लुका 7
7
रोमि कप्टानमि निवाँयुङ्
(मट्टि ८:५-१३)
1हाङ् येसुऎ याॽमिचि लोमाहा खानावाँ चोब्न इसिटु हाङ् खो कफारनुहुम लोमॆ हाटाबि खारा। 2आक्रल आक्कुबि एक्क कप्टानमि नेन्चामिम्पा योम्पक् मुखुबा याॽमि टुक्पम्पासॆ सिःखेॽमा परक्मिम्पा लॆटा। 3कप्टानऎ येसुमि बारेबि खेमु हाङ् येसु सॆॽल डाब्ल हाङ् काम् योम्पक् मुखुबा याॽमि नुबक्मिट्टुर कामानुङ् याहुडिचिम् निवाँनेन् टुङ्घङ्पाचि स्यामिसि पाङ्हाङ्सुचि। 4आक्खा टुङ्घङ्पाचि येसुबि टाआमि हाङ् येसु स्यामिस्से लोसुचि, “आक्क कप्टानमि योम्पक् मुखुबा याॽमि नुबक्मिट्टुना हाङ्ग काम्नुऎ लि, 5मान्ठाभनॆ खोसॆ कानिम् याॽमिचि नाम्नाम् पिसिकुचि, हाङ् खोसॆ कानिम् लागि एक्क याहुडिचि खोम्ठाम् खिम् सङ्क हेप्पिडि।” 6येसु आक्खाचिनुङ् खारा। हाङ् कप्टानमि खिम् कॆक्पि टामार कप्टानऎ उम् लाङ्काम्चि गर कामानुङ् खानावाँ पाङ्हाङ्सु, “पारभु, डुखा आटक्चाऎ, मान्ठाभनॆ काङा रक्मा मिःछुॽमा याॽमिऎ आना काम् खिम् हङ्सि भॆनॆ लोमा खॆन्चोउनि। 7हाङ् काङा रक्मा मिःछुॽमा याॽमि आनाबि टामा स खॆन्चाङानि। मसॆ आनॆ नुबकॆ टेःॽन लोबिटिङ्ना हाङ्ग काम् योम्पक् मुखुबा याॽमि नुबक्। 8मान्ठाभनॆ काङा सङ्क काबाङ् टुङ्घङ्पामि ढुप्पाट्ट खुक्माबि पेन्खुबा याॽमिङा, काम् खुक्माबि सङ्क टिलिङ्गाचि चुःक्मि। कॆ एक्क ‘खारॆ’ लोकुङ् आक्क खॆ, हाङ् होइक ‘टाऎ’ लोकुङ्, हाङ् आक्क टाः। काम् योम्पक् मुखुबा याॽमिचि ‘गर लॆटानॆ’ लोकुङ्चि, हाङ् आक्खाचिऎ लॆकुचि।”
9येसुऎ ग खानावाँ खेमु हाङ् आक्खॆटु हाङ् ऎम्पका हाङ् खो डॆङ्डॆङ् टिङ्खुबाचि लोसुचि, “कॆ आन्ना लोकानि, गरक्मा ढ्या निवाँयुङ् लॆखुबा याॽमि ग कॆ इस्राएलिचिबि सङ्क मॆखाङ्टक्टिॽङा।” 10खानावाँ टॆखुबा कप्टानमि लाङ्काम्चि खिम्पि ऎम्पकामि, आक्खाचि कप्टानमि खिम्पि टामार आक्क योम्पक् मुखुबा याॽमि नुबखॆम्पा खाङ्टकुचि।
येसुऎ लाङ्मिॽमामि पासा हिङ्पॽमिॽमिम्पा
11वेन्डाक् लाम्पॆ येसु नाइन लोमॆ हाटाबि खारा हाङ् खो टिङ्खुबाचि नुङ् होइढा डिरिक् याॽमिचि सङ्क खोनुङ् खारामि। 12येसु हाटाबिऎ टागारबि टामार लाङ्मिॽमामि एक्क सिःखॆमिम्पा पासामि सिच्चि यङ्मानुङ् डिरिक् याॽमिचि खॆॽमॆ सिसामि। आक्क सिःखॆम्पा याॽमि लाङ्मिॽमामि एक्क टेःॽन पासा लॆटा। 13पारभुऎ ग खाङ्टकु हाङ् आक्क लाङ्मिॽमा नाम्नाम् पिसिटु हाङ् लोसु, “ऎहाबॆ!” 14हाङ् खो सिच्चिमि नेन्टाङ् खारा हाङ् सिच्चियोङ् डिन्चउ हाङ् सिच्चि यङ्खुबाचि येप्टिखारामि। हाङ् येसुऎ लोसु, “कॆ आना लोक्ना, ए वेन्चा याॽमि, पःगॆ।” 15हाङ् आक्क सिःखॆमिम्पा याॽमि पःगा हाङ् यामुबक्का। हाङ् येसुऎ आक्क खोमि उम्मा पिट्टु।
16हाङ् गरक्मा चॆक्मावा खाङुचि हाङ् चोब्न याॽमिचि किसिमानुङ् आक्खॆसे गर कासे निवाँहाङ्मि निङ् ठेरुचि, “एक्क ढ्या निवाँहाङ्मि खानावाँ लोखुबा कानिम् लुम्पि चु।” हाङ् “निवाँहाङ्ऎ खोम् याॽमिचि नाम्नाम् पिसिडुचि।” 17हाङ् येसुमि ग खानावाँ याहुडिया नुङ् गॆअङ्मॆअङ्हा चोब्न हाङ्टेम्पि फुबका।
युहान्नाऎ येसुमि बारेबि खानावाँ वाप्सि पाङ्हाङ्पा
(मट्टि ११:२-१९)
18बाप्टिस्मा पिक्खुबा युहान्ना इघा चोब्न खानावाँ खो टिङ्खुबाचिऎ खेम्मिटुचि। 19हाङ् युहान्नाऎ खोम् हिप्पा टिङ्खुबाचि पारभुबि ग खानावाँ सिम्सि पाङ्हाङ्सुचि, “काङ्कॆ हुङ्मिम्पा खिरिस्ट आनान रु? काङ्कॆ होइकन हुङ्मा लॆऎ?” 20आक्खाचिऎ येसु चुबुचि हाङ् लोसाचु, “बाप्टिस्मा पिक्खुबा युहान्नाऎ काङ्का ग खानावाँ सिम्सि आनाबि पाङ्हाङ्डिङ्का, काङ्कॆ हुङ्मिम्पा खिरिस्ट आनान रु? काङ्कॆ होइकन हुङ्मा लॆऎ?”
21आक्रलॽन येसुऎ डिरिक् याॽमिचि आक्खाचिम् टुक्मावाबाङ् नुबक्मिट्टुचि हाङ् चाप्चिऎ लाॽमिम्पाचि फाक्बकुचि हाङ् मिक् आखाङ्खुबा ऎॽवाह्चि खाङ्खुबा मुसुचि। 22हाङ् खोसॆ युहान्नामि टिङ्खुबाचि लोसुचि, “ऎम्पकानॆ हाङ् खारानॆ हाङ् आन्नॆ माङ् खाङ्डाम्नि हाङ् खेमाम्नि आक्क खानावाँ इटाम्नॆ मिक् आखाङ्खुबाचि खाङ्खुबा लिडामि, लाङ् फॆम्मिनिहाचि लाम्ढुम्पडामि, साखक्मि टुक्मावाचि नुबक्डामि, नाबाक् एखेम्खुबाचि खेम्खुबा लिडामि, सिखॆम्पाचि हिङ्पडामि हाङ् माङ्स माआमिहा याॽमिचिऎ नुऎ खानावाँ खेम्टडुचि। 23हाङ् खो गस लोसाम्नॆ, हानाम्स काबि निवाँयुङ् लॆखुबा आसिका टक्चामिम्पा याॽमि यो।”
24युहान्ना टिङ्खुबाचि ऎम्पकामि, हाङ् येसुऎ याॽमिचि युहान्नामि बारेबि लोबकुचि, “आन्ना आसास पेम्मिनिहा ठालबि माङ् खाङ्सि खारानिहा? माल हिॽयापाऎ मिट्ढाङ्पा चिःॽबा खाङ्सि?” 25आन्ना माङ् खाङ्सि आम्पकानिहा? माल काम्नुहा काम्नुहा चेः चाङ्मिम्पा नुङ् चासुम्टाङ्पा याॽमिचि खाङ्सि? आक्रहा चेः चाङ्खुबाचि ग हाङ्खिम्पि पेनुक्मि। 26चाइबान लोङानॆ, आन्ना माङ् खाङ्सि आम्पकानिहा? माल निवाँहाङ्मि खानावाँ लोखुबा खाङ्सि? कॆ आन्ना लोकानि आन्नॆ निवाँहाङ्मि खानावाँ लोखुबाम् स चोब्बाङ् ढ्या एक्क याॽमि खाङ्टकाम्नि। 27बाप्टिस्मा पिक्खुबा युहान्नामि बारेबि निवाँहाङ्मि साब्चिराबि गरहाङ् साब्डा, “काङॆ काम् पाङ्कुचा आनाम् लाम्फु मुमाम् लागि आनाबाङ् याॽल पाङ्हाङ्कुङ्#मालाकि ३:१।”
28हाङ् येसुऎ खानावाँ येप्टिसे लोसु, “मेॽनुङ्माबाङ् टक्मिम्पाचिबि युहान्नाबाङ् ढ्या आसस माआमि। हाङ्स निवाँहाङ्मि हाङ्डाम्पि चोब्बाङ् मिःछुॽमा स बाप्टिस्मा पिक्खुबा युहान्नाबाङ् ढ्या लि।” 29चोब्न याॽमिचिऎ युहान्नामि खानावाँ खेमुचि, गरक्ढारि रु यावेङ्ग लाखुबाचिऎ सङ्क निवाँहाङ्मि लाम्फु नुऎ लॆ कामानुङ् खासिआमि, मान्ठाभनॆ आक्खाचिऎ युहान्नाबाङ् बाप्टिस्मा लामिम्पा लॆटामि। 30टर फारिसि नुङ् मोसामि यायेॽमा चिन्खुबाचिऎ खोचिम् लागि निवाँहाङ्ऎ मुमिम्पा काम्नुऎ खानावाँ हुन्नहा खानावाँ कामानुङ् युहान्नाबाङ् बाप्टिस्मा मॆलामि। 31गरहा याॽमिचि मान्टहाचि कामानुङ् कॆ माङ् नुङ् ङेॽमाचिहा? 32आक्खाचि ग हाटामि लुम्पि पेनुक्मिहा पिसाचिर लॆःॽमि मान्ठाभनॆ खोचि टाङ्पा टाङ्पाबि गर काग्मि
काङ्कॆ आन्नामि लागि भ्यामि डुॽमाहा डुबुङ्का, टर आन्ना मालाॽलुसानि,
काङ्कॆ डुखाहा साम् इसुङ्का, टर आन्ना माहाबानि।
33बाप्टिस्मा पिक्खुबा युहान्ना आङ्गुरमि खॆवा माडुङ्रे साक्नॆक्मानुङ् टाआ। हाङ् आन्नॆ खो खो खारिॽमाङ्ऎ लाप्मिम्पा याॽमि लोसाम्नि। 34निवाँहाङ्ऎ पाङ्हाङ्मिम्पा याॽमिमि पासा टाआ, हाङ् चाआ हाङ् डुङा हाङ् आन्नॆ खो एक्क रोप्खुबा हाङ् डुङ्खुबा नुङ् यावेङ्ग लाखुबाचिम् नुङ् हिङ्वाचिम् लाङ्काम् लोकाम्नि 35टर निवाँ काम्नुऎ यो लोमॆ खानावाँ चेन्टुबाङ् निवाँ नुङ् लाम्ढुखुबाचिऎन खाङ्मुकुचि।
एक्क मेॽनुङ्माऎ येसुमि लाङ् सःक्मिम्पा
36एक्क सिमोन लोमॆ फरिसिऎ येसु टाबाङ्मि निङ्पि खोम् खिम्पि चामा चासि सेःरु हाङ् खो खारा हाङ् चामा चासि पेना। 37आक्क हाटाबि एक्क हिङ्वा मेॽनुङ्मा चुआ। आक्कसॆ येसु सिमोनमि खिम्पि चामा चासि टाडा कामानुङ् खेमुहाङ् एक्क काम्नुऎ हारपॆक्#७:३७ आक्क हारपॆक् सिङ्मि हॆॽनॆ टर लुङ्कॽवाबाङ् मुमिम्पा लॆटा। हाङ् याहुडिचिऎ आक्रक्मा हारपॆक् नाम्सुऎ केवा हाङ् होइढा काम्नुहा ठका युङ्माम् लागि फॆॽयुक्सुचि। भोरि नाम्नुऎ केवा खिम्मानुङ् येसु टाडॆ खिम्पि टाआ। 38हाङ् खो ऎन्टाङ्बाङ्कॆ येसुमि लाङ् कॆक्पि टाआहाङ् हाःप्से उम् मिक्वाऎ येसुमि लाङ् टाप्से उम् टाङाक्ऎ टुःगुहाङ् हॆन्मिटु हाङ् लाङ्पि चुप्पा लॆसॆ#७:३८ याहुडिचिऎ याॽमिचि काम्नुःर लॆःॽमानुङ् स्यामिॽमार ङाचिक्पि चुप्पा लॆःॽयुक्सामि। ग याहुडिम् चालाना रेम। स्यामिॽमानुङ् आक्क नाम्नुऎ केवा सिपिटु।
39येसु सेखुबा सिमोन फरिसिऎ ग खाङ्टकु हाङ् उम् निवाँनिवाँब्न मिनु, “चाइबान इग निवाँहाङ्मि खानावाँ लोखुबा हाङ्ग खो डिन्चाखुबा ग मेॽनुङ्मा मान्टक्मा लॆऎ कामानुङ् लेॽमालॆऎ, मान्ठाभनॆ गग हिङ्वा मेॽनुङ्मा रेटा।” 40हाङ् येसुऎ सिमोन फारिसि लोसु, “सिमोन, आना काङॆ एक्क खानावाँ लोक्ना।” सिमोनऎ लोसु, “चिन्खुबो, लोङॆमोटा।” 41हाङ् येसुऎ खो एक्क काठा लोसु, “हिप्पा याॽमिचिऎ एक्क याॽमिबाङ् सिङि लासाचु एक्कसॆ चक्फुमि ङाकक् याङ् नुङ् होइकसॆ ङापङ् याङ। 42टर हिप्पाङ्ऎन सिङि माफङ्हिसाचु मसॆ सिङि पिक्खुबाऎ नाम्नाम् पिसिसे खोचि आन्नॆ सिङि फङ्मा पाब्नि लोसुचि। ह लोरेटा, इग हिप्पाङ्बाङ् आसॆ चाइ खो एट्टान नाम्नाम् पिसिकुवॆ?”
43सिमोनऎ लोसु, “काम् निवाँ रक्न आक्क डिरिक् यङ्निमा टक्चाखुबाऎ चाइ नाम्नाम् पिसिकु।” येसुऎ खो लोसु, “आनॆ चाइबान इरिसुना।” 44हाङ् येसु आक्क मेॽनुङ्मा पोट्टि हिङ्पका हाङ् सिमोन लोसु, “इग मेॽनुङ्मा खाङुनॆ? काङा आनाम् खिम्पि टाइङ् टर आनॆ काङा लाङ् सःग्माम् लागि योवाढारि मापिट्टिङ्ना, टर गसॆ ग काम् लाङ् खोम् मिॽवाऎ टाबु हाङ् टाङ्पाम् टाङाक्ऎ टुःगु। 45आनॆ काङा चुप्पा लॆसॆ मास्यमिॽङाना, टर गसॆ ग काङा टाडिङॆबान काम् लाङ्पि चुप्पा लॆमा मायाइटिटु। 46आनॆ काम् निङ्टॽवाबि केवा मॆसिटिबिॽङाना, टर गसॆ ग काम् लाङ्पि नाम्नुऎ केवा सिःडु। 47मसॆ कॆ आना लोक्ना, गमि चुहा डिरिक् हिङ्वा यङ्निडा, मसॆ ग मेॽनुङ्माऎ एट्टान नाम्नावाँ खाङ्मुसु। टर मिःक्म यङ्निमा टक्चाखुबॆ मिःक्मन नाम्नावाँ लॆकु।” 48हाङ् येसुऎ आक्क मेॽनुङ्मा लोसु, “आनाम् हिङ्वा यङ्निडा।” 49हाङ् आक्कुबि खोनुङ् सोरि चासि पेन्खुबाचि उम्चि टाटाङ्पाबि गर काबकामि, “हिङ्वा यङ्मिहिखुबा ग आसार?” 50येसुऎ आक्क मेॽनुङ्मा लोसु, “आनाम् निवाँयुङ्ऎ आना हिङ्पमिडा। नुःर खारॆ।”
Currently Selected:
लुका 7: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
