Matiu 9
9
Iesua mupaipounu itema xixinu musoisoli
1Ioxe, Iesua mutelo no pouti so ulivu ulai xalevile no kupa no tualasou u'isalili. 2Muxali la tamiÂtema se'i mitavulenu itema vile xixinu musoisoli no lusou so mine'eÂnu noxou Iesua. La mumaisi'a lexe milopala noxousi laso anu muvikaÂlanu itema e xixinu musoisoli ne lexe, “Alixeli, oponeni uai se'isisi. Tina'uxene so susu muiasi mukalu.”
3La tamitema se'i so lavulavu no anu lavuloto milomu lexe Iesua muvikala axone laso mimunumunu noxi'a ngato'o lexe, “Ai, vaikala ane noxou Mosinge u'isalili a itema ano'o ulemolu vuluvulusi 'o.” 4Ia Iesua mulavusou opone'i la muviÂkala lexe, “Axova so xavutala masua ane xo ne uxolu no opongengi? 5Ma'ia ane ialuxu so alemolu? Ialuxu so avikala lexe tina'uxene so susu muiasi mukalu o ialuxu so avikala lexe natulu nano'u lusine mo nalai? 6Ia eni emasaxa lexe ngingi ngalavu lexe Itema ane molu noxou Mosinge uxoxolu no lialia mo xavinu so ukalusou tina'u so susu.” Anu muvikalane'i tamiÂtema so lavulavu axone mukalu la muvikaÂlanu itema e xixinu musoiÂsoli ne lexe, “Nini natulu xe nano'u lusine mo nalai no tasine.” 7Sila itema ne muavutu mutulu la mulai no tasou. 8Xe tamitema latala ne mimalei axone la mama'u mukasi'a mo mi'iti'itinu Mosinge ualasou xo anu molu mupilixinu xavi anene noxi'a tamitema.
Iesua mu'avalou Matiu so umulinu
9Ioxe, ili'i la Iesua mumuamua'i mulai xe mumaisou itema vile ualasou lexe Matiu a uxoxolu no tasou taxisi. La muvikalanu lexe, “Nane'e namulileli.” Sila Matiu mu'avuti mumulinusi.
10Xe ili'i la Iesua oli'a tatisaipeliou mixolu mi'ani no tasou Matiu. Mi'ani la oli'a tamitema so itaxusou taxisi tapiena xe tamitema so ili'ilixo masua iouiou. 11Xe Tapalisi mimaisi'a la mitali'isi'a tatisaipeliou lexe, “Axova so tisamengi upita so u'ani noxi'a tamitema so itaxusou taxisi xe tamitema so ili'ilixo masua iouiou to ne?”
12Xe Iesua mulomusou vaikalai'a ne la muvikalane'i lexe, “Tamitema ipipiena uasi la ilai noxou tokota uasi. Ane'i ane ipipienasi a ilai noxou tokota. 13Laso ngingi ngalai ngano'u lavulavu no anu laxu vaikalaou Mosinge vile aloxo 'o, 'Tami ane ngalavusou ngave'a lexe noxilo la amasaxau to uasi. Mi ane a'osasousi a so tangengixa'a tameneÂxinge.'” Xe Iesua muvikala aloxo 'ola, “Ane'i ane me'a i'oxo lexe ane'i tamalemalenga, la ene'e so a'avali'a uasi. Eni ene'e so a'avali'a ane'i ane ilamana no anu susu noxi'asi.”
Iesua mu'oxonu latilovo se'i so ilixo e so i'apixa'a no anu la'ilali
14Ioxe, la no voxo anene tatisaiÂpeliou Tioni mine'e noxou Iesua la mitali'isou aloxo 'o, “Nexi noxi'a Tapalisi talavusou ta'oxonu ilixo so ta'apinexe no anu la'ilali. Ia axova, xo tatisaipelimeni ilavusou i'oxonu to uasi?” 15Laso Iesua mu'oxonu latilovo so mukoline'i aloxo 'o, “Loxo itema vile so utaula'i ia uxolu noxi'a tamenexusio la ane'i opone'i tu'umaxu uasi, ne? Ia loxo ili'i isaxanu mo ulai mukalui laso ane'i i'apixa'a no anu ani'ani. 16Xe vile aloxo 'o. Loxo lavalava teinu ukaka la umomomo so mosou uno'u lavalava xasixu alavua so usimenu no anu uasisi. Xo loxo 'o io u'uinu la xasixu alavua ne upipi mo ukakanu teinu ne avile. 17Xe vile aloxo 'ola. Loxo itema vile uno'u uaini alavua la anu unava? Anu uno'u lexa vexasou teinu e mu'oxonu no anu misoposi sosoiou so utau no anu? Uasi! Xo loxo 'o io uaini alavua masi usoxonixu mole upaunoxu mo usu'a avile sila lexaxu ukasavalasi. Ia loxo utau uaini alavua no anu vexasou alavua laso ane, ilou ne uai laixesi.”
Iesua mupamauline vuanga vile misoli xe mupaipoune sema vile sialuxe munixinixi
18La Iesua a uvikala axone noxi'aÂsio la tila vile no anu tasou lavuloto mune'e ka mutangatulu no laxunu mo muvikala lexe, “Alixeli sema misoli se alala'e 'osi. Ia nini nane'e namulaxu avone noxie laso imauli.” 19Xe Iesua mulutu so mumulinu mulai la oli'a tatisaiÂpeliou.
20Ioxe, mulai la sema vile ane sialuxe munixinixe mumomomo no anu tau ie 12 mine'e alai no tumalou Iesua. Mine'e laso mikaÂsou lasioÂtiou veveni no telexu se. 21Xo mixavutala no opone lexe, “Loxo eni akasi se no mimiou 'o la eni masi laixeleli a.” 22Ia Iesua muxiu loxo 'o mo mumaisie la muvikala lexe, “Alixeli, oponeni uai se'isisi. Nini nelopalaleli laso a laixeneni ne.” Sila alaxu vilesisi sema ne laixenesi.
23Mukalu la Iesua mulutu xo xe muxali no tasou itema tila ne la mumaisi'a tamitema mixolu mitaÂtama. Xe leviani a mitausou mi loxo iu mo ane'i tamitema latala mipiÂtanu anaxa'a mu'oki manina. 24la Iesua muvikalane'i lexe, “Ngingi ngalailai. Sema ne isoli uasi, miaisi a.” La ane'i mukalusi mikekeusi. 25Ia mikusakusai'a tamitema ne milala mukalu laso Iesua mu'unalai mo mutila'e sema no avole sila mitulusi. 26La a'alo so mi e Iesua mu'oxonu ne muiaÂveiave musu'asou xale lia ne mukalusi.
Iesua mupaipoune'i tamitema tamei ie'i mutomu xe vile anaxu mutomu
27Ioxe, ili'i la Iesua mulutu mo mumuamua'i mulai. La tamitema tamei ie'i mutomu mimulinu xe mi'ava noxou lexe, “Nini ilusunu Tevitio, naiaiama noxixe.” 28Xe anu a mu'unalai no tani la ane'i ilou mi'una noxou. La Iesua mutaÂli'isi'a lexe, “Ningi ngilou ngaloÂpaÂlaleli lexe amomomo so asu'ulingengi?” La ilou mikolinu lexe, “Ani, Tatila. Nexi telopala axone.” 29Mukalu xe anu mumuÂlaxu avolu no ie'i la muvikala lexe, “Anu uxali a loxo ngelopala ne.” 30Sila ilou ie'i muka. La Iesua muvikala pakia'u noxi'a lexe, “Ngalomu, mamu so ngapaÂla'anixu mi 'o noxou evile.” 31Ia ilou milai mivulavulanu a'alosou no xale tuatuala mukalusi.
32Xe ilou a mila la tamitema se'i mine'enu itema vile anaxu mutomu xo angelo masua muxolu noxou. 33Laso Iesua mukusaou angelo masua ne sila itema ne muviviÂkalala. La tamitema latala tane'ilili mo mivikala lexe, “Ai, tatei mi aloxo 'o uxali lai ne Isilaeli 'o uasisi.” 34Ia Tapalisi mi'oxo lexe, “Anu uno'u xavi noxou tila noxi'a ta'angelo tamasua so ukusai'a to axone!”
Iesua tanuxa'a tamitema latala ne
35Ioxe, no voxo ne Iesua mumoÂmoxu taotaoni xe tuatuala mo mu'una'una so uvotovoto no tataÂsou lavuloto noxi'a. La mulanu vaikala laixe so voxo ane Mosinge molu u'uli laxune'i tamitemaou. Xe mupaipoune'i tamitema no anu tu'utu'umaxu mitavulenu no vasime'a mo no anu siki iouiou. 36Mo loxo mumaisi'a tamitema latala axone la anu tanuxa'a misevile xo ane'i opone'i muvaxa mune'e mo xoluxoluxa'a masua. Ane'i loxo tasipisipi ane tatanane'i so usaxila'a uasi. 37Laso anu muviÂkalane'i tatisaiÂpeliou lexe, “Xai lingamo mo nene'axu tavu'alo a mulalaxi mukalu, ia tavokuvoi so itaxusou a tata'ei mososi. 38Laso ngalinga noxou Tatananu xai so upalusi'a tavoÂkuvoi se'ila mo so itaxusou nene'axu xaixu.”
Currently Selected:
Matiu 9: ATA
Highlight
Share
Copy
Want to have your highlights saved across all your devices? Sign up or sign in
Copyright 1999 New Tribes Mission, Sanford, FL 32771-1487
