लूका ईं सुब समाचार गै बारै में
ईं सुब समाचार गै बारै में
ईं किताब गो नाम लेखक लूका गै नाम पर रखेड़ो है। ईं किताब में प्रभु यीसू मसी गै बारै में पूरी जाणकारी है।
बाइबल में लूका दो किताबां लिखी है झिकिंया में एक “लूका” अर दूसरी “खास चेला गा करेड़ा काम” है। लेखक लूका, पौलुस खास चेलै गो बेली हो अर बिंगै सागै सेवा करतो हो। लेखक सीरिया देस गै अन्ताकिया नगर गो रेण आळो हो। बो बेद हो, बण ब्या कोनी मंडायो अर चुरासी सालां गी उंमर लेगे गुजरग्यो।
आ किताब ईस्वी सन् 60 में रोम देस में लिखिजी ही। बिं टेम जद पौलुस खास चेलै नै रोमी सरकार पेली बारी केद करयो हो।
लूका ओ सुब समाचार थियुफिलुस गै नाम लिख्यो है पण ओ सगळी जातियां गै खातर है। थियुफिलुस रोम राजा गै घराणै गो मोटो अफसर हो। बण यीसू मसी नै मान्यो हो। बिंगो मकसद हो कै यीसू मसी गै बारै में सगळी जाती गा लोग बी भोत आच्छी तरियां जाणै। लेखक ईं सुब समाचार में च्यार स्तुति गा भजन बी जोड़या है झिका में मरियम 1:46-55, जकरयाह 1:67-79, सुरगदूत 2:14, समौन 2:29-32 तांई आपां पढ सकां।
ओ सुब समाचार यीसू मसी नै मिनख गै रूप में दिखाण आळो है। माणस जाती गै कल्याण खातर यीसू मसी आपगो बलिदान दियो। ईं बात गो साफ-साफ जिकर करेड़ो है। ईं सुब समाचार नै पराथना गो सुब समाचार बी बोल सकां, क्यूंकै पराथना गै बारै में भोत सारी मिसाल बताई है। यीसू मसी आपगै चेला नै पराथना करणी सिखाई ऐ सगळी बातां दिखावै है कै पराथना गो भोत म्हत्व है।
लेखक लूका यीसू नै इसराएल खातर पेलां गो वायदो करेड़ो उद्धारकरता अर सारी माणस जाती गो उद्धारकरता आं दोनां ईं रूप में लिखै है। लूका लिख्यो है कै यीसू “कंगालां नै सुब समाचार सुणाण खातर” प्रभु गी आत्मा बुलायो हो। ईंखातर ओ सुब समाचार हरेक तरियां गी ब्यादियां अर समस्यावां में पडे़ड़ा लोगां गी चिंताऊं भरयो पड़यो है। ईं सुब समाचार में आनंद गै भाव गी भरपूरी है। खास कर'गे सरू गै पाठां में, झिकां में यीसू मसी गै आण गो एलान करेड़ो है, अर छेकड़लै पाठां में बी जठै यीसू मसी गै सुरग में जाण गै बारै में लिखेड़ो है। यीसू मसी गै सुरग में जाणै गै बाद में मसी में बिस्वास गो बदणो अर फेलाण गै बारै में लूका “खास चेला गा करेड़ा काम” गी किताब में लिख्यो है। यीसू अर बतिस्मो देण आळै यूहना गै जन्म गै बारै में सारी बातां सिरफ लूका लेखक ई लिखी है। मिसाल गै तोर पर यीसू गै जन्म होणै पर सुरगदूतां गो भजन, गुआळियां गो यीसू नै देखण जाणो, यरुसलेम गै मिन्दर में टाबर यीसू, अर दयालु सामरी अर ऊजाड़ू बेटै गी मिसाल अर समौन अर हना गै बारै में सिरफ ईं किताब में ई मिलै। सगळै सुब समाचार में पराथना, पवितर आत्मा, यीसू मसी गी जन-सेवा में लुगाईयां गो रोल, अर परमेसर पापां नै माफ करै ईं बात पर भोत जोर देएड़ो है।
रूप रेखा
बतिस्मो देण आळै यूहना अर यीसू गो जन्म अर टाबरपणो 1:5–2:52
बतिस्मो देण आळै यूहना गी लोक-सेवा 3:1-20
यीसू गो बतिस्मो अर परख्यो जाणो 3:21–4:13
गलील परदेस में यीसू गी लोक-सेवा 4:14–9:50
गलील परदेस ऊं लेगे यरुसलेम तांई यीसू गी यातरा 9:51–19:27
यरुसलेम में छेकड़ैला सात दिन 19:28–23:56
प्रभु यीसू गो मरगे जीणो, दिसणो, अर सुरग में जाणो 24:1-53
Currently Selected:
लूका ईं सुब समाचार गै बारै में: BGQ
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust