लुका 9
9
एपङ्हि टिङ्खुबाचि पाङ्हाङ्मिम्पा
(मट्टि १०:५-१५; मारकुस ६:७-१३)
1येसुऎ एपङ्हि टिङ्खुबाचि सेःरुचि हाङ् खोमुचि हाङ् आक्खाचि चोब्न खारिॽमाङ्चि लाबक्मॆ नुङ् टुक्मावा नुबक्मिॽमॆ चॆक्मावा नुङ् ढुप्पाट्ट पिटुटुचि। 2हाङ् खोसॆ आक्खाचि निवाँहाङ्मि हाङ्डाम्मि खानावाँ फुबक्माम् लागि नुङ् टुक्मावाचि नुबक्मिःक्माम् लागि पाङ्हाङ्सुचि। 3आक्रल खोसॆ आक्खाचि लोसुचि, “लाम्फुबि याङ्माम् लागि आन्नॆ टोम्राङ, बॆक्खा, चामा ठका, याङ् गरक्ढारि रु चाङ्माम् लागि होइढा चेः सङ्क आखिनानॆ। 4हाम्पॆ खिम्पि आन्ना नुःर लॆःॽमि आक्क ठालबि लिरढारि आक्क खिम्पिॽन पेनानॆ। 5टर याॽमिचिऎ आन्ना नुःर मालॆॽमि हाङ्ग आक्क ठालबाङ् आम्पक्मार निवाँहाङ्मि सिरि आक्खाचिबि सिॽल कामानुङ् चिन्नामि लागि टाङ्पाम् लाङ्पिऎ बाखा फाप्पिडाआम्चिनॆ।” 6हाङ् टिङ्खुबाचि खाइटामि हाङ् चोब्न गाँवाँबि वाइमानुङ् काम्नुऎ खानावाँ खेम्मिसे टुक्खुबाचि नुबक्मिट्टुचि।
हेरोडऎ मावाप्हिमिम्पा
(मट्टि १४:१-१२; मारकुस ६:१४-२९)
7येसुऎ लॆःॽमिम्पा इघा चोब्न योम्पक्मि बारेबि गालिलबिऎ हाङ् हेरोड एन्टिपासऎ खेमु टर मॆवाप्हिसु मान्ठाभनॆ याॽमिचि “बाप्टिस्मा पिक्खुबा युहान्ना सिखॆम्पाबाङ् हिङ्पडा” कायुक्सामि। 8होइढाचि चाइ “येसु एलिया रु एक्क निवाँहाङ्मि खानावाँ लोखुबा सिखॆम्पाबाङ् हिङ्पडा कायुङ्सामि।” 9हेरोडऎ लोसु, “युहान्नामि निङ्टवाँ ग कॆन बक्मिडुङॆ, टर ग आसार कॆ खोम् बारेबि खेम्मे सिकुङ्?” हाङ् खोसॆ येसु चुब्मा मिट्टु।
येसुऎ ङापङ्बाङ्चि चामा पिॽमिम्पा
(मट्टि १४:१३-२१; मारकुस ६:३०-४४; युहान्ना ६:१-१४)
10हाङ् सॆक्ढुङ्पाचि ऎन्टाआमि हाङ् खोचिऎ लॆःॽमिम्पा चोब्न योम्पक् येसु इटुचि। हाङ् येसुऎ आक्खाचि सोरि चिःक्मानुङ् खोचि टेःॽन बेट्सेडा लोमॆ हाटा कॆक्पि लाखॆटुचि। 11टर डिरिक् याॽमिचिऎ खो खॆॽमॆ सि कामानुङ् लेटकुचि हाङ् टिङ्पकुचि। येसुऎ आक्खाचि टामा पिट्टुचि हाङ् निवाँहाङ्मि हाङ्डाम्मि बारेबि इटुचि हाङ् टुक्खुबाचि नुबक्मिट्टुचि।
12नाम् डाखॆॽमा परका हाङ् एपङ्हि टिङ्खुबाचिन डाबामि हाङ् कासामि, “इघा डिरिक् याॽमिचि लेॽहाङ्सॆचॆ, मान्ठाभनॆ गॆअङ्मॆअङ्हा गाँवाँबि खॆःॽमि हाङ् खोचिम् लागि चामॆ डुङ्मॆ नुङ् पेम्मॆ खानावाँ टङुकुचि, मान्ठाभनॆ कानि आसास पेम्मिनिहा ठालबि चुकि।” 13टर खोसॆ आक्खाचि लोसुचि, “आन्नॆॽन इघाचि चामा पिट्टाम्चिनॆ” हाङ् टिङ्खुबाचिऎ लोसुचि, “काङ्का नुङ् ङाचि चारेपा नुङ् हिच्चि ङाः टेःॽन चु। माल काङ्कॆ इन्टेॽमा हाङ् इघा चोब्न याॽमिचि चामा पिट्टुचिर मिक्चिमॆ?” 14आक्कुबि ङाबङ्चिर वाठाङ्पाचि चुआमि। येसुऎ टिङ्खुबाचि लोसुचि, “याॽमिचि ङापङ् ङापङ्बि खिरिरि पेम्मिटाम्चिनॆ।” 15हाङ् टिङ्खुबाचिऎ आक्रक्न पेम्मिटुचिमि। 16हाङ् येसुऎ आक्खा ङाचि चारेपा नुङ् हिच्चि ङाः लासु हाङ् पारु पोट्टि खाङ्से ओहाक् पिट्टु हाङ् चारेपा नुङ् ङाः आसिका पिट्टु। हाङ् योबु हाङ् चोब्न याॽमिचि हाबिटाम्चिनॆ कामानुङ् टिङ्खुबाचि पिट्टुचि। 17चोप्पासॆ बखार चोउचि हाङ् टिङ्खुबाचिऎ एम्पक्मिम्पा खोम्मार एपङ्हि बचॽवा लिसा।
पाट्रुस खासिमिम्पा
(मट्टि १६:१३-२३; मारकुस ८:२७-३३)
18इॽया येसु टाङ्पा टेःॽन निवाँहाङ् नुङ् यामुमे पाइटा, टिङ्खुबाचि खोनुङ् चुआमि, हाङ् खोसॆ आक्खाचि सिमुचि, “याॽमिचिऎ काङा आसार लोॽङामिहा?” 19आक्खाचिऎ लोसुचि, “ऎॽवाचिऎ बाप्टिस्मा पिक्खुबा युहान्ना काक्मि, ऎॽवाचिऎ एलिया हाङ् होइढाचिऎ चाइ आरेॽऎ एक्क निवाँहाङ्मि खानावाँ लोखुबा सिखॆम्पाबाङ् हिङ्पडा काक्मि।” 20येसुऎ आक्खाचि सिमुचि, “आन्नॆ चाइ माङ् लोॽङानिहा टा? का आसार?” हाङ् पाट्रुसऎ खानावाँ ऎम्पिसे लोसु, “आना निवाँहाङ्ऎ पाङ्हाङ्पा खिरिस्ट ना!”
21टर येसुऎ “ग खानावाँ आसास आनआलोसाम्चिनॆ” कामानुङ् टिङ्खुबाचि काम्नुःर लोसुचि। 22हाङ् खोसॆ आक्खाचि लोसुचि, “निवाँहाङ्ऎ पाङ्हाङ्पा काङा याॽमिमि पासाऎ एट्टान डुखा आङ्मा लॆ। खो याहुडिचिम् टुङ्घङ्पा हाङ् ढ्या याटाङ्पाबाचिबाङ् नुङ् मोसामि यायेॽमा चिन्खुबाचिबाङ् सिच्चाइखॆ हाङ् खोचिऎ खो सेरुकुचि टर सुम्चि डिना डॆङ्पि खो हिङ्प।”
टिङ्खुबाचिऎ मुमॆ योम्पक्
(मट्टि १६:२४-२८; मारकुस ८:३४-९:१)
23हाङ् खोसॆ आक्खाचि चोब्न लोसुचि, “आसा काम् टिङ्खुबा लिमा मिनुक्, खोसॆ टाङ्पान मिखॆॽमा लॆ हाङ् टाङ्पामि डुखामि कुरुसा खिन्मानुङ् काङा टिङ्मा लॆ। 24मान्ठाभनॆ आसॆ टाङ्पाम् हिङ्खामा हिङ्मा यकु, खोसॆ निवाँहाङ् नुङ् लिऎ हिङ्खामा माइकु, टर आसॆ काम् लागि खोम् हिङ्खामा लुक्पिकु, खोसॆ निवाँहाङ् नुङ् लिऎ हिङ्खामा हिङ्पकु। 25याॽमिचिऎ बाखाटेम्पि चुहा चोब्न ठका टक्चाकुचि हाङ्स टाङ्पाम् लावा चाइ हिङ्पहिसुचिनि हाङ्ग माङ् काम्नुऎ लिऎ? 26हाङ् ह आसा कानुङ् काम् खानावाँबि ङेसिॽ काङा याॽमिमि पासा सङ्क टाङ्पाम् नुङ् निवाँहाङ् आपामि हाङ् सॆङ्सॆङॆ निवाँखाटॆखुबाचिम् निङ्लावाबि टामार आक्क नुङ् ङेसिङा। 27आन्ना कॆ चाइबान लोकानि, गुबि येॽमिम्पाचिबि ऎॽवाचि चाइ निवाँहाङ्मि हाङ्डाम् मॆखाङ्टॽलढारि सिखॆॽमिनि।”
येसुमि रुपा होइकन लिमिम्पा
(मट्टि १७:१-८; मारकुस ९:२-८)
28आक्क खानावाँ लोमिम्पा बाङ्चि डिना डॆङ्पि पाट्रुस, युहान्ना नुङ् याकुब सोरि चिःक्मानुङ् येसु निवाँहाङ् नुङ् यामुमाम् लागि पङ्पङ्माबि खारा। 29खो निवाँहाङ् नुङ् यामुमॆपाइमार खोम् ङाचिक् होइकन लिसा, हाङ् खोम् चे लेन्टाऎ चिक्खॆम्पा नाम्र बिॽयाक्ट लिमानुङ् ओऎ लॆटा। 30हाङ् खोनुङ् मोसा हाङ् एलिया खाङ्ङुसाचि हाङ् येसु नुङ् यामुबक्काचि। 31खोचि पारुबिऎ निङ्लावाबि खाङ्ङुसामि हाङ् येसुमि सिखॆॽमॆ बारेबि यामुमेपाइटामि। ग खानावाँ खोसॆ यारुसालेम्पि मुमॆ योम्पक् लॆटा।
32पाट्रुस हाङ् खोनुङ् चुखुबाचि इम्टिखॆॽमिम्पा लॆटामि। टर हुम्पक्मार खोचिऎ येसुमि निङ्लावा नुङ् सोरि येॽमिम्पा हिप्पा याॽमिचि खाङ्टकुचि। 33मोसा नुङ् एलिया ऎम्पक्मा परक्मार पाट्रुसऎ काङा माङ् यामुमे पाइङॆ कामानुङ् माङ्स मॆमिॽलारॆ येसु लोसु, “चिन्खुबो, कानि गुबिॽन पेम्मा काम्नुऎ लि। मसॆ गुबि सुम्चि पोप्ठाम् मुमा, एक्क आनाम् लागि, एक्क मोसामि लागि हाङ् एक्क एलियामि लागि।”
34खो यामुभॆट्टा रक्न आक्खाचि खिन्डुमाऎ डॆगुचि हाङ् टिङ्खुबाचि किसिआमि। 35हाङ् खिन्डुमाबाङ् गरक्मा खानावाँ टाआ, “इग काङॆ सॆःक्डुङॆ काम् पासा यो, खोम् खानावाँ खेमाम्नॆ।” 36आक्क खानावाँ लुक्खारा हाङ् खोचिऎ आक्क सुम्पाङ्बि येसु टेःॽन खाङ्टकुचि। हाङ् आक्रल टिङ्खुबाचिऎ खाङ्मिम्पा चोब्न ठका आसास मॆइटुचिमि।
येसुऎ वाठाङ्पा पिसा खारिॽमाङ्बाङ् नुबक्मिॽमिम्पा
(मट्टि १७:१४-१८; मारकुस ९:१४-२७)
37वेन्डाक् लाम्पॆ येसु नुङ् सुम्पाङ् टिङ्खुबाचि पङ्पङ्माबाङ् उङामि हाङ् डिरिक् याॽमिचि येसु चुब्सि टाआमि। 38आक्खा डिरिक् याॽमिचिम् लुम्पाङ् एक्क याॽमि ढ्या साम्लाऎ याकामानुङ् येसु लोसु, “चिन्खुबो, काम् पासा सक्पि नाम्नाम् पिसिबिॽङॆ, ग काम् एक्क टेःॽन पासा! 39एक्क खारिॽमाङ्ऎ लाबुकु, हाङ् खो याकाब, हाङ् सिखॆन्टॽन लि हाङ् याबाङ्कॆ चोयमा लाबकु। हाङ् हुचेॽवे चेप्से हुवा मॆसिॽलढारि लेनलेहाङ्सुनि। 40काङॆ आनाम् टिङ्खुबाचि खारिॽमाङ् लाबक्पिच्चिमॆ कामानुङ् लोसुङ्चि टर खोचिऎ मालाबॽहिसुचि।” 41येसुऎ लोसु, “ओ निवाँयुङ् माआनिहा काइसा याॽमिचि, हानाम्ढारि काङा आन्नानुङ् लिॽङॆ? हाङ् कॆ आन्ना हानाम्ढारि आङ्ढाङ्मॆ? आनाम् वाठाङ्पा पासा गुबि लाडापॆ।” 42टर आक्क पिसा टाभॆटारक्न खारिॽमाङ्ऎ टॆप्रङ्ट चेप्ढाङ्सु हाङ् लाबु। टर येसुऎ आक्क खारिॽमाङ् वोसु हाङ् आक्क पिसा नुबक्मिट्टु हाङ् उम्पा पिट्टु। 43गरक्मा निवाँहाङ्मि चॆक्मावा खाङुचि हाङ् चोब्न याॽमिचि आक्खॆटुचि।
येसुऎ टाङ्पा सिखॆॽमॆ खानावाँ इमिम्पा
(मट्टि १७:२२-२३; मारकुस ९:३०-३२)
याॽमिचि आक्खॆॽमारक्न येसुऎ आक्खाचि लोसुचि,
44“काङॆ लोमा ठाबाक्डानिहा खानावाँ आमिखॆटाम्नॆ। निवाँहाङ्ऎ पाङ्हाङ्पा याॽमिमि पासा याॽमिचिम् हुक्पि सिॽमा परक्डा।” 45टर टिङ्खुबाचिऎ ग खानावाँ वाॽमॆ निवाँ माटक्चामिम्पासॆ येसुऎ यामुमिम्पा खानावाँ आक्खाचिऎ मॆवाप्हिसुचि। खोचि गमि बारेबि येसु सिम्मा किसियुक्सामि।
चोब्बाङ् ढ्या आसा?
(मट्टि १८:१-५; मारकुस ९:३३-३७)
46हाङ् एपङ्हि टिङ्खुबाचिम् लुम्पि आसा चाइ चोब्बाङ् ढ्या कामानुङ् खानावाँ लिसा। 47येसुऎ आक्खाचिम् निवाँबिऎ खानावाँ वाप्टकु हाङ् एक्क चाचा खोम् कॆक्पि युङु, 48हाङ् आक्खाचि लोसुचि, “आसॆ काम् निङ्पि इग चाचा काम्नुःर लॆकु, आक्कसॆ काङान काम्नुःर लॆःॽङा, हाङ् आसॆ काङा काम्नुःर लॆःॽङा आक्कसॆ काङा पाङ्हाङ्खुबा आपा काम्नुःर लॆकु। आन्नाम् लुम्पि आसा चाइ मिःछुॽमा लि, खोन चोब्बाङ् टुङ्घङ्पा लि।”
आन्ना काइर आलॆखुबाचि चोब्न आन्नामि याॽमिचि
(मारकुस ९:३८-४०)
49युहान्नाऎ येसु लोसु, “चिन्खुबो, काङ्कॆ एक्कसॆ आनाम् निङ्पि याॽमिचिबाङ् खारिॽमाङ्चि लाबक्ढाङ्मिम्पा खाङ्टकुङ्का हाङ् काङ्कॆ खो आक्क मुमा मापिट्टुङ्का। मान्ठाभनॆ खो काङ्कामि याॽमि हॆॽनॆ।” 50येसुऎ टिङ्खुबाचि लोसुचि, “खो आलॆटॆ आलोसाम्चिनॆ। आक्रक्मा योम्पक् आयिगॆ आलोसाम्नॆ मान्ठाभनॆ आन्ना काइसॆ आलॆखुबा चोब्न आन्नाम् याॽमिचिन।”
सामारिचिऎ येसु सिच्चामिम्पा
51खोमि सॆॽलन पारुबि खॆॽमॆ लः टामिम्पासॆ येसुऎ यारुसालेम खॆॽमॆ चाइबानऎ निवाँ मुसु। 52हाङ् खोसॆ पाङ्कुचाचि खोबाङ् याॽलन पाङ्हाङ्सुचि। आक्खाचि खोम् लागि चोब्न ठका टङ्माम् लागि सामारिचिम् एक्क गाँवाँबि खारामि। 53टर गाँवाँबिहा याॽमिचिऎ खो यारुसालेम खॆ कामानुङ् लेटक्मिम्पासॆ खो नुःर मालॆटुचि। 54ग खाङ्टकुचि हाङ् खो टिङ्खुबाचि याकुब नुङ् युहान्नाऎ येसु लोसुचि, “पारभु, आना माङ् मिनुॽनॆ माल पारुबाङ् मिः हेॽल हाङ् इघाचि सिखॆॽमिर कामानुङ् कामॆ?”
55टर येसु ऎम्पका हाङ् आक्खाचि वोसुचि। 56हाङ् येसु नुङ् खो टिङ्खुबाचि होइक गाँवाँबि खारामि।
सुम्पा याॽमिचिऎ येसु टिङ्मा मिॽमिम्पा
(मट्टि ८:१९-२२)
57खोचि खॆॽमॆ सिसामिर एक्क याॽमिऎ येसु लोसु, “आना हाबि खॆःॽनार कॆ आना टिङ्खाना।”
58हाङ् येसुऎ आक्क लोसु, “ठाॽनाम् हुॽवाचिम् पेन्ठाम् ढाणा हाङ् सवाँचिम् हाब्बाङ् चु, टर याॽमिमि पासाम् ग निङ्टवाँ युङ्ठाम् ठाल स माआ।”
59हाङ् येसुऎ होइक एक्क याॽमि लोसु, “काङा टिङ्ङॆ।” टर आक्कसॆ लोसु, “चिन्खुबो, याॽल काङा काम् आपा हुम्सि खॆॽमा पिॽङॆ।” 60येसुऎ आक्क लोसु, “लावाबि सिखॆखुबाचिन सिखॆम्पाचि हुम्मा पिट्टाम्चिनॆ, टर आना खारॆहाङ् निवाँहाङ्मि हाङ्डाम्मि नुऎ खानावाँ इटॆचॆ।”
61होइकसॆ सङ्क लोसु, “चिन्खुबो, कॆ आना टिङ्ना, टर याॽलि काम् खिम्पिहाचिनुङ् खाइटिङ्यो काडामा पिॽङॆ।” 62येसुऎ आक्क लोसु, “टाङ्पाम् हुक् हालबि युङ्मानुङ् टेराङ्गॆ खाङ्खुबा आसास निवाँहाङ्मि हाङ्डाम्मि लागि योम्पक् पिक्खुबा याॽमि लिनि।”
Currently Selected:
लुका 9: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
