मरकुस 7

रीति रिवाज नै मानणै गो सवाल

(मत्ती 15:1-9)

1एकर फरीसी अर सासतरी लोग झिका यरुसलेम ऊं आयेड़ा हा बांगै कनै भेळा होया। 2बां देख्यो कै यीसू गा चेला यहुदी नेम गै अनुसार बिना हात धोये खाणो खाण लागरया।

3क्यूंकै सारा फरीसी अर यहुदी लोग आपगै बडेरां गी परम्परा गै अनुसार हात आच्छी तरियां धोगे रोटी जीमता। 4जद बे बजार ऊं घरे आवै तो आपगै बडेरां गी रीत गै अनुसार हात धोगे खाणो खावै। बे लोटा, बाटी अर ताम्बे गै भांडा नै मांजणै गै कामा में आपगै बडेरां गै बतायेडै़ नेम गो पालण करता।

5फरीसियां अर यहुदियां यीसू नै पूछयो, “थारा चेला नेम गै अनुसार हात धोगे क्यूं खाणो कोनी खावै। बांगी रिवाज पर ऐ क्यूं कोनी चालै।”

6यीसू बानै केयो, “थारै पाखंडी लोगां गै बारै में तो परमेसर गा बचन सुणाण आळा भोत पेलां साची बात के दी।” ऐ बाता सासतर में ईं तरियां ऊं लिखेड़ी है कै,

“ऐ लोग मेरी बाता ऊं ई मनै मोटो मानै

पण मेरै पर बिस्वास कोनी करै।

7ऐ झिका बेकार में मेरी पूजा करै बिंगो कोई फायदो कोनी।

बे झिको सिखाण लागरया है बे आदमी गा बणायेड़ा रिवाज है।”

8थे लोगां परमेसर गै हुकम नै मानणो छोड़ दियो अर आदमी गै बणायेडै़ रिवाज नै सखताई ऊं मानण लागग्या।

9फेर यीसू बानै केयो, “थे परमेसर गै हुकम नै टाळ गे आपगै रीति रिवाजा नै मानण गो आच्छो ढंग सीख लिओ।” 10मूसा परमेसर गो ओ नेम सिखायो कै, “थे थारै मां बाप नै आदर करो। अर बां ओ ई सिखायो कै झिको आपगी मां बाप गी बुराई करै बिनै जान ऊं मारदैयो।” 11पण थे सिखाओ झिको आदमी आपगै मां बाप गी मदद खातर न्यारो धन भेळो करै बो परमेसर खातर रखेड़ो है। 12फेर आपगै मां बाप नै कीं देण गी लोड़ कोनी? 13इयां थे थारै रिवाजा ऊं दूसरा नै सिखाओ अर परमेसर गै नेमा ऊं आंख फेर ल्यो हिस्या हिस्या भोत गळत काम करो।

आदमी नै नास करण आळी बातां

(मत्ती 15:10-20)

14फेर यीसू लोगां गी भीड़ बुला गे केयो, “थे ध्यान ऊं सुणगे मेरी बात नै समझो। 15हिसी कोई चीज बारै कोनी झिकी नै आदमी खा गे असुद्ध होवै पण एक आदमी गै दिल ऊं झिकी बुराईयां निकळै बे ई आदमी नै परमेसर गी नजर में असुद्ध बणा दैय। 16झिकै गै कान है बो ईं बात नै ध्यान ऊं सुण गे समझ ल्यै।”

17जद यीसू भीड़ नै छोड गे घर में गेया तो बांगै चेला ईं मिसाल गो मतलब पूछयो। 18यीसू बानै केयो, “थे इती सोखी बात नै ई कोनी समझ सक्या कै झिको आदमी गै मूं माखर जावै बो आदमी नै असुद्ध कोनी कर सकै। 19क्यूंकै बो बिंगै मन में कोनी जावै पण पेट में जा'गे सरीर ऊं बारै निकल ज्यै। ओ केगे बानै समझायो कै हर तरियां गै भोजन नै खा सको।”

20फेर यीसू बानै समझायो कै, “झिको आदमी गी जबान ऊं निकळै बो ई आदमी नै परमेसर गी नजरा में बुरो बणा दैय। 21-22क्यूंकै आदमी गै मन ऊं ई बुरी सोच, बेबीचार, चोरी, हत्या, लोभ, बुरा काम, ईरस्या, चुगली, घमण्ड, अर मूरखता निकळै। 23ऐ सारी बुराईयां आदमी गै माऊं आ'गे बिनै बुरो बणा दैय।”

युनानी जाती गी लुगाई गो बिस्वास

(मत्ती 15:21-28)

24यीसू गलील प्रांत नै छोड गे उतर दिसा गै तुरास प्रांत में उड़ग्या। अर बठै किंगैई घर में उड़ गया अर बे चावा हा कै किनी ठा ना लागै कै मैं अठै हूं। पण लोगां ऊं ओलै कोनी रे सक्या। 25अर जद ई बठै एक लुगाई आई झिकी गी छोरी में ओपरी बड़ेड़ी ही। अर बा आ'गे बांगै पगां पड़गी। 26बा सीरिया देस गै फुनीसिया प्रान्त गी युनानी जाती गी ही। बा ओपरी काडण खातर यीसू ऊं गिड़ गिड़ागे पराथना करण लागगी। 27बिंगै बिस्वास नै परखण खातर यीसू बिनै केयो, “पेलां यहुदी झिका परमेसर गी उळाद है बागी मदद कर लेण दे। टाबरां गी रोटी लेगे कुता नै फेंकणी माड़ी बात है।”

28बण लुगाई केयो, “पण मालिक, घर गा कुता तो टाबरां कनूं मेज गै नीचै पड़या टुकडा खावै।”

29ओ सुणगे यीसू केयो, “तूं इतो आच्छो उतर दिओ ईंखातर तूं जा सकै। तेरी बेटी मू ओपरी निकळ गी।”

30जद बा घरे गेई तो बिंगी छोरी बिस्तर पर सुती पड़ी अर बिमू ओपरी निकळगी ही।

बेरै अर हकळै आदमी नै ठीक करणो

31फेर यीसू तुरास प्रांत नै छोड़गे सेदा सैहर ऊं होगे गलील झील गै कनै दिकापुलिस प्रांत में आ ग्या। 32बठै लोग एक आदमी नै यीसू कनै ल्याया। बो आदमी बेरो हो। बो हकड़ी खा'गे बोलतो हो जद लोग यीसू ऊं बिनती करण लागग्या कै थारी दया गो हात ईं पर रखै। 33जद बे बिं आदमी नै भीड़ ऊं दूर लेग्या अर बिंगै काना में आंगळी घाली अर थुथकारो घाल गे बिंगी जीभ गै हात लगायो। 34अर आकास कानी देख गे लंबो सांस लियो अर बिं आदमी गी भासा में बोल्या “इफकथा” झिकै गो अरथ होवै खुल ज्याओ।

35अर बिं आदमी गी जबान अर कान खुलग्या अर बो दूसरै लोगां गी तरियां बोलण लागग्यो। 36यीसू लोगां नै चेतायो कै ईं चमत्कार गै बारै में किनी ना बताईयो पण फेर ई लोग ईं बात गो जादा परचार करण लागग्या। 37लोग हेरान होगे केण लाग्या, “यीसू झिको कीं करै बड़िया करै। आंगै केण ऊं बेरा सुणन लागज्यै अर गूंगा बोलण लागज्यै।”

Currently Selected:

मरकुस 7: BGQ

Highlight

Copy