मट्टि 17
17
येसु नाम्र हामिम्पा
(मारकुस ९:२-१३; लुका ९:२८-३६)
1हाङ् ठुक्चि डिना डॆङ्पि येसुऎ पाट्रुस, याकुब नुङ् उम् नुसा युहान्ना टेःॽन पङ्पङ्माबि खुनिङ्म लाखॆटुचि। 2हाङ् खोचिम् लुम्पि येसु होइकन ङिबका हाङ् खोम् ङारिङ् नाम्र हासा हाङ् खोम् चे चाइ बिॽयाक्ट हासा। 3हाङ् मरक्लन मोसा नुङ् एलिया खाङ्मुसाचि हाङ् येसु नुङ् याम्चाबक्कामि। 4म खाङुहाङ् पाट्रुसऎ येसु लोसु, “ओ पारभु, काङ्का गुबि लिमिम्पा काम्नुऎन लिसा। आना मिन्ना हाङ्ग गुबि कॆ सुम्चि पोप्ठाम ठॆयङ् हेबुकुङ। एक्क आनामि लागि, एक्क मोसामि लागि हाङ् एक्क चाइ एलियामि लागि।”
5पाट्रुस यामुभॆट्टा रक्न बिॽयाक्ट खिन्डुमाऎ खोचि डॆगुचि। हाङ् आक्क खिन्डुमाहङ्सिबाङ् गरक्मा एक्क साम्ला टाआ, “इग कॆ नाम्नाम पिस्सिमिम्पा काम् पासा यो, काङा खोनुङ् एट्टान चेन्चाडिङ्, खोम् खानावाँ खेमाम्नॆ।” 6टिङ्खुबाचिऎ ग साम्ला खेमुचिहाङ् किसिआमि हाङ् पोप्ढिङ्खारामि। 7टर येसु टाआहाङ् आक्खाचि डिन्चासे लोसुचि, “पःगानॆ, ऎकिसिआनॆ।” 8हाङ् खोचिऎ उम्चि मिक् ओसुचि हाङ् येसुबाङ् होइढा याॽमिचि आसास माखाङ्टकुचि।
9हाङ् खोचि पङ्पङ्माबाङ् युमे सिसामिर येसुऎ खोचि लोसुचि “आन्नॆ पङ्पङ्माबि खाङ्मिम्पा खानावाँ याॽमिमि पासा सिखॆमिम्पाबाङ् माहिङ्पक्लढारि आसास एलोसाम्चिनॆ।”
10हाङ् टिङखुबाचिऎ खो सिमुचि, “मरहाङ्ग मान्ठा मोसामि यायेॽमा चिन्खुबाचिऎ खिरिस्टबाङ् याॽलि एलिया टामान लॆ काक्मिहा?” 11येसुऎ आक्खाचि खानावाँ ऎम्पिसे लोसुचि, “चाइबान चोब्न खानावाँ टङ्पक्सि एलिया टामा लॆ। 12टर कॆ आन्ना लोकानि, एलिया ग यागॆॽन टाखॆडा, याॽमिचिऎ खो मालेसुचि। टर खो माङ्माङ् लॆःॽमा मिट्टुचि ममन लॆटुचि। मरहाङ्न याॽमिमि पासाऎ सङ्क खोचिबाङ् डुखा आङ्कु।” 13हाङ् टिङ्खुबाचिऎ खोसॆ खोचिनुङ् बाप्टिस्मा पिक्खुबा युहान्नामि बारेबि लोमिम्पा कामानुङ् वाबुचि।
येसुऎ खारिॽमाङ्ऎ लाप्मिम्पा वॆन्चा नुबक्मिॽमिम्पा
(मारकुस ९:१४-२९; लुका ९:३७-४३)
14हाङ् खोचि डिरिक् याॽमिचि चुक्मिहा ठालबि टाआमि। आक्कुबि एक्क याॽमिऎ येसुमि ङारिङ्पि पुम्रुॽवा ठक्से लोसु, 15“पारभु, काम पासा नाम्नाम् पिस्सबिॽमा! मान्ठाभनॆ आक्क चाबॆरोम्मॆ लाप्डुहाङ् एट्टान डुखा आङ्मॆ पाइकु। खो हसहस मिबि नुङ् योवाबि सिट्टि खॆ। 16कॆ खो आनामि टिङ्खुबाचिबि टॆटुङ्, टर आक्खाचिऎ मानुबक्मिहिट्टुचि।” 17हाङ् येसुऎ लोसुचि, “ओ निवाँयुङ् माआनिहा हाङ् काइसाहा हहा याॽमिचि। हानाम्ढारि काङा आन्नानुङ् लिङॆ? कॆ आन्ना हानाम्डारि आङ्मानिहा? आक्क टुक्खुबा याॽमि काबि लारापाम्नॆ।” 18हाङ् येसुऎ आक्क खारिॽमाङ् वोसु हाङ् म खारिॽमाङ् आक्क वॆन्चाबाङ आम्पखारा हाङ् आक्रलन वॆन्चा नुबक्खारा।
19आक्क डॆङपि टिङ्खुबाचिऎ येसु टेःॽन चुऎ बेला सिमुचि, “काङ्कॆ चाइ मान्ठा आक्क खारिॽमाङ् मालाबक्हिसुम्के?” 20आक्खाचि येसुऎ लोसुचि, “आन्नॆ मिःक्म टे निवाँयुङ लॆमिम्पासॆ आक्र लिमिम्पा रेम। चाइबान कॆ आन्ना लोकानि, आन्नाबि रायोमि एक्क मिःछुॽमा उम्चा रकॆ निवाँयुङ् चु हाङ्ग ग पङ्पङ्मा गबाङके खाइटॆ लोमार आक्क खॆ। हाङ् आन्नॆ आमुहिमॆ योम्पक् माङ्स लिनि। 21[टर गरक्मा खारिॽमाङ् चाइ पारठाना नुङ् साक्नेॽमाहाङ् टेः लाबक्मा हे।”]#१७:२१ ग हिपङ्ए पद याॽलिहा साब्चिराबि चाइ माआ, टर डॆङ्पिहा डिरिक् साब्चिराबि चु।
येसुऎ फेरि खो सिखॆॽमॆ खानावाँ इमिम्पा
(मारकुस ९:३०-३२; लुका ९:४३-४५)
22हाङ् खोचि फेरि गालिलबि खोम्टि खारामि#१७:२२ ऎॽवा साब्चिराऎ चाइ हाङ् खोचि फेरि गालिलबि चुआमिर स लोकु। हाङ् येसुऎ टिङ्खुबाचि लोसुचि, “याॽमिमि पासा बङ्सिॽमाम्#१७:२२ ग ठालबि याॽलिऎ गिरिक् साब्चिराऎ सङ्क हिच्चि आरठा टाःमॆ गारि खानावाँ इःसु। ऎॽवा बाइबलमि निवाँटाङ्पाचि येसु ह याॽमिऎ बङ्सिकु, म बङ्सिखुबा चाइ याहुडा यो काग्मि। टर ऎॽवाचि चाइ निवाँहाङ्ऎ ह येसु याॽमिचिम् हुक्पि पिकु काग्मि। लागि याॽमिचिम् हुक्पि पिइ। 23हाङ् आक्खाचिऎ खो सेरुकुचि, टर सुम्चि डिनाबि खो सिखॆमिम्पाबाङ् हिङप।” ग खेमुचिहाङ् टिङ्खुबाचि चाइखेट्टुचि।
येसुऎ निवाँहाङ्मि खिम्मि यावॆङ्ग फङ्मिम्पा
24आक्क डॆङ्पि येसु नुङ् खोम् टिङ्खुबाचि काफारनाहुम् हाटाबि टाआमि। निवाँहाङ्मि खिम्पि यावॆङ्ग खोम्खुबाचि टाआमिहाङ् पाट्रुस सिमुचि, “माल आन्नामि चिन्खुबाऎ निवाँहाङ्मि खिम्पिऎ यावॆङ्ग फङुनॆ?” 25पट्टुरुसऎ लोसु, “फङ्कु, मान्ठा फङुनॆ?” पाट्रुस खिम् हङ्सि भेनाहाङ् येसुऎ याॽल खो लोसु, “सिमोन, आना माङ् मिन्नॆ? बाखाटेम्पिहा हाङ्चिऎ यावॆङ्ग आठावा याङ् उम्चि पासाचिबाङ् खोमुक्मिहा रु होइढा याॽमिचिबाङ् खोमुक्मिहा?”
26पाट्रुसऎ लोसु, “होइढा याॽमिचिबाङ् खोमुक्मिहा रेम।” येसुऎ लोसु, “मरहाङ्ग उम्चि पासाचिऎ चाइ फङ्मा पाब्नि। 27टर खोचि सोम् आखेॽमिॽमाचि। आना खारॆहाङ् टोम्पलिॽवाबि जाला कगॆ हाङ् याॽलि जालाबि सिॽमिम्पा ङा लारापॆ हाङ् आक्कमि या आक्बकॆ। आक्कुबि आनॆ एक्क सिःमि याङ् भॆट्टकुना। आक्क लाखॆटॆहाङ् आनाम् नुङ् काम् लागि आक्खा याॽमिचि पिट्डाएचॆ।”
Currently Selected:
मट्टि 17: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
