मट्टि 18
18
आसा चाइ चोब्बाङ् ढ्या?
(मारकुस ९:३३-३७; लुका ९:४६-४८)
1आक्रल टिङ्खुबाचि येसुबि टाआमिहाङ् सिमुचि, “निवाँहाङ्मि हाङ्डाम्पि चोब्बाङ् टुङ्घङ्पा आसार?” 2हाङ् येसुऎ एक्क पिसा सेःरुहाङ् आक्खाचिम् लुम्पि येप्मिटु। 3हाङ् लोसुचि, “चाइबान कॆ आन्ना लोकानि, टाङ्पामि हिङ्वाबाङ् ऎम्पक्से पिसाचिर मालिसानि हाङ्ग आन्ना हानाम्स पारुमि हाङ्डाम्पि भॆन्टक्कानिनि। 4मसॆ आसॆ चाइ टाङ्पा इग पिसार मिःछुॽमा लॆङ्खुबा याॽमि मुकु खोन पारुमि हाङ्डाम्पि चोब्बाङ् ढ्या लि। 5हाङ् आसॆ चाइ काम् निङ्पि गरक्मा पिसा काम्नुःर लॆकु, आक्कसॆ काङा काम्नुःर लॆङा।
हिङ्वाबि सिॽमिमॆ खानावाँ
(मारकुस ९:४२-४८; लुका १७:१-२)
6“टर आसॆ चाइ का सक्पि निवाँयुङ् लॆखुबा इघा पिसाचिबाङ् एक्क पिसा हिङ्वा योम्पक् लॆःॽमिकु, आक्कमि ग उम् पॆॽलाबि ढ्या यिःॽलुङ् हिक्टिबिॽमाहाङ् रुम्रुम्पा पॆरॆरॆमाबि रुम्ढाङ्मान नुऎ लि। 7ढिक्कारा ग बाखाटेम् मान्ठाभनॆ गुबि ग याॽमिचि हिङ्वा लॆःॽमिखुबा काइसॆ खानावाँ चु! हिङ्वा लॆःॽमिखुबा खानावाँ ग टाक्न, टर ढिक्कारा आक्क याॽमि खोबाङ् म हिङ्वा लॆःॽमॆ खानावाँ टा!
8“आनामि हुक् लाङ्ऎ आना हिङ्वा लॆःॽमि हाङ्ग आक्क बगॆहाङ् कक्लाङ्सॆ। हिच्चि हुक् हाङ् हिच्चि लाङ्नुङ्न हानाम्स सिःखॆनॆ मिःबि सिॽमा भान्डा ग हुक् लाङ् मॆड्डिङ् लिमानुङ् हिङ्खामाबि भॆन्मा आनाम् लागि नुऎ लि। 9हाङ् आनामि मिक्ऎ आना हिङ्वा लॆःॽमि हाङ्ग आक्क मिक् लाबकॆहाङ् कहाङ्सॆ। हिच्चि मिक्नुङ्न नाराकमि मिःबि सिॽमाबाङ्ग ग एक्क मिक् मॆड्डिङ्मा लिमानुङ् हानाम्स सिखॆनॆ हिङ्खामाबि भॆन्मा आनाम् लागि नुऎ लि।
माखॆमिम्पा सामुङ्
(लुका १५:३-७)
10“खेमानॆ, आन्नॆ इघा मिःछुॽहा पिसाचिबाङ् एक्क पिसा सङ्क काइर ऎलॆटाम्चिनॆ। मान्ठाभनॆ कॆ आन्ना लोकानि, निवाँखाटॆखुबाचि हानाम्स पारुबि पेनुक्मि। खोचि काम् पारुबि चुऎ आपामि ङारिङ्पि चुःक्मि। 11मान्ठाभनॆ याॽमिमि पासा ग माखॆमिम्पाचि हिङ्चामिस्सि टाडिङ।#१८:११ ग पद याॽलिहा साब्चिराबि ग माआ, टर डॆङ्पिहा डिरिक् साब्चिराबि चाइ चु।
12“आन्ना माङ् मिङ्कानिहा? एक्क याॽमिमि एक्क सामुङ् चु, हाङ् आक्कबाङ् एक्क सामुङ् माखारा हाङ्ग आक्खा नापङ्ना सामुङ्चि पङ्पङ्माबिॽन याइडासे खो आक्क माखॆॽमिम्पा खोम् एक्क सामुङ् यक्सि खॆॽनॆ? 13खोसॆ आक्क यक्टकुहाङग, चाइबान कॆ आन्ना लोकानि, आक्खा मॆमाखॆटिहा नापङ्ना सामुङ्चिम् लागि बाङ्स आक्क एक्कमि लागि खो एट्टान चेन्चाक्। 14आक्रहाङ्न पारुबि चुखुबा निवाँहाङ् आपाऎ सङ्क इघा पिसाचि हङ्सिबाङ् एक्क स आमाखॆमिर कामानुङ् मिनुक्।
काइर पाइखुबा नुसा
(लुका १७:३)
15“निवाँयुङ् लॆखुबा एक्कसॆ आना काइर लॆटा हाङ्ग, आन्चिना टेःॽन लिमार खोम् काइसॆ योम्पक् खाङ्मिटॆ। खोसॆ आनाम् खानावाँ खेमुहाङ्ग, खो आनाम् याॽमिन लि। 16टर खोसॆ आम् खानावाँ माखेमु हाङ्ग आनानुङ एक्क हिप्पा याॽमिचि चिखॆटॆचॆ हाङ् आनाम् खानावाँ हिप्पा सुम्पा चुमॆक्सङ् पिक्खुबाचिम् लुम्पि सङ्क युङॆ। 17हाङ् खोसॆ आक्खाचिमि खानावाँ सङ्क माखेमु हाङ्ग, म खानावाँ मान्डालिबि लोसॆचॆ हाङ् खोसॆ मान्डालिबिहा याॽमिचिऎ लोमिम्पा सङ्क माखेमु हाङ्ग खो एक्क निवाँयुङ् आलॆखुबा हाङ् यावॆङ्ग खोम्खुबा याॽमि रक्न मिॽलाआम्नॆ।
18“चाइबान कॆ आन्ना लोकानि, आन्नॆ माङ् ग बाखाटेम्पि हिगुकाम्नि, म पारुबि सङ्क हिगु हाङ् आन्नॆ ग बाखाटेम्पि माङ् हेनुकाम्निर आक्क पारुबि सङ्क हेम्बक्। 19फेरि कॆ आन्ना लोकानि, ग बाखाटेम्पि टङ्चासे हिप्पा याॽमिचिऎ ङागाचु हाङ्ग, पारुबि चुऎ काम् निवाँहाङ् आपॆ आक्क पिकानि। 20मान्ठाभनॆ हाम्पि हिप्पा सुम्पा काम निङ्पि खोमुक्मि, काङा आक्खाचिम् लुम्पि लिःॽङा।”
यङ्निमा आपिक्खुबा याॽमि
(लुका १७:४)
21हाङ् पाट्रुस येसुबि टाआहाङ् सिमु, “पारभु, निवाँयुङ् लॆखुबॆ काङा काइर लॆढाङ्सिङ् हाङ्ग कॆ खो ऎॽवा यङ्मिॽमॆ? माल् वाङ्चि खेपाढारि?”
22येसुऎ खानावाँ ऎम्पिटुचि, “वाङ्चि खेपा टेः हॆॽनॆ, टर वापङ् खेपाबाङ् डिरिक् यङ्निमा लॆ। 23मसॆ पारुमि हाङ्डाम् चाइ एक्क हाङ् नुङ् ङेप्हि। खोसॆ खोम् योम्पक् मुखुबाचि नुङ् आक्खाचिऎ लामिम्पा याङ्मि हिसापा लामा मिनु। 24हाङ् आक्क हाङ्ऎ टाङ्पाम् हिसापा लामा परक्मार खोबाङ् एपङ्बङ् फिइयामि याङ् लाखुबा एक्क याॽमि खोबि लाटॆटु। 25टर आक्कसॆ म याङ् माफङ्हिसु हाङ् उम् टुङ्घङ्पॆ आना आम् खिम्टाङ्मा हाङ् पासाचि हाङ् चुहा चोब्न ठका इन्चोऎ हाङ् काम् याङ् फङ्ङॆ लोसु। 26हाङ् आक्क सिङि लाखुबॆ टुङ्घङ्पामि लाङ्पि स्यामिसे लोसु ‘एक्क हिच्चि डिना हुङ्पिॽङॆ, कॆ चोब्न सिङि फङ्कुङ।’ 27हाङ् योम्पक् मुखुबामि टुङ्घङ्पाऎ खो नाम्नाम् पिस्सिटु हाङ् आनॆ सिङि फङ्मा पाब्नि कामानुङ् याइपिटु।
28“टर आक्क योम्पक् मुखुबा खारा हाङ् खोसॆ खोबाङ् एक्क् फिइयामि याङ्मि सिङि लाखुबा खोम् एक्क लाङ्काम चुबु। हाङ् आक्क पॆॽलाबि लाबुहाङ् लोसु ‘आनॆ काङाबाङ् लामिम्पा सिङि फङ्इटॆ।’ 29आक्क लाङ्काम्ऎ खो लाङ्पि स्यामिसे नुःर लोसु ‘एक्क हिच्चि डिना हुङ्पिॽङॆ कॆ फङ्खाना।’ 30टर आक्क मॆखासि हाङ् खारा हाङ् सिङि मॆफङ्लढारि आक्कसॆ खो सॆक्चिम्पि सॆक्ढाङ्सु।
31“खोम् योम्पक् मुखुबा लाङ्काम्चिऎ आक्खा चोब्न खानावाँ खाङुचि हाङ् एट्टान चाइखॆटुचि। हाङ् खारामिहाङ् आक्खा चोब्न खानावाँ टुङ्घङ्पा खेम्मिटुचिमि। 32हाङ् टुङ्घङ्पॆ म योम्पक् मुखुबा याॽमि सेःरुहाङ् लोसु, ‘ओ काइसॆ निवाँ चुखुबा याॽमि आना, आनॆ काङा स्यामिसे लोमिम्पासॆ आनामि चोब्न सिङि याइपिटाना। 33कॆ आना सक्पि नाम्नाम् पिस्सिइन्टक्न आनॆ सङ्क आनाम् लाङ्काम सक्पि नाम्नाम् पिस्सिमा पाप्नॆ?’ 34हाङ् सोम् खेॽमिम्पासॆ आक्कमि टुङ्घङ्पॆ खोसॆ चोब्न सिङि मॆफङ्लढारि सॆक्चिम्पि डुखा पिस्सि सॆगाम्नॆ” कामानुङ लोसुचि।
35आक्क डॆङ्पि येसुऎ खोम् टिङ्खुबाचि लोसुचि, “आन्नॆ निवाँयुङ् लॆखुबा बुबुनुसाचि टाङ्पामि निवाँहङ्सिबाङ यङ्निटाम्नि हाङ्ग, काम् पारुबिऎ आपाऎ सङ्क आन्ना आक्रक्न लॆकानि।”
Currently Selected:
मट्टि 18: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
