मरकुस 11

यरुसलेम में जीत गे जाणो

(मत्ती 21:1-11; लूका 19:28-40; यूहना 12:12-19)

1फेर यीसू अर बिंगा चेला यरुसलेम गै कनै बैतफगे अर बेतनिया नाम गै दो गामां कनै पोंच्या झिका जेतुन पहाड़ पर बसेड़ा हा, यीसू आपगै दो चेला नै आ'गै भेज्या। 2अर बानै केयो, “आ'गै झिको गाम है बिमै जाओ। जिंयाई थे बिं गाम में बड़ोगा थानै एक गधी गो बच्चों बांदेड़ो दिखसी। बिं पर अजे तांई कणैई सवारी कोनी करी है। बिनै खोलगे अठै ले आओ। 3जे थानै कोई पूछै कै इनै क्यूं थे खोलो हो, तो थे बिनै केईयो प्रभु नै इंगी लोड़ है अर बेगो ई पाछो भेज दैयांगा।”

4दोनूं भेळा गेया अर एक गधी गै बच्चै नै एक घर गै दरवाजै गै बारै गळी में बांदेडो देख्यो बिनै जिंयाई खोलण लागग्या। 5बठै खड़या लोगां बानै पूछयो, “के करण लागरया हो। ईं गधी गै बच्चै नै क्यामी खोलो हो?”

6जिंया यीसू चेला नै केयो हो, बिंयाई बानै बता दियो। जद लोगां गधी गै बच्चै नै ले जाण दियो। 7बां गधी गै बच्चै नै यीसू गै कनै ल्यागे बिं पर आपगा गाबा रख दिया अर बो बिंगै उपर बेठ ग्यो। 8भीड़ ऊं केई लोगां आपगा गाबा अर केई लोगां दरखतां गी डाळियां खेता ऊं ल्यागे रा में बिछा दी। 9यीसू गै आगै अर लारै चालण आळा लोग ऊंची आवाज में केण लाग्या,

“परमेसर गी बडाई होवै।

परमेसर गी जय जयकार होवै। तूं झिको परमेसर कनूं आयो है।

परमेसर गी खास आसिस थारै पर है।

10म्हारै बाप दाऊद गो राज झिको आण आळो है धन्य है।”

परमेसर गी जय जयकार होवै।

11यीसू यरुसलेम आया अर मिन्दर में गेया। चारूंमेर घूमगे यीसू ध्यान ऊं सारो कीं देख्यो। पण देर होण गै कारण बारा चेला गै सागै बेतनिया गाम में उड़ग्या।

बिना फळ गो अंजीर गो दरखत

(मत्ती 21:18,19)

12दूसरै दिन जद यीसू अर बिंगा चेला बेतनिया गाम ऊं निकळया तो यीसू मसी नै भूख लागगी। 13थोड़ी सी दूर बां पता ऊं भरेड़ो अंजीर गो दरखत देख्यो। यीसू बिंगै कनै गेया तो बिंगै अंजीर लागेड़ा ई कोनी हा अर एकला पता ई लागेड़ा देख्या क्यूंकै बो टेम अंजीर पाकण गो कोनी हो। 14फेर बिं दरखत नै सराप दियो आज गै बाद तेरो फळ कोई बी खा ना सकै। चेला यीसू गी आ बात सुणी ही।

मिन्दर मू बोपारियां नै बारै काडणो

(मत्ती 21:12-17; लूका 19:45-48; यूहना 2:13-22)

15-16फेर बे यरुसलेम आया अर बठै मिन्दर में गेया अर बठै लोगां दुकानां लगा राखी बानै बारै काडण लागग्यो अर सारा नै सामान खरिदणो अर बेचणो बंद करा दियो। 17फेर यीसू परमेसर गो बचन सिखाण लागग्यो। बण केयो, “थे जाणो हो कै पवितर सासतर में इंया लिखेड़ो है कै मेरो मिन्दर सारी जाति गै लोगां खातर पराथना करण गो घर है। पण थे इनै बोपार गो घर बणा दियो।”#यसयाह 56:7 #यिरमयाह 7:11

18जद मुख्य याजक अर यहुदी नेम सिखाण आळा यीसू नै मारण गी कोसिस करण लागग्या पण यीसू कनूं बे डरता हा क्यूंकै सारा लोग बिंगो बचन सुणगे हेरान हो जावंता हा।

19जद आथण होई तो यीसू अर चेला सैहर ऊं बारै उड़ग्या।

सुकेड़ै अंजीर गै दरखत गी सिक्सा

(मत्ती 21:20-22)

20दूसरै दिन दिनगै जद यीसू अर चेला गाम ऊं जावै हा तो। बां बिं अंजीर गै दरखत नै देख्यो झिकै नै यीसू स्राप दियो हो। बो जड़ ऊं सूकग्यो हो। 21पतरस नै याद आयो अर बण यीसू नै केयो, “गुरूजी देखो, ओ बो ई अंजीर गो दरखत हो झिकै नै थे स्राप दियो बो सुकग्यो है।”

22यीसू केयो, “परमेसर पर बिस्वास करो। 23मैं थानै साची केऊं हूं कै जे कोई आपगै पूरै दिल ऊं बिस्वास करै है अर कोई संका कोनी करै कै जिंया बो केवैगो बिंया जरूर हो जासी अर जे पहाड़ नै केवै, जा'गे समुंदर में पड़ जा तो बो बिंयाई हो'सी। 24मैं थानै केऊं हूं कै जद थे लोग परमेसर कनूं कोई बी चीज पराथना कर'गे मांगो हो तो इंया बिस्वास करो कै बा थानै मिलैगी तो थानै जरूर मिलसी। 25जद थे पराथना करो हो जे थारै मन में किंगैई सागै है कीं तरियां गो बेर है तो बिनै थे माफ कर दैयो। जद थारो पिता परमेसर झिको सुरग में है थानै थारै पापां गी माफी दे देवैगो। 26जे थे माफ ना करोगा तो थारो पिता झिको सुरग में है थारै पापां गी माफी बी कोनी देवैगो।”

यीसू गै अधिकार पर सवाल

(मत्ती 21:23-27; लूका 20:1-8)

27बे यरुसलेम पूगगे मिन्दर में गेया, यीसू मिन्दर गै आंगण में चालण लागरया हा तो खास याजक अर नेम सिखाण आळा अर समाज गा मोटा आदमी बांगै कनै आया। 28अर बे यीसू नै पूछण लाग्या, “काल तूं झिको कीं करयो बो करण खातर तनै कण केयो, इंया करण गो अधिकार तनै कण दियो है।”

29यीसू बानै उतर दियो, “मैं थानै एक सवाल पूछूं हूं, जे बिंगो उतर देवैगो तो मैं बताऊंगा कै इयां करण गो मनै कण केयो? 30यूहना झिको पाणी में बतिस्मो दियो बो सुरग कानूं हो या फेर माणसा कानूं इंगो मनै उतर दैयो।”

31बां लोगां आपसरी में बातां करी अर एक दूसरै नै केण लाग्या जे आपां केवांगा कै यूहना गी डुबकी परमेसर कानूं ही तो यीसू केसी फेर थे बिस्वास क्यूं कोनी करयो। 32जे आपां केवां, यूहना कानी ऊं है क्यूंकै सारा लोग यूहना नै परमेसर गो संदेस सुणाण आळो मानता ईं बात ऊं बे लोग डरता हा। 33ईंखातर बां उतर दियो, “म्हे कोनी जाणा,” यीसू फेर केयो, “मैं बी थानै कोनी बताऊं कै मैं ओ काम किंगै अधिकार ऊं करूं हूं।”

Currently Selected:

मरकुस 11: BGQ

Highlight

Copy