लूका 21

कंगाल विधवा गो दान

(मरकुस 12:41-44)

1फेर यीसू धनवान लोगां कानी देख्यो झिका दान पातर में आपगो दान घालण लागरया। 2बठै ई बां एक गरीब विधवा लुगाई नै दो छोटा सिका घालतां देखी। 3जद बण केयो, “मैं थानै साची केऊं कै अण विधवा लुगाई परमेसर गी नजरा में दूसरा लोगां ऊं जादा दान दियो है। 4क्यूंकै सारा लोगां आपगै बोळै धन मू थोड़ो सो दान करयो है पण अण गरीब विधवा लुगाई बिंगै कनै झिको कीं हो बो दे दियो।”

मिन्दर गै ढाण गी बात

(मत्ती 24:1,2; मरकुस 13:1,2)

5जद केई लोग आपसरी में बात करा कै मिन्दर कितै सुणै पथरां अर दान करेड़ी चिजाऊं सजायो है। 6जद यीसू बानै केयो, “झिकै मिन्दर नै आज थे देखण लागरया हो, कदी हिस्यो टेम आसी ईं मिन्दर नै ढा देसी।”

संकट अर क्ळेस

(मत्ती 24:3-14; मरकुस 13:3-13)

7जद बां यीसू नै पूछयो, “हे गुरू, बो दिन कद आवैगो अर बिं दिन गी के निसानी हो'सी।” 8यीसू बानै केयो, चोकस ऊं रेईयो अर किंगी बात में आ'गे भटक ना जाईयो, क्यूंकै भोत लोग मेरै बरगा बणगे थारै कनै आवैगा अर केसी मैं मसी हूं अर दुनियां गै अंत गो टेम आ'ग्यो है। पण थे बांगै लारै ना लागज्याईयो। 9फेर केयो, “थे लड़ाई अर दंगा होण'गी बात सुणगे घबराईयो ना। क्यूंकै ऐ बातां तो पेलां होवैगी पण बिं टेम अंत कोनी होवैगो।” 10फेर बण केयो कै हरेक जाती अर हरेक देस एक दूसरै गै बिरोध में खड़या होज्यैगा। 11अर मोटा मोटा भूकंप आवैगा, जिग्यां-जिग्यां काळ पड़ैगा अर हरेक जिग्यां महामारी पड़ैगी। अर आकास गूंजण लागज्यैगो अर मोटा-मोटा निसान आकास में दिखण लागज्यैगा। 12पण ऐ बातां होण ऊं पेलां लोग थानै मेरा चेला होण खातर पकड़ैगा, दुख देवैगा अर पंचायत में सूंपगे जेळ में बंद करवा देवैगा अर मेरै नाम गै कारण थानै राजा गै सांमणै पेस करैगा। 13पण बो टेम मेरै बारै में बताण गो मोको होवैगो। 14जद थे ईं बात गी चिंता ना करियो कै आपणै पर लगाएड़ै दोसा गो जबाब के देवांगा? 15क्यूंकै बिं टेम मैं थानै हिस्यो ग्यान अर समझ दैयूंगा कै थारा बिरोधी थारी बात गो जबाब कोनी दे सकैगा। 16अर थारा मां-बाप, भाई, बन्धु झिका मेरै उपर बिस्वास कोनी करै बे थानै पकड़ुवावैगा अर थारै मू केईयां नै मरवा दैयगा। 17थारो मेरै पर बिस्वास होण गै कारण सारा लोग थारूं बैर राखण लागज्यैगा। 18पण थारो बाळ ई बांको कोनी होवैगो। 19थारी धीरजाई ही थारै प्राण नै बचागे राखैगी।

यरुसलेम गै बिनास गी बात

(मत्ती 24:15-21; मरकुस 13:14-19)

20जद थे यरुसलेम नै सेना ऊं घिरेड़ो देखल्यो तो समझ लेईयो कै सैहर उजड़णगो टेम आ'ग्यो। 21बिं टेम झिका यहुदियां नगर में रेण आळा लोग प्हाड़ा पर भाज जाईयो अर झिका यरुसलेम नगर में रेवै बे सारा बारै निकळ जाईयो अर झिका बारलै पासै रेवै बे नगर गै मा सरण लेण खातर ना जाईयो। 22क्यूंकै बो दिन पवितर सासतर में लिखेड़ी बातां पूरी होण गै कारण बठै गै लोगां नै सजा देण गो होवैगो। 23पण तेरै पर इतो बुरो हो'सी कै बां लुगाईयां पर झिकी बिं टेम गरभवती हो'सी या फेर नानै टाबरां नै दूध प्यांती हो'सी, बां लुगाइंया ऊं भाजीजणो कोनी क्यूंकै बिं टेम बठै भोत क्ळेस अर परमेसर गी रीस लोगां पर हो'सी। 24बे तलवारां ऊं बाडिज्यैगा अर झिका बच जिसी बानै बंदी बणागे दूसरा देसां में लेजीसी अर यरुसलेम पर राज करण आळा गेर यहुदी लोग बानै कुचळता रेवैगा जद ताईं बांगो टेम पूरो कोनी होज्यै'गो।

मिनख गै बेटै गो दुसर आणो

(मत्ती 24:29-31; मरकुस 13:24-27)

25जद मिनख गो बेटो दुसर आसी बिं टेम सूरज, अर चांद अर तारा में डरावणा निसान दिखैगा अर सारी धरती गै लोगां पर भोत क्ळेस आसी। क्यूंकै बे समुंदर गै ऊथळ-पुथळ होण ऊं भोत डरज्यैगा। 26संसार पर आण आळै क्ळेस ऊं डरतां लोगां गो जी निकळज्यैगो क्यूंकै आकास गी सकतियां हलाइजैगी। 27जद बे मिनख गै बेटै नै बिंगी सकती अर मेंमा गै सागै बादळा ऊं आंता देखैगा। 28जद ऐ सगळी बातां होण लागै तो सीधा खड़या होगे आपगो सिर उपर चकियो क्यूंकै बिं टेम थारो छुटकारो नेडै़ हो'सी।

अंजीर गै दरखत गी मिसाल

(मत्ती 24:32-35; मरकुस 13:28-31)

29फेर बण बानै एक मिसाल देगे समझाया कै अंजीर गै दरखत नै अर दूसरा दरखतां नै देखो, 30जिंयाई आंगै नूंआ पता या कूंपळ निकळण लागज्यै तो थानै ठा लागज्यै कै अब गरमी गी रूत आण आळी है। 31ईं तरियां बे सारी बातां थानै होंती दिखण लागज्यै तो समझ लेईयो परमेसर गो राज आण आळो है। 32मैं थानै साची-साची केऊं कै जद तांई ऐ बातां पूरी ना हो'ज्यै बिं टेम तांई ईं पीढी गै लोगां गो अंत कोनी होवै। 33आकास अर धरती तो टळ जिसी पण मेरी बातां कदैई टळै कोनी।

जागता रेवो

(मत्ती 24:36-44; मरकुस 13:32-37)

34ईंखातर सावधान रेवो कठैई इंया ना होवै कै थारो मन लापरवाई अर नसै में अर ईं जीवन गी चिंतावां ऊं उदास हो'ज्यै अर बो दिन फांसी गी तरियां चाणचकै ई थारै गळै में घलज्यै। 35क्यूंकै बो दिन सारी धरती पर रेण आळा लोगां पर एकैदम ई आसी। 36ईंखातर जागता रेवो अर हर टेम पराथना करता रेवो। जिंऊ आण आळै टेम गै क्ळेस ऊं बचण खातर अर मिनख गै बेटै गै सांमणै खड़या होण गै लायक बण सको। 37बो दिन में मिन्दर में परबचन करतो अर रात नै बारै जा'गे जेतुन प्हाड़ पर रेंतो हो। 38अर दिन गै पेली सारा लोग परबचन सुणन खातर मिन्दर में बांगै कनै आंता हा।

Currently Selected:

लूका 21: BGQ

Highlight

Copy