San Lucas 9
9
Jesusi imeri jurhengorhirichani axaaspti Diósïri ambe aiangpeni
(Mt 10.5-15; Mc 6.7-13)
1Jesusi imeri témbeni tsimani jurhengorherichani tánaaspti, ka uinhapekua ka juramukua íntsaspti, eskaksï iámendu járhati nóambakitichani úpiringa juramukuani, ka eskajtuksï úpiringa p'amenchakuechani ambakerpentani. 2Axaaspti Diósïri irechekuani uandantani ka p'amenchatichani ambakerantaani. 3Arhiaspti: Ásï ambe ma pákorhe je:
–Tenhexkorhekua ásï pa je, ka sutupujtu ásï pa je, ka t'irekuajtu ásï pa je, ka tuminajtu ásï pa je, ka mórhekuajtu ásï pa je. 4Mápurku pakara je k'umanchekuarhu engajtsï niárka, eskajtsï xáni ióni jima jarhajka. 5Ekaksïni ma iretarhu no jiókaska, uéakuntsï je ka t'upuri sési uauanduntsï je, eska ísï jámani marhuakuauaka míani jarhani eskaksï aiangukata jarhaspkia.
6Nirasptiksï ka iámendu iretecharhuksï niáraspti, ambakiti aiangperakuani aiangpepani ka ambakerpentapani.
Erodesi no jánhaskaxapti
(Mt 14.1-12; Mc 6.14-29)
7Juramuti Erodesi mítespti ambe enga xáni úkorheni jápka; ka no jánhaskasïrempti andisï ísï úkorheni jápi, jimbokaksï máru uandasïrempka eska Juánu itsï atajtsïkpiri tsíntaspka; 8máteruksï uandasïrempti eska Diósïri uandari Eliasïsï xarhantapka; ka máteruksï uandasïrempti, eska ióntki anapu ma Diósïri uandarisï tsíntapka. 9Ka Erodesi uandaspti:
–Ji juramuspka eskaksï Juánuni kachujchakupiringa. ¿Andi néski ima engajtsïni xáni ambe aianguni jaka?
Jimbosï Erodesi jángorhentani jápti Jesusini míteni.
Na enga Jesusi uáni t'irerpepka #9.10-17 Cf. El relato similar en Mt 15.32-39 y Mc 8.1-10 (véase Mc 8.1-10 n.).
(Mt 14.13-21; Mc 6.30-44; Jn 6.1-14)
10Engaksï jurhengorhericha k'uanhatsentapka, Jesusinksï aianguntaspti ambe engaksï úpka. Ima támu páaspti iretarhu ma enga Betsaida arhinhajka. 11K'óru enga mítenhapka, chúxapasptiksï, ka Jesusi sési eroaspti, Diósïri irechekueri ambe uandaxekuaspti ka p'amenchatichani ambakerantaaspti.
12Enga xatinini jápkia, Jesusinksï andarheraspti témbeni tsimani jurhengorhericha ka arhisptiksï:
–Axajpentsï iretecharhu engaksï ixu no iauani jaka, mintsikorheni ka t'irekua jirinhani, jimboka ixuesï nómbema akua jarhaska.
13Jesusi arhiaspti:
–Cháchka t'ireraa je.
Imaksï arhispti:
–Iúmu kurhindajkuchisï kámani jaka ka tsimani kurucha, juchachkani nirania t'irekua p'ikuani.
14Jimboka iúmu míli (5,000) ísïnhaspka. K'óru Jesusi jurhengorheri jémbechani arhiaspti:
–Tsimani ekuatse témbenichani isï uaxastpe je.
15Imaksï kurhajchaspti ka iámenduechanksï uaxastaaspti. 16Jimajku Jesusi iúmu kurhindechani ka tsimani kuruchechani p'íkuaspti, ka auandarhu erancheparini újchakuraaspti, arhukuaspti ka jurhengorheri jémbechani íntsaaspti eskaksï etsakupiringa. 17Sési t'irenhaspti uiniarhanhantani, ka pakarataksï témbeni tsimani tsïkiata tánantaspti.
Pédru uandantaspti eska Jesusisï Diósïri újchakurakateka
(Mt 16.13-19; Mc 8.27-29)
18Ma jurhiatekua enga Jesusi uandamukukorheni jápka, enga jurhengorheri jémbecha jinguni jámani jápka, kurhamarheaspti:
–¿Néna uandanhaxaki, eskani ji néska?
19Imaksï arhispti:
–Máruksï uandasïndi eskari Juánu itsï atajtsïkpiriska, ka máruksï uandasïndi eskari ióntki anapu Diósïri uandari méska enga tsíntaka.
20Ka kurhamarheaspti:
–¿Ka cháia, nénajtsï uandasïnki, eskani ji néska?
Ka Pédru arhispti:
–T'úrisï Diósïri újchakurakateka.
21Ka Jesusi uinhamu arhiaspti eskaksï nónemani aiangupiringa. 22Ka tátsekua Jesusi arhiaspti:
–Acheti Uájpa jatsisti kánekua kómu nitamani, ka achamasïcha ka tátecheri urhejtsïkuricha ka juramukua jurhentpirichaksï no xénhchaati. Uándikuatiksï, k'óru tanimu jurhia jimbo tsíntaati.
23Tátsekua iámenduechani arhiaspti:
–Enga nema uéjka jucheti jurhengorherini, ikimchakorhe, mándani pauani krúsini ichandikorhe ka chúxapuerini. 24Jimboka ne enga uékajka tsípekuani patsapatsandakorheni, tsîtakorheati; k'óru ne enga tsípekuani jíndeni jimbo tsîtakorheska, patsakorheati. 25Jimbokachka, ¿Ambe andanhaa iámu i parhakpenini andakorhenhatini enga jandiojku k'amajkukorhenhaaka o tsînchekorhenhani? 26Jimboka ne engarini jíndeni ka jucheti uandakuani k'uratsenharhiska, acheti Uájpajtu k'uratsenharhiati enga imeri t'íntskua jinguni junguaaka ka tátjemberi t'íntskua jinguni ka ánjeli pímbinhaxeticheri t'íntskua jinguni. 27Sési jimboksïnisï arhijka eskaksï máru engajtsï ixu jaka, nótkijtsï uarhini jauaka ka t'uínijtsï exeakia Diósïri irechekuani.
Na enga Jesusi ménderueni jáxentapka
(Mt 17.1-8; Mc 9.2-8)
28Iúmu tanimu jurhia ísï tátsekua enga íni ambe uandaxepka, Jesusi, Pédru, Santiagu ka Juánuni jinguni juátarhu máksï karhamaspti uandamukukorheni. 29Ka enga na uandamukukorheni jápka Jesusi ménderueni jánharhintaspti, ka imeri xukuparhakua kánekua urapentaspti ka mereani; 30ka tsimani achetichaksï xarharaspti ima jingunksï uandaxeni jarhani. Moisesispti ka Eliasï, 31sésiksï jásï ma t'íntskua uirhipandakorhetixapti ka Jesusiri níntskueri ambeksï uandaxexapti, eska Jerusaleni úkorhepiringa. 32Náuejkiksï Pédru ka imeri pámpiricha kánekua k'uínchani jápka, ísïksï jarhaspti tsínharhitini, ka exesptiksï Jesusiri t'íntskuani ka tsimani achetichani engaksï ima jinguni jápka. 33Engaksï ima acheticha na Jesusini jarharentani jápkia, Pédru arhispti:
–Jurhentpiri, ¡Sési úska jucha ixu jarhani! Tanimu uapajtsïtakuachi úaka: Ma chéti, máteru Moisesiri ka máteru Eliasïri.
K'óru Pédru no mítespti ambesï uandani jápi. 34Enga uandani jápka, janikua ma karhakua niarakuaspti, ka engaksï xúmurhu jápkia chésptiksï. 35Jimajkani xúmurhu uandakua ma kurhakorhespti, enga arhipka: “I jucheti Uátsïtisti, jucheti Erakukata: Kurhajcha je.”
36Enga na pínandepkia, Jesusi jandiojku pakaraspti. Ka imaksï míani pakaraspti indeni ambe ka jiákani ísïksï nónemani aianguspti.
Na enga Jesusi tumbini ma ambakerantapka
(Mt 17.14-21; Mc 9.14-29)
37Pauandekuarhu engaksï na juátarhu kétsentapkia, uánekua ninhaspti Jesusini kúntani. 38Ka acheti ma teruakuni isï uératini uinhachakuarhu arhispti:
–Jurhentpiri, jimboatakua sáni, tataka sapichunirini exeche jimbokani íntkusïni kámka; 39nósesi jásï ma jupintasïndi, ka uinhachatarasïndi ka p'íntatarasïndi ka k'uruata uéchatarasïndi. Nósesi kámasïndi ka no uéksïndi jurajkuni. 40Kómarhiaskia chéti jurhengorherichani eskaksï imani espirituni petarhetantaaka, ka nóksï ústi.
41Jesusi arhispti imechani engaksï chúxapani jápka:
–¡Áke cha engajtsï ísï no jakajkujka ka nójtsï ambarhani! ¿Na jatini jamberi chánksïni jinguni jaua ka tekaachentanksïni jarhani? Juácherini axu chéti sapini.
42Enga tataka sapichu andarherani jápka, nóambakiti tataka sapichuni k'uanintskaraspti ka ménderu p'íntatarani; ka Jesusi nósesi jásïni xukaspti, tataka sapichuni ambakerantaspti ka tátjembani íntskuntani. 43Ka iámenduechaksï Diósïri k'érikuani exerini ísku pakaraspti.
Jesusi ménderu uandanukorhexapti
(Mt 17.22-23; Mc 9.30-32)
Enga jamberi ísku pakareranhatini janhapka xénhani ima ambe enga Jesusi úempka, Jesusi jurhengorheri jémbechani arhiaspti: 44–Sési kurha je íni ka ásï mirikurhi je: Acheti Uájpa parhakpeni anapuechani intsïnharhitanhaati.
45K'óruksï ima no kurhangusïrempti ima ambesï arhiani jápi, jimbokaksï kurhangukua nótki mítamenhasïrempka engaksï jimbo jánhaskatarapiringa; támtuksï chésïrempti arhini Jesusini eska jánhaskataraapiringa.
Nésï sánderu ambe
(Mt 18.1-5; Mc 9.33-37)
46Jiájkani isïksï jurhengorhericha uénaspti arhijperani ne imecheri sánderu k'éri ambepirini. 47Jesusi mítetini ambe eskaksï eratseni jápka, tataka sapichuni ma antsïtaspti, ima jinguni péraspti, 48ka arhiaspti:
–Ima enga íni tataka sapichuni jucheti jakangurhikua jimbo sési kámka, jíndendini sési jiókaxati, ka ne engarini jíndeni sési erokajka, imantu sési jiókasïndi engarini axaka. Ísï jimbo, ima enga sánderu nómbemeka cha iámenduecheri, imasï sánderu ambeti.
Ima engajtsïni no ójkutajka, jucha jingunistiksï
(Mc 9.38-40)
49Juánu arhispti:
–Jurhentpiri, exeskachi ma enga chéti jakangurhikua jimbo nóambakitichani pétarhpeantaani jápka; nóchi jiaretaska, jimboka no jucha jinguniska.
50Jesusi arhispti:
–Ásï no jiáreta je, jimboka ne engajtsïni no ójkutajka, imaksï jucha jingunistiksï.
Jesusi Santiaguni ka Juánuni xukaaspti
51Enga na niárani jápkia jurhiata enga Jesusi auandarhu kénchentapiringa, uinhauinhajtsïparini uéraspti Jerusaleni nirani. 52Uandakua párichani urhetatapaaspti, ka imaksï niraspti Samaria isï, ireta sapichurhu ma, Jesusini jájkorhekua jirinhakuni; 53ka Samaria anapuechaksï no jiókaspti, jimbokaksï mítetixapka eska Jerusaleni niraxamempka. 54Engaksï jurhengorheri jémbecha Santiagu ka Juánu ísï exepka, arhisptiksï:
–Acha, ¿Uéksïndi eskachi juramuaka eska auandarhu uératini chpíri kétseaka, ka eska indechani k'amajkuauaka?
55Ka Jesusi p'irhipakorhespti ka xukaani. 56Tátsekuaksï máteru ireta jimbo niraspti.
Engaksï Jesusini chúxapani uékempka
(Mt 8.19-22)
57Xanhari jimbo, acheti ma Jesusini arhispti:
–Acha, uéksïngakini chúxapani nani uéjkiri nirani.
58Jesusi arhispti:
–Jiuatsïchaksï irekua jatsikorhesti ka káratichaksï xerekua jatsikorhesti; ka acheti Uájpa no jatsisti nani uirhundeni.
59Jesusi máteruni arhispti:
–Chúxapurini.
Ka ima arhini:
–Acha, jurajkuni urheta nirani táteni jatsintani.
60Jesusi arhispti:
–Jurajkuksï uarhiricha imecheri uarhirichani jatsikorheantaani; t'u jáma Diósïri irechekuani uandantani.
61Máteru uandaspti:
–Acha, jíkini uéksïnga chúxapani, k'óru erokarini, jurajkuni urheta nirani juchenio uandanukorheni.
62Ka Jesusi arhispti:
–Ima enga jupikajka tarherakuani ka útasï eraparhani jarhani, Diósïri irechekuarhu no marhuasïndi.
Currently Selected:
San Lucas 9: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
