लुका 10
10
येसुऎ वापङ् याॽमिचि पाङ्हाङ्मिम्पा
1आक्क डॆङ्पि टुङ्घङ्पा येसुऎ वापङ् याॽमिचि सॆःगुचि। हाङ् हिप्पा हिप्पा लॆःॽमानुङ् खो खॆॽमा परक्मिम्पा चोब्न गाँवाँ नुङ् हाटाबि खोबाङ् याॽल आक्खाचि पाङ्हाङ्सुचि। 2खोसॆ आक्खाचि लोसुचि, “टुम्मिम्पा चारुङ् ग डिरिक् चु, टर चारुङ् खोम्खुबाचि चाइ मिःक्म लॆकुचि। मसॆ चारुङ्मि टुङ्घङ्पा खोम्खुबाचि पाङ्हाङ् पिच्चिमॆ कामानुङ् ङागानॆ। 3ह आन्ना खारानॆ, कॆ आन्ना ठाॽनाम् हुॽवाचिम् लुम्पि सामुङ्चिर मुमानुङ् पाङ्हाङ्मॆ सिकानि। 4हाङ् आन्नॆ याङ्, बॆख्खा, सुःॽमारा माङ्स आखिनानॆ। हाङ् लाम्फुबि याॽमिचि नुङ् टक्भॆआ टक्भॆआ खानावाँ सङ्क आइसानॆ।
5“हाम्पॆ खिम्पि आन्ना भॆङ्कानि, भॆम्माबाङ् याॽल ‘ग खिम्पि सान्टि लिर’ कामानुङ् आसिका पिट्टाम्चिनॆ। 6आक्क खिम्पिहा याॽमिचिऎ सान्टि नेन्चोकुचि हाङ्ग खोचिऎ आसिका टक्चाकुचि। टर नेन्चोउचिनि हाङ्ग आक्क आसिका आन्नाबिन ऎन्टा। 7खिम्खिम्पि आभॆनानॆ टर हाम्पॆ खिम्पि आन्ना काम्नुःर लॆकानि आक्क खिम्पिॽन पेनानॆ हाङ् आक्खाचिऎ टङ्पिॽमिम्पा चामा ठका चाआनॆ। मान्ठाभनॆ योम्पक् मुखुबॆ खोम् नाम्याक् टक्चाकु।
8“आक्रक्न आन्ना हाम्पॆ हाटाबि भॆङ्कानि आक्कुबिहा याॽमिचिऎ नुःर लॆसॆ पिॽमिम्पा चामाहा ठका चाआम्नॆ। 9आक्कुबिहा टुक्खुबा याॽमिचि नुबक्मिट्टाम्चिनॆ, हाङ् आक्खाचि ‘निवाँहाङ्मि हाङ्डाम् नेन्टाङ्न टाखॆडा’ कामानुङ् लोसाम्चिनॆ। 10टर हाम्पॆ हाटाबिहा याॽमिचिऎ आन्ना काम्नुःर लॆटानिनि, आन्ना लाम्चुॽमॆबि आम्पकानॆ हाङ् लोसाम्चिनॆ, 11आन्नॆ काङ्कामि खानावाँ माखेम्मिम्पासॆ आन्ना सक्पि निवाँहाङ्ऎ खोम् सिरि होकुर काङ्कॆ माङ्स लेसुङ्कानि कामानुङ् आन्नामि हाटाबिऎ ढुल सङ्क काङ्कामि लाङ्पिहा फाप्लाङ्ह्कुङ्का। टर आन्नॆ ग खानावाँ वाबाम्नॆ निवाँहाङ्मि हाङ्डाम् नेन्टाङ् टाखॆडा। 12कॆ आन्ना लोकानि, निवाँहाङ्ऎ न्यायॆ लॆःॽमार आक्क हाटामि डसा साडोम हाटा बाङ्स एट्टान काइर लि।
निवाँयुङ् आलॆखुबा हाटाबिहा याॽमिचि
(मट्टि ११:२०-२४)
13“ढिक्कारा, ओ खोराजिन नुङ् बेठसेडाबिहा याॽमिचि, मान्ठाभनॆ आन्नामि लुम्पि लॆःॽमिम्पा आक्खॆॽमाहा योम्पक् टुरोस नुङ् सिडोनबि लॆःॽमिम्पा हाङ्ग आक्कुबिहा याॽमिचिऎ टाङ्पॆ लॆःॽमिम्पा हिङ्वाबि डुखा मिन्से चखॆॽमामि चेः चाङ्मानुङ् ठाब्बि सिसे निवाँ ऎनुचि हला। 14मसॆ निवाँहाङ्ऎ न्यायॆ लॆःॽमार टुरोस नुङ् सिडोन्बिहा याॽमिचि आन्नाबाङ् डिरिक् नाम्नाम् पिसिकु। 15हाङ् ओ कफारनुहुमबिहा याॽमिचि, माल आन्ना पारुबि टुङ्घङ्पा लिकिङ्का मिङ्कानिहा? आन्ना ग नाराक्बि खॆकानि।”
16येसुऎ टिङ्खुबाचि लोसुचि, “आन्नामि खानावाँ खेम्खुबाचिऎ कामिन खानावाँ खेम्कुचि। आन्ना सिच्चाखुबाचिऎ काङान सिच्चाङामि हाङ् काङा सिच्चोखुबॆ काङा पाङहाङ्खुबा निवाँहाङ्न सिच्चोकु।”
वापङ् टिङ्खुबाचि ऎन्टामिम्पा
17आक्खा पाङ्हाङ्पा वापङ् टिङ्खुबाचि#१०:१७ एक्क हिच्चि साब्चिराबि वापङ्हि टिङ्खुबाचि कामानुङ् स साब्डा। चेन्चासे ऎन्टाआमि हाङ् टुङ्घङ्पा लोसुचि, “टुङ्घङ्पो, काङकॆ आनाम् निङ्पि यामुमार खारिॽमाङ्चिऎ सङ्क कानिम् खानावाँ खेमुचि।” 18येसुऎ आक्खाचि लोसुचि, “काङॆ साइटान नाम्फलिॽवाबाङ् नाम्टुरुङ्मा हेढ्ढिमिम्पा रक्मान हेढ्ढिम्मॆ पाइऎ खाङुङ। 19खेमाम्नॆ, कॆ आन्ना पुसेमा नुङ् बिच्छिचि सिक्मॆ चॆक्मावा हाङ् आन्ना काइर लॆखुबा साइटानमि चोब्न चॆक्मावा सक्पि ढुप्पाट्ट पिडानि, हाङ् माङ्ऎ सङ्क आन्ना काइसॆ लॆटानिनि। 20हाङ्स चाप्चि काङ्कामि ढुप्पाट्टबि टाआमि कामानुङ् आचेन्चाआनॆ टर टाङ्पाम् निङ् पारुबि साब्डा कामानुङ् चेन्चाआनॆ।”
येसु निवाँहाङ् नुङ् यामुसे ओहाक् पिॽमिम्पा
(मट्टि ११:२५-२७; १३:१६-१७)
21आक्रलॽन सॆङ्सॆङॆ लावाऎ चेप्खेप्मानुङ् चेन्चासे येसुऎ लोसु, “ओ आपा, पारु हाङ् बाखाटेम्पिऎ पारभु, कॆ आना ओहाक् पिःॽना। मान्ठाभनॆ आनॆ इघा खानावाँ निवाँटाङ्पाङाये मिन्खुबाचि नुङ् चेन्टुबावाँ याॽमिचिबाङ् चुमुना हाङ् पिसाचि रक्मा याॽमिचि चाइ वाप्मिटुचिना। मान्ठाभनॆ आपो, आनॆ गरक्न लॆःॽमा काम्निटुना।
22“काम् निवाँहाङ् आपाऎ काङा चोब्न चॆक्मावा नुङ् ढुप्पाट्ट पिडिङ। आपाऎबाङ् काङा आपामि पासाङा आसॆस लेङामिनि। आक्रक्न पासाऎ हाङ् खोसॆ लेॽमिॽमिम्पाचिबाङ् होइढा आसॆस आप्पा लेसुचिनि।”
23आक्क डॆङ्पि येसु टिङ्खुबाचि पोट्टि हिङ्पका हाङ् टिङ्खुबाचि टे लोसुचि, “इघा चोब्न खानावाँ खाङ्टखुबा आन्ना एट्टान आसिका टक्चामिम्पाचि रेम। 24कॆ आन्ना लोकानि, निवाँहाङ्मि खानावाँ लोखुबाचि नुङ् हाङ्चिऎ आन्नॆ खाङ्मिम्पा इघा खानावाँ खाङ्मा मिॽमिम्पा लॆटुचि, टर खाङ्मा हाङ् खेम्मा माटक्कुचि।”
नुऎ सामारि
(मट्टि २२:३४-४०; मारकुस १२:२८-३१)
25इॽया एक्क मोसामि यायेॽमा चिन्खुबा टाआ हाङ् येसुमि निवाँ ठाग्मॆ निवाँएॆ येसु सिमु, “टुङ्घङ्पो, काङा हिङ्चाढाङ्माम् लागि माङ् लॆःॽमा लॆऎ?”
26येसुऎ लोसु, “निवाँनेन् यायेॽमाबि माङ् साब्डॆ, आक्कुबि आनॆ माङ् माखाङ्टिटुनॆ?”
27मोसामि यायेॽमा चिन्खुबाऎ लोसु, “आनॆ टाङ्पाम् पारभु आम् चोब्न लावाऎ, आम् सक्माऎ, चॆॽमावाऎ हाङ् आम् चोब्न निवाँऎ नाम्नाम् पिसिमा लॆ। टाङ्पा रक्न टाङ्पाम् नेन्टाङ्हाचि सङ्क नाम्नाम् पिसिॽमा लॆःॽमि।”
28येसुऎ लोसु, “आनॆ चाइबान इरिसुना। आक्रक्न लॆटॆ हाङ् हिङ्चाढाङ्ना।”
29मोसामि यायेॽमा चिन्खुबाऎ टाङ्पा काम्नुखॆॽमॆ निवाँऎ येसु सिमु, “काम् नेन्टाङ्ऎ आसारटा?”
30हाङ् येसुऎ लोसु, “एक्क याॽमि यारुसालेमबाङ्कॆ यरिहो लोमॆ हाटाबि युमे सिसार खुसुबाङ्चिऎ खो लाम्फुबि चुबुचि। हाङ् उम् चेः बिन्पिटुचि हाङ् सिखॆॽमा ना हिङ्चामॆ लिरढारि रगुचि हाङ् याइडाउचि। 31एच्छहाङ्कॆ आक्क लाम्न एक्क याटाङ्पा टाआ हाङ् आक्क याॽमि खाङु हाङ् मिउगॆॽन यिफाक्डाउ। 32हाङ् एच्छहाङ् फॆगुवाङ् सङ्क आक्क लाम्न टाआ हाङ् आक्क खाङ्टकु हाङ् यिफाक्डाउ। 33हाङ् एच्छहाङ् सामारि#१०:३३ याहुडि जाटिचिऎ मिःछुॽमा जाटिबिहा याॽमिचि कामानुङ् चिक्सिम्पा याॽमिचि सामारि लोकुचि। सामॆक्बिऎ याॽमि सङ्क टाआ हाङ् आक्क खाङ्टाकु हाङ् नाम्नाम् पिसिटु। 34उम् हुवाबि जाइटुनमि केवा नुङ् आङ्गुरमि खॆवा टिबिटु। हाङ् खोम् गढा सक्पि ठेट्टिसु हाङ् पोप्ठम् ठेयोङ्पि लाखॆटु। आक्कुबि खोसॆ आक्क याॽमि नुःर खाङु। 35वेन्डाक् लाम्पॆ पोप्ठाम् ठेयोङ्पिऎ टुम्घङ्पा सिःमि हिच्चि याङ् पिट्टु हाङ् गर लोसु, इग नुःर खाङॆ, इघा याङ्ऎ माखेटु हाङ्ग ऎन्टाङार काङॆ फङ्कुङ।”
36हाङ् येसुऎ आक्क निवाँनेन् यायेॽमा खानावाँ इखुबा याटाङ्पा सिमु, “इघा सुम्पाबि आक्क रग्भुङ्पा याॽमिमि नेन्टाङ्ऎ आसार?”
37आक्कसॆ लोसु, “खो नाम्नाम् पिसिखुबा चाइ।” हाङ् येसुऎ लोसु, “खारॆ हाङ् आना स आक्रहाङ्न लॆटॆ।”
येसु मार्ठा नुङ् मारियाम्मि खिम्पि
38येसु नुङ् खोम् टिङ्खुबाचि खॆॽमॆ पाइटामिर एक्क गाँवाँबि टाआमि। आक्कबि एक्क मार्ठा लोमॆ मेॽनुङ्माऎ येसु हाङ् टिङ्खुबाचि खोम् खिम्पि लाखॆटु हाङ् काम्नुःर लॆटुचि। 39मार्ठामि मारियाम निङ् चुखुबा एक्क मेॽनुङ्मा नुसा चुआ। खो येसुमि खानावाँ खेम्माम् लागि खोम् लाङ् कॆक्पि पेना। 40टर मार्ठा चाइ हाट्टार हॆङ्से चामाडुङ्मामि योम्पक् मुढाङ्सा। टाङ्पॆ टेःॽन योम्पक् मुमा सिॽमिम्पासॆ खो येसुबि टाआ हाङ् लोसु, “ओ पारभु, चुहा चोब्न योम्पक् उङ्टाङ्पॆ मुमॆ पाइङा। टर काम् नुसा चाइ माङ्स मुनि। माङ् आनॆ खाङ्टकुनानॆ? आक्क खारॆ हाङ् काङा योम्पक् मुबाकॆ लोसॆ।” 41टर येसुऎ खो लोसु, “मार्ठा, ओ मार्ठा, आना डिरिक् खानावाँबि निवाँ हॆङुक्ना। 42टर पाबुऎ खानावाँ एक्क टेःॽन चु, आक्कन मरियामऎ सॆःक्डु। ग खानावाँ खोबाङ् ङाप्नियॆछ।”
Currently Selected:
लुका 10: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
