मरकुस 10

तलाक गै बारै में यीसू गी सिक्सा

(मत्ती 19:1-12; लूका 16:18)

1यीसू कफरनहूम ऊं चालगे यहुदियां प्रदेस गी कांकड़ में अर यरदन नदी गी दूसरी पार गेयो। फेर ऊं भीड़ बिंगै कनै भेळी होगी, बो बानै रोज कीं तरियां परमेसर गी बाता सिखाण लागग्यो।

2फरीसी सभा गा केई आदमी यीसू कनै आ'गे बिनै सवाल पूछण लागग्या कै, “बिमै कोई गळती म्हानै लादै।” बां बिनै पूछयो, “कोई आदमी आपगी घरआळी नै छोड़ सकै है के?”

3यीसू बानै उतर दियो, “मूसा गै नेम विधान थानै के आग्या दी है?”

4बां जबाब दियो, “तलाक नामो दे'गे कोई आदमी आपगी घरआळी नै छोड़ सकै।”

5यीसू बानै केयो, “मूसा आ आग्या थानै ईं कर'गे दी कै थारा मन भोत पथर बरगा है। 6पण जद परमेसर सरसटी बणाई तो आदमी अर लुगाई नै बी बणाई। 7ईंखातर आदमी आपगै मां बाप नै छोड़गे आपगी घरआळी गै सागै रेसी। 8अर अब बे दो कोनी पण एक माणस गी तरियां हो'सी। 9ईंखातर बानै परमेसर जोड़ दिया तो कोई बी माणस बानै न्यारा न्यारा ना करै।”

10जद बे घरे हा तो चेला एकर फेर पूछयो, 11यीसू बानै उतर दियो, जे कोई आपगी घरआळी नै छोड़गे दूसरी लुगाई सागै ब्या करै तो बो परमेसर गी नजर में गळत काम करै। 12अर जे कोई लुगाई आपगै आदमी नै छोड़गे दूसरै आदमी सागै ब्या करै है तो बा परमेसर गी नजर में बेबीचार करै है।

टाबरां नै आसिरवाद

(मत्ती 19:13-15; लूका 18:15-17)

13एकर लोग आपगै टाबरां नै यीसू कनै ल्याया। बे चावा हा कै यीसू बांगै सिर पर हात रखगे बानै आसिरवाद देवै। पण यीसू गा चेला बानै रोक दिया। 14जद यीसू ओ देख्यो तो बिनै भोत रीस आ'गी। बण चेला नै केयो, टाबरां नै मेरै कनै आण दैयो, बानै रोको ना। आं टाबरां गी तरियां परमेसर पर पूरो भरोसो राखण आळा ई परमेसर गी आसिस ले सकै। 15झिका लोग एक टाबर गी तरियां परमेसर पर भरोसो कर'गे अर पूरी खुसी ऊं बिनै आपगो राजा मानसी बे ई परमेसर कनूं मिलण आळी आसिस ले सकै। 16फेर यीसू टाबरां नै आपगी गोदी में लेगे बांगै सिर पर हात रखगे बानै आसिरवाद दियो।

अमीर आदमी अर अनन्त जीवन

(मत्ती 19:16-30; लूका 18:18-30)

17जिंयाई यीसू यरुसलेम कानी जाण लाग्यो, एक आदमी भाजगे बिंगै कनै आयो अर आपगा गोडा टेक लिया अर बोल्यो, “गुरूजी, थे भोत आच्छा हो। मनै बताओ मैं अनन्त जीवन लेण खातर के करूं?”

18यीसू बिनै केयो, “तूं मनै क्यूं आच्छो बतावै है, तूं जाणै है कै परमेसर नै छोड़गे कोई बी आच्छो कोनी हो सकै। 19थे परमेसर गा ऐ नेम जाणो हो कै, किंगी हत्या ना करियो, कोई बी लुगाई गै सागै गळत संबंध ना राखियो, झूठी गवाई ना देईयो, ना पंचायत में ना कचेड़ी में किनैई धोखो ना देईयो अर आपगै मां बाप गो आदर मान करियो।”

20बण आदमी जबाब दियो, “गुरूजी, ऐ तो मैं छोटो सो हो जद ऊं आं सारा नेमा मानूं हूं।”

21यीसू बिनै देख्यो अर बिंगो मन प्रेम ऊं भरग्यो। फेर यीसू बिनै केयो, “तूं एक काम कर झिको तूं अजे तांई कोनी करयो तूं इंया कर, जितो तेरै कनै धन माल है सारो बेचगे गरीबा नै बाट दे, जे इंया करसी तो तनै सुरग में आत्मिक धन मिलैगो अर बाद में तूं मेरै लारै आ जा।” 22आ बात सुणगे बो भोत उदास होगे बठूं उड़ग्यो क्यूंकै बो भोत अमीर हो।

23यीसू चारूंमेर देखगे आपगै चेला नै केयो, “अमीर लोगां गो परमेसर गै राज में जाणो भोत मुसकिल है।”

24आ बात सुणगे चेला नै अचंभो होयो, पण यीसू फेर केयो, “झिका लोग आपगै धन पर भरोसो राखै है बांगो परमेसर गै राज में जाणो भोत मुसकिल है। 25जिंया एक ऊंट गो सुई गै नाकै माखर निकळणो बिंयाई एक धनवान आदमी गो परमेसर गै राज में जाणो भोत मुसकिल है।”

26आ बात सुणगे बे भोत चिंता में पड़ग्या अर आपसरी में पूछण लाग्या, “फेर तो कोई बी परमेसर गी सजा ऊं बच कोनी सकै।”

27यीसू बांगै कानी देखगे केयो, “लोगां खातर तो ओ भोत मुसकिल है पण परमेसर इंया कर सकै।”

28पतरस यीसू नै केयो, “थारै लारै चालण खातर म्हे सारो कीं छोड़ दियो।”

29यीसू बानै केयो, “मैं थानै साची केऊं, हिस्यो कोई कोनी झिको मेरै अर सुब समाचार खातर आपगा मां बाप, भाई भेन अर टाबर आपगी खेती छोड़ दी होवै। 30अर ईं दुनिया में सो गुणा ऊं जादा बिनै जरूर ना मिलै, घर होवै या भाई भेन, या मां बाप या टाबर पण आं मुसकिलां गै सागै बिनै सताव गो बिं सामणो करणो पड़सी। बिंगै आण गै टेम में बिनै अनन्त जीवन मिलसी। 31झिका नै, आ दुनिया मोटा समझै है बामू केईयां नै आण आळै टेम में परमेसर छोटा मानसी। अर केईयां नै आ दुनिया छोटा मानै है बानै परमेसर आण आळै टेम में मोटा मानसी।”

आपगी मोत गै बारै में यीसू गी तीसरी बात

(मत्ती 20:17-19; लूका 18:31-34)

32जद यीसू मसी अर बिंगा चेला अर केई ओर लोग बांगै सागै यरुसलेम जाण लागरया हा। यीसू बांगै आगै चालै हो। चेला नै अचंभो होयो। झिका सारा लोग बे बी भोत डरेड़ा हा। फेर यीसू बारा चेला नै ओटै ले जा'गे बातां बताई झिकी बिंगै सागै होण आळी ही बानै सारी बाता बताई। 33यीसू बानै केयो, “आपां यरुसलेम जाण लागरया हां। लोग परमेसर कनूं आएड़ै माणस नै मुख्य याजक अर यहुदी नेम सिखाण आळां गै हवालै कर देसी। बे बिनै मोत गी सजा सुणागे सैहर गै राजा गै अर अफसरां गै हवालै कर देसी। 34बे बिंगो मजाक उड़ावैगा। बिं पर थूक सी, कोड़ा मारसी अर मार देवैगा। पण बो तीन दिना गै बाद फेर जींवंतो होज्यै'गो।”

याकूब अर यूहना गी बिनती

(मत्ती 20:20-28)

35फेर जबदी गै बेटै याकूब अर यूहना यीसू गै कनै आ'गे केण लागग्या गुरूजी म्हे थारै कनूं कीं मांगागा थे म्हानै मना ना करियो।

36यीसू बानै पूछयो, “थे लोग मेरै कनूं के चावो हो?”

37बां उतर दियो जद थे परमेसर गी मेमा गै सागै सासन करो तो, थे म्हानै दोना नै एक नै दाहिणै अर दूसरै नै खबै पासै बिठा लेईयो।

38यीसू बानै केयो, थे झिको कीं मांगो हो बिनै आच्छी तरियां समझ गे कोनी मांगो, के झिको दुख मैं झेलण जाण लागरयो हूं। थे बी बो दुख झेलण खातर तैयार हो? के मेरी तरियां दुख झेलगे मरण खातर तैयार हो।

39बां यीसू नै केयो, “म्हे तैयार हां,” यीसू बानै केयो, “थे दोनूं मेरी तरियां दुख झेलण अर मरण खातर तैयार होवोगा।”

40पण कुण मेरै दाहिणै अर खबै बेठसी इंगो फेंसलो मैं कोनी कर सकूं। कुण लोग बेठ सकै है बांगै खातर परमेसर पेलां ऊं बा जिग्यां तैयार कर राखी है।

41जद बां दूसरां दस चेला नै पतो लागग्यो कै याकूब अर यूहना यीसू कनूं के मांग्यो है तो बानै दोना पर रीस आ'गी। 42यीसू मसी चेला नै बुला'गे केयो, “थे जाणो हो कै गेर यहुदियां पर झिका हुकम चलावै है, बे लोग आपगी ताकत दिखाणी चावै है अर बानै मोटा लोगां पर हुकम देणो आच्छो लागै है। 43पण थानै हिस्यो कोनी बणणो। झिको परमेसर गी नजर में मोटो बणणो चावै है बिनै सारा गी सेवा करणी चईयै। 44झिको परमेसर गी नजर में मोटो बणणो चावै है। बिनै सारां गो दास बणणो चइयै। 45क्यूंकै माणस गो बेटो ईंखातर कोनी आयो कै दूसरा बिंगी सेवा करै। पण दूसरा गी सेवा कर'गे आपगी जान दैय। परमेसर ऊं मिलण आळी सजा ऊं बचाण खातर आयो।”

आंधै बरतिमाई नै आंख्या देणी

(मत्ती 20:29-34; लूका 18:35-43)

46फेर बे यरीहो पूग्या। जद बठूं यीसू अर चेला बोळी भीड़ गै सागै निकळ्या, सड़क गै किनारै तिमाई गो बेटो बरतिमाई झिको आंधो हो, मंगतो बण गे बेठयो हो। 47जद बण सुणयो कै नासरत गाम गो यीसू आवै है। बो रोळा मचागे केण लागग्यो, “दाऊद राजा गी उळाद यीसू मेरै पर दया कर।”

48भीड़ ऊं केई लोगां बिनै रोक्यो अर रोळा करया कै, “चुप हो'जा।” पण बो चुप कोनी रेयो अर ओर बोळा रोळा मचागे केण लागग्यो, “दाऊद राजा गी पीढी ऊं आण आळा यीसू मेरै पर दया कर।”

49यीसू बठै रुकगे बिनै बुला'गे ल्याण खातर केयो, “लोगां बरतिमाई नै जा'गे केयो, सबर राख अर उठ, बो तनै बुलावै है।”

50आ बात सुणतां ई बण आपगो गाबो परनै फेंकगे दबादब खड़यो होगे यीसू गै कनै आयो।

51यीसू बिनै पूछयो, “मैं तेरै खातर के करूं?” आंधै आदमी केयो, गुरूजी मैं चाऊं के मैं देखण लाग जाऊं।

52यीसू बिनै केयो, “जा तेरै बिस्वास गै कारण तूं ठीक हो'ग्यो।” बो बिं घड़ी देखण लागग्यो अर यीसू गै लारै लारै चाल पड़यो।

Currently Selected:

मरकुस 10: BGQ

Highlight

Copy