लुका 11
11
येसुऎ निवाँहाङ् नुङ् यामुमा चिन्डुचिहा
(मट्टि ६:९-१३; ७:७-११)
1इॽया येसु एक्क ठालबि निवाँहाङ् नुङ् यामुमॆ पाइटा। खो निवाँहाङ् नुङ् यामुसिट्टा, आक्क डॆङ्पि खोम् एक्क टिङ्खुबा टाआहाङ् खो लोसु, “पारभु, बाप्टिस्मा पिक्खुबा युहान्नाऎ उम् टिङ्खुबाचि निवाँहाङ् नुङ् यामुमा चिनुकुचि। मसॆ काङ्का स आनॆ निवाँहाङ् नुङ् यामुमा चिन्चिमॆ।” 2येसुऎ आक्खाचि लोसुचि, “आन्ना गरहाङ् निवाँहाङ् नुङ् यामुसानॆ,
“ओ आप्पा निवाँहाङ्, आनाम् निङ् सॆङ्सॆङॆ यो कामानुङ् मिनुचिर, हाङ् सॆॽलन आनाम् हाङ्डाम् टार,
3डिनाहुँ काङ्का चामा ठका पिच्चिमॆ।
4काङ्कॆ काङ्का काइसॆ लॆखुबाचि यङ्निटिन्टॽन काङ्कामि हिङ्वा यङ्निपिच्चिमॆ। हाङ् काङकॆ ऎआङ्हिमॆ गारि ऎठाक्चिमॆ।”
5हाङ् येसुऎ टिङ्खुबाचि लोसुचि, “मिॽलाआम्नॆ, आन्नाबाङ् एक्क लाङ्काम्मि खिम्पि युटा इम्टिखॆॽमार खॆ हाङ् लोकु, ‘खिम्पि आसा आसारो चुकानिहा? काङा मिःक्म चामाह ठका पिॽङानॆम। 6मान्ठाभनॆ काम् खिम्पि एक्क लाङ्काम् पोब्सि टाडा। टर खो चामा पिॽमाम् लागि कानुङ् माङ्स माआ।’ 7आक्क खिम् हङ्सि चुखुबॆ हङ्सिॽयुबाङ्न लोसु, काङा डुखा आपिॽङॆ। लम्भॆरॆङ्मा सङ्क सॆक्ठाङ्डुङ्, हाङ् चाचाचिनुङ् इम्चाखॆडिङ। मसॆ पःग्माहाङ् आना कॆ माङ्स पिॽहिनानि।” 8ग खानावाँ इसिटु हाङ् येसुऎ आक्खाचि लोसुचि, “आक्कसॆ लाङ्काम् मिॽलासे पिट्टुनि हाङ्स ङाग्खुबाऎ ङाग्मिम्पा ङाग्मिम्पान लॆःॽमिम्पासॆ खो पःगुक्हाङ् खो पाबुहा चोब्न ठका पिॽहाङ्कु।
9“मसॆ कॆ आन्ना लोकानि, ङागानॆ आन्नॆ टक्चाकाम्नि, यगाम्नॆ आन्नॆ भेट्टकाम्नि हाङ् लम्भॆरॆङ्मा डुबाम्नॆ आन्नामि लागि हेम्ब। 10मान्ठाभनॆ ङाग्खुबॆ टक्चाकु, यक्खुबॆ यक्टःकु हाङ् लम्भॆरॆङ्मा डुब्खुबामि लागि हेम्ब। 11माल आन्नाबि आसा चाइ गरक्मा आप्पा चुऎ, उम् पासाऎ ङा ङाग्मार पुसेमा पिक्खुबा? 12हाङ् वॆड्डिन् ङाग्मार बिच्छि पिक्खुबा। 13आन्ना काइसाहा याॽमि लॆकानि हाङ्स टाङ्पाम् चाचाचि काम्नुहा ठका पिॽमा लेकाम्नि हाङ्ग आन्नामि पारुबिऎ आपाऎ खोनुङ् ङाग्खुबाचि ऎॽवा डिरिक् सॆङ्सॆङॆ लावा पिॽमा लॆ कामानुङ् लेकु।”
येसु हाङ् बालाजिबुला
(मट्टि १२:२२-३०; मारकुस ३:२०-२७)
14इॽया एक्क याॽमि खारिॽमाङ्ऎ लाॽमिम्पासॆ याटानिऎ लिमिम्पा लॆटा। मसॆ येसुऎ आक्क याॽमि हङ्सि चुऎ खारिॽमाङ् लाबक्पिक्टु हाङ् आक्कमि याटाबका। ग खाङुचि हाङ् आक्कुबि चुखुबा चोब्न याॽमिचि आक्टिखारामि। 15टर आक्खाचिबाङ् ऎॽवाचिऎ चाइ येसु गर लोसुचि, “गसॆ खारिॽमाङ्चिम् टुङ्घङ्पा साइटानमि चॆक्मावाऎ खारिॽमाङ्चि लाबक्कुचिहा रेम।” 16होइढा ऎॽवाचिऎ चाइ खो ठाःक्माम् लागि लोसुचि, “ग योम्पक् निवाँहाङ्मि चॆक्मावाऎ लॆःॽमिम्पा हाङ्ग पारुबाङ् काङ्का एक्क चिन्ना खाङ्मिचिमॆ।” 17टर येसुऎ आक्खाचिम् निवाँबिहा खानावाँ वाप्टकु हाङ् लोसुचि, “हाम्पॆ हाङ्टेम् हङ्सि टाङ्पा टाङ्पाबि खिःक्मि, आक्क हाङ्डाम् लुक्खॆ, हाङ् हाम्पॆ खिम्पिहाचिमि निवाँ टङ्नि आक्क खिम् सङ्क लुक्खॆ। 18आक्रक्न साइटानमि साइटान नुङ्न खिमाटुमा लिसा हाङ्ग, आक्क सङ्क लिढाङ्हिनि, आक्क लुख्खॆ मान्ठाभनॆ आन्नॆ काङा साइटानमि चॆक्मावाऎ खारिॽमाङ्चि लाबकु लोॽङानि। 19कॆ साइटानमि चॆक्मावाबाङ् खारिॽमाङ्चि लाबक्कुङ्चि हाङ्ग, आन्नामि टिङ्खुबाचिऎ चाइ आसाबाङ् लाबकुच्चॆ टा? आक्खाचिऎन आन्नामि हुन्नहा खानावाँ खाङ्मिडानि। 20टर, कॆ निवाँहाङ्मि चॆक्मावाबाङ् खारिॽमाङ्चि लाबक्मॆ योम्पक् यिगुक्ङा हाङ्ग आन्नामि लुम्पि निवाँहाङ्मि हाङ्डाम् टाखॆडा। 21एक्क चॆकुयॆ याॽमिऎ आप्चिरा वेमानुङ् उम् खिम् हुङु हाङ्ग उम् कॽनाम् माङ्स माखॆॽनि। 22टर खोबाङ् सङ्क चॆकुयॆ याॽमि टाआ हाङ्ग आक्क रगुकु हाङ् हेचाइकु हाङ् उम् आप्चिरा सङ्क ङाप्फॆकु हाङ् उम् चोब्न कॽनाम् लुबुकु हाङ् आक्कसॆ लाङ्काम्चि नुङ् हाकु। 23हाङ् आसा चाइ काङानुङ् टङ्नि, खो काङा काइर लॆखुबा लि, हाङ् आसा चाइ कानुङ् खोम्मॆ योम्पक् मुनि, खोसॆ कॆ खोम्मिम्पा सङ्क टुप्लाहाङ्कु।
खारिॽमाङ् ऎन्टा
(मट्टि १२:४३-४५)
24“एक्क याॽमिबाङ् खारिॽमाङ् आम्प हाङ् आक्क आसास पेम्मिनिहा ठालबि पेम्माम् लागि काम्नुऎ ठाल यक्से खॆ। टर हाबिस काम्नुऎ ठाल यक्टकुनि हाङ् आक्कसॆ लोकु, ‘याॽल पेन्डिङॆ ठालबिॽन खॆङा’ हाङ् आक्क ऎन्टा। 25आक्क टामार आक्कसॆ म खिम् बॆःक्से काम्नुःर काम्नुःर चिल्लाहाङ्पा खिम्र यक्टकु। 26ग खाङ्टकु हाङ् आक्कसॆ खोबाङ् सङ्क काइसा होइढा वाङ्चि खारिॽमाङ्चि सेटॆकुचि हाङ् आक्खाचि चोब्न हङ्सिॽयु भॆनुक्मि हाङ् पेनुक्मि। हाङ् आक्क याॽमि याॽलऎ बाङ्स किॽमालाम्ऎबि लि।”
चाइबानऎ हाङ्हाङ्
27येसु यामुभॆट्टा रक्न आक्खा याॽमिचिबाङ् एक्क मेॽनुङ्मा ढ्या साम्लाऎ गरहाङ् कासा, “आना टक्खुबा हाङ् खोम् डुरु पिक्खुबा डिरिक् आसिका टक्चामिम्पा मेॽनुङ्मा यो।” 28टर येसुऎ ग खेमुहाङ् लोसु, “आक्र हॆॽनॆ, निवाँहाङ्मि खानावाँ खेम्खुबा नुङ् आक्रक्न लॆखुबाचि रे डिरिक् आसिका टक्चामिम्पाचि रेम।”
याॽमिचिऎ आक्खॆॽमाहा खानावाँ खाङ्मा मिॽमिम्पा
(मट्टि १२:३८-४२)
29येसुमि गॆअङ्मॆअङ् डिरिक् याॽमिचि खोम्से खारामि। हाङ् येसुऎ लोसु, “आच्चेलाहा याॽमिचि काइसाचि लॆःॽमि। खोचिऎ काबाङ् आक्खॆॽमाहा खानावाँ खाङ्मा यगुकुचि। टर खोचि निवाँहाङ्मि खानावाँ इखुबा योना लोमॆ याॽमिमि हिङ्खामाबि खाङ्मिॽमिम्पा रक्मा आक्खॆॽमॆ खानावाँबाङ् होइढा माङ्स खाङ्मा टक्कुचिनि। 30निनाबे लोमॆ हाटाबिहा याॽमिचिम् लागि योना एक्क चिन्ना लिसिन्टॽन आच्चेलाहा याॽमिचिम् लागि काङा याॽमिमि पासा सङ्क खोचिम् लागि चिन्नाङा। 31निवाँहाङ्मि सिरि सिऎ डिना आच्चेलाहा याॽमिचि सेबा#१ हाङ् १०:१-१० लोमॆ हाङ्डाम्पिऎ हाङ्टाङ्माऎ आब्डिक् टिकुचि मान्ठाभनॆ खो होइक हाङ्डाम्बाङ् डिरिक् डिना लाम्ढुसे सोलोमन लोमॆ हाङ्मि काम्नुहा खानावाँ खेम्सि टाआ, टर खाङानॆ, गुबि चुऎ एक्क सोलोमानबाङ् स ढ्या रेम, टर आन्नॆ खोम् खानावाँ खेमाम्निनि। 32न्यायॆमि डिना निनाबॆ हाटाबिहा याॽमिचि आच्चेलाहा याॽमिचि नुङ् येबुक्मि हाङ् खोचिऎ आच्चेलाहा याॽमिचि आब्डिक् टिकुचि। मान्ठाभनॆ खोचिऎ योनाऎ इमिम्पा खानावाँ खेमुचिहाङ् टाङ्पाम् हिङ्वाबाङ् ऎम्पक्मिम्पा लॆटामि, टर खाङाम्नॆ, गुबि योनाबाङ्स टुङ्घङ्पा एक्क चु।
हिङ्खामामि ओप्लिङ्
(मट्टि ५:१५; ६:२२-२३)
33“ओप्लिङ् ओबुकुचिहाङ् बचॽवाऎ खोबुचिनि, टर हङ्सि भॆन्खुबाचि चोब्नमि लागि हार कामानुङ् पङ्पङ्मा ठालबि युङुकुचि। 34सालुङ्मि ओप्लिङ् मिक् रेम। आनाम् मिक् नुऎ लॆ हाङ्ग आम् चोब्न सालुङ् हा। टर आक्कसॆ काम्नुःर खाङुनि हाङ्ग चोब्न सालुङ्न युट्टाराम्पाबि लि। 35मसॆ नुःर पेनानॆ, आन्नाबि चुऎ हिङ्खामामि ओप्लिङ् आसिखॆॽल। 36मसॆ आनाम् सालुङ्बिहा भाग माङ्स युट्टाराम्पाबि माआ टर चोब्न ओप्लिङ्बि चु हाङ्ग आक्क ओप्लिङ् हासिन्टॽन आनामि हिङ्खामा सङ्क ओप्लिङ्बि लि।”
येसु हाङ् फारिसि नुङ् मोसामि यायेॽमा चिन्खुबाचि
(मट्टि २३:१-३६; मारकुस १२:३८-४०)
37येसुऎ ग खानावाँ इसिटु हाङ् एक्क फारिसिऎ येसु चाम् चामाम् लागि खोम् खिम्पि सेःरु। येसु आक्कमि खिम्पि खाराहाङ् चासि पेना। 38येसुऎ हुक् मासःक्ले चामा ठाबाक्मिम्पा खाङ्टकुहाङ् आक्क फारिसि फोफो आक्खॆटु। 39हाङ् पारभु येसुऎ आक्क लोसु, “आन्ना फारिसिचि ठाला खङ्खरॆ पॆङिन्टॽन टाङ्पामि बाहिरा पोट्टि टेःॽन पॆङुकाम्नि, टर हङ्सिॽयु चाइ कङ्मानुङ् काइसा खानावाँऎ चेप्खॆम्पा लिकानि। 40ओ निवाँ माआनिहा याॽमिचि, आसॆ बाहिरा पोट्टिऎ भाग मुसु, खोसॆॽन हङ्सिऎ स मुमिम्पा हॆॽनॆ? 41टर ठाला खङ्खरॆबि चुहा चोब्न ठका माङ्स माआमिहाचि मरक्न पिट्टाम्चिनॆ, हाङ् आनाम् लागि चोब्न खानावाँ सॆङ्सॆङॆ लि।
42“ढिक्कारा! आन्ना फारिसिचि, मान्ठाभनॆ आन्नॆ मॆच्छु नुङ् बेसुक् रक्मा मिॽमिहा ठकामि चाइ एपङ्मि एक्क कग् पिकाम्नि, टर होइढाचि नुःर लॆःॽमॆ हाङ् निवाँहाङ्मि नाम्नावाँ चाइ सिच्चोकाम्नि। होइढा योम्पक् नुङ् सोरि काम्नुःर लॆःॽमा हाङ् नाम्नाम् पिसिॽमॆ योम्पक् सङ्क लॆटानॆ।
43“ढिक्कारा आन्ना फारिसिचि! मान्ठाभनॆ आन्ना याहुडिचि खोम्ठाम् खिम्पि डिड्ढा डिड्ढा ठावँबि पेम्मा हाङ् हाटाबि चोब्नऎ स्यामिम्पा नेन्चाकाम्नि। 44ढिक्कारा आन्ना! मान्ठाभनॆ आन्ना ग ऎखाङ्ङुखुबा येःॽमा रक्मा लॆकानि। हाङ् येःॽमाये कामानुङ् मालेबान याॽमिचि आक्क सङ्पिटुबाङ् लाम्ढुम्मि।”
45मोसामि यायेॽमा चिन्खुबाचिबाङ् एक्कसे येसु लोसु, “चिन्खुबो, ग खानावाँ इसे आनॆ ग काङ्का स ठक्चिॽनुङ् वाचिक् लोसाचिम्।” 46येसुऎ लोसु, “आन्ना मोसामि यायेॽमा चिन्खुबाचि ढिक्कारा! मान्ठाभनॆ आन्नॆ याॽमिऎ खिन्हिसुचिनिहा कक्खिम् खिम्मिकाम्चिनि। टर टाङ्पॆ चाइ खिम्मा ग हॆॽनॆ खॆरॆॽवासिऎ सङ्क डिन्चाआम्निनि।
47“ढिक्कारा आन्ना! मान्ठाभनॆ आन्नॆ आन्नाम्न टुबालाबाचिऎ सेॽमिम्पा निवाँहाङ्मि खानावाँ लोखुबाचिम् लागि काम्नुहा काम्नुहा येःॽमा मुकाम्नि। 48आन्नॆॽन आन्नामि टुबालाबाचिऎ माङ् लॆटामिहा कामानुङ् खाङ्ङुकाम्नि, मान्ठाभनॆ खोचिऎ निवाँहाङ्मि खानावाँ लोखुबाचि सेरुचि हाङ् आन्नॆ आक्खाचिम् लागि येःॽमा हेप्पिकाम्नि। 49मसॆ चोब्न खानावाँ लेखुबा निवाँहाङ्ऎ याॽलन लोसु, ‘कॆ आक्खाचिबि निवाँहाङ्मि खानावाँ लोखुबाचि हाङ् सॆक्ढुङ्पाचि पाङ्हाङ्कुङ्चि। टर आक्खाचिऎ खोचि नुगुकुचि हाङ् ऎॽवाचि चाइ सेरुकुचि।’ 50मसॆ बाखाटेम्पि हढारि सेॽमिम्पा चोब्न निवाँहाङ्मि खानावाँ लोखुबाचिम् हारिमि आब्डिक् हहा याॽमिचिबि सि। 51कॆ लोकानि, हाबिल लोमॆ याॽमि सेॽमिम्पाबाङ् निवाँहाङ् चुङ्ठाम् खिम् हाङ् युङ्ठङ् लुम्पि सेॽमिम्पा जाकारिया लोमॆ निवाँहाङ्मि खानावाँ लोखुबामि हारिमि आब्डिक् चोब्न हहा याॽमिचिम् निङ्टॽवाबि सि।
52“ढिक्कारा आन्ना मोसामि यायेॽमा चिन्खुबाचि! मान्ठाभनॆ आन्नानुङ् निवाँहाङ् लेॽमॆ साँचो ग चु। टर आन्नॆ स निवाँहाङ् मालेसाम्नि हाङ् होइढाचि सङ्क लेॽमा मापिट्टाम्चिनि।”
53येसु आक्कबाङ् खाइटा हाङ् मोसामि यायेॽमा चिन्खुबाचि नुङ् फारिसिचिऎ खो एट्टान इचोबक्कुचि हाङ् ओइर खानावाँ सिम्पकुचि, 54खोसॆ खानावाँ ऎम्मार काइसॆ खानावाँ टाहाङ् लाब्भुङ्हिऎरु कामानुङ् खाङ्पकुचि।
Currently Selected:
लुका 11: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
