मरकुस 16

यीसू गो दूसर जी उठणो

(मत्ती 28:1-8; लूका 24:1-12; यूहना 20:1-10)

1सबत गो दिन बीत जाणै पर मरियम मगदलीनी, सलोमी अर याकूब गी मां मरियम यीसू गी ल्हास पर लगाण खातर सुगन्ध सामग्री मोल ली। 2हफ्ते गै पेलै दिन जद सूरज निकळ्यो बे कबर पर गेई। 3बे आपस में केवै ही, म्हारै खातर कबर गै मूं पर ऊं पथर नै कुण सरकावै गो। 4फेर जद बां आंख उठाई तो देख्यो कै भोत मोटो पथर बठूं हटेड़ो है। 5फेर जद बे कबर गै मा गेई तो बां देख्यो कै सफेद गाबा पेरेड़ो एक जवान बेठयो है। बे डर गी।

6फेर जवान बानै केयो, “डरो ना, थे झिकै यीसू नासरी नै ढूंडो हो, जिनै करूस पर चढायो गेयो हो बो जी उठयो है। बो अठै कोनी है, ईं जिग्यां नै देखो जठै बां बिनै रख्यो हो। 7अब थे जाओ अर बिंगै चेला अर पतरस नै केवो कै बो थारूं पेलां ई गलील जाण लागरयो है जिंया कै बण थानै केयो हो, बो थानै बठैई मिलैगो।” 8जद डर अर अचरज में डुबेड़ी बे कबर ऊं निकळगे भाज गी। बां किनैई कोनी बतायो क्यूंकै बे भोत घबरायेड़ी ही।

मरियम मगदलीनी नै यीसू गो दिखणो

(मत्ती 28:9,10; यूहना 20:11-18)

9हफ्ते गै पेलै दिन दिनगै जी उठणै गै बाद बो सारा ऊं पेलां मरियम मगदलीनी गै सामणै परकट होयो झिकी मू बण सात ओपरी काडी ही। 10बण यीसू गै साथिया नै झिका दुख में हा अर विलाप करा हा जा'गे बतायो। 11जद बां सुण्यो कै यीसू जींवंतो है अर बां देख्यो है तो बां बिस्वास कोनी करयो।

दो चेला नै यीसू दिखणो

(लूका 24:13-35)

12इंगै बाद बो दो जणा नै दूसरै रूप में मिल्यो झिका आपगै गाम जाण लागरया। 13बां पाछा आ'गे ओरा नै बी ईं बात गी जाणकारी दी पण बां बांगो बिस्वास कोनी करयो।

ग्यारा चेला नै यीसू दिखणो

(मत्ती 28:16-20; लूका 24:36-49; यूहना 20:19)

14बाद में जद बिंगा ग्यारा चेला भोजन करै हा, बो बांगै सामणै प्रकट होयो अर बां बिंगै अबिस्वास अर मन गी कठोरता गै खातर बानै झिड़क्या क्यूंकै बां बिंगो बिस्वास कोनी करयो हो झिको जींवंतो होण गै बाद बानै दिख्यो हो। 15फेर बण बानै केयो, “जाओ अर सारी दुनिया गै लोगां नै सुब समाचार गो उपदेस देवो। 16झिको कोई बिस्वास करै है अर बतिस्मो लेवै है बिंगो उद्धार होवैगो अर झिको बिस्वास ना करै है, बो दोसी मान्यो जावैगो। 17झिको मेरो बिस्वास करैगो, बामै ऐ निसानी हो'सी बे मेरै नाम ऊं ओपरियां नै काड सकैगा बे नूंई नूंई बोली बोलैगा। 18बे आपणै हातां ऊं सांप पकड़ लेवैगा अर बे जे ज्हेर बी पी लेवै तो बांगो कीं कोनी होवैगो, बे रोगियां पर आपगो हात रखैगा अर बे ठीक हो जावैगा।”

यीसू गो सुरग में जाणो

(लूका 24:50-53)

19ईं तरियां जद प्रभु यीसू बाऊं बात कर चुक्यो हो तो सुरग में उठा लियो गेयो बो परमेसर गै दाहिणी ओर बेठयो है। 20अर बां जा'गे हरेक जिग्यां प्रचार करयो। अर प्रभु बांगै द्वारा चमत्कार करता रेया अर चमत्कार ऊं प्रभु गो बचन सच्च साबित करता रेया।

Currently Selected:

मरकुस 16: BGQ

Highlight

Copy