लूका 1
1
जाण पिछाण
1आदरणीय थियुफिलुस,#1:1 बिं टेम गो एक मोटो अफसर, ईं नाम गो मतलब है परमेसर गो बेली परमेसर आपणै बिचाळै झिका काम पूरा करया है, बांनै केई लोगां लिखणै गी कोसिस करी है। 2आं कामां गी बातां आपां तांई बां लोगां पुगाई है, झिका आंख्या ऊं देखण आळा अर प्रभु गो बचन परचार करण आळा हा। 3यीसू मसी#1:3 यीसू मसी गै नाम गो मतलब है, “उद्धारकरता प्रभु” गै जन्म ऊं लेगे आखर तांई सगळी बातां नै मैं आच्छी तरियां परखी तो मनै ई ठीक लाग्यो कै ऐ सगळी बातां तेरै खातर ध्यान ऊं अर लड़ीबार लिखूं। 4जिंऊं थे थियुफिलुस, जाणल्यो कै यीसू मसी गै बारै में झिकी बातां थे सीखी है बे लो पर लीक है।
बतिस्मो देण आळै यूहना गै जन्म गो एलान
5आ घटना यहुदिया परदेस गै राजा हेरोदेस गै टेम गी है, जद जकरिया नाम गो एक याजक हो। बो याजकां गै अबियाह दल#1:5 यहुदी याजकां नै 24 दळ में बांटेड़ो हो, हरेक दळ आपगै नेता गै नाम ऊं जाणिजतो हो। ओ दळ अबियाह गो हो। में हो। बिंगी घराळी इलीसिबा हारून गै घराणै गी ही। 6जकरिया अर इलीसिबा परमेसर गी नजर में निरदोस हा अर परमेसर गै हुक्म अर नेम नै मानण आळा हा। 7अर बांगै कोई टाबर कोनी होया क्यूंकै इलीसिबा बांझ ही अर बे दोनूं बुढा हो'ग्या। 8-9जकरिया गै दल गै याजकां गी यरुसलेम नगर में परमेसर गै मिन्दर में धूप करण गी बारी#1:8-9 धूप करण गी बारी: किसै बी याजक नै आपगै पूरै जीवन में एक बारी ही धूप करण गो मोको मिलतो हो। आई। याजकां गी रीति गै हिसाब ऊं परची घाली तो बा जकरिया गै नाम गी निकळी कै बो मिन्दर गी पवितर जिग्यां में जा'गे प्रभु गै सांमै धूप करै। 10बिं टेम बो मिन्दर में धूप करै हो तो बारै लोगां गी भोत मोटी भीड़ खड़ी होगे पराथना करै ही।
11बिं टेम मिन्दर में जकरिया नै परमेसर गो एक सुरगदूत धूप करण गी जिग्यां गै सजै पास खड़यो दिस्यो। 12जकरिया बिनै देखगे भोत डर ग्यो। 13जद सुरगदूत बिनै केयो, “तूं डर ना, तेरी पराथना परमेसर सुण ली, तेरी घराळी इलीसिबा गै एक छोरो हो'सी तूं बिंगो नाम यूहना#1:13 ईं नाम गो मतलब: परमेसर गी किरपा या आसिस। राखी। 14बिंगै जन्म ऊं थानै खुसी मिलसी अर सगळा लोग भोत आनंद मनासी। 15अर बो प्रभु गी निगा में म्हान हो'सी अर आपगी मां गी कोख में ई परमेसर गी आत्मा ऊं भरपूर हो'सी अर बो दाख गो रस अर दारू कदी कोनी पिवैगो। 16जद बो जुआन होज्यै'गो तो इसराएल देस में परचार कर'गे भोत सारा लोगां नै परमेसर गै रा पर ल्यासी। 17बो एलियाह परमेसर गी बात बोलण आळै गी आत्मा अर सामरथ लेगे प्रभु गै आण ऊं पेलां आवैगो। बो प्रभु मसी गै जन्म ऊं पेलां आ'गे बिंगै खातर लायक प्रजा तैयार करसी, बो मां बाप गो मन टाबरां कनै लगासी अर परमेसर गै हुक्म नै ना मानण आळा लोगां गै मन नै परमेसर गी नजर में आच्छा लोगां गी समझ में ले आसी।” 18जकरिया सुरगदूत नै केयो, “म्हे दोनूं तो बुढा हां, फेर ईं बात नै मैं किंया मानूं?” 19सुरगदूत बिनै केयो, “मेरो नाम जिबराईल#1:19 जिबराईल: ईं नाम गो मतलब है परमेसर गो जन, इंगो काम परमेसर गी योजनावां गो एलान करणो है। है, मैं परमेसर गै सांमै खड़यो रेगे सेवा करूं हूं, अर मनै तेरै कनै ओ सुब समाचार सुणाण खातर घाल्यो है कै थारै एक छोरो हो'सी। 20मेरी बातां पर तूं बिस्वास कोनी करयो बिं टेम आण पर पूरी होण आळी है। ईंखातर तूं बिं टेम तांई बोल कोनी सकैगो।”
21सगळा लोग बारै खड़या जकरिया नै अडिकता अडिकता हेरान होण लागरया कै बिनै मिन्दर में इती देर किंया लागी। 22केई देर बाद जद बो मिन्दर ऊं बारै आयो तो बिंऊं बोलीज्यो कोनी अर जद बो बानै सेन ऊं समझाण लागग्यो। ईंखातर लोग बिनै देखगे समझग्या कै मिन्दर में आज इनै परमेसर दरसण दियो है। 23जद बिंगा मिन्दर में सेवा करण गा दिन पूरा हो'ग्या तो पाछो आपगै घरे उड़ग्यो। 24बां दिनां में बिंगी घराळी इलीसिबा गरभवती होई अर पांच म्हिना तांई आपगै घर गै मांई रेई। 25कै ईं “बुढापै में परमेसर मेरै उपर किरपा कर'गे टाबर ना होण गो मेरै कलंक नै दूर करयो है। आ बात परमेसर मेरै खातर करी है।”
यीसू गै जन्म गो एलान
26जद इलीसिबा गै गरभवती होण गै छठै म्हिनै में परमेसर जिबराईल सुरगदूत नै गलील परदेस गै नासरत नगर में मरियम कनै घाल्यो।#मत्ती 1:18 27अर बिंगो रिस्तो राजा दाऊद गै घराणै गै युसुफ नाम गै एक छोरै गै सागै होयड़ो हो अर बा बिं टेम कुंआरी ही। 28फेर सुरगदूत मरियम गै घरे जा'गे केयो, “प्रणाम परमेसर तेरै सागै है अर तेरै उपर किरपा करी है।” 29मरियम आ बात सुणगे भोत घबरा गी अर सोचण लागी कै ओ के तरिकै गो प्रणाम है? 30सुरगदूत बिनै केयो, “डर ना, क्यूंकै परमेसर गी किरपा तेरै उपर होई है, 31देख, तूं गरभवती हो'सी अर तेरै एक छोरो हो'सी। तूं बिंगो नाम यीसू राखी।#मत्ती 1:21 32बो म्हान होवैगो अर परमेसर गो झिको सारा ऊं म्हान बेटो कुहावैगो अर प्रभु परमेसर बिंगै पुरखां दाऊद गो सिंहासन देसी। 33अर बो याकूब गै घराणै पर सदां राज करसी अर बिंगै राज गो कदी बी अंत कोनी हो'सी।” 34ऐ बातां सुणगे मरियम सुरगदूत नै केयो, “इंया किंया हो सकै, मैं तो अजे कुंआरी हूं।” 35सुरगदूत बिनै जबाब दियो, “तेरै उपर परमेसर गी किरपा ऊं पवितर आत्मा तेरै उपर ऊतरसी अर परमेसर गी सामरथ तनै संभाळसी। ईंखातर बो पवितर हो'सी अर परमेसर गो बेटो कुहासी। 36सुण, तेरै नेडै़ गै रिस्तै में इलीसिबा गै छठमों म्हिनों है, झिकी बांझड़ी ही, बिंगै बुढापै में एक छोरो हो'सी। 37क्यूंकै परमेसर नै कोई बी बात मुसकिल कोनी।” 38मरियम केयो, “मैं प्रभु गी दासी हूं, अर बिंगी इच्छा पूरी होवै।” आ बात सुणगे सुरगदूत पाछो सुरग में उड़ग्यो।
मरियम गो इलीसिबा ऊं मिलण जाणो
39बां दिनां में मरियम बेगी सी प्हाड़ी देस में यहूदा परदेस गै एक नगर में इलीसिबा गै घरे गेई अर, 40बिनै निमस्कार करयो। 41जिंयाई इलीसिबा बिंगो निमस्कार सुण्यो तो टाबर बिंगै पेट में खुसी ऊं उछळ्यो अर बा पवितर आत्मा ऊं भरपूर हो'गी। 42इलीसिबा राजी होई अर जोर ऊं बोली कै, “लुगाईयां में तेरै अर तेरै पेट गै फळ पर परमेसर गी आसिस है, 43मेरै उपर किरपा होई है कै मेरै प्रभु गी मां मनै मिलण आई है, 44देख, मरियम तेरो निमस्कार सुणता ई मेरै पेट में टाबर खुसी ऊं उछळ्यो है, 45धन्य है मरियम तूं झिकी बिस्वास करयो कै प्रभु गै कानी ऊं केएड़ी बातां पूरी होगे रेसी।”
मरियम गो भजन
46-47जद मरियम केयो,
“मेरा प्राण परमेसर गी बडाई करै
अर आत्मा खुस है,
48बण आपगी गरीब दासी पर किरपा कर'गे
जुगा जुगा तांई धन्य कर दी,
49क्यूंकै पवितर अर सकतीसाली परमेसर
मेरै खातर भोत म्हान काम करया है।
50झिका लोग बिंगो डर मानै है
बां पर पीढियां तांईं दया बणी रेसी।
51बण आपगै सामरथ ऊं
हंकारी लोगां नै तितर-बितर कर दिया।
52बण राजा नै गरीब बणा दिया
अर गरीबां नै राजा बणा दिया।
53बण भूखै लोगां नै आच्छी चिजां ऊं धपा दिया
अर अमीर लोगां नै खाली हात काड़ दिया।
54बण इसराएल गा लोग झिका परमेसर गा सेवक है बांगी मदद करी
अर आपगो करेड़ो वायदो भुल्यो कोनी अर बां पर दया करी।
55बण म्हारै पुरखां, अबरहाम अर बिंगै घराणै गै सागै वायदो करयो
कै मेरी दया थारै उपर सदां बणी रेसी।”
56मरियम लगभग तीन म्हिना तांई इलीसिबा गै घरे रेई फेर पाछी आपगै घरे आ'गी।
बतिस्मो देण आळै यूहना गो जन्म
57जद इलीसिबा गै जापै गो टेम पूरो होयो तो बण एक छोरै नै जन्म दियो। 58जद बिंगै पड़ोसियां अर रिस्तेदारां नै पतो लागग्यो कै इलीसिबा नै छोरो देगे परमेसर दया करी है, तो बां बठै भोत खुसी मनाई।
59बांगी रीति-रिवाज गै हिसाब ऊं टाबर गै जन्म ऊं आठमै दिन खतनै गै रिवाज नै पूरो करण खातर अर नाम काडण खातर बिंगै घरे आया। बां टाबर गो नाम बिंगै बाप गै नाम पर जकरिया काडणो चायो। 60ओ देखगे इलीसिबा बोली कै, “इंगो नाम तो यूहना काडणो है।”
61जद बां केयो, “थारै पूरै परिवार में किंगोई ओ नाम कोनी।”
62जद बां बिंगै बाप नै सेन कर'गे पूछयो कै, “तूं इंगो नाम के काडणो चावै है?” 63बण तख्ती मंगा गे बिं पर लिख्यो कै “इंगो नाम यूहना है” ईं बात पर सारा लोग हेरान हो'ग्या। 64बिं टेम ई जकरिया गी जुबान खुलगी अर परमेसर गो धन्यवाद करण लागग्यो। 65आं बातां ऊं बठै रेण आळा सारा लोग डरण लागग्या अर यहुदियां गै पूरै प्हाड़ी देस में आं बातां गी चरचा फेलगी। 66झिकैई आं बातां नै सुणी बो हेरान हो'ग्यो अर सोचण लागग्यो कै ओ टाबर मोटो होगे केठा के बणैगो? क्यूंकै प्रभु गो हात इंगै सिर पर हो। ईंखातर लोग इंयाई सोचै हा।
जकरिया गो भजन
67जद जकरिया पवितर आत्मा ऊं पूर्ण होगे परमेसर गी बात बोलण लागग्यो।
68“इसराएल गै परमेसर गी जय हो
क्यूंकै बो आपगै लोगां गी मदद गै खातर आयो है अर आपगै लोगां नै आजाद कराया है।
69परमेसर आपणै खातर
आपगै सेवक राजा दाऊद गै खानदान में मुकतीदाता घाल्यो,
70जिंयाई परमेसर भोत टेम पेलां आपगै पवितर परमेसर गी बात बोलण आळा ऊं बचन कुहाया हा।
71परमेसर आपां नै दुसमणा अर बैरियां गै हातां ऊं छुड़ाया है।
72परमेसर झिको पवितर वायदो आपणै पुरखां सागै करयो हो बो आपणै सागै निभायो है।
73-75परमेसर आपणै पिता अबरहाम गै सागै सोगन खाई
अर बचन दियो कै थानै दुसमणा गै हातां ऊं छुड़ागे
सारी उंमर प्रभु गी सेवा करण खातर धरमी, पवितर अर दिलेर बणादेस्यूं। ओ बी पूरो होण लागग्यो,
76हे बालक, तूं मुकतीदाता गै आणूं पेलां परचार कर'गे, लोगां गो मन बदळगे तैयार करसी।
ईंखातर तूं परम प्रधान परमेसर गी बात बोलण आळो कुहासी।
77अर बिंगै लोगां नै समझावैगो
कै आपगै पापां गी माफी मांगण ऊं मुकती मिलसी।
78ओ सारो आपणै परमेसर गी घणी किरपा ऊं हो'सी,
झिकै गै कारण आपणै सारां पर सुरग ऊं एक नूंअ दिन गी जोती चमकैगी।
79आ जोती बां लोगां पर चमकैगी झिका अंधेरै अर मोत गै नेडै़ है,
अर बो आपां नै सांती गै रा पर चालण गी अगुआई करसी।”
80अर बो टाबर यूहना जवान अर आत्मा में पूरो होंतो गेयो, अर इसराएल गै लोगां गै बिचाळै आपगी सेवा सरू करण तांई बन उजाड़ में रेयो।
Currently Selected:
लूका 1: BGQ
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust
