Maki 12

Latilovo so tamitema tamasua misaxila'u xaisou uaini

1Xe Iesua muvikalane'i tatiatila noxi'a Taiuta mo mu'oxonu latilovo aloxo 'o, “Itema vile mu'oxonu xaisou uaini xe mukalu la muvimelusou. Muvimelusou mukalu la mu'asou taxa. Taxa ne so loxo ili'i uaini lingamo xe imamulonu la lexaxu usiali upita no anu. Mu'asou taxa mukalu la mutulusou tasou latolosou xai ne. Ioxe, mukalui la mupilixinu xai ne no avo'a tamitema se'i so isaxila'u. Mupilixinu noxi'a axone xo anu uxolu uasi mulai no tuala nopaxa. 2Mulai muxolu xo xe voxo so uaini lingamoe la anu mupalusou voiou vile so ulai noxi'a tamitema ane misaxila'u xaixu ne. Mupalusou mulai noxi'a so ilosou xai temanu se'i. 3Ia voiou mulutu xe muxali la tamitema so isaxila'u xai ne mi'otu'otunu mo mikusaou mulivu muxaxasi. 4La mosou xai ne mupalusou voiou vilela. Mulai muxali la mi'otu'otunu kalumo mo mipaunoxu kisou, mivila'isou e lapilai uasisi. 5Mune'e la mosou xai mupalusou vilela ia mulai la mivau musoli avile. Xe ili'i la alaxu tavu'alo mupalupalusi'a tavoiou milailai ia ane'i olele mimasuane'i mukalusi xe se'i la mive'ave'a misoisoli. 6Mupalupalusi'a xo mole kaluxusi'a soxu vilesisi a muxolu. Kaluxusi'a ne olusi, e musexelaxu misevile. Mosou xai muxavutala no oponu lexe, 'Apalusou alixeli soxu 'o xo ane'i ilomuxu ane.' 7Ioxe, olu mulai xe tamitema so isaxila'u xai mimaisou la mivikalane'i ngato'o lexe, 'Ano'o ne mosou xai olu. Ili'i la anu uxalisou mimiou momu mukalusi. Laso nenge tavau aliku 'o usoli mo so nenge menge tamosou xai ano'o.' 8Sila ane'i mivau musoli, mo misu'anu vasimolu noale no xai.

9Ioxe, laso masi mosou xai ne unava? Ngalomu. A une'e umamulone'i tamitema so isaxila'u xaixu ne. Umamulone'i mo upilixinu xai no avo'a tamitema se'i taalavua. 10Xo Mosinge muvikalasou mi ne no lavukuou, ia masi vaikala ne ngalavusou uasi, ne? Muvikala aloxo 'o, 'Ane'i tamitema so itulusou tani mimatapianu lavo'o vile. Ia lavo'o nesi Mosinge muilounu so muxali lavo'o so tani kisou. 11Tatananenge molu muxalixu mi ne xe tesaxisou la tekuluke xo lailaixe misevile.'” Iesua mulemolu vaikalaou Mosinge axone. 12Xe tatiatila milomusou latilovo mu'oxonu ne la milavu lexe anu so uto'omea no anu ane. La opone'i ialuxu manina so lexe itetelisou ia vote'i uasi xo i'ume'a tamitema latala ne. Laso mipaxelesou mo milailai.

Se'i mitali'isou lexe anu laixe so isu'anu takisi o uasi

13Ioxe, mune'e la tatiatila mipalusi'a Tapalisi oli'a laili e mivalaxu Eloti se'i milai noxou Iesua. Mipalusi'a so i'oxonu loloxu Iesua no anu vaikala. Xo mimasaxau so loxo Iesua ulemolu vaikala ma'ia susu la ikotixu no anu. 14Mixali noxou la mivikalanu lexe, “Tisao, nexi talavu lexe nini namitema so vaikala maninasi. Mo namama'u noxi'a tamitema uasi. Ane'i tatiatila o tamitema vitanisi ne navikalane'i iou vilesisi. Ane'i latala ne napelototosi'a no anu vaikalaou Mosinge maninasousi. Laso naxavutala axova? Anu laixe so nenge tasu'anu taxisi ulai noxou kingi noxi'a Talomu e Sisa, o uasi? 15Talosi'a Talomu lamoli ne o uasi?” Mivikala axone ia anu mulavu no anu lolo noxi'a ne laso mukoline'i lexe, “Axova so ngatovoleli? Ngane'enu lamoli siliva vile ane ngasu'anu so taxisi mo amaisou 'o.” 16Mine'enu la anu mutali'isi'a lexe, “Pikisa mo uala no lamoli 'o noxou eio?” La ane'i mi'oxo lexe, “A noxou kingi Sisa to!” 17La Iesua muvikalane'i lexe, “Laso ane. Loxo mi noxou Sisa la ngapilixinu noxou u'isalili. Xe mi noxou Mosinge la ngapilixinu noxou u'isalili kalumo.” Anu muvikala axone la ane'i tane'ilili noxou misevile.

Tasatusi mitali'isou Iesua so tamitema isoli ka imauli

18Ioxe, mune'e la Tasatusi se'i mine'e mixali noxou Iesua. Ane'i Tasatusi ne xavutalai'a lexe loxo itema usoli la ukalu avile, Mosinge utulusoula uasi. Mine'e mixali noxou Iesua la mitali'isou aloxo 'o, 19“Tisa, Mosisi mukaukavunu lavuloto aloxo 'o. 'Loxo itema vile utaula'i xe olu uasi ia usoli, la vimou uno'u tanixu mo utaula'ixe ou ne. La ixalixa'a ta'ili'a mo so laili noxou vimou e musoli la utalo uasi, usuku axone.' 20Ioxe, anene lavuloto e Mosisi mukaukavunu. Laso tatovonu latilovo aloxo 'o. Loxo tamulu 7 ane'i tavimovimo'asi. Xe laposalaxa'a utaula'ixe sema vile xe olu uasi ia usoli. 21Laso vimo'a tameisou uno'e sema nela ka usoli, ia olu uasi kalumo. Xe tatalusi'ala la axone kalumo. 22La axonesi. Ane'i tavimovimo'a 7 ne mitaula'ixe sema vilesisi ne. Ia vile noxi'a upala uasi, misoisolisi. Mo mulai la sema ne misoli kalumo. 23Laso tali'i noxixe axo'. Loxo ili'i no voxo so Mosinge utulusi'a tamitema misoisoli, la axova? Sema ne mulue ena'ei manina, xo mitaula'ixa'a tavimovimo'a 7 mukalusi.” 24La Iesua mukoline'i lexe, “Ngingi ngalamana no anu vaikalaou Mosinge mo ngalavusou xavi noxou uasisi. Laso maixene ngaxovulaulau aloxone. 25Xo loxo Mosinge utulusi'a tamitema misoisoli la xoluxoluxa'a no anu taula'i uasi. No anu anene la ixolusi, kaini loxo ta'angelo no tualasou Mosinge. 26Ia no anu telexu so lexe tamitema isoli ka itulula, la ngalamana no anu uasi. Xo no anu Mosinge vaikalaou la Mosisi mua'aloxu ovu kitu'a navu mu'ani no anu. La no voxo ne Mosinge muvikalanu lexe, 'Eni a Mosi'a Apala'amu xe Aisaki xe Iakovo a.' 27Ne ngamaisou, Mosinge uvikalasi'a ta'ilusungengi axone xo ixolu imauli ane. Mamu so ngaxavutala lexe Mosinge anu Mosi'a tamitema ane soli mukalusi'a avile. Anu Mosi'a tamitema ane imaulusi. Ngingi ngaxovulaulau to!”

Lo noxou Mosinge aneva mutiatila?

28Ioxe, itema vile so lavulavu no anu lavuloto a mune'e. Mune'e la mulomusi'a Tasatusi itovonu so iua'ulixu Iesua no anu vaikala. Anu mulomu lexe Iesua mukoline'i laixe manina, laso anu mutali'isou lexe, “Lavuloto noxou Mosinge aneva mutiatila?” 29La Iesua mukolinu lexe, “Lavuloto ane mutiatila e ane uvikala lexe, 'Ngingi Ta'isilaeli ngalomu, Mosinge anu Tatananenge ne anu Mosinge vilesisi ane. 30Ngingi opongengi xe xavutalamengi utulu so ngasexelaxu Tatananenge anu Mosingesi. Mo xavingengi so ngalomuxu no anu maulingenge mukalusi.' 31Lo anene uua'ulixu lo mukalusi, ia tameisou 'o mutiatila kalumo. Aloxo 'o. 'Ngingi ngasexelaxa'a tamenexinge a loxo ngingi menge ngasexelangenge.' No anu lavuloto mukalusi la tamei 'o u'uli'uli.” 32Xe itema so lavulavu no anu lavuloto mulomu la muvikalanu Iesua lexe, “Tisa vaikalameni mulovo. Nevikala manina lexe, 'Mosinge anu vilesisi, vilela uasi.' 33Xe loxo oponenge mo xavutalamenge utulu so tasexelaxu Mosinge, xe loxo xavinenge so talomuxu mo loxo tasexelaxa'a tamenexinge a loxo nenge menge tasexelanenge la Mosinge u'osasou. Anene uua'ulixu ilixo so ta'elaxu misoposi mo talosou mimi lexe noxou Mosinge.” 34Iesua mulomusou itema ne vaikalaou loxo muno'u lavulavu sevile la muvikalanu lexe, “Ai, nini naxolu alaisi so na'unalai naxolu no voxo so Mosinge molu u'uli laxune'i tamitemaou.” Xe ili'i la tamitema itali'i noxou Iesua la uasi xo mimama'u.

Iesua muvotone'i tamitema so Itema ane Mosinge musosovosou

35Ioxe, Iesua muxolu no tasou Mosinge la muvotovotone'i tamitema. La muvikala aloxo 'o, “Tamitema so lavulavu no anu lavuloto ivikala lexe anu ane so Kalaisiti ne anu ilusunu Teviti. Axova so ivikala axone? 36Xo Ulenu Laixe mulosou Teviti lavulavu la mukaukavunu vaikala aloxo 'o, 'Tatananenge muvikalanu Tatanaleli lexe, Nini natalupexa no avolo tema. Natalupexa ne xo mo eni apilixine'i tauluameni no laxene so namaloxo'a.' 37La Teviti molu mulemolu Itema ane Mosinge musosovosou ne lexe Tatananu. Laso vote'i axova so Tatananu Teviti ne anu muxali ilusunu?” Iesua muvikala axone xe ane'i tamitema latala mixolu milomusou la mi'osasou kena.

Iesua mupela'axu ilixo noxi'a tamitema so lavulavu no anu lavuloto

38Xe Iesua musolonu votovoto aloxo 'o, “Ngingi masi ngalaxa'i laixe noxi'a tamitema so lavulavu no anu lavuloto. Ane'i ilavusou imulaxu lavuluti veveni lailaixe so ixixao no loxoloxomala mo so tamitema itaxane'i mo ivikala kakau aso noxi'a. 39Xe no anu tasou lavuloto la ane'i italupexa no anu lu u'uli. O loxo no anu la'ilali la imasaxau tanixa'a tatiatilasi. 40Mo loxo sema vile mulue usoli la i'oxo loloxe so isalimunu tasie, ia lamolisou la ane'i me'a ino'u. Mo itoxa'a no anu lakilaka so ivikala veveni musuku. Tamitema axone, no voxo loxo Mosinge utilovo mo ukolinu ilixo la itavulenu tu'umaxusou ilixo noxi'a avile.”

Sema oloxola mipilixinu lamolie sevile noxou Mosinge

41Ioxe, mune'e la Iesua mutalupexa alai no anu kesi so lamoli no tasou Mosinge. La muititii'a tamitema latala mine'e mipilixinu lamoli no kesi ne. Muititii'a la tamitema so lamoli la mipilixinu lamoli tiatila. 42La sema vile oloxola mulue musoli a mine'e. Mine'e la mipilixinu lamoli koinisi se tamei. 43La Iesua mu'avali'a tatisaipeliou mine'e la muvikalane'i lexe, “Ngamaisie sema oloxola e mulue musolisie olele. Avikalangengi manina axo', ane'i tamitema tavu'alo mipilixinu lamoli no kesi 'o. Ia se noxie sema ne, uua'ulixu noxi'a avile. 44Xo ane'i tavu'alo ne ixolu no latanu lamoli mo mipilixinu pa'usou sesi. Ia sema ne ixolu vitanisi mo lamoli se so la'ilalixe a mipilixinu mukalusi oe, pa'usou uaila uasi.”

Currently Selected:

Maki 12: ATA

Highlight

Copy