लुका 21
21
लाङ्मिॽमाऎ पिॽमिम्पा याङ्
(मारकुस १२:४१-४४)
1येसु निवाँहाङ्मि खिम्पि चुआर चासुम्टाङ्पा याॽमिचिऎ निवाँहाङ्मि निङ्पि याङ् खोम्मॆ खङ्पि याङ् डॆम्मॆ पाइमिम्पा खाङ्टकु। 2येसुऎ आक्कुबि एक्क लाङ्मिॽमाऎ स मिःक्म याङ् डॆम्मिम्पा खाङ्टकु। 3ग खाङुहाङ् येसुऎ आक्खाचि लोसुचि, “चाइबान कॆ आन्ना लोकानि, ग माङ्स माऎ लाङ्मिॽमाऎ होइढाचिबाङ् डिरिक् याङ् डॆन्डु। 4मान्ठाभनॆ होइढाचिऎ टाङ्पाम् एम्पम्पाबाङ् डॆन्डुचि टर ग लाङ्मिॽमाऎ ग खोसॆ टाङ्पाम् लागि फॆॽमालॆऎ खोनुङ् चुहा चोब्न डॆन्डु।”
निवाँहाङ्मि खिम् योरॆॽमॆ खानावाँ
(मट्टि २४:१-१४; मारकुस १३:१-१३)
5एक्क हिप्पा येसुमि टिङ्खुबाचि गरक् कामॆ पाइटामि, “काम्नुहा काम्नुहा लुङ्कॽवाबाङ् मुमिम्पा हाङ् निवाँहाङ्मि निङ्पि पिॽमिम्पा याङ्बाङ् काम्नुःर मुमिम्पा इग निवाँहाङ्मि खिम् ऎॽवा काम्नुऎ लॆ।” टर येसुऎ आक्खाचि लोसुचि, 6“गरक्मा लः टामॆ पाइ, ह आन्नॆ खाङ्मॆ पाइकाम्निहा ठालबि एक्क लुङ्कॽवा सक्पि होइक लुङ्कॽवा लिनि, टर चोब्न योराङ।”
7आक्खाचिऎ सिमुचि, “चिन्खुबो, ग हानाम् लिऎ? हाङ् काङ्कॆ ग लिमा ठाबाका कामानुङ् मान्टक्ल लेट्टक्मॆ?” 8येसुऎ आक्खाचि लोसुचि, “नुःर पेनानॆ, आन्ना आसॆस आफॆस्सिॽमिर मान्ठाभनॆ डिरिक् याॽमिचि काम् निङ्पि काङान ‘खिरिस्टङा’ कामानुङ् टाक्मि हाङ् ‘बाखाटेम् लुक्खॆॽमॆ लः मुबिॽन टाःडा’ कामानुङ् लोक्मि टर आन्नॆ आक्खाचि आटिङाम्चिनॆ। 9आन्नॆ डिड्ढा डिड्ढा खिमिम्पा टुमिम्पा हाङ् खिमाटुमाम् लागि परक्मिम्पा खानावाँ खेम्काम्नि टर आकिसिआनॆ, मान्ठाभनॆ इगग लिमन लॆ टर आक्रलॽन बाखाटेम् लुक्खॆॽनि।”
10येसुऎ फेरि लोसुचि, “एक्क जाटिबिहा याॽमिचि हॆॽनिबारेक् याॽमिचि नुङ् चुङ्पक्मि हाङ् एक्क हाङ्टेम् नुङ् होइक हाङ्टेम् चुङुक्मि। 11डिड्ढा डिड्ढा लुक्ढिमा खॆ, हाम्पि ग हाम्पि आनिकाला टा, डिरिक् याॽमिचि टुक्पक्मि। नाम्फलिॽवाबि डिड्ढा डिड्ढा किसिमा लुहा हाङ् आक्खॆॽमाहा खानावाँ लि।”
12“टर ग लिमाबाङ् याॽल याॽमिचिऎ आन्ना काम् टिङ्खुबाचि लिमिम्पासॆ लाबुक्मिहाङ् रगुक्मि हाङ् याहुडिचि खोम्ठाम् खिम्पि लाखॆमिहाङ् आब्डिक् टिक्मि। हाङ् सॆक्चिम्पि सॆक्ठाङ्मि। हाङ् टुङ्घङ्पाचि नुङ् हाङ्चिमि ङारिङ्पि यॆप्मिमि। 13टर आक्रल काम् बारेमि खानावाँ इमॆ काम्नुऎ लः लि। 14मसॆ आन्नॆ टाङ्पा हिङ्चामामि लागि माङ् यामुमा लॆऎ कामानुङ् याॽलन माङ्स आमिॽलापाम्नॆ हाङ् आकिसिआनॆ। 15मान्ठाभनॆ कॆ आन्ना यामुमाम् लागि गरक्मा निवाँ पिकानि, आन्नॆ यामुमिम्पा खानावाँमि जुवापा आन्ना सिच्चोखुबाचिऎ आसॆस पिॽमा हेसुचिनि हाङ् आक्खाचिऎ या हेम्मा हेसुचिनि। 16आन्ना टाङ्पाम्न आपा आमा, बुबुनुसा, नेन्टाङ्हाचि हाङ् लाङ्काम्चिऎन लाब्भुङ्मि हाङ् ऎॽवाचि चाइ सेॽमिकुचि। 17काङा निवाँयुङ् लॆॽमिम्पासॆ आन्ना चोप्पासॆ सिच्चाक्मि। 18हाङ्स आन्नामि निङ्टवाँबाङ् एक्क टाङाक् स हेॽनि। 19इघा चोब्न आङ्टिखॆकाम्निर माटॆगानि हाङ्ग आन्ना हिङ्चाकानि।”
यारुसालेम लुक्खॆॽमॆ खानावाँ
(मट्टि २४:१५-२१; मारकुस १३:१४-१९)
20“हानाम् यारुसालेम हाटा सिच्चोखुबाचिम् टिलिङ्गाचिऎ बॆङ्सिम्पा खाङ्टकाम्नि, आक्रल वाबाम्नॆ हाटामि लुक्खॆॽमॆ बेला मुबिॽन टाखॆडा। 21आक्रल याहुडियाबि चुखुबाचि पङ्पङ्मा पोट्टि पिल्लॆॽमा लॆ। हाटा हङ्सि चुखुबाचि आक्कबाङ् खाइमा लॆ हाङ् गावॆँबि चुखुबाचि हाटा हङ्सि आटामॆ। 22मान्ठाभनॆ निवाँहाङ्मि साब्चिराबि साॽमिम्पा चोब्न खानावाँ लिमाम् लागि गरहा डन्डा लिटा। 23आक्रल बःक्खुरुॽमा हाङ् पोम्पि चाचा चुखुबा मेॽनुङ्माचि ढ्या डुखाबि सिक्मि। मान्ठाभनॆ ग बाखामाबि किॽमालुऎ डुखा टा हाङ् इघा याॽमिचि सक्पि निवाँहाङ्मि सिरि सि। 24आक्खाचि फेयाऎ बक्सिकुचि हाङ् डिरिक् हाङ्टेम्पि हिक्मानुङ् लाखॆकुचि। होइढा हाङ्टेम्पिहा याॽमिचिम् ल मालुख्खॆलढारि खोचिऎ यारुसालेम हाटा उम्चि लाङ्पि सिक्से युङुकुचि।
काङा याॽमिमि पासा खाङ्मुङॆ लःमि खानावाँ
(मट्टि २४:२९-३१; मारकुस १३:२४-२७)
25“नाम्, पाप्पाला हाङ् साङ्केम्माबि आक्खॆॽमाहा चिन्ना खाङ्मुक् हाङ् पॆरॆरॆमामि ढ्या ढ्या साम्ला हाङ् किॽमालुलु अङ्टाहा योवाऎ बाखाटेम्पिहा चोब्न हाङ्टेम् डुखाबि सिक्मि हाङ् किसिमाबि सिक्मि। 26बाखाटेम्पि टामा परम्पा खानावाँऎ याॽमिचिम् निवाँन माखॆ मान्ठाभनॆ नाम्फलिॽवाबिहा चोब्न चॆक्मावाचि सङ्पक्मि। 27आक्क डॆङ्पि काङा याॽमिमि पासा ढ्या चॆक्मावा हाङ् निङ्लावा नुङ् खिन्डुमाबि टामॆ पाइऎ आक्खाचिऎ खाङ्टकुचि। 28गरक्मा लिमा अक्सि आन्ना चेन्चामानुङ् मॆङ्किसिरे येप्पकानॆ मान्ठभनॆ आन्ना सॆॽलन हिङ्पकानि।”
छाराक्फुमि सिङ्बाङ् वाप्मॆ खानावाँ
(मट्टि २४:३२-३५; मारकुस १३:२८-३१)
29आक्क डॆङ्पि येसुऎ आक्खाचि इग काठा लोसुचि, “छाराक्फु हाङ् होइढा सिङ्लुङ् खाङाम्नॆ, 30आक्खासॆ नेॽवा नेॽमिम्पा खाङ्टकाम्निहाङ् ओम्मॽओम्मॽ लिबक् कामानुङ् लेकाम्नि। 31आक्रक्न कॆ लोमिम्पा इघा खानावाँ लिमिम्पा खाङ्टकाम्नि हाङ् निवाँहाङ्मि हाङ्डाम् सॆॽलन टा कामानुङ् लेसाम्नॆ। 32चाइबान कॆ आन्ना लोकानि, इघा चोब्न खानावाँ मालिरढारि इग पुस्टा लुक्खॆॽनि। 33पारु हाङ् बाखाटेम् लुक्खॆ टर कॆ यामुमिम्पा खानावाँ हानाम्स लुक्खॆॽनि।
चेन्टुबाङ् लिमानुङ् पेम्मॆ
34“आन्ना नुःर पेनानॆ, डिरिक् भोजा भाट्टेरबि आपिन्टिटानॆ, आसेङ्खिटिट्टानॆ हाङ् ग हिङ्खामामि लागि एट्टान निवाँ आफॆरानॆ। हॆॽनॆहाङ्ग आन्नामि निवाँ योम्पक् आपिक्खुबा मुकु हाङ् खिसाबि सिट्टिन्ट आन्नॆ मामिॽलामार आन्नाबि डॆङ्पिऎ डिना टा। 35मान्ठाभनॆ आक्क डिना खिसाबि सिॽमिम्पा रक्न बाखाटेम्पिहा चोब्न याॽमिचि सिःक्मि। 36मसॆ नुःर पेनानॆ, ‘आक्खा चोब्न किॽमालुहा खानावाँबाङ् हिङ्चामा नुङ् काङा याॽमिमि पासामि ङारिङ्पि मॆङ्किसिरे यॆप्मे चॆक्मावा काङ्का पिच्चिमॆ’ कामानुङ् निवाँहाङ् नुङ् यामुढाङ्सानॆ।”
37लेन्टा येसुऎ निवाँहाङ्मि खिम्पि चिन्युक्सुचि हाङ् सेन्टा जाइटुन लोमॆ पङ्पङ्माबि बासा पोप्सि खॆॽयुक्सा। 38चोब्न याॽमिचि खोम् खानावाँ खेम्सि नाम्सङ्माॽनि टायुक्सामि।
Currently Selected:
लुका 21: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
