Matiu 10

Ualaualasi'a ta'aposeli 12

1Ioxe, Iesua mu'avali'a tatisaipeliou 12 mine'e mipita noxou. Mipita noxou laso anu mulosi'a xavi so ikusai'a ta'angelo tamasua noxi'a tamitema xe so ipaipoune'i tamitema no anu tu'umaxu no vasime'a mo no anu siki iouiou. 2La ualaualasi'a ta'aposeli 12 ne aloxo 'o. Saimoni ane ualasou vile lexe Pita xe vimou e Anitilu xe Tiemisi ilou vimou Tioni e Sepeti ta'olu. 3Mo Pilipi xe Patolomiu xe Tomasi xe Matiu e itema so utaxusou taxisi xe Tiemisi e Alipiusi olu xe Tatiusi. 4Mo Saimoni anu so laili noxi'a Taseloti xe Iutasi Isikalioti e itema ane so upilixinu Iesua no avo'a tauluaou.

Iesua mupilixinu xaixai no avo'a ta'aposeliou 12

5Ane'i 12 'o ne Iesua mupalusi'a so ilailai ia tei la mupelototosi'a aloxo 'o, “Ngalai la ngalai noxi'a tamitema noale'ale uasi, mo nga'unalai no taotaoni noxi'a Tasamalia uasi. 6Ia ngingi ngalai noxi'a tasisipi e milusi mukalu e ane'i laili Ta'isilaelisi. 7Ngalai la ngalanu vaikala lexe, 'Voxo so Mosinge molu u'uli laxune'i tamitemaou no tualasou a mune'e alai mukalu 'oe.' 8Mo tapipiena la ngapaipoune'i xe tamitema ane isoli la ngapamauline'i xe ane'i so siki lepelesi la ngaxalixu vasime'a malemalenga xe ane'i ane ta'angelo tamasua ikasi'a la ngakusai'a noxi'a. Su'uli ane nga'oxonu ne ngano'u lapesou uasi xo su'uli ane ngexalisou la ngalotonu uasi.

9Xe loxo so ngalailai la ngataxusou koli o siliva o koinisi sevile so ngatanu no anu ulu'ulu uasi. 10Mo loxo ngalutu so ngamuamua'i la ngaxaxasi, ngatavulenu tiva xe lasioti tamei so senisi xe lasu xe vilaxo uasi. Ngano'u mi vile axone uasi xo itema so xaixai la anu laixe so tamitema ivalaxu no anu xoluxolu so vasimolu.

11Xe loxo nga'unalai no taoni o tuala vile la ngakilolo laixe lexe itema aneva ne laixe. Laso ngaxolu noxou xo mo voxo so ngalutula. 12Mo loxo nga'unalai no tani vile la ngavikala laixesou xoluxoluxa'a tatemanu. 13Laso loxo ane'i tamitema talaixe la vaikala laixe so xoluxoluxa'a lexe lalavulusi ne anu uxalixu nene'axu. Ia loxo ane'i talaixe uasi la anu vaikalameni laixe ne ulivu uxolu noxinesi. 14Xe loxo se'i i'osasinge so nga'una noxi'a uasi o so ilomuxu vaikalamengi uasi xe ngala no anu tani o taoni anene la ngapupanu tava'inge so kalaisou uxexe. Laso no anu vote'i anene la nga'oxonu latilovosou ilixo masua noxi'a. 15Ia eni avikalangengi manina aloxo 'o. No anu voxo so Mosinge ukolinu susu olele la tu'umaxu ane uxalisi'a tatemanu taoni ne la uua'ulixu anene so uxalisi'a Tasotomu oli'a Taxomola.”

Mupala'anixu tu'utu'umaxu iouiou a so uxali

16La Iesua musolonu aloxo 'ola, “Ngalomu, eni apalusinge ngalai la ngingi loxo tasipisipi ilailai no taine'i ta'a'a tavova. Laso no anu lavulavu mo tilovo noxinge la loxo tasineke ia no ilixo noxinge la malemalenga mo lamanasi a loxo tangiala ta'utu 'o. 17Mo ngalaxa'i laixe noxi'a tamitema xo ane'i itulusinge so ikotingengi mo ipuapuasinge no anu tatasou lavuloto noxi'a. 18Mo tava'u xo ngingi nga'aloxo laso itulusinge no laxune'i taxamani xe takingi. Itulusinge laso ngingi nga'aloxo noxi'a xe noxi'a tamitema noale'ale. 19Xe loxo ilaixinge so ikotingenge la mamu so nga'olo'olo lexe, 'Iu, tavikala axova masi?' o 'Ai masi takoline'i no anu vote'i axova?' Nga'ume axone uasi xo no voxo ne u'isalili la ngaxalisou vaikala ma'ia ane so ngalemolu. 20Xo anene ngingi menge ngalanu vaikala uasi. Anu Maminge Ulenu molu ulanu vaikalaou no anangenge.

21Xe no voxo anene la tamitema ipilixine'i tavimovimo'a so ikotixa'a mo ive'a isoisoli. Xe tamitema i'oxo axone noxi'a ta'ili'a kalumo. Mo ane'i se'i la ixililii'a tamami'a taneni'a mo ipilixine'i so tamitema ive'a isoli. 22Xe loxo ngingi, la tamitema opone'i umatapiangengi xo ngingi tamitemaxeli. Ia ngingi ngaxolu pakia'inge xo mo uxali no anu voxo kaluxusou xo ngingi ngaxalisou pamauli ane. 23Xe loxo tamitema so taoni vile ilosinge tu'umaxu la nga'ume ngasuku ngalai no taoni vile. Xo avikalangengi manina lexe, ngakalusou xaixai noxinge so ngamomoxu taotaoni ne Isilaeli uao ia Itema ane molu noxou Mosinge ulivu une'e tei.

24Itema usikulu uua'ulixu tisaou uasi xe itema so xaixai u'uli laxunu tilasou uasi. 25Laso loxo xoluxoluxu itema usikulu uxali aloxo tisaou, xe noxou itema so xaixai uxali loxo tilasou la mi vile uasi, umomomo noxi'asi. Xo mosou tani la milemolu lexe Velisevuli laso loxo tasou tatemanu vitanisi la masi ilosi'a tu'umaxu kaini axovao?”

Laixe so tamama'u noxou Mosingesi

26Mo muvikala aloxo 'ola, “Mamu so nga'ume'a tamitema ane ilosinge tu'umaxu. Xo mimi ma'ia tamitema isilavunu la anu ulamanasi, xe mimi ma'ia italumeu la anu upala'asi. 27Vaikala e eni alemolu noxinge no isivoxo la ngalanu no aso. Xe vaikala ma'ia ngalomusou umunumunu no sangalinge la ngatulu mo nga'avamolu no laxa'u tatani. 28Tamitema ane so ivau vasimenge usoli ia imomomo so imamulonu ulengengi uasi ne, mamu so nga'ume'a. Ia anu ane so ngamama'u noxou a anu ane xaviou so umamulonu ulengenge ilou vasimenge no navu so mamulo. 29Xo ngelavu, tamitema ilotone'i tangiala kitukitu tamei no anu 10 toeasi. Ia loxo soxu vilesisi noxi'a tangiala ne ulapau no lialia la Maminge ulavusou ane. 30Xe noxinge la anu ulavusinge laixe kalumo xo kisinge laxusou se ne anu mulavusou navasou ane. 31Laso nga'ume uasi xo tangiala ne mi loxo utiatila uasi, anu tanungenge uua'ulixa'a tangiala tavu'alo ne avile.

Anu laixe so tamitemaou Kalaisiti ipala'anixu mo imaila uasi

32Xe muvikala aloxo 'ola, “Eni avikalangengi lexe ena'ei uvikala lamana no ie'i tamitema lexe anu vile noxilo la eni avikala lamana no iou Mamilo ane uxolu no tualasou lexe itema anene eni na'a xelimo. 33Ia loxo evile uvikala no ie'i tamitema lexe anu vile noxilo uasi la eni avikala no iou Mamilo ane uxolu no tualasou lexe anu ne itemaxeli to uasi.

Itema loxo umulinu Iesua la ulalaxinu oponu laixe tei

34La Iesua musolonu aloxo 'ola, “Mamu so ngaxavutala lexe eni ene'e so asolixu oto'oto no lialia. Uasi manina, eni ene'enu laviso so oto a. 35Eni ene'e so kalipala uxali no taine'i itema ilou momu xe sema olie nenie xe sema itaula'i olie ua'ane. 36Mo tatemanu tasou itema vile la ixali tauluaou ane.

37Loxo sexela noxou itema so si'a momu olie nenu uua'ulixu anene uxamulinu silo la umomomo so umulileli uasi. Xe loxo osa noxou so si'a ta'olu tamulu xe tasema uua'ulixu anene uxamulinu silo la anu laixe umomomo so uvaitami noxilo uasi ane. 38Xe itema ane oponu u'osa uasi so utavulenu ovu valautu noxou so usoli no anu la umomomo so uxali itemaxeli uasi. 39Loxo itema vile ulaxa'inu maulixu lexe mi noxou mo, la maulixu ne usu'a vitanisi ane. Ia loxo itema vile upilixinu maulixu xo tanu u'oxoxo la anu maulixu uxalixu nene'axu laixe.

Itema aneva usu'uline'i tamitemaou Kalaisiti la uxalisou lakolisou laixe

40Xe Iesua muvikala aloxo 'ola, “Loxo itema u'osasinge so nga'una noxou la ngingisi uasi, anu u'unaleli ane. Mo loxo u'osasilo so a'una noxou ne la enisi uasi, anu u'unanu anu ane mupalusilo ene'e 'o. 41Xe loxo itema vile u'osasou polopeti vile so xaixai noxou mo u'unanu noxou la itema ne uxalisou lakolisou u'isalili a loxo lapeou polopeti. Mo loxo itema vile u'osasou itema vile ulapusi so ilixou ne mo u'unanu noxou la itema ne uxalisou lakolisou u'isalili a loxo lapeou itema ulapu. 42Mo loxo itema vile u'oxo lexe usu'uline'i tatisaipelixeli xe utau lexa lelemesou so ulosi'a ta'aliku moso 'o, la avikalangengi manina lexe uxalisou lapesou laixe ane.

Currently Selected:

Matiu 10: ATA

Highlight

Copy