Maki 10

Iesua muvikala lamana no anu ilixo so taula'i uxoto

1Ioxe, mune'e la Iesua mulutu no apu ne xo la mulai muxali ne Iutea mo mulai avile xalevile no lexa Tiotani. Muxali ne la tamitema tavu'alo mine'e mipita noxoula. La anu mu'oxonu loxo utotomu mu'oxonu so uvotovoto noxi'a. 2Muvotovoto la Tapalisi se'i mixali noxou so itovonu lexe ukoli axova. La mitali'i lexe, “No anu lo noxou Mosinge la anu umomomo so itema uxotonu taula'i mo ukusaie semau?” 3La Iesua mukoline'i lexe, “Xo Mosisi mupela'inge axova?” 4La ane'i mivikilanu lexe, “Mosisi muvikala lexe loxo itema vile uno'u lapepasou laso umomomo ane. Uxotonu taula'i mo ukusaie semau.” 5Ia Iesua muvikalane'i lexe, “Ia xo ma'i. Ngingi tamitema so nga'oxo pai laso Mosisi mupele masaxa so mukaukavunu lo anene. 6Mosisi mupele masaxa ia ngalomu. Tatei loxo Mosinge mukoinu mimi la loxo vaikalaou ulemolu, 'mukoine'i, mulu mo sema'. 7Mo, 'Anene tava'u so itema u'uemesi'a momu olie nenu xe upita noxie semau. 8So anu olie semau ixali vasime'a vilesisi.' I'oxo axone laso no anu iou Mosinge la ane'i tamei uasi, ane'i vilesisi ane. 9Laso avikalangengi axo'. Mi ane Mosinge mupitanu vilesisi la mamu so tamitema ixotonu.”

10Xe ili'i loxo Iesua oli'a tatisaipeliousi mixolu no tani la ane'i mitali'isouxu mi nela. 11La anu muvikalane'i lexe, “Loxo itema vile uxotonu taula'i mo ukusaie semau xe utaula'ixe sema vilela la ane semau manina uasi, uxolu noxie vitanisi ane. 12Mo sema kalumo. Loxo ane ixotonu tau la'i xe i'umesou mulue mo itaula'ixu itema vile, la anu mulue manina uasi, ixolu noxou vitanisi ane.”

13 Ioxe, la tamitema mine'ene'i ta'ili'a noxou Iesua. Mine'ene'i so anu umalaxu avolu no kisi'a. Ia tatisaipeliou milavixa'a mo mi'apixa'a. 14Xe Iesua mumaisi'a tatisaipeliou lexe mi'oxo axone la oponu tu'umaxu noxi'a. La anu muvikalane'i lexe, “Nga'italone'i tamolomolo ine'ene'e noxilo, nga'apixa'a uasi. Xo no voxo olele la tamitema ane Mosinge molu u'uli laxune'i la ane'i so loxo tamolomolo ano'o. 15Xo avikala manina aloxo 'o. Tamolomolo ano'o ilopalane'i uasi, ipilixine'isi. Ioxe, loxo itema vile ulopala mo upilixinu axone uasi la no voxo so Mosinge molu u'uli laxune'i tamitemaou la anu itema anene uxolu to uasi.” 16La anu Iesua muvo'one'i tamolomolo vilevilesi ne mo mumulaxu avolu no kisi'a. Mukalu la mulingau su'uli so xoluxoluxa'a noxou Mosinge.

17Mukalu xe Iesua so ulutu umuamua'i la itema vile muiave mune'e muxali noxou. Muxali noxou la muxolasou tava'u no laxunu, la mutali'i lexe, “Tisa laixeo, eni a'oxonu mi ma'i so axalisou mauli kaluxu uasi?” 18La Iesua muvikalanu aloxo 'o, “Loxova so nelemelo lexe eni a laixe a? Mosinge anusisi laixe. 19Nini nalavusou lo noxou Mosinge aloxo 'o. Mamu so navau itema usoli, xe mamu so nalailai noxi'a tasema vitanisi, xe mamu so napakali xe mamu so nakalavoi no anu lakoti, xe mamu so na'oxo loloxa'a tamitema so napulumao mimii'a xe nataxane'i mamine olie nenine.” 20La anu mukolinu lexe, “Tisa, eni amolomoloxo mo mune'e muxali vaimomo 'o ne emulinu lo anene mukalusi.” 21Iesua musaxisou la musexelaxu misevile. La muvikalanu lexe, “Mi vile na'oxonu uao. Nalai nasalimunu mimimeni mukalusi xe lamolisou, la naitii'a tamitema ane lamolixa'a uasi. Laso axone la naxalisou mimi lailaixe no tualasou Mosinge. Naitii'a ukalu la nane'e namulileli.” 22Itema ne mulomusou Iesua vaikalaou la iou lusi'u mo oponu tu'umaxu. Oponu tu'umaxu xo anu mimiou tavu'alo mo oponu no anu anenesi. Laso muxexesou Iesua mulai.

23Mulai la Iesua muxiu noxi'a tatisaipeliou la muvikala lexe, “Ai ialuxu manina noxi'a tamitema mimii'a tavu'alo. Ialuxu so i'una ixolu no voxo ane Mosinge molu u'uli laxune'i tamitemaou.” 24La tatisaipeliou mikuluke no anu vaikala anene. Ia Iesua muvikalala lexe, “Ta'alixeli, anu ialuxu manina so tamitema i'una ixolu no voxo ane Mosinge molu u'uli laxune'i tamitemaou. 25Loxo kameli utovonu so u'unalai no anu lalili so sumapi taxanu la ta'oxo lexe, 'Uo umomomo uasi ane.' Ia loxo itema e mimiou tavu'alo xavinuou so u'una uxolu no voxo so Mosinge molu u'uli laxune'i tamitemaou, la umomomo uasi e uasisi manina.” 26La tatisaipeli mikuluke mu'oki no anu vaikalaou mo mitali'isou lexe, “Iauo, laso ena'ei umomomo so uxalisou pamauli?” 27La Iesua iou mukai'a mo muvikala lexe, “Loxo tamitema me'a la imomomo uasi ane. Ia Mosinge umomomo. Mosinge umomomo no anu mimi mukalusi.”

28La Pita muvikalanu lexe, “Xo namalei, nexi tepilixinu mimi so xoluxolu noxixe tei. Tepilixinusi ka temulineni 'o.” 29La Iesua mukolinu lexe, “Eni avikala manina aloxo 'o. Itema aneva u'italonu tasou oli'a tavimovimou xe nenu ilou momu xe ta'olu xe xaixu so umulileli mo ulanu a'alosilo laixe, la uxalisou nene'axu aloxo 'o. 30Mimi e mu'italonu ne uxalisou no latanu tavu'alo e tavu'alo. Xo no anu voxovoxo so vaimomo 'o la Mosinge ulosou tanitani xe tavimovimou tavu'alo xe tanenenu xe ta'olu tavu'alo xe xaixaixu kalumo. Anu uxalisou mimi lailaixe noxou Mosinge axone ia loxo tamitema la ilosou tu'umaxu. Ia loxo voxo olele uxali, la uxalisou mauli kaluxu uasi. 31Mo aloxo 'o. Tamitema tavu'alo e i'uli'uli vaimomo 'o ilai iili'i ane. Xe ane'i ane iili'i vaimomo 'o la ilai i'uli avile ane.”

Vaikalaou Iesua e lexe usoli ka umaulila, a mulemolu alaxu tatalusoula

32Ioxe, mune'e la Iesuaena mimuamua'i no vote'i so ilai ne Ielusalemo. La Iesua mu'uli xe tatisaipeli miili'i mo tane'ilili. Xe tamitema e mimulimuli ne opone'i kalaua. La Iesua mu'avali'a ane'i 12 ne milai va'axu sevile so uvikalane'ila no anu mi ma'ia so uxalisou ili'i. 33Muvikala lexe, “Ngalomu. Nenge talai ne Ielusalemo 'oe. Evile so upilixinu Itema ane molu noxou Mosinge no avo'a tatiatila noxi'a tapilisiti xe tamitema so lavulavu no anu lavuloto. La ane'i ne imolo soli noxou mo i'italonu no avo'a tamitema noale'ale so ivau usoli. 34La ane'i imolo sukusou xe ituvesou xe ipuapuasou. Ukalu la ivau usoli. Usoli xe voxo tatalusou la umaulila.”

Tiemisi ilou Tioni mi'oxo lexe i'uli laxune'i tamenexi'a

35Ioxe, mune'e la Tiemisi ilou Tioni e Sepeti ta'olu mine'e noxou Iesua la mivikala aloxo 'o, “Tisao, nexi talingau mi vile noxine mo so na'oxonu noxixe.” 36La anu mutali'i lexe, “Xo ngamasaxau a'oxonu mi ma'ia noxinge ngilou?” 37La ane'i mivikalanu lexe, “No voxo loxo nini naxolu no anu tanixene so na'uli'uli mo iaxenesi, la tamasaxau axo'. Vile noxixe noxou 'o uxolu no anu avone tema xe vile no avone kaisi.” 38La Iesua muvikalane'i ilou aloxo 'o, “Ngingi ngilou ngalamana no anu mi ane ngalingau uasi ane. Xo ngingi ngamomomo so ngaiexu lexa sixula eni so aiexu 'o? Xe ngingi ngamomomo so ngakelele no anu tu'utu'umaxu ane so uxali noxilo 'oio?” 39La ilou mi'oxo lexe, “Ani nexi tamomomo ane.” La Iesua muvikalane'i lexe, “E ani. Xo lexa sixula ane so aiexu 'o ngilou ngaie no anu ili'io. Xe tu'utu'umaxu a so akelele no anu la ngilou ngakelele no anu ili'io kalumo. 40Ia no anu mi e ngetali'i so lexe ena'ei uxolu no avolo tema xe kaisi la anu mi na'a xeli uasi. Anu mi noxou Mosinge so molu ulalaxinu lexe noxi'a ta'ei.”

41Ioxe, Tiemisi ilou Tioni milinga noxou Iesua axone xe tatisaipeli 10 milavusoui la la'iaxa'ai'a ilou. 42Ia Iesua mu'avali'a tatisaipeli mukalusi mipita noxou. La muvikalane'i lexe, “Ngingi ngelavusou ilixo noxi'a tamitema noale'ale. Ane'i takingii'a itoxa'a mo ilosi'a tamitema tu'utu'umaxu. Xe tatiatilasi'a itulu no tumali'a tamitema ta'ei loxo ivosine'i ne. 43Ia mamu so ilixo anene uxolu no taingengi. Xo itema ena'ei noxinge so uxali tatila la vote'isou aloxo 'o. Anu ulu'enu mo so u'oxonu xaixai noxinge latala. 44Xe ei noxinge oponu lexe u'uli laxungengi la anu masi uxali itema so xaixai vitanisi noxinge.” 45Mo musolonu aloxo 'ola. “Anu Itema ane molu noxou Mosinge kalumo une'e so tamitema i'oxonu xaixaisou uasi. Anu mune'e so u'oxonu xaixaisi'a tamitema. Mo mune'e so ulotonu tina'uxa'a so susu no anu mauli noxou.”

46Ioxe, Iesua oli'a tatisaipeliou mixali no tuala ne Ieliko. La tamitema latala e latala mimuline'i. Mixali ne Ieliko la miuluale no iou xalengasi. La itema vile ualasou lexe Patimaiasi e Timaiasi olu, muxoxolu no pa'umolu vote'i. Anu iou selevenu la muxoxolu ne so ulingalinga noxi'a tamitema. 47Muxoxolu xe mulomu lexe Iesua so Nasaleti a mune'e ne laso mu'ava tatila lexe, “Iesua nini Teviti ilusunuo, naiaiama noxilo.” 48Ia tamitema tapiena milavixu lexe uxolu tasiausi. Ia anu ava noxou mutoxoxa'ala lexe, “Ilusunu Tevitio, nini naiaima noxilo.” 49La Iesua a mumuamua'i sila mutulu no vote'i la muvikalane'i lexe i'avalou itema ne une'e noxou. La ane'i mi'avalou itema iou selevenu mo mi'oxo lexe, “Oponeni uai laixe. Natulu xo anu a u'avaline 'oe.” 50Sila alaxu vilesisi muili'e mutulu mo muxexenu lasiotiou veveni xe mupalea mulai noxou Iesua. 51La Iesua mutali'isou lexe, “Nini namasaxau lexe a'oxonu ma'ia noxine?” La itema iou selevenu ne mu'oxo lexe, “Tisa, eni amasaxa lexe ieli lamana so asaxila.” 52La Iesua muvikalanu lexe, “Nini nelopala noxilosi laso eni apaipouneni. Laso nalai.” Sila alaxu vilesisi iou lamana la anu mumulinu Iesua no vote'i so mulai.

Currently Selected:

Maki 10: ATA

Highlight

Copy