मरकुस 8

चार हजार लोगां नै रोटी खुआणी

(मत्ती 15:32-39)

1बां दिना में एकर ओर भीड़ यीसू गी बाता सुणन खातर भेळी होयी। पण भीड़ कनै खाण नै कीं कोनी हो। ईंखातर यीसू आपगै चेला नै केयो, 2“मनै ईं भीड़ पर भोत तरस आण लागरयो है। ऐ सारा तीन दिना ऊं मेरै सागै रेण लागरया है। अर खाण खातर आं कनै कीं कोनी बच्यो। 3जे मैं आनै घरे भेज दिआ तो ऐ रा में ई बेहोस हो'ज्यैगा। कीं लोग तो भोत दूर ऊं आयेड़ा है।”

4बांगै चेला केयो, “बन उजाड़ में इती रोटी कठूं आसी जिंऊं ऐ धाप ज्यै।”

5यीसू बानै पूछयो, “थारै कनै किती रोटी है,” बां केयो, “सात।”

6जद बां सारै लोगां नै बेठण खातर केयो अर बे रोटी लेगे परमेसर गो धन्यावाद कर'गे तोड़ी अर आपगै चेला नै देंता गेया अर बे सारा बांटता गेया। 7बांगै कनै थोड़ी सी छोटी मछलियां बी ही बां धन्यावाद कर'गे बे बी लोगां नै देण गी आग्या दी। 8सारा खा'गे धापग्या अर बाकी बचेड़ी रोटियां गा टुकड़ा ऊं चेला सात टोकरा भर लिआ। 9बे लोग चार हजार गै सारै सारै हा। बाद में बां सारै लोगां नै विदा करया। 10अर यीसू आपगै चेला सागै किस्ती पर चढगे दलमनूता परदेस में उड़ग्या।

फरीसियां गै द्वारा सुरगीय निसान गी मांग

(मत्ती 16:1-4)

11बठै कीं फरीसी गुट गा लोग यीसू ऊं आ'गे सुआल पूछण लागग्या। अर बानै परखण खातर कै ओ परमेसर गो बेटो है या कोनी ईंखातर बांऊ कोई निसानी मांगण लागग्या। 12बां आपगी आत्मा में जाण लिओ अर आह भरगे केयो, ईं जुग गा लोग क्यामी निसान मांगै। पण मैं थानै साची केऊं ईं जुग गै लोगां नै कोई निसान कोनी दियो जावैगो।

13ओ केगे यीसू आपगै चेला सागै किस्ती पर चढ'गे झील गै दूसरै किनारै पर उड़ग्या।

फरीसिया अर हेरोदेस गो खमीर

(मत्ती 16:5-12)

14चेला आपगै सागै रोटी ल्याणी भूल ग्या। बां कनै किस्ती में एक ई रोटी ही। 15यीसू बानै चेताया कै, “देखो फरीसियां अर हेरोदेस गै लोगां ऊं सावधान रेईयो।”

16चेला समझया कोनी तो आपस में बिचार करण लागग्या कै, “ऐ आ बात ईंखातर केवै कै, के आपणै कनै रोटी कोनी?”

17यीसू नै बांगी बात गो ठा लागग्यो। अर बां पूछयो, “थे रोटी ना होण'गी बात क्यामी करण लागरया हो। के थारो दिल कठोर होयड़ो है थे देख गे ई कोनी समझो? 18थे झिकी थारी आंख्या ऊं देखी अर काना ऊं सुणी ही बा बात थानै याद कोनी। 19कै पांच हजार लोगां नै पांच रोटियां ऊं सलटा दिआ हा जद थे बाकी किती टोकरियां भरी।” बां केयो, “बारा टोकरियां।”

20फेर यीसू पूछयो, “जद मैं चार हजार लोगां नै सात रोटियां ऊं धपाया तो थे बाकी बचेड़ी रोटियां गा किता टोकरा भरया।” चेला केयो, “सात टोकरा।”

21यीसू बानै केयो, “फेर ई थे रोटी गी चिंता क्यामी करण लागरया हो?”

बेतसैदा में एक आंधै नै ठीक करणो

22जद बे बेतसैदा गाम में आया तो बठै लोग एक आंधै आदमी नै यीसू कनै ल्यागे बांऊ बिनती करण लाग्या कै ईं पर दया करो। हात लगाओ। 23यीसू बिं आंधै आदमी गो हात पकड़ गे गाम ऊं बारै लेग्या अर बिंगी आंख पर थूथकारो घाल गे हात मेल्यो अर बिनै पुछ्यो, “तनै कीं दिख के?”

24बण आंख चक गे इनै बिनै देख्यो अर केयो, “मनै आदमी भाजतै दरखतां गी तरियां दिखै।”

25दूसर फेर यीसू बिंगी आंख पर हात रख्यो अर बो आदमी देखण लागग्यो। 26यीसू बिनै गाम ऊं दूर होगे घरे जाण गो केयो, “झिकै ऊं बो चमत्कार गै बारै में किनैई बता ना सकै।”

पतरस गो यीसू नै मान लेणो

(मत्ती 16:13-20; लूका 9:18-21)

27फेर यीसू अर बिंगा चेला गलील प्रांत ऊं कैसरिया फिलिप्पी सैहर गै आसै पासै गै गामां में गेया। रा में यीसू चेला नै पूछयो, “मनै लोग के केवै?”

28चेला उतर दियो, “केई लोग तो यूहना बतिस्मो देण आळो केवै अर केई एलियाह अर केई परमेसर गी बात बताण आळो केवै।”

29बां बानै पूछयो, “थे मनै के केवो,” जद पतरस बोल्यो, “थे मसी हो।”

30यीसू बानै चेतायो कै, “मेरै बारै में ओ किनैई ना केईयो।”

आपगी मोत गै बारै में यीसू गी बात

(मत्ती 16:21-23; लूका 9:22)

31फेर यीसू बानै समझाण लागग्या कै, “मिनख गै बेटै खातर ओ जरूरी है कै बो दुख उठावै। समाज गा मोटा ग्यानी लोग, मुख्य याजक अर धर्म गा नेम सिखाण आळा मनै मसी मानण ऊं इनकार करैगा अर लोग जान ऊं मार दैयगा अर बो तीसरै दिन पाछो जीज्यैगो।” 32आ बात यीसू आपगै चेला नै खुल गे बताई, ईं पर पतरस यीसू नै न्यारी जिग्यां ले जा'गे फटकार लगाई। 33पण यीसू मुड़ गे आपगै चेला कानी देख्यो अर फेर पतरस नै फटकार गे केयो, “हे सैतान मेरी नजरा ऊं दूर होज्या। तूं परमेसर गी बाता पर कोनी पण मिनखां गी बात पर मन लगावै।”

34फेर बां आपगै चेला सागै भीड़ नै बुलाई अर बानै केयो, “जे कोई मेरै लारै आणो चावै तो पेलां अपणै आपगो त्याग करै। फेर मेरै लारै चालै। 35क्यूंकै झिको आपगै प्राणा नै बचाणो चावैगो बो बिनै खोवैगो। अर झिको मेरै ईं सुब समाचार गै खातर आपगा प्राण खोवैगो बो आपगा प्राण बचावैगो। 36जे कोई आदमी सारी दुनिया नै आपगी मुठी में कर ल्यै अर अनंत जीवन ना पा सकै तो फेर बिनै के लाभ होयो? 37मुकती ऊं बढगे कोई किमती चीज कोनी। 38जे कोई ईं संसार गै बुरा लोगां गै सांमै मेरो चेलो बणन ऊं अर मेरी बाता नै मानण ऊं सरमावैगो तो बिनै मिनख गो बेटो जद बो आपगै पिता परमेसर गी मेमा में सुरगदूतां सागै धरती पर आवैगो तो बिनै बी मानण ऊं सरमावैगो।”

Currently Selected:

मरकुस 8: BGQ

Highlight

Copy