Luku 9

Iesua mupilixinu xaixai no avo'a ta'aposeliou 12

1Mune'e la Iesua mu'avali'a ta'aposeliou 12 mine'e mipita noxou. Mipita noxou laso anu mutulusi'a no anu xaixai mo mulosi'a xavi so ikusai'a ta'angelo tamasua xe so ipaipoune'i tamitema no anu siki iouiou. 2Xe mupalusi'a so ilanu vaikala laixe so voxo ane Mosinge molu u'uli laxune'i tamitemaou xe so ipaipoune'i tamitema loxo itavulenu tu'umaxu no vasime'a. 3La muvikalane'i aloxo 'o, “Loxo ngamuamua'i la ngaxaxasi, ngano'u vilaxo o tiva o la'ilali o lamoli uasi xe ngano'u lasioti tamei so senisi uasi. 4Mo loxo ngaxali no tuala vile xe nga'unalai so ngaxolu no tani aneva, la ngaxolu anesi xo mo ngaxexesou tuala nela. 5Ia loxo tatemanu tuala vile i'osasinge uasi la ngaxexesi'asi ngalaisi. Xe loxo so ngalutu la ngapupanu tava'inge so kalaisou uxexe mo so ilavusou lexe anene latilovosou ilixo masua noxi'a.” 6Iesua mupalusi'a axone laso ane'i milailai no tuatuala no xale lia ne so milanu vaikala laixe xe mipaipoune'i tapipiena.

Eloti tanulili lexe Iesua e ena'eio

7Ioxe, Eloti e mu'uli laxunu xale lia ne mulomusou a'alo tavu'alo no anu mimi e Iesua a u'oxonu. La anu tanulili xo se'i mi'oxo lexe anene Tioni ane, mutulu no anu soli. 8Xe se'i mivikala lexe Elaitia a mupa ne. Ia ane'i se'i la mi'oxo lexe polopeti vile so tatei ane mutulu mumauli ne. 9Laso Eloti mu'oxo lexe, “Eni elavu lexe Tioni musoli xo eni melo exalixu soli noxou so tamitemaxeli mixotonu limilaxu. Laso itema ane alomusou a'alosou iouiou aloxo a ena'ei manina to?” La anu ukamulinu vote'i so lexe umaisou Iesua.

Iesua muvelunu la'ilali xa'a tamitema 5000

10Ioxe, ta'aposeli mixixao no tuatuala xo xe milivu mixalii la mia'alou Iesua no anu mimi mukalusi ane milai mi'oxonu. Laso Iesua mu'avali'a lexe oli'a ixexesi'a latala so ane'isisi ilai no tuala vile ualasou lexe Vetisaita. 11Ia tamitema latala loxo milavu lexe anu a mulai ne'ei la mimulinu. Mimulinu xo xe mixalisoui la anu mumaxa'u osa noxousi'a so mine'e axone. La anu muvotone'i so voxo ane Mosinge molu u'uli laxune'i tamitemaou xe mupaipoune'i ta'ei ane imasaxau su'uli noxou. 12Mixoxolu xo xe o'olovoxo manina la ane'i tatisaipeli 12 mine'e noxou la mivikalanu aloxo 'o, “Ai, masi nini napalusi'a tamitema latala 'o so ilailai no tuatuala se'i alai 'o mo so ixalisou la'ilali xe tanixu ai'ai. Xo nenge taxolu no anu apu ano'o tuala vile uasi.” 13Ia Iesua muvikalane'i lexe, “Ngingi menge ngalosi'a la'ilali.” La ane'i mi'oxo lexe, “Nexi la'ilali to uasi. Anu pileti ta'uvesi xe sinana moso tameisi a. Ia axova, masi nexi talai talotoxa'a tamitema mukalusi 'o la'ilali?” 14Ane'i mivikala axone xo tamitema ne tavu'alo musuku, navasi'a tamulu noxi'a umomomo no anu 5000.

La anu muvikalane'i tatisaipeliou aloxo 'o, “Ngingi ngavikalane'i tamitema lexe ita'ota'olu no anu kulukulupu loxo 50.” 15Xe tatisaipeli mimulinu vaikalaou laso tamitema mitalutalupexa no lialia. 16Mukalu la Iesua muno'u pileti ta'uve xe sinana soxu tamei ne ka mutala telo no loxotolo mo muvikalasou laixe noxou Mosinge. Muvikalasou laixe mukalu la muse'ise'inu mo mulosi'a tatisaipeliou so ivelunuxa'a tamitema latala ne. 17La mi'ani'ani xo mole mikalusou masaxa noxi'a avile. Xe mipitanu matomatovinu la umomomo no anu lakela 12.

Iesua mutali'isi'a tatisaipeliou lexe, “Eni ena'eio?”

18Ioxe, no voxo vile la Iesua muxoxolu so uvikala noxou Mosinge la tatisaipeliou a oli'a mixoxolusi. La anu mutali'isi'a aloxo 'o, “Tamitema latala ivikala lexe eni ena'eio?” 19La ane'i mikolinu lexe, “Se'i ivikala lexe nini Tioni e itema so u'oxo ilixo so kelele. Xe se'i i'oxo lexe nini Elaitia. Xe se'i ivikala lexe nini polopeti vile so tatei mumauli ane.” 20La anu mutali'isi'a lexe, “Ia ngingi ngaxavutala lexe eni ena'eio?” La Pita mukolinu lexe, “Nini ane Mosinge musosovosou lexe Kalaisiti a.”

Iesua mupela'a tatisaipeliou lexe anu usoli ka umaulila

21La Iesua mu'apixa'a mo mupelototosi'a lexe ipala'anixu noxi'a tamitema mamu. 22Mo muvikala aloxo 'o, “Eni amitema melo noxou Mosinge 'o atavulenu tu'utu'umaxu tavu'alo ili'io. Mo tatiatila noxi'a Taiuta xe noxi'a tapilisiti xe tamitema so lavulavu no anu lavuloto ixililiieli. Ixililiieli la ipilixileli noxi'a tamitema so ivelo asoli. Asoli mo vasimelo uai voxo tatalu ka amaulila.”

23Xe muvikalane'i aloxo 'ola, “Loxo itema umasaxa so umulileli la upilixinu masamasaxa noxou. Upilixinu ukalu la ulalaxinu oponu so lexe loxo umulileli xe uxalisou tu'umaxu o mailasou, la u'ume uasi. Anu loxo u'itinu ovu valautu so usoli no anu mo utavulenu so umulilelisi. 24Xo aloxo 'o. Loxo itema vile u'apisou maulixu lexe noxoumo, la maulixu usu'a vitanisi ane. Ia loxo itema vile upilixinu maulixu so umulileli, la anu maulixu uxalixu nene'axu lailaixe. 25Xe loxo vote'i so itema utaxusou mimi no lialia mukalusi, ia loxo itema ne umamulo mo usu'a vitanisi la mimi ne usu'ulinu axovao? 26Ane'i tamitema mose'i imaila so imulileli mo ane'i ixiunu tumali'aou vaikalaxeli. I'oxo axone ia ili'i la Itema ane molu noxou Mosinge la une'e no anu iaxu Mosinge. La oli'a ta'angelo talaixe ane. Une'e axone laso ane'i ane mixiunu tumali'a noxou vaimomo 'o, la anu ukoline'i mo uxiunu tumalou noxi'a ane. 27Mo eni avikalangengi manina aloxo 'o. Se'i noxinge ane nenge'a tatulu 'o, isoli uao la imaisou voxo ane Mosinge molu u'uli laxune'i tamitemaou uxali.”

Iesua vasimolu muxiu musaxi iou vilemo

28 Ioxe, muvikala axone xe mixolu voxo loxo 8 mukalui laso anu muno'a Pita xe Tioni xe Tiemsisi la oli'a milai teitexi no la'olu vile so uvikala noxou Mosinge. 29Muxolu muvikala noxou Mosinge sila iou muxiu muxali iou vilemo manina. Xe lavulutiou muvalukeasi mo muiei. 30Sila tamitema tamei a oli'a mitulu mivikala noxou. Tamei ne ane'i Mosisi ilou Elaitia. 31Ilou mipa no anu iaxu Mosinge mo a mivikalasou nene'axu xaixai noxou Iesua a so uxali loxo usoli ne Ielusalemo. 32Tei la Pita oli'a tamenexu tamei ie'i tu'umaxu so aisi ia loxo mi ne muxalii la ie'i muka avile sila mimaisou Iesua iaxu xe mimaisi'a tamitema tamei ne oli'a mitulu. 33Mimaisi'a axone xe ilou so ixexesoui la Pita muvikala lexe, “Tatananexi, laixe so nenge taxolu aloxo 'osi. Nenge ta'alaxu tani tatalu. Vile sine xe vile noxou Mosisi xe vile noxou Elaitia.” Pita muvikala axone vuluvulusisi. 34Anu a muvikalasio sila sauma vile mupa mo musu'asi'a la Pitaena tane'i kalaua. 35Xe milomusou xolinu vile molu no sauma lexe, “Ano'o alixeli, anu e esosovosou a. Ngingi ngalomuxu.” 36Xolinu muvikala axone mukalu la mimaisou Iesua anusisi a muxolu. Xe ane'i milivu milu'e no la'olu ia ili'i la tatisaipeli tatalu ne ia'alou itema vile no anu mimi e mimaisou ne uasi.

Iesua mukusaou angelo masua vile ane tatisaipeli imomomo no anu uasi

37Mixolu xe no voxo loxo ne'iela la Iesua oli'a tatisaipeliou ne me'a no la'olu milu'e. Milu'e xe no vote'i la tamitema latala mixalisi'a. 38La vile no taine'i tamitema tavu'alo mu'ava noxou lexe, “Tisao, eni alinga noxine lexe nane'e nasaxisou alixeli 'o. Anu soxu vilesisi anesi, alixeli vilela uasi. 39Anu alaxu tavu'alo angelo masua utelosou mole alaxu vilesisi uiaukaka mo umuamuainu vasimolu mo livilivixu upeipei. Angelo masua ne uvilasou vasimolu la ukasou utotomu utotomu sika uxexesou alaxu vilevilesisi. 40Mo eni elinga pakia'u noxi'a tatisaipelimeni lexe ikusaou ia imomomo to uasi.”

41Iesua mulomusou itema ne mukalu la muvikalane'i tamitema latala ne lexe, “Uo, ngingi tamitema vaimomo 'o ne ngalopala uasisi. Xavutala ilou ilixomengi ukilikalusi. Axolu noxinge voxo veveni axova mo so ngano'u lavulavu? Ngamolo kalakala'ilo axo'o la ukalu talu?” La muvikalanu itema lexe, “Nano'u iline une'e noxilo.” 42Ioxe, molomolo uao une'esio mo a so uxali noxou Iesua la angelo masua mupalapeipeni mo mumuamuainu. Ia Iesua mulavixu angelo masua so uxexesou molomolo ne. Iesua mupamaulinu axone mukalu laso mulaixu noxou momu.

Iesua muvikalasou soli noxou alaxu tameisou

43Xe tamitema latala ne mimaisou xavi noxou Mosinge axone la mikulukemolu kena. Ane'i a mixolu tane'ilili mo ivivikalasou mimi mukalusi e Iesua mu'oxonu ia anu muvikalane'i tatisaipeliou aloxo 'o, 44“Ngingi ngalomunganiou vaikalaxeli 'o. Ili'i la Itema ane molu noxou Mosinge u'italo no avo'a tamitema.” 45Ia ane'i ilavusou laxu to uasi xo mi ne mutalume so upalasi noxi'a uasi. Mo ane'i imama'u so itali'isouxu vaikalaou ne.

Iesua mupelototo lexe ena'ei so u'uli laxune'i tamenexu

46Ioxe, no voxo vile la tatisaipeli mipelesou anaxa'a so lexe ena'ei noxi'a utulu u'uli laxune'i. 47Ia Iesua mulavusou xavutala ane muxolu no opone'i ne. Laso anu muno'u molomolo vile mune'enu la mutulusou no pa'umolu. 48La muvikalane'i lexe “Itema aneva usexelaxu molomolo soxu 'o so usu'ulinu no anu ualasilo, la anu loxo usexelaxu molomolo ano'osi uasi. Anu usexelaxo ane. Xe loxo usexelaxo axone, la enisisi uasi. Axone la anu usexelaxu Mamilo e mupalusilo kalumo ane. Xo itema ane uxolu loxo mi vitanisi no taingengi la anu so u'uli laxungengi ane.”

Itema ane uxililienge uasi, anu uvalanenge ane

49La Tioni muvikalanu Iesua lexe, “Tatananexio, nexi temaisou itema vile a ukusai'a ta'angelo tamasua no anu ualasine. Ia anu vile noxinge uasi laso nexi te'apixu.” 50Ia Iesua muvikalanu lexe, “Uasi, nga'apixu uasi. Itema aneva uxililiienge uasi, la anu uvalanenge ane.”

Tasamali'a mi'apixu Iesua lexe uxolu no tualasi'a uasi

51Ioxe, mune'e xe voxo so Mosinge ulaixu Iesua no tualasou lailaixe a mune'e alai mukalu, laso Iesua oponu mututulusi lexe ulai ne Ielusalemosi. 52Anu so ulutu ulai ne Ielusalemo laso anu mupalusi'a tamitema se'i mi'uli. Mi'uli so ilai no tuala vile noxi'a Tasamalia so ilalaxinu tanixu ai'ai noxou. 53Ia vile no tuala ne u'osa so u'unanu no tasou uasi xo milavu lexe anu so ulai ne Ielusalemo ane. 54Ili'i loxo tatisaipeliou tamei e Tiemisi ilou Tioni milomusou ilixo noxi'a Tasamalia axone la mitali'isou lexe, “Tatananexio, nini namasaxau so nexi talingau navu molu no tulasou Mosinge ulu'e so u'ia'a tamitema ano'o?” 55Ia Iesua muxiu la mulavixa'a ilou.#9.55 Tamitema so lavulavu se'i ixavutala lexe Luku mukaukavunu vaikala pa'usou sevilela no anu 9:55,56 Vaikala ne aloxo 'o, “Ngingi ngalavusou lexe ulenu kaini aneva upamuxangengi no anu mi ne uasi. 56 Xo Itema ane molu noxou Mosinge une'e so umamulonu xoluxoluxa'a tamitema uasi, anu mune'e so upamauline'isi. 56Laso ane'i mimuamua'i so milai no tuala vile.

Iesua muvikalasou vote'i so tamitema imulinu

57La Iesua oli'a tatisaipeli a imuamua'i no vote'i so ilalai la itema vile muvikalanu lexe, “No tuala aneva loxo nini nalai no anu la eni amulinenisi ane.” 58Ia Iesua muvikalanu lexe, “Ta'a'a tavova taxataxasi'a no lia so ixolu no anu. Xe tangiala tasi'a kalumo. Ia Itema ane molu noxou Mosinge anu tanixu so uai uasi.” 59Xe Iesua muvikala noxou itema vile lexe, “Nane'e namulileli.” Ia anu muvikalanu lexe, “Tatilao, na'italoleli so alai a'asixu mamilo teio, ukalu laso amulineni.” 60“Ia Iesua muvikanu lexe, “Tamitema ane misoli mukalu la me'a i'asixa'a tamenexi'a isoisoli. Ia loxo nini la naxixao no tuatuala so navikala lamana no anu voxo ane Mosinge molu u'uli laxune'i tamitemaou.” 61Xe vilela muvikalanu lexe, “Tatilao, eni amasaxau amulineni. Ia na'italoleli so alai no tualasilo so apilixine'i laili noxilo laixe teio.” 62Ia Iesua muvikalanu lexe, “Loxo itema utetelisou palau mo so umamulonu lia so xai, ia loxo utotomu usu'anu iou ulivu la upuninusi ane. Xe itema ane oponu ututuluou xoluxoluxu tei la umomomo uasi manina so ulanu vaikala so voxo ane Mosinge molu u'uli laxune'i tamitemaou.”

Currently Selected:

Luku 9: ATA

Highlight

Copy