुरुजी! मेह्‍णु एतर असे कि दुई सौ दीनारे#6:7 दीनार रोमी मेह्‍णु के चन्नी सिक्का थिआ। यक दीनारे मुल यक रोजे मजूरी थी। यक दीनार लगभग यक तोड़ा चन्नी भुन्ताथ। त दुई सौ दीनार दुई सौ तोड़ा चन्नी भुन्ताथ जेस जे लगभग अठ मेहने मजूरी करीण एन्तीथ। रौठि बि धिक धिक टाण जे बि एन्हि घट घेन्ति।” 8तसे चेली बुच शमौन पतरसे भाई अन्द्रियासे तस जे बोलु, 9“गुरुजी! इठि यक कुआ असा, जेस केईं जोउवे पंज रौठि त दुई मछली असी; पर एतु मेह्‍णु के अगर ए की असु?”

10यीशु अपु चेली जे बोलु कि मेह्‍णु भीं बिशाणे। किस कि तठि सुआ घास थिउ त सम्हाई तठि बिश गे। तठि पंज हजार त सद मड़दे थिए। 11तोउं यीशु से रौठि टाइ कइ परमेश्वरे धन्यवाद किआ त बांटुण जे चेली कें धे दिती; तीं तेन मछली बि नी कइ किउ त बांटण जे दिती। 12जपल से खाई-खुई रज्जि गे त तेन अपु चेली जे बोलु कि “बचो रौठि टुकुड़ किठा करे, ताकि कुछ बेकार ना घियेल।” 13त तेन्हि सम्हाई टुकुड़ चुणे त कोई बाराह चाउं भरे। ए सोब टुकुड़ तेन्हि पंज जोउवे रौठि केआं थिए, जे मेह्‍णु के खाण केईआं पता बच गो थिए। 14एस चमत्कारे कम हेर कइ से मेह्‍णु बोलुण लगे, “जे भविष्य वक्ता इस धरती पुठ एणे बाड़ा असा, से जरूर एईएं भो।” 15पर यीशु पता लग गा कि मेह्‍णु तस टाइ कइ जब्बरदस्ती अपु राजा बणाण चहन्ते। त से अकेले चुपचाप तठिआ रैहि रैहि बइ नश गा।

पोण पुठ यीशु हंटण

मत्ती 14:22-33; मरकुस 6:45-52

16त जपल झवादी गोउ, तसे चेले तथे औत जे गे, 17त नाव पुठ चढ़ कइ तथे पार कफरनहुम शेहर जे घेण लगे: तपल अन्हारु भोई गो थिउ त यीशु तोउं बि तेन्हि केईं नेओथ ओ। 18तोउं तथ पुठ तुफाने बझई जुए सुआ छल्हारे बि एण लगे। 19त जपल तेन्हि नाव चलाई चलाई कोई पंज, छेआ किलोमिटर दूर घेई गे, त तेन्हि का कि यीशु पोणि पुठ हंट कइ तेन्के भेएड़ जे एण लगो असा। त से डरी गे। 20पर यीशु तेन्हि जे बोलु, “ना डरे, अउं भो!” 21त से तस नाव पुठ चढ़ाण लगो थिए दे तिखेईंए से नाव तथे औत पुठ पुजी गे।

मेह्‍णु यीशु तोपुण

22तढ़ेया होउस, जे हुसुड़ा तथे होर कना थिआ, हेरु कि तठि सद यक ईं नाव थी त बगैर यीशु चेले घेई गो थिए। यीशु अपु चेली जुए नाव पुठ ना थिआ। 23(तोउं बि होरे मठड़ी नाव तिबिरियास शेहर केआं तठि आई, जेठि यीशु परमेश्वर धन्यवाद करणे पता तेन्हि खांजे खिलो थी।) 24त जपल तेन्हि हेरु कि तठि ना यीशु असा होर ना तसे चेले, त से बि मठिड़ मठिड़ नावी पुठ चढ़ कइ यीशु तोपते तोपते कफरनहुम शेहर पुजे।

यीशु, जीवन देण बाड़ी रौठि

25त तथे पार यीशु जुए मी कइ तेन्हि बोलु, “ए गुरु, तुस कपल इएर जे आए?” 26यीशु तेन्हि जे बोलु, “अउं तुसी जे बोता कि तुस मोउं तोउं तोपुण नेईं लगो कि तुसी चमत्कारे कम हेरे, पर तोउं कि तुस रौठि खाई खाई रज्जे। 27जे रौठि खराब भोई घेन्ति, तस लिए कष्ट ना करे, पर तेस रौठि लिए कष्ट करे, जे तुं धे अमर जीवन देन्ती। से रौठि सद मनखे कुआ तुं धे दी सकता, किस कि परमपिता मतलब परमेश्वरे तसे धे हक दुतो असा।” 28त तेन्हि तस जे बोलु, “गुरुजी! अस परमेश्वरे इच्छा कीं कइ पूरी कइ सकते?” 29यीशु तेन्हि जे बोलु, “परमेश्वरे इच्छा ई असी कि तुस मोउं पुठ विश्वास करे, जे तेन लंघो असा।” 30त तेन्हि तस जे बोलु, “त तुस असी ईं कि निशाणी हरालते, जेसे बेलि अस तोउ पुठ विश्वास करुं? तुस असी की बोडे चमत्कारे कम हराल सकते? 31हें बाव दादु अरुणि धार अन्तर मन्ने#6:31 मन्ने: ए से चमत्कारी खांजे भो, जे परमेश्वर इस्राएली मेह्‍णु अरुणि धार अन्तर खिलाओ थिउ, जपल से मिस्र देशे गुलामी केआं छूट कइ एण लगो थिए। खे; जीं लिखो असु कि

‘तेन्हि खाण जे तेन स्वर्ग केआं रौठि दिती।’”#छुआंरी 78:24

32यीशु तेन्हि जे बोलु, “अउं तुसी जे बोता कि मूसे से रौठि तुं धे स्वर्ग केआं ना दिती, पर में बोउ सच्ची रौठि तुं धे स्वर्ग केआं देन्ता। 33किस कि परमेश्वरे दुतो रौठि से भो, जे स्वर्ग छड़ कइ आई त इस धरती सम्हाई मेह्‍णु कें धे जीवन देन्ती।” 34त तेन्हि तस जे बोलु, “ए प्रभु, हें धे रोज ईं रौठि दिए।” 35यीशु तेन्हि जे बोलु, “जीवन देण बाड़ा रौठि अउं भो; जे मोउं केईं एन्ता, से कदी ढुके ना बिश्ता त जे मोउं पुठ विश्वास कता, से कदी टिशो ना रेहन्ता। 36पर मेईं तुसी जे बोलो असा कि तुसी अउं हेर छउ असा, तोउं बि तुस मोउं पुठ विश्वास ना कते। 37परमेश्वरे जेन्हि में पतूं एणे ठीक किओ असा, से सम्हाई मोउं केईं एन्ते। त अउं तेन्हि कदी ना दौड़ान्ता। 38किस कि अउं अपु इच्छा पूरी करण जे नेईं अओ, बल्कि मोउं लंघाणे बाड़े इच्छा पूरी करुण जे स्वर्ग केआं अओ असा। 39त मोउं लंघाणे बाड़े इच्छा ईं असी कि जे जे बि तेन मेन्धे दुतो असु, तेन्हि बुचा यक बि ना गड़ाण, पर से परमेश्वरे न्याय करणे रोज#6:39 यहूदी मेह्‍णु मानते कि यक रोज सम्हाई मेह्‍णु परमेश्वर अगर खड़ भुई कइ अपु अपु कमे हिसाब देण एन्ता त परमेश्वर तेन्के पंची कता। (मत्ती 7:22; 25:32-46) अन्तर दुबारी जीआण। 40किस कि में बोउए इच्छा ई असी कि जे कोउं कुआ मानेल, त तस पुठ विश्वास करेल, तेन्हि अमर जीवन मेईंयेल। त परमेश्वर न्याय करणे रोज अउं तस दुबारी जीआन्ता।”

41त मेह्‍णु तसे बोकी पुठ चरचर करण लगे, किस कि तेन बोलो थी “स्वर्ग केआं जे रौठि अओ असी, से अउं भो”। 42त तेन्हि बोलु, “ए कि यूसुफे कुआ यीशु ना भो ना, जेसे ईये बोउए असी पता असा? त ए कीं बोलुण लगो असा कि ‘अउं स्वर्ग केआं अओ असा।’” 43यीशु तेन्हि जे बोलु, “में बारे अपफ बुच चरचर ना करे। 44कोई बि तोउं तकर मोउं केईं एई ना सकता, जोउं तकर मोउं लंघाणे बाड़ा परमपिता परमेश्वर तस में कना जे ना रिझान्ता त अउं तस परमेश्वर न्याय करणे रोज दुबारी जीआन्ता। 45भविष्य वक्ती अपु कताबी अन्तर लिखो असु कि

‘से सम्हाई परमेश्वर शिचालो भुन्ते।’”#यशायाह 54:13

“त, जे बि परमेश्वर शिचालो असे त शुणते, से मोउं केईं एन्ते। 46पर बोक ईं असी कि परमपिता परमेश्वर केनि ना का। सद मेईं काओ असा, जे तस केईआं अओ असा। 47अउं तुसी जे बोता कि अमर जीवन तसे भो, जे मोउं पुठ विश्वास कता। 48जीवन देण बाड़ा रौठि अउं भो। 49तुं दादु बोउ अरुणि धार अन्तर मन्ना खे, तोउं बि मरी गे। 50पर ए से रौठि भो जे स्वर्ग केआं अओ असी, ताकि जे बि मेह्‍णु इस खाआल, से ना मराल। 51जीवन देण बाड़ी रौठि जे स्वर्ग केआं ओ असी, से अउं भो। अगर कोई इस रौठि खाआल, त से अमर जीवन जीन्ता। जे रौठि अउं मेह्‍णु कें धे देन्ता, से में मास भो।#6:51 यीशु इठि अपु मरणे बारे बोता।”

52त इस बोकी पुठ मेह्‍णु अपफ बुच ईं बोल कइ चरचर करण लगे कि “ए मेह्‍णु अपु मास असी खाण जे कीं दी सकता?” 53यीशु तेन्हि जे बोलु, “अउं तुसी जे बोता कि जपल तकर तुस मनखे कोईये मतलब में मास ना खाआल, त लहु ना पियाल, तुसी अमर जीवन ना मेता।#6:53 यीशु इठि अपु अखिर बेह्‌लु बारे बोता। 54मोउं पुठ विश्वास कर कइ जे में मास खांता त में लहु पीन्ता, तस अमर जीवन मेता त अउं तस परमेश्वरे न्याय करणे रोज दुबारी जीआन्ता। 55किस कि जे खांते पीन्ते से मर घेन्ते, पर जे में मास खांते, त में लहु पीन्ते से अमर जीवन जीन्ते। 56मोउं पुठ विश्वास कर कइ जे में मास खांता त में लहु पीन्ता, से मोउं जुए त अउं तेन्हि जुए उई मी कइ बिश्ता। 57जेन परमपिता अउं लंघो असा से जीन्ता असा त अउं बि तेस बझई जुए जीन्ता असा। तिहांणि जे मोउं पुठ विश्वास कता से बि में बझई जुए जीन्ता रेहन्ता। 58जे बि मोउं पुठ विश्वास कराल से स्वर्ग केआं अओ सच्चु रोटी खांता। त से बाव दादु ईं मन्ना खाई कइ मरता नोउ, पर अमर जीवन जीन्ता।”

सुआ चेले यीशु छड़ देण

59ई बोक तेन कफरनहुम शेहरे यक अराधनालय अन्तर शिचालते टेम बोली। 60त तसे चेली बुच सुआ जेईं ई शुण कइ बोलु, “ए त ओखी बोके असी। अन्हि कोउं मान सकता?” 61यीशु अपु मन अन्तर पता लाई कइ कि तसे चेले अपफ बुच किस चरचर करण लगो असे, तेन्हि केईआं पुछु, “तुसी ई बोके ओखी लगती ना? 62त अगर तुस मनखे कुआ, मतलब मोउं अपु पेहले जगाई, जे स्वर्ग असा ता जे घेणे केईयेल त तुं हाल कीं भुन्ता? 63परमेश्वरे आत्मा त जीवन देन्ता पर जिसमे बेलि कुछ फायदा नेईं।#6:63 किस कि जिसम जीवन दी ना सकता। जे बोक मेईं तुसी जे बोलो असी, से आत्मा त जीवन बि भो। 64पर तुसी बुच कुछ असे, जे में बोकी पुठ विश्वास ना कते।” ई बोके यीशु बोली, किस कि पेहले ईं तस पता थिआ कि कोउं तस पुठ विश्वास ना कता त कोउं तस टोवान्ता। 65तेन तेन्हि जे बोलु, “तोउं त मेईं तुसी जे बोलो थिउ कि जपल तकर परमपिता परमेश्वर केआं ए वरदान ना मेता, तोउं तकर कोई मोउं केईं ना एई सकता।” 66त यीशु चेली बुच सुआ चेले तसे पता घेण छड़ दुतु त तस जुए ना गे। 67तोउं यीशु अपु बाराह प्रतिनिधि जे बोलु, “कि तुस बि छड़ देण चहन्ते ना?” 68शमौन पतरसे बोलु, “ए प्रभु, अस केस केईं घेन्ते? अमर जीवने बोके त तुसी केईं असी।#मत्ती 16:16; मरकुस 8:29; लूका 9:20 69असी विश्वास किओ असा त असी पता लग गो असा कि परमेश्वरे शुचा मनख तुईएं भीन्‍थ।” 70यीशु तेन्हि जे बोलु, “मेईं तुस बाराह जेईं नेईं ना चुणो? तोउं बि तुसी बुच यक असा, जे शैतान भो।” 71(इ बोक तेन शमौन इस्कारियती कुआ यहूदे बारे बोलु, किस कि से बि तेन्हि बाराह बुच थिआ, त जे तस दुश्माणी के हथ टोवान्ता।)

Currently Selected:

यूहन्ना 6: pgg

Highlight

Copy