Luku 10

Iesua mupalusi'a tamitema 72 so ixixao ilanu vaikalaou

1Ioxe, ili'i la Tatananenge musosovosi'a tamitema 72 mo mupalusi'a tamei tamei so milailai. Mupalusi'a so i'uli noxou mo ilailai no taotaoni xe tuatuala ane anu so ulai no anu u'isalili. 2La muvikalane'i aloxo 'o, “Xai lingamo mo nene'axu tavu'alo a mulalaxi mukalu, ia tavokuvoi so itaxusou a tata'ei mososi. Laso ngalinga noxou Tatananu xai so upalusi'a tavokuvoi se'ila mo so itaxusou nene'axu xaixu.

3Laso ngalai. Ia ngalomu, apalusinge ngalai la ngingi loxo tasipisipi ta'ili'a ilailai no taine'i ta'a'a tavova. 4Xe loxo ngalai la ngatavulenu ulu'ulu so lamoli xe laveki so mimi xe lasu uasi. Mo loxo ngaxalisi'a tamitema no vote'i la ngatulutulu so ngavikala aso noxi'a uasi, ngalaisi. 5Mo loxo ngaxali no tuala vile xe nga'unalai no tani aneva, la ngavikalane'i tei lexe, “Ngingi tatemanu tani masi ngaxolu lalavulusi.' 6Laso loxo mosou tani anene anu itema so oponu lalavulusi la vaikala nelemolu ne anu u'isalili noxou ane. Ia loxo uasi la vaikalameni ulivu uxolu noxinesi. 7Xe ngaxolu se'isisi no anu tani anene. Mo loxo i'itixene la'ilali ilou lexa la nano'usi xo anu laixe so uokuvoi uno'u tuxasou xaixai noxou. La ngavaxa ngane'e no tatani uasi.

8Loxo nga'unalai no taoni vile xe ane'i i'unangengi no tasi'a la ngaxolu ne mo nga'ou la'ilali aneva itavalingenge no anu. 9Xe ngapaipoune'i tapipiena ta'ei no taoni ne. Mo ngalanu vaikala noxi'a lexe, 'Voxo so Mosinge molu u'uli laxune'i tamitemaou a mune'e alai noxinge mukalu 'oe.' 10Ia loxo nga'unalai no taoni aneva xe tatemanu i'osasinge so i'unangengi no tasi'a uasi la ngalai ngatulu no iouxalenga la ngavikala lexe, 11'Nexi taxexesinge a. Mo ngamaisou, kalaisou tualasinge kalumo taxexenu so latilovosou ilixo masua noxinge. Ia ngalavu laixe lexe voxo so Mosinge molu u'uli laxune'i tamitemaou a mune'e alai mukalu.' 12Ngingi ngavikalane'i tatemanu taoni axone ia eni avikalangengi lamana aloxo 'o. No anu voxo so Mosinge ukolinu susu olele la tu'umaxu ane uxalisi'a tatemanu taoni ne la uua'ulixu anene so uxalisi'a Tasotomu.”

Anu uxali masua manina noxi'a ane'i ane ixiunu mo i'isalilinoxu opone'i uasi

13La Iesua musolonu aloxo 'ola, “Auo, anu uxali masua manina noxinge ne Kolasini, mo uxali masua manina noxinge ne Vetisaita to. Xo loxo sosovo so xavi muxali no taoni ne Taili mo Saitoni a loxo muxali no taingengi ne la ane'i masi mixiunu mo mi'isalilinoxu opone'i tateimo. Xe axone la masi a isakinu lavalava so tama mo ipeipenu lomulu no kisi'a. 14Ia no voxo so Mosinge ukolinu susu la tu'umaxu ane uxalisinge la uua'ulixu ane noxi'a Tataili xe Tasaitoni. 15Xe ngingi Takapeniamu, ngingi nga'oxo lexe nga'itingengi so ngaxali no tualasou Mosinge, ne? Uasisi ane, ngingi ngasu'a ulu'e no tanixu solisi ane!”

16Mo musolonu noxi'a tatisaipeliou ne lexe, “Itema ane ulomungenge la anu ulomuxo ane. Xe itema ane uxiunu tumalou noxinge la anu uxiunu tumalou noxilosi ane. Xe anu uxiunu tumalou noxilo axone la anu uxiunu tumalou noxou Anu ane mupalusilosi.”

Tamitema 72 milivu mixali

17Ioxe, tamitema 72 milailai xo xe milivu mixali noxoui la mi'osa manina mo mivikalanu lexe, “Tatananexi, nexi telemolu ualasine so takusai'a ta'angelo tamasua sila milomunexesi.” 18La Iesua muvikalane'i lexe, “Eni emaisou Uluaou mulapau no tualasou Mosinge mupisikei mulu'e loxo lele'e mupau. 19Ngalomu, eni epilixinu xavi noxinge mukalu. Laso ngingi ngamomomo so ngataxapalisi'a tasineke tamasua xe tatanga la ivila'isinge uasi. Mo elosinge xavi so ngaua'ulixu xavi noxou Uluamengi la mi vile u'oxongengi masua uasi. 20Ia mi e ngelemolu lexe ta'angelo tamasua ilomungenge ne, anu mi so nga'osasou malaxo to uasi. Mi e so nga'osasou manina ane so ualasinge a mukaukavu no tualasou Mosinge.

Iesua mu'osa mo muvikala laixe noxou Mosinge

21Ioxe, no voxo ne Ulenu Laixe mu'avutinoxu osa'ila no oponu Iesua la muvikala aloxo 'o, “Papao, nini Tatananu tualasine mo lialia 'o. Eni a'itinu ualasine xo nini netalumeu mimi ano'o noxi'a tamitema so lavulavu xe takeleva. Ia a nepala'anixu noxi'a tamitema pelesi'a a loxo takeakeasi 'o. E Papa, muxali aloxo 'o xo mumulinu masaxa noxine u'isalilisi.” 22La Iesua muvikala aloxo 'ola, “Mamilo mupilixinu mimi mukalusi no avolo 'o. La itema vile ulavusou Olu uasi, Momusi ulavusou. Xe itema molu ulavusou Momu uasi, Olusi xe ane'i ta'ei upela'axu Momu la ilavusousi.” 23Mukalu la muxiu muvikala so tatisaipeliousi milomusou aloxo 'o, “Ai, laixe manina noxi'a ane'i ane isaxisou mimi e ngingi a ngasasaxisou no iengi lavo'onu 'o. 24Xo avikalangengi manina lexe tatei tapolopeti oli'a takingi tapiena mimasaxau manina so imaisou mimi ane a ngasaxisou 'o, ia ane'i imaisou to uasi. Xe ane'i opone'i mutatama so ilomusou vaikala e a ngalolomusou 'o, ia ilomusou to uasi.”

Iesua mulemolu a'alo so itema Samalia vile musu'ulinu Iuta vile

25Ioxe, itema vile so lavulavu no anu lavuloto mu'avuti so mutovonu Iesua lexe ukoli axova. Muvikalanu aloxo 'o, “Tisao, eni a'oxonu mi ma'ia so axalisou mauli kaluxu uasi?” 26La Iesua mukolinu mutali'isou lexe, “Xo vaikala ma'ia mukaukavu muxolu no anu lo? Nini netilovosou axova?” 27Sila itema ne muvikalanu lexe, “Lo uvikalasinge aloxo 'o. Ngingi ngasexelaxu Tatananenge anu Mosinge no anu tangengi xe no anu ulengengi xe no anu mauli noxinge xe no anu xavutalamengi mukalusi. Mo ngasexelaxa'a tamenexinge a loxo ngingi menge ngasexelangenge ne.” 28La Iesua mukolinu lexe, “Anu ane, a loxo nekolinu ne. Na'oxo axone laso naxalisou mauli.”

29Ia itema so lavulavu no anu lo umasaxau so umaxa'u lexe ilixo noxou ulapusi. Laso mutali'isou Iesua lexe, “Ia menexilo e lo ulemolu ne, ena'ei manina?” 30La Iesua mukolinu mua'alo aloxo 'o, “Itema vile mulutu ne Ielusalemo so mulu'elai no tuala ne Ieliko. La talasikeli mixalisou no vote'i mo mi'oto'otunu xe mitaxusou mimiou sika milai. Ia anusisi muai ne mole mane la usoli. 31La no voxo ne pilisiti vile mumulinu vote'i mulu'e. Mulu'e xe mumaisou itema ne la mupolo va'axu so upolopepenu la mulai avile. 32Mo axone kalumo noxou Livai vile. Xo muxali noxou itema ne xe mumaisou la mupolo va'axu so mupolopepenu kalumo.

33Ia itema so Samalia vile a mumulinu vote'i ne so ulai no tuala vile. Mulutu xo xe muxalisou itema ne la tanuxu misevile. 34Laso mune'e noxou mo munixi'u ueli ilou uaini no anu xalexalevinu so u'uinu xe muvanisinu. Itema Samalia mune'e la no anu tonikiou. Laso anu mu'itinu itema ne mutelonu no anu tonikiou so mulaixu. Mulaixu xo la muxalixu no anu tasi'a taasila la mu'unalaixu so usaxila'u ne. 35Musaxila'u xo xe no kakau la mupilixinu lamoli siliva tamei noxou mosou tasi'a taasila ne. La muvikalanu aloxo 'o, 'Nini navu'ulinu itema 'o laixe. Xe loxo lamoli tamei 'o umomomo uasi, la eni akolineni loxo alivu ane'e.'” 36Iesua mua'alo mukalu laso mutali'isou itema so lavulavu no anu lavuloto lexe, “Nexavutala axova? Tamitema tatalu mipolo no vote'i ne mo misaxisou itema muai ne. Ia ena'ei noxi'a menexu manina ne?” 37La anu mukolinu lexe, “A itema e muiaiama noxou so musu'ulinu.” La Iesua muvikalanu lexe, “Io', nini nalai na'oxo axone kalumo.”

Iesua muxolu no tasi'a Malita olie Malia

38Ioxe, Iesua oli'a tatisaipeli milutu xo xe mixali no tuala vile. La sema vile so tuala ne ualasie lexe Malita mi'osa so Iesua u'unalai no tasie. 39Mu'unalai xe muxolu nonano la ane vimoe ualasie lexe Malia a mixolu no lia no laxunu Tatananenge so ilomusou vaivaikalaou. 40Ia Malita xavutalaie mu'au'au so lalaxisou la'ilalisi xo laso milai noxou Iesua mo mivikalanu lexe, “Tatanaleli, vivilo 'o isu'ulileli so talalaxinu la'ilali uasi, eni ensisi a. Axova, naxavutala mi vile no anu uasi? Navikalane lexe ine'e isu'ulileli.” 41Ia Tatananenge mukoline lexe, “Malita, uo Malita, nini nauali mo oponeni uauavutiou mimi tavu'alo moe! 42Ia anu laixe so naxavutalanu mimi tavu'alo aloxo 'o uasi. Oponeni ututuluou mi vilesisi. Xo noxie Malia 'o la miilounu mi ane lailaixe manina e umomomo so tasiauxu noxie uasi.”

Currently Selected:

Luku 10: ATA

Highlight

Copy