Maki 9

Iesua vasimolu muxiu musaxi iou vilemo

1Ioxe, mo muvikalane'ila lexe, “Eni avikalangengi manina aloxo 'o. Se'i noxinge ane nenge'a tatulu 'o, isoli uao la imaisou voxo so Mosinge molu u'uli laxune'i tamitemaou uxali no anu xavisi.”

2Ioxe, voxo 6 mulai mukalu laso Iesua mu'avali'a Pita xe Tiemisi xe Tioni so imulinu. Mimulinu la mitelai no la'olu vile teitexi mo ane'isisi mixoxolu ne. Mixoxolu mixoxolu sila misaxisou Iesua vasimolu muxiu muxali iou vilemo. 3Muxiu la mimiou no vasimolu kea mo iaxu e iaxu manina. Loxo nenge ta'uinu mimi no tikiso 'o la ukea axone uasi. Anene muvalukeasi. 4Xe Elaitia ilou Mosisi mipa ne mo tatisaipeli tatalu mimaisi'a ivikala noxou Iesua. 5Mimaisi'a axone la Pita muvikala lexe, “Tisao. Laixe so nenge taxolu aloxo 'osi. Nenge ta'alaxu tani tatalu. Vile sine xe vile noxou Mosisi xe vile noxou Elaitia.” 6Pita muvikala vuluvulusi axone xo anu oli'a tamenexu tatisaipeli mikisikula mo opone'i mu'olo'olo to!

7Ane'i mixoxolu la sauma vile mupa mo musuasi'a. Musuasi'a la milomusou xoli vile molu no sauma lexe, “Ano'o alixeli eni asexelaxu misevile. Ngingi ngalomuxu.” 8Vaikala ne mukalu xe misaxisaxi loxo 'o la evilela uasi. Mosisi ilou Elaitia tasiauxa'a. Ia Iesua oli'a tatisaipeliou tatalusi mixolu.

9Mukalu la oli'a milutu no la'olu ne milu'e. Milulu'e la Iesua muvikalane'i lexe, “Mi e ngemaisou 'o ngalemolu noxou itema vile uasi. Ngaxolusi xo xe ulai no voxo loxo Itema ane molu noxou Mosinge usoli xe utului laso ane, nga'alosi.” 10La ane'i milomuxu mo ipala'anixu mi ne uasi. Ia vaikalaou lexe umauli no anu soli la tane'ililiou mo mivivikalasou ngato'o. 11La ane'i mitali'isou Iesua aloxo 'o, “Axova no anu vaikalai'a tamitema so lavuluavu no anu lavuloto? Xo i'oxo lexe Elaitia une'e tei kaio Itema ane molu noxou Mosinge uxali ili'i?” 12La anu mukoline'i lexe, “Ia xo ma'i. Anene manina. Mosinge vaikalaou lexe Elaitia u'uli so upaipounu vote'isou Itema ane molu noxou Mosinge. Ia anu vaikalaou kalumo lexe Itema anene utavulenu tu'umaxu tavu'alo mo ipilikeousi. 13Ia no anu tali'i noxinge ne la avikalangengi aloxo 'o. Elaitia a mune'e mukalu. La tamitema mi'oxonu ili'ilixo masua noxou no anu masamasaxa noxi'a. Anu muxali noxou loxo tapolopeti mikaukavunu tatei.”

Iesua mukusaou angelo masua vile ane tatisaipeli imomomo no anu uasi

14Ioxe, Iesua oli'a tatisaipeli tatalu a so ixali noxi'a tamenexi'ae la mimaisi'a tamitema tavu'alo e tavu'alo mipita mixalilixa'a olele. La tamitema so lavulavu no anu lavuloto se'i mixolu mo a i'oki'okine'i no anu vaikala. 15Xe tamitema latala mimaisou Iesua unene'e sila mikuluke mo alaxu vilesisi miiave milai noxou. Milai xe mixali noxou la ane'i mivikala aso noxou. 16La anu mutali'isi'a lexe, “Ngingi ngexolu ngevivikalasou ma'ia ne?” 17La itema vile no taine'i mukolinu lexe, “Tisa, eni e'oxo so ane'enu alixeli noxine. Anu anaxu utomu so uvikala uasi xo angelo masua vile mukasou ane. 18Xe voxo loxo ukasou aloxo 'o la upalepeinu. La aliku 'o livilivixu upeipei mo anaxu ukalakikisi. Anu u'oxo u'oxo laso vasimolu utoto'eke. Ene'enu mo elinga noxi'a tatisaipelimeni lexe ikusaou angelo masua ne ia imomomo to uasi.”

19Iesua mulomusou itema ne mukalu la muvikalane'i tamitema latala lexe, “Uo, ngingi tamitema vaimomo 'o ne ngalopala uasisi. Axolu noxinge voxo veveni axova mo so ngano'u lavulavu? Ngamolo kalakala'ilo axo'o la ukalu talu? Ngano'u molomolo ne une'e noxilo.” 20Xe mine'enu noxou la angelo masua ne mumaisou Iesua sila alaxu vilesisi mukunokunoxu molomolo vasimolu mu'oki manina. La mupalepeinu no lia mo mulo'elo'e xe livilivixu mupeipei. 21La Iesua mutali'isou molomolo momu lexe, “Mi ano'o musoko'u talumo?” La mukolinu lexe, “Ai, musoko'u e molomoloxumo. 22Mo alaxu tavu'alo angelo masua ne mupalepeinu mu'una no navu mo no lexa so umasuanu avile. Laso loxo nini namomomo la taneninexe mo nasu'ulinexi.” 23La Iesua muvikalanu lexe, “Axova so nelemolu vaikala anene lexe, 'Loxo nini namomomo'? Anu umomomo so mimi mukalusi uxali noxou itema aneva loxo ulopalasi.” 24La alaxu vilesisi molomolo ne momu xolinu mula tatila lexe, “A eni alopala, ia lopala noxilo tatila malaxo uasi. Nini mene na'oxonu lopala noxilo so utilasi.”

25Ilou mivikala axone la mixolu va'axu sevile. Ia Iesua mumaisi'a tamitema milasi mine'ene'e noxi'a laso anu alaxu vilesisi mulavixu angelo masua lexe, “Nini angelo masua ane na'oxonu molomolo 'o sangalou ilou anaxu mutomu, avikalaneni pakia'u aloxo 'o. Naxexesou molomolo ne mo nalivu na'una noxoula uasi.” 26Sila angelo masua ne mu'ava tatila mo mu'umu'umunu mu'oki. Mukalu la muxexesou mo molomolo muai ovu mautunusi. La ane'i tamitema latala mi'oxo lexe, “Iu musoli masi.” 27Ia Iesua mutila'u no avolu so mutulusou, la anu laixenu mo mutulu.

28Xe ili'i loxo Iesuaena milai no tanii xe ane'isisi mixolu la tatisaipeli mitali'isou lexe, “Nexi tamomomo so takusaou angelo masua ne uasi to. Tava'u axova?” 29La anu mukoline'i lexe, “Laili axone, vote'i vilesisi so takusai'a. Ane so tavikala noxou Mosingesi.”

Vaikalaou Iesua e lexe usoli ka umaulila, a mulemolula

30Ioxe, Iesuaena milutu no apu ne la milai mixixao no xale lia ne Xalili. La Iesua umasaxa lexe tamitema ilavu lexe anu a ne'ei uasi. 31Xo anu a upela'a tatisaipeliou lexe, “Evile so upilixinu Itema ane molu noxou Mosinge no avo'a se'i so ivau usoli. Ivau usoli xo xe voxo tatalu la utulu umaulila.” 32Muvikala axone ia ane'i ilamana no anu vaikalaou uasi. Ia ane'i mimama'u so itali'isou.

Iesua mupelototo lexe ena'ei so u'uli laxune'i tamenexu

33Oli'a mimuamua'i xo xe mixali no tuala ne Kapeniamu la mi'unalai no tani. Mukalu la Iesua mutali'isi'a tatisaipeli lexe, “Temuamua'i no vote'i la ngingi ngevivikalasou ma'ia?” 34Mutali'i axone ia mimaila mo mixolu tasiausi. Xo no vote'i la ane'i mi'oto no anu vaikala lexe ena'ei noxi'a u'uli laxune'i. 35Mixolu tasiausi laso Iesua mutalupexa mo mu'avali'a ane'i 12 ne ipita noxou. Mipita noxou la muvikalane'i lexe, “Loxo itema vile umasaxa lexe u'uli'uli la vote'isou aloxo 'o. Anu ulu'enu uxali itema vitanisi no taine'i mo uxali itema so xaixai noxi'a tamitema mukalusi.” 36La anu muno'u molomolo soxu vile mo mutulusou no taine'i. La musavunoxu mo muvikalane'i tatisaipeli lexe, 37“Itema aneva usexelaxu molomolo aloxo 'o so usu'ulinu no anu ualasilo, la anu loxo usexelaxu molomolo nesi uasi, eni ane. Xe loxo usexelaxo axone, la enisisi uasi. Axone la anu usexelaxu Mamilo e mupalusilo kalumo ane.”

Itema ane uxililiienge uasi, anu uvalanenge ane

38Iesua a mu'oxonu latilovo noxou molomolo ne, la Tioni mutali'isou aloxo 'o, “Tisao. Nexi temaisou itema vile ukusakusai'a ta'angelo tamasua no anu ualasine. Ia nexi te'apixu xo anu vile noxixe tavaitamimeni uasi.” 39La Iesua muvikalanu lexe, “Anu laixe so nga'apixu uasi. Loxo itema vile u'oxonu sosovo so xavi no anu ualasilo la anu upalea so uvikalasilo masua uasi. 40Itema aneva uxililiienge uasi, anu uvalanenge ane. 41Loxo itema vile tanungenge xo ngingi tavaitamixeli eni ane so Kalaisiti 'o, mo utaungenge lexa so ngaiexu la avikalangengi manina aloxo 'o. Itema ne uxalisou lakolisou su'uli mu'oxonu ne.”

Vasimenge pa'upa'usou uolenenge no anu susu

42Xe Iesua musolonu aloxo 'ola, “Noxi'a tamolomolo ane ilopala noxilo 'o, loxo itema vile uxovulaulanixu lopala noxi'a la utavulenu tu'umaxusou ane. Xo loxo tamitema isakinu lavo'o toxoxu ulili no limilaxu ka isu'anu no luaki xe uuo'uo la anu loxo mi vitanisi ane. Ia loxo Mosinge ukolinu susu noxou ne la tu'umaxu e tu'umaxu manina. 43Xe aloxola. Loxo avone ulapuneni no anu susu la naxotonu uxexe. Xo loxo naxolu avone vilesisi la ialuxu sevile. Ia anu umomomo uasi no anu tu'umaxu so naxalisou no anu navu so mamulo e usita uasi. 44Loxo ulemolu no anu Mosinge vaikalaou lexe, 'Ane'i ane ixoxolu no navu so mamulo e usita uasi, la ixolu avile utalo uasi.'#9.44 Tamitema so lavulavu se'i ixavutala lexe Maki molu ukaukavunu vaikala ane uxolu no anu 9:44 uasi, itema vilemo masi mukaukavunu. 45Mo loxo tava'ine u'oxoneni so natulaki na'una no anu susu, la naxotonusi. Xo loxo naxolu tava'ine tamei aloxo 'o ia ili'i nasu'a no navu so mamulosi la tu'umaxu misevile. 46Xo loxo ulemolu, ane'i no navu so mamulo ne ixolu avilesi.#9.46 Tamitema so lavulavu se'i ixavutala lexe Maki molu ukaukavunu vaikala ane uxolu no anu 9:46 uasi, itema vilemo masi mukaukavunu. 47Mo ieni kalumo. Loxo ieni ulapuneni no anu susu la naxexenu mo usua'si. Xo loxo naxolu ieni vilesisi no voxo so Mosinge molu u'uli laxune'i tamitemaou la anu laixe ane. Ia loxo naxolu no navu so mamulo ieni tamei la anu masua manina. 48Xo loxo Mosinge vaikalaou ulemolu lexe anene tanixu soli. Ane'i tatemanu tanixu soli ne ixolu no anu navu so mamulo e u'ani u'ani usita uasi. 49Latilovosou mi ne aloxo 'o. Tamitema ilavusou i'uisou la'ilalixa'a, la axone kalumo Mosinge ukalanu navusi'a tamitema so susu. 50Xe vile aloxo 'o. Au ne anu tu'axu laixe. Ia loxo mi u'oxonu mo tu'axu ukalu la vote'i so tu'axu axovala? E uasi manina. Laso ngingi loxo opongengi ututulu no anu sususi la ngaxali loxo au ane tu'axu uasi. Laso apelototosinge lexe ilixo noxinge ngato'o laixe mo ngaxolu opongengi vilesisi.”

Currently Selected:

Maki 9: ATA

Highlight

Copy