यूहना 16

1“ऐ बाता मैं थानै ईंखातर कैई कै थे आपगै बिस्वास में ठोकर ना खा सको। 2बे थानै सतसंग घर ऊं काड़ देवैगा। सच्च में बो टेम आण लागरयो है। जद थारै मू किनैई मारगे हर कोई सोचैगो कै बो परमेसर गी सेवा करै है। 3इंया बे ईंखातर करैगा कै बे ना पिता नै जाणै है अर ना मनै जाणै है। 4पण ऐ बाता मैं थानै ईंखातर कैई कै ऐ बाता होणै गो टेम आवै तो थानै याद आ जावै कै मैं थानै इंगै बारै में पेलां ई बता दियो हो। मैं सुरू में थारै सागै हो। ईंखातर मैं थानै ऐ बाता कोनी बताई। 5अब मैं आपगै भेजण आळै गै कनै जाऊं हूं अर थारै मू अब मनै कोई कोनी पूछै कै तूं कठै जावै है। 6पण मैं झिकी बाता थानै कैई है ईंखातर थारो मन दुख ऊं भरिजग्यो है। 7पण मैं थानै साची साची केऊं हूं कै मेरो जाणो थारै खातर आच्छो है क्यूंकै जे मैं ना जाऊं तो मदद करण आळो थारै कनै कोनी आवैगो, पण जे मैं जाऊंगा तो बिनै थारै कनै घाल देऊंगा। 8बो आवैगो तो दुनियां नै पाप गै बारै में अर धारमिकता गै बारै में अर न्याय गै बारै में गवाई बतावैगो। 9लोगां मेरै उपर बिस्वास कोनी करयो। ईंखातर पाप गै बारै में बतावै है।#यूहना 7:7; 8:24; 2 पतरस 3:9 10अर अब थे मनै ओर जादा कोनी देखोगा। ईंखातर धारमिकता गै बारै में बतावै है। 11संसार पर राज करण आळै नै दोसी बणा दियो है। ईंखातर न्याय गै बारै में बतावै है।

12मैं थानै ओर बी भोत सारी बाता केणी है, पण थे बानै अब सेण कोनी कर सको। 13पण जद सच्चाई गो आत्मा झिको परमेसर कनूं आवैगो बो सारो सच्च जाणन गै खातर थारी मदद करैगो। क्यूंकै बो आपगै कनूं कोनी केवैगो, पण झिको सुणैगो बो ई केवैगो। बो थानै आण आळी बाता बतावैगो। 14बो मेरो आदर करैगो, क्यूंकै मेरी बातां लेगे बे बातां थानै बतावैगो। 15झिको पिता गो हो बो सारो मेरो है। ईंखातर मैं केयो कै मेरी बात लेगे थानै बतावैगो।”

दुख सुख में बदळ जावैगो

16थोड़ी देर गै बाद थे मनै कोनी देखोगा अर फेर थोड़ी देर में मनै देखोगा।

17जद बिंगा कीं चेला आपसरी में केयो, “ओ के है झिको बो आपां नै केवै है, थोड़ी देर में थे मनै कोनी देखोगा अर फेर थोड़ी देर में मनै देखैगा। अर ओ ईंखातर कै मैं पिता गै कनै जाण लागरयो हूं।” 18जद बां केयो, “थोड़ी देर आळी आ के बात है? आपां कोनी जाणा कै बो के केवै है।”

19यीसू जाणग्यो कै बे बिनै पूछणो चावै है तो बण बानै केयो कै, “थोड़ी देर गै बाद थे मनै कोनी देखोगा अर फेर थोड़ी देर में मनै देखोगा। इंया कर'गे झिको मैं केयो है बिं बात गै बारै में आपसरी में बात करण लागरया हो के? 20मैं थानै साची साची केऊं हूं, थे विलाप करोगा अर रोओगा पण ओ संसार राजी होवैगो। थे दुख करोगा पण थारो दुख खुसी में बदळ ज्यैगो। 21जद लुगाई गै जापै गो टेम आवै है तो बा भोत दुखी होवै है। पण जद टाबर पैदा हो'ज्यै तो बा भोत राजी होवै है। फेर बो दुख चिंता बिनै याद कोनी आवै, क्यूंकै संसार में एक टाबर पैदा हो'ग्यो। 22थे सारा लोग इंयाई दुखी हो, पण मैं थानै फेर मिलूंगा अर थारो मन खुसी ऊं भर ज्यैगो। अर बिं खुसी नै कोई बदळ कोनी सकैगो। 23बिं दिन थे मनै फेर देखोगा तो मेरूं कीं कोनी पूछोगा। मैं थानै साची साची केऊं मेरै नाम ऊं पिता कनूं झिको मांगोगा थानै देवैगो। 24अब तांई थे मेरै नाम ऊं कीं कोनी मांग्यो, मांगो तो मिलैगो कै थारी खुसी पूरी हो जावै।

संसार पर जीत

25मैं ऐ बाता थानै मिसाल गै रूप में कैई है। पण अब बो टेम आ'ग्यो है कै मैं थानै मिसाल देगे कोनी बताऊंगा, पण साफ साफ पिता गै बारै में बताऊंगा। 26-28मैं पिता ऊं परगट होयो अर ईं संसार में आयो अर अब मैं ईं संसार नै छोड़गे पिता गै कनै जाण लागरयो हूं। पिता आप थानै प्रेम करै है क्यूंकै थे मनै प्रेम करयो हो अर मान्यो है कै मैं पिता कनूं आयो हूं। बिं दिन मैं थानै ओ कोनी केऊं कै थारी ओर ऊं पिता कनै पराथना करूंगा पण थे मेरै नाम में मांगोगा। बो थानै मिल जावैगो जिंया बण बतायो हो।” 29बिंगै चेला केयो, “देखो अब थे बिना मिसाल गै साफ साफ बताण लागरया हो। 30अब म्हे जाणग्या कै थे सारो कीं जाणो हो। अर इंगी जरूरत कोनी क्यूंकै पूछण ऊं पेलां ई जाणै है कै आदमियां गै मन में के सवाल है। अर तूं बिंगो जबाब दे सकै है। ईंखातर म्हे बिस्वास करां हां कै थे परमेसर कनूं आया हो।”

31ओ सुणगे यीसू केयो कै, “थे अब बिस्वास करो हो। 32देखो, थारै मू हर एक इनै बिनै होगे आपो आपगै घरे उड़ जावैगा अर मनै छोड़ण गो टेम आ'ग्यो है। पण मेरो पिता मेरै सागै है। ईंखातर मैं एकलो कोनी। 33मैं ऐ बाता थानै ईंखातर कैई कै थानै मेरै द्वारा सांती मिलै। संसार में थानै दुख मिलैगो पण थे होंसलो राखो, मैं संसार नै जीत लियो है।”

Currently Selected:

यूहना 16: BGQ

Highlight

Copy