लुका 22
22
येसु सेॽमा यक्मिम्पा
(मट्टि २६:१-५,१४-१६; मारकुस १४:१-२,१०-११; युहान्ना ११:४५-५३)
1सिढा माठुमिम्पा चारेपा चामॆ याहुडिचिम् फाॽमिम्पामि चाडा टामा परक्मिम्पा लॆटा। 2ढ्या याटाङ्पाचि हाङ् मोसामि यायेॽमा चिन्खुबाचिऎ येसु सेॽमा मिन्युङ्सुचि, टर होइढा याॽमिचि नुङ् किसिमिम्पासॆ खोचिऎ येसु आसॆस मालेट्टॽमॆ गरि सेॽमॆ निवाँ मुसुचि।
3हाङ् एपङ्हि टिङ्खुबाचिबाङ् एक्क याहुडा यस्करियोट लोमॆ टिङ्खुबामि निवाँबि साइटान भॆना। 4हाङ् खो ढ्या याटाङ्पाचिबि हाङ् निवाँहाङ् चुङ्ठाम् खिम् खाङ्खुबाचिम् टुङ्घङ्पाचिबि खाराहाङ् “कॆ येसु आन्नाम् हुक्पि मान्टहाङ् सिॽमिॽमॆ” कामानुङ् खानावाँ इसा। 5ग खेमुचिहाङ् आक्खाचि चेन्चामानुङ् आना याङ् पिक्खाचिम् लोसुचि। 6याहुडा खासिआ हाङ् याॽमिचिऎ मान्लेरे मान्टहाङ् येसु लाॽमिमॆ कामानुङ् लाम्फु खाङ्पकु।
डॆङ्पिऎ भोजा
(मट्टि २६:१७-३०; मारकुस १४:१२-२६; युहान्ना १३:२१-३०)
7सिढा माठुमिम्पा चारेपा चामॆ फाॽमिम्पामि चाडाबि सामुङ्मि पाठा सङ्टिॽमॆ डिना टाआ। 8येसुऎ पाट्रुस नुङ् युहान्ना “खाराचॆहाङ् कानिम् लागि फाॽमिम्पा चाडामि भोजा टङाचॆ” कामानुङ् पाङ्हाङ्सुचि। 9खोचिऎ येसु सिमाचु, “काचिऎ इग भोजा हाबि टङ्मॆ?” 10खोसॆ लोसुचि, “आन्चिना यारुसालेम हाटाबि भॆम्मा अक्सि पोरोम्पि योवा खिम्मानुङ् खॆॽमॆसिऎ एक्क याॽमि चुबुक्चुना, आक्क भॆनुऎ खिम्ढारि डॆङ्डॆङ् टिङाचॆ। 11हाङ् आक्क खिम्पिऎ टुङ्घङ्पा लोसॆचॆ, चिन्खुबॆ आना सिमुक्, काङॆ काम् टिङ्खुबाचि नुङ् फाॽमिम्पा चाडामि भोजा चामॆ टाबाङ्मि ठाल हाबिर? 12खोसॆ आन्चिना सङ्पिटुऎ टालाबि काम्नुःर चाक्मिम्पा एक्क ढ्या ठाल खाङ्मिक्चि। आक्कुबिॽन भोजा टङाचॆ।” 13खोचि खाराचि हाङ् येसुऎ लोसिन्टॽन चोब्न भॆट्टकाचु हाङ् आक्कुबिॽन फाॽमिम्पामि भोजा टङाचु।
14म भोजा चामॆ बेला साप्पु हाङ् येसु खोम् एपङ्हि टिङ्खुबाचिङ् चासि पेना। 15खोसॆ आक्खाचि लोसुचि, “काङॆ डुखा आङ्माबाङ् याॽल ग फाॽमिम्पा चाडामि भोजा आन्नानुङ् चामा मिनिङ। 16मान्ठाभनॆ कॆ आन्ना लोकानि, निवाँहाङ्मि हाङ्डाम्पि ग भोजाऎ लोमा यकुवॆ खानावाँ मालुक्खॆॽरढारि काङॆ फेरि ग भोजा चाङानि।” 17आक्क डॆङ्पि येसुऎ आङ्गुङ्मि खॆवा चुऎ खरॆ लासु हाङ् निवाँहाङ् ओहाक् पिट्टुहाङ् लोसु, “ग लासानॆ हाङ् आन्ना चोप्पासॆ हासानॆ हाङ् डुङानॆ। 18कॆ आन्ना लोकानि, हयॆबाङ् निवाँहाङ्मि हाङ्डाम् मॆटारढारि काङॆ गरक्मा आङ्गुरमि खॆवा डुङ्ङानि।” 19आक्क डॆङ्पि येसुऎ चारेपा याङु हाङ् निवाँहाङ् ओहाक् पिट्टुहाङ् योबु हाङ् टिङ्खुबाचि पिस्से लोसुचि, “आन्ना पिॽमिम्पा ग काम् सालुङ् यो। हयॆबाङ् काङा मिॽलामाम् लागि गरहाङ्न चाआनॆ।” 20आक्रहाङ्न चासिटुचिहाङ् खोसॆ आङ्गुङ्मि खॆवा चुऎ खरॆ लामानुङ् टिङ्खुबाचि लोसुचि, “ग खरॆबिऎ आङ्गुरमि खॆवा काम् हारि नुङ् हिक्मिम्पा आन्नामि लागि उम्चङ् चुप्लाङ् यो। ग हारि आन्नामि लागि अङ्मिडा।
21“टर खाङानॆ, काङा लाॽमिखुबा याॽमि कानुङ्न चासि पेन्डा। 22निवाँहाङ्मि निवाँ रक्न काङा याॽमिमि पासा ग सिखॆॽमान लॆ, टर ढिक्कारा, काङा याॽमिमि पासा लाॽमिखुबा आक्क।” 23ग खानावाँ खेमुचिहाङ् टिङ्खुबाचि “गरक्मा योम्पक् मुखुबा आसार?” कामानुङ् उम्चि टाङ्पाटाङ्पाबि खानावाँ इपकामि।
आसा चाइ टुङ्घङ्पा
(मट्टि २०:२५-२८; १९:२८; मारकुस १०:४२-४५)
24आक्कबाङ् खोचिबि चोब्बाङ् टुङ्घङ्पा आसार कामानुङ् टाङ्पाटाङ्पाबि खानावाँ लिबका। 25येसुऎ आक्खाचि लोसुचि, “इग बाखाटेम्पिहा हाङ्चिऎ टाङ्पाम् याॽमिचि सक्पि ढुप्पाट्ट फॆरुकुचि हाङ् उम्चि टाङ्पा काम्नुकिङ्का काग्मि। 26टर आन्नाबि चाइ आक्र लिमा फॆन्नि। आन्नाबि आसा टुङ्घङ्पा लॆ खो चोब्बाङ् मिःछुॽमा लॆङ्र हाङ् टुङ्घङ्पा लिमा यक्खुबॆ चोब्नमि योम्पक् मुसुर। 27चामा चासि पेन्खुबा टुङ्घङ्पा रु आक्कमि लागि योम्पक् मुबिखुबा चाइ टुङ्घङ्पा? चामा चासि पेन्खुबा चाइ हॆॽनॆ? टर खाङानॆ, काङा आन्नामि लुम्पि योम्पक् मुबिखुबा रक्मान लिडिङ।
28“काम् चोब्न डुखाबि आन्ना कानुङ्न पेनानि। 29काम् आपॆ काङा हाङ्डाम् फॆॽमॆ ढुप्पाट्ट पिट्टिङ् हाङ् कॆस आन्ना ढुप्पाट्ट पिकानि। 30काम् हाङ्डाम्पि आन्ना कानुङ्न पेनुकानिहाङ् चाकानि हाङ् हाङ्पेन्ठाम् ठालबि पेम्मानुङ् इस्राएलिचिम् एपङ्हि सामॆक् सक्पि हाङ्डाम् फॆरुकानि।”
पाट्रुसऎ ढाँटु बङ्चामॆ खानावाँ येसुऎ इमिम्पा
(मट्टि २६:३१-३५; मारकुस १४:२७-३१; युहान्ना १३:३६-३८)
31आक्क डॆङ्पि येसुऎ लोसु, “सिमोन, ओ सिमोन खाङॆ, साइटानऎ आन्ना चोब्न चाम् ठाबिन्ट ठाब्से काबाङ् आन्ना फॽमाम् लागि निवाँहाङ् नुङ् ढुप्पाट्ट ङाग्डा। 32टर आनाम् निवाँयुङ् एमाखॆॽल कामानुङ् कॆ निवाँहाङ् नुङ् ङाग्डिङ। फेरि आना आनाम् हिङ्वाबाङ् ऎम्पक्नाहाङ् आनॆ आनाम् बुबुनुसाचि उम्चि निवाँयुङ्बि चॆकुचिहा मुमा लॆॽमि। 33पाट्रुसऎ लोसु, ‘पारभु, काङा आनानुङ् सॆक्चिम्पि टेःॽन हॆॽनॆ टर सिखॆॽमा स हेकुङ्’।” 34टर येसुऎ खो लोसु, “पाट्रुस चाइबान कॆ आना लोक्ना, आनॆ सुम्चि खेपाढारि काङॆ खो लेनलेङानि मालोरोढारि वेन्डा नाम्स हॆॽवा अःक्नि।”
टामा परक्मिम्पा डुखामि लागि चेन्चेन् लिमॆ
35येसुऎ आक्खाचि लोसुचि, “माल कॆ आन्ना नुऎ खानावाँ खेम्मिसि बॆक्खा, सुःॽमारा हाङ् याङ् मॆड्डिङ् पाङ्हाङ्मार डुखाबि सिट्टानिहॆ टा?” आक्खाचिऎ लोसुचि, “मासिट्टिङ्का।”
36येसुऎ आक्खाचि लोसुचि, “ह चाइ याङ् चुखुबॆ याङ् खिनुःर, बॆक्खा चुखुबॆ बॆक्खा हाङ् फेया एचुखुबॆ खोम् खाम्ठाम् इन्चासे हाङ्स एक्क फेया इनुःर। 37मान्ठाभनॆ चाइबान कॆ आन्ना लोकानि, निवाँहाङ्मि साब्चिराबि काम् बारेबि ‘खो हाङ्टेम्खिसाचिनुङ् ङॆप्सिखारा’#यासाइया ५३:१२लोमॆ खानावाँ काबि लिमान लॆ। हाङ् काम् बारेबि साॽमिम्पा खानावाँ लिमॆ स पाइ।” 38टिङ्खुबाचिऎ लोसुचि, “पारभु खाङॆ, गुबि काङ्कानुङ् हिच्चि फेया चु।” येसुऎ खानावाँ ऎम्पिटुचि, “साबु।”
जाइटुन लोमॆ पङ्पङ्माबि येसु निवाँहाङ् नुङ् यामुमिम्पा
(मट्टि २६:३६-४६; मारकुस १४:३२-४२)
39येसु सङ्पिटुऎ टालाबाङ् आम्पका हाङ् याॽलऎ रक्न जाइटुन लोमॆ पङ्पङ्माबि खारा हाङ् टिङ्खुबाचि सङ्क खोनुङ् सोरि खारामि। 40आक्क ठालबि टाआहाङ् येसुऎ टिङ्खुबाचि लोसुचि, “ठाःक्मार आन्नामि निवाँयुङ् ऎमाखॆॽल कामानुङ् निवाँहाङ् नुङ् खानावाँ इसानॆ।” 41आक्क डॆङ्पि मिःक्म मॆअङ् खाराहाङ् पुम्रुक् ठःक्मानुङ् येसु गरहाङ् निवाँहाङ् नुङ् यामुबक्का। 42“ओ आपो, आनाम् निवाँ रक्न नुक् हाङ्ग इग डुखामि खरॆ काबाङ् लाबहाङ्पिॽङॆ। टर काम् निवाँर हॆॽनॆ आनाम् निवाँर लिर।” 43हाङ् पारुबाङ् एक्क निवाँखाटॆखुबा टाआहाङ् खो डुखा आङ्मॆ चॆक्मावा पिट्टु। 44खो एट्टान चाइर निवाँ टुक्मानुङ् निवाँहाङ् नुङ् यामुबक्का। खो निवाँहाङ् नुङ् यामुमार खोम् होप्ठॆॽवा हारिर बाखाबि ठॆःक्मॆ सिसा। 45येसु निवाँहाङ् नुङ् यामुसाहाङ् टिङ्खुबाचि चुक्मिहा ठालबि टामार आक्खाचि निवाँ टुक्मानुङ् याक्टाखॆॽमिम्पासॆ इम्टिखॆॽमिम्पा भॆट्टकुचि। 46खोसॆ आक्खाचि लोसुचि, “आन्ना मान्ठा इम्चाढाङ्कानिहा? हुम्पकानॆ हाङ् ठाःक्मार हिङ्वा ऎलॆटुम्यॆ कामानुङ् निवाँहाङ् नुङ् यामुसानॆ।”
येसु लाब्मिम्पा
(मट्टि २६:४७-५६; मारकुस १४:४३-५०; युहान्ना १८:३-११)
47येसुऎ ग खानावाँ इबॆटुरक्न एपङ्हि टिङ्खुबाचिबाङ् याहुडा लोमॆ टिङ्खुबॆ येसु लाॽलाम् लागि होइढा डिरिक् याॽमिचि लाटॆटुचि हाङ् येसु चुप्पा लॆसॆ स्यामिॽमाम् लागि खोम् नेन्टाङ् खारा। 48टर येसुऎ आक्क लोसु, “याहुडा, माल आनॆ चुप्पा लॆसॆ स्यामिॽमानुङ् काङा याॽमिमि पासा सिच्चाखुबाचिम् हुक्पि पिकुचिनॆ?” 49गॆअङ्मॆअङ् चुक्मिहा टिङ्खुबाचिऎ ग खाङुचिहाङ् ह लिमा परक्डॆ खानावाँ लेसुचि हाङ् येसु लोसुचि, “पारभु, इघाचि फेयाऎ बक्माचिहॆ?” 50एक्क टिङ्खुबॆ चाइ फेयाऎ चोब्बाङ् ढ्या याटाङ्पामि योम्पक् मुखुबामि चुप्ठिङ् पोट्टिऎ नाबाक् फक्लॆक्ट बक्लाह्ङ् पिट्टु। 51टर येसुऎ लोसुचि, “याइटॆ।” हाङ् येसुऎ आक्कमि नाबाक् डिन्चउ हाङ् नुबक्मिट्टु।
52येसु लाप्सि टाखुबाचि चाइ ढ्या याटाङ्पाचि, निवाँहाङ्मि खिम् खाङ्खुबाचिम् टुङ्घङ्पाचि हाङ् याहुडिचिम् होइढा टुङ्घङ्पाचि लॆटामि। येसुऎ आक्खाचि लोसुचि, “माल काङा लुप्चाङा हॆ हाङ् आन्ना टोम्राङ्नुङ् फेया खिम्मानुङ् काङा लाप्सि टाडानिहा? 53काङा डिनाहुँ निवाँहाङ्मि खिम्पि आन्नानुङ् चुइङ्र काङा लाॽमॆ निवाँ मामुहिसाम्निटा? टर काइसॆ चॆक्मावाऎ हाङ्डाम् फॆरुकुरक्न आन्नामि योम्पक् मुमॆ लः रेम।”
पाट्रुसऎ येसु लेॽङानि लोमिम्पा
(मट्टि २६:५७-५८,६९-७५; मारकुस १४:५३-५४,६६-७२; युहान्ना १८:१२-१८,२५-२७)
54आक्खा याॽमिचिऎ येसु लाबुचिहाङ् चोब्बाङ् ढ्या याटाङ्पामि खिम्पि लाखॆटुचि। पाट्रुसऎ चाइ मिउबाङ्कॆ खो डॆङ्डॆङ् टिङ्खॆटु। 55आक्कुबि याॽमिचि पालुम्मि लुम्पि मि टुम्पॽमानुङ् हुङ्चामॆ सिसामि। पाट्रुस सङ्क आक्खाचिनुङ् सोरि पेना। 56योम्पक् मुखुबा एक्क मेॽनुङ्माऎ पाट्रुसऎ सङ्क मि हुङ्चाढाङ्पा खाङ्टकुहाङ् काम्नुःर खाङ्मानुङ् लोसु, “इग याॽमि स येसु नुङ्न चुआ।” 57टर पाट्रुसऎ लोसु, “हॆॽनि इग मेॽनुङ्मा माल् काऎ? कॆ खो लेङानि।”
58एच्छक् डॆङ्पि होइक एक्कसॆ पाट्रुस खाङ्टकुहाङ् लोसु, “आना स आक्खाचिम् लाङ्काम्नान।” पाट्रुसऎ लोसु, “काङा हॆन हॆॽङानॆ।”
59एक घान्टार यागु हाङ् होइक एक्क याॽमिऎ लोसु, “चाइबान इग याॽमि स येसु नुङ्न चुआ, मान्ठाभनॆ ग सङ्क गालिलबिएन।” 60टर पाट्रुसऎ लोसु, “हॆॽनि, आना माल् काग्नॆ? कॆ खो लेटालेङानि।” पाट्रुस यामुभॆट्टा रक्न हॆॽवा अःगा। 61आक्रलॽन पारभु येसु ऎम्पकाहाङ् पाट्रुस खाङु हाङ् “वेन्डा नाम्स हॆॽवा अःग्माबाङ् याॽल आनॆ काङा सुम्चि खेपा लेनलेॽङानि कामानुङ् लोॽङानॆछ” कामानुङ् पारभु येसुऎ लोमिम्पा खानावाँ पाट्रुसऎ मिॽलउ। 62हाङ् पाट्रुस पालुम्बाङ् खाइहाङ्सा हाङ् हाप्हिर हाबा।
येसु सेन्से रग्मिम्पा
(मट्टि २६:६७,६८; मारकुस १४:६५)
63येसु हुङ्खुबा याॽमिचिऎ खो सेम्चउचि हाङ् रगुचि। 64आक्खाचिऎ खोम् मिक् डॆक्पिटुचि हाङ् रग्से लोसुचि, “लु लोरॆ, आना आसॆ रगॆ?” 65गरहाङ् आक्खाचिऎ खो पेहिरपेसुचि हाङ् लोहिर लोसुचि।
येसु याहुडि टुङ्घङ्पाचिऎ खानावाँ इठाम् ठालबि
(मट्टि २६:५९-६६; मारकुस १४:५५-६४; युहान्ना १८:१९-२४)
66नाम्स लिमा अक्सि ढ्या याटाङ्पाचि हाङ् मोसामि यायेॽमा चिन्खुबा इघा चोब्न टुङ्घङ्पाचि खोमामि हाङ् टिलिङ्गाचिऎ येसु उम्चि हाङ्डाम्पिऎ टुङ्घङ्पाचिऎ खानावाँ इठाम् ठालबि लाखॆटुचिहाङ् लोसुचि, 67“काङ्का लोइचिमॆ, आना फाक्खुबा खिरिस्ट ना हॆटा?” येसुऎ खानावाँ ऎम्पिटुचि, “काङॆ आन्ना लोकानि हाङ्स आन्नॆ निवाँयुङ् लॆहिसाम्निनि। 68हाङ् कॆ खानावाँ सिमानि भनॆ जुवापा पिॽमा स हेसाम्निनि। 69टर हयॆबाङ् मरक् काङा याॽमिमि पासा चोब्बाङ् सङ्पिऎ चॆक्मावा नुङ्मा निवाँहाङ्मि चुप्ठिङ् हुक् पोट्टि पेनुॽङा।” 70चोप्पासॆ लोसुचि, “मरक् हाङ्ग माल आना निवाँहाङ्मि पासाना हॆटा?” खोसॆ जुवापा पिट्टुचि, “आन्नॆ लोसिन्टॽन काङा मङान।” 71खोम् खानावाँ खेमुचिहाङ् आक्खाचि कासामि, “ह कानि होइढा चुमॆक्सङ् पाबिङ्कानि। उम् याबाङ्न कानिऎ खेम्इटा।”
Currently Selected:
लुका 22: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
