लूका 15

गमेड़ी भेड़ गी मिसाल

(मत्ती 18:12-14)

1यीसू जद परबचन देंता तो सारा चुंगी लेण आळा अर पापी लोग बिंगै कनै सुणन आंता। 2ओ देखगे फरीसी अर सास्तरी लोग रीस बळगे केण लागग्या कै ओ तो पापी लोगां सागै खावै पीवै अर मिलै है। 3जद यीसू बानै आ मिसाल बताई। 4मानल्यो थारै माऊं किंगै कनै सो भेड़ां है अर बामूं जे एक भेड़ कठैई गमज्यै तो थे बां निनाणवै भेड़ां नै बठै छोड़गे बिं गमेड़ी भेड़ नै ढूंढता कोनी फिरोगा के? जद तांई ना मिलै। 5अर जद लादज्यै, तो बिनै राजी होगे आपगै मोडै पर चक ल्याओगा 6अर घरे आ'गे आपगै साथियां सागै अर पड़ोसियां सागै खुसी मनाण लागज्यै कै मेरी गमेड़ी भेड़ लाद'गी। 7मैं केऊं कै ईं तरियां ईं जद एक भटकेड़ो पापी परमेसर कनै आवै तो सुरग में इतो आनंद होवै जितो बां निनाणवै धरमी लोगां खातर कोनी होवै क्यूंकै बे भटकेड़ा कोनी हा।

गमेडै़ टकै गी मिसाल

8जिंया मानल्यो एक लुगाई गै कनै चांदी गा दस टका है जे बिंगो एक टको गमज्यै तो बा दीयो जगागे अर घर में भूआरी मारगे जद तांई बो ना मिलैगो तो बिनै जी लगागे ढूंढती कोनी रेवैगी के? 9जद बो चांदी गो टको बिनै लादज्यै तो बा आपगी बेलणां अर पड़ोसणां नै बुला'गे केसी, “मेरै सागै खुसी मनाओ क्यूंकै मेरो गमेड़ो टको लाद'ग्यो है।” 10मैं थानै केऊं बिंयाई एक पापी गै मन बदळ नै ऊं परमेसर गै सुरगदूतां सांमै सुरग में आनंद होवै।

ऊजाड़ू बेटै गी मिसाल

11फेर बण एक ओर मिसाल कैई कै एक आदमी गै दो बेटा हा। 12अर बिंगो छोटियो बेटो आपगै बाप नै बोल्यो, “पिताजी, मनै मेरी जेदाद गो हिसो दे अर बिंगै बाप बिंगो हिसो बिनै दे दियो। 13केई दिनां गै बाद में छोटियो बेटो आपगो धन-माल लेगे दूसरै देस में उड़ग्यो अर बठै गळत कामां में आपगो सारो धन उड़ा दियो। 14जद बिं कनै सारो धन मुकग्यो तो बो कंगाल हो'ग्यो। बिं टेम देस में अकाळ पड़ग्यो। 15बण बठै एक किसान गै आ'गै बिनती करी कै मनै राख ल्यो तो बण किसान बिनै सूर चराण खेत में घाल दियो। 16अर बो सोचतो कै मनै बे फळियां मिल जावै झिकी सूर खांता हा। पण बिंगो मालिक बिनै ओर कीं खाण नै कोनी देंतो। 17जद बण आपगै घर गी सोची कै मेरै पिता गै घरे दिहाड़िया नै कितो खाण पीण नै मिलै। अर मैं अठै भूख मरण लागरयो हूं। 18पण अब मैं आपगै पिता कनै जाऊंगा अर केऊंगा, ‘पिताजी, मैं परमेसर गै खिलाफ अर थारी नजरां में भोत पाप करया है।’” 19अब मैं थारो बेटो कुहाण गै ई लाइक कोनी रेयो। अब थे मनै एक नोकर बणागे घरे राख ल्यो। 20अर बो आपगै घर कानी चाल पड़यो। बिंगै पिता बिनै दूर ऊं आंता देख बिं पर तरस खायो। अर सांमै भाजगे बिनै काळजै गै लगा लियो अर भोत बिंगा लाड-कोड करया। 21बण केयो पिताजी, “मैं पापी हूं क्यूंकै मैं सुरग अर थारी नजरां में भोत मोटो पाप करयो है। मैं थारो बेटो कुहाण गै लायक कोनी रेयो।” 22पण बिंगै पिता आपगै दासा नै केयो ईंखातर बडिया कपड़ा, जूती अर बिंटी ल्यागे पिरा'ओ, 23अर बडिया भोजन तैयार करवाओ, इंगै सागै जीमां अर सारा खुसी मनावां। 24क्यूंकै मेरो बेटो झिको मरग्यो आज बो जीग्यो है अर गम'ग्यो हो बो आज लाद'ग्यो है अर बे सारा खुसी मनाण लागग्या। 25पण बिंगो मोटोड़ो बेटो खेत ऊं आयो तो बण घर में नाचण कूदण गो खड़को सुण्यो। 26बण आपगै नोकर नै बुला'गे पूछयो, “ओ के होण लागरयो है?” 27बो बोल्यो, “तेरो भाई आयो है जद तेरै पिता बिनै चंगो भलो देखगे घरे भोज करवायो है।” 28ओ सुणगे बो रीसा में आ'ग्यो। अर घर गै मा कोनी आणो चावै ओ तो बिंगै पिता बिनै बारै आ'गे समझाण लागग्यो। 29बण आपगै पिता नै केयो, “देखो मनै थारी सेवा करता नै इता साल हो'ग्या अर थारी बात में कदी कोनी टाळी तो बी थे मनै साथियां सागै खुसी मनाण खातर कदी कीं कोनी दियो। 30पण अण बेटै थारो सारो धन गळत कामां में उड़ा'गे घरे आयो है अर थे ईंखातर बडिया भोजन तैयार करवायो है। 31बिंगै पिता बिनै समझायो कै बेटा तूं हमेसा मेरै सागै रेयो है अर झिको कीं मेरो है। बो सारो तेरो ई तो है। 32पण आज तनै खुस होणो चाईजै कै आज तेरो भाई झिको मरग्यो बो आज जींवंतो हो'ग्यो। गम'ग्यो हो बो आज लाद'ग्यो है।”

Currently Selected:

लूका 15: BGQ

Highlight

Copy