San Lucas 10

Na enga Jesusi máteru jurhengorherichani axaapka

1Tátsekua enga na i ambe úkorhepkia, Acha máteru tanimu ekuatse témbeni tsimani erakuaspti, (72) ka tsimandani axaaspti urhetatapaani iámendu iretecharhu enga ima niárapiringa.

2Arhiaspti: “Sési jimbo p'ikuntskua kánesti, ka p'ikuntstichaksï sántkuesti. Jimbo, arhi je cha Achani enga p'ikuntskua jatsika eska axauaka p'ikuntstichani p'ikuntani. 3Cha ni je; exe je eskaksïni karichi sapirhati, jiuatsïchani inchachataani isï axaxaka. 4Tumina ásï pa je ka akuajtu ásï pa je, ka kuarhachijtu ásï pa je; ka ásï nemani jimbo p'íngukorhema je uandajpeni. 5Ekajtsï inchajka nemo, urheta uandajpe je, arhiparini: ‘Ixu sési jánhe,’ 6Ka enga jima sési janhaka, chári sési jakua imechani andarheraati; ka eka no ísïka chájtsï nómbema tsîtaaka. 7Imani k'umanchekuarhu pakara je ka a je ka itsïma je ambe engajtsï intsïmbenhajka, jimboka uétarhesïnga eska ánchekorheri maiamunhaaka. Ásï axu ka axu inchapu je. 8Engajtsï ma iretarhu niáratini jiónhaaka, a je ambe engaksïni jatsiracheaka; 9iámendu p'amenchatichani ambakerantaa je, ka arhia je: ‘Diósïri irechekuaksïni andarheraxatiia.’ 10Ka engaksïni mápuru iretarhu no jiókaska, xanharu jimbo ni je uandaparini: 11‘¡Chári ireteri t'upuri jamberichi uauanduntaxaka chánksïni nósesi xécheni! K'óru míte je eskaksïni Diósïri irechekua andarheraxakaia.’ 12Arhixakaksïni eska Sodoma no xáni nósesi kánhaska eska inde ireta na kánhaaka.”

Na engaksï ireta no jakajkuticha arhinharhikunhaaka

(Mt 11.20-24)

13“¡Áke t'u Korasini! ¡Áke t'u Betsaida! Jimboka eka Tiro ka Sidoni únhapiringa milagru enga ixu úkorheka, ióntkiksïsï ch'ech'erasï ambe jukarini ka t'upuri japu atajtsïparini Diósïni andarhentapiringa. 14K'órujtsï cha imani jurhiatekua arhinharhikperakuarhu sánderu nósesi kánhaaka, eskaksï ima engaksï Tiro ka Sidoni anapueka. 15Ka t'u, Kafarnaumi, ¿Tsípestakorhexakiri eskari auandarhu jamberi karhatanhaaka? ¡Sánderuri uarhicho jamberisï andanheraaka!”

16“Ima engaksïni kurhajchajka chánksïni, jíndenisï kurhajchajti; ka ima engaksïni no jiókajka, jíndenisï no jiókajti; ka ne engarini jíndeni no jiókajka, imanisï no jiókorhejti engarini axaka.”

Na engaksï jurhengorhiricha k'uanhatsentapka

17Ima tanimu ekuatse témbeni tsimanksï kánekua tsípeparini k'uanhatsentaspti, uandaparinksï:

–¡Acha, chéti jakangurhikuani jimbojtsïni nóambakiticha jamberi kurhajchasïndi!

18Ka Jesusi uandaspti:

–Ísïsti, jimbokani ji exespka enga Nóambakiti auandarhu uératini piritakueni uekorheka. 19Jíksïni íntskuska uinhapekua chánksïni eskajtsï úaka akuitsechani ka k'uarapuechani jatanduani, ka eskajtsï andaaka iámendu uinhapekua ménderueni eratseticheri, ka nójtsï ambe ma úkorhenchani. 20K'óru ásï tsípe je engaksïni espirituecha kurhandirachejka, sánderu imani jimbojtsïsï tsípeaka enga chári jakangurhikua auandarhu pakaratini jakaia.

Tátjembani Uájpajkusï míteti

(Mt 11.25-27; 13.16-17)

21Enga na ísï arhiapkia, Jesusi Espiritu Sántuni iámu incharhekorhetini uandaspti: “K'éri ambeskari, Táte, auanda ka parhakpeniri Acha, jimbokari exeraaska sapirhatichani imani ambe engari jískakuaka kánekua jurhendichani ka kurhangutichani. Jo Táte jimbokari ísï uékaska.”

22“Jucheti Táterini iámu ambe íntskusti. Nónema mítesti nésï uájpe, Tátejku; ka nónema mítesti nésï Táte, Uájpajku ka imajku enga Uájpa uékaaka mítetarani.”

23Jurhengorherichani andarhentaatini imechanku arhiaspti: “Imaksï k'ória engaksï exeaka imani ambe enga cha exeni jaka; 24jimbokaksïni aianguxaka eskaksï uánekua Diósïri uandaricha ka irechecha uékaska exeni íni ambe enga cha exeni jaka, ka nóksï exesti; uékastiksï kurhani íni ambe enga cha kurhani jaka ka nóksï kurhasti.”

Samaria anapueri uandantskua

25Juramukua jurhentpiri ma niraspti Jesusini uandaxekuni, ka ts'éjkuni uékani kurhamarhespti:

–Jurhentpiri, ¿Ji néna jámaa eskani úaka méntku isï anapu tsípekua p'irani?

26Ka Jesusi arhispti:

–¿Andi juramukuarhu néna karakata jarhaski? ¿O t'u ambe arhintasïnki?

27Ka ima juramukua jurhentpiri arhispti:

Chéti Acha Diósïni iámu chéti mintsita jinguni íntskukorhentsï ka iámu chéti álma jinguni ka iámu chéti uinhapekua jinguni ka iámu chéti kurhangukua jinguni; ka máteru nemani xáni xénhcha eskari t'u xáni xénhchakorhejka.

28Ka Jesusi arhispti:

–Sésiri arhiska. Ekari ísï jámaaka tsípekuari jatsiaka.

29K'óru juramukua jurhentpiri, ójchakurani uékani imani enga kurhangorhepka, arhispti Jesusini:

–¿Ka nésï máteru nemeia?

30Jimajkani Jesusi arhispti:

–Acheti ma xanhari jimbo niraxapti enga Jerusaleni uératini Jeriko niárajka, ka kuárhukpiticha máruksï kuárhukuspti ka takusï jamberiksï euakorhespti; atasptiksï ka níntanksï, uándikuxaptiksïa. 31Táta ma jimesï nitamaxapti; ka enga exepka, ísku uanondaspti ka terutsemani nirani. 32Tiósïo jándi májtu jimesï niraxapti, enga na exepka, imajtu ísku uanondaspti ka terutsemani nirani. 33Samaria anapu ma k'óru enga jimesï nitamatipka, ísï exerini p'amojkuspti. 34Andarheraspti ka sïpiati atamakuspti ka jomakuni. Ka jimajku ch'anchakirhu jatsiraspti ka jájkorhekuarhu páspti ka sési kámaxapti. 35Pauandekuarhu, ima Samaria anapu p'íarhaspti tsimani jurhia andakata ka jájkorhekua jatsirini íntskuspti ka arhini: Exe je íni achetini, ka engajtsï sánderu úraska, jíksïni maiamumunguaka. 36Ka ia, ¿Ima tanimueri, néniri xésïnki eska sési kámaska imani engaksï kuárhukupka?

37Ka ima juramukua jurhentpiri arhispti:

–Ima enga p'amojkupka.

Jesusi arhispti:

–Ka níchka, ka t'újtu méntkueni jáma.

Jesusi Mártao ka Mariao niraspti

38Jesusi xanharasptiteru ka ireta sapichurhu ma niáraspti, jima iretarhu enga nanaka ma Márta arhikorhe pápka mintsikorhetarani. 39Márta jingunekuani ma kámasïrempti enga Maria arhinhempka, ima uaxandentaspti Jesusini kurhajchani. 40Ka Márta, enga xáni uánekua ambe úkua jimbo jatajchakukorheni jápkia, andarheraspti Jesusini ka arhini:

–Acha, ¿Nóri ambe ma sáni uandasïnki engarini jucheti jingunekua jandiojku jurarkucheka iámendu úkua? Arhi eskarini jarhuataaka.

41Ka Jesusi arhispti:

–¡Mártata! Uánekua ambe jimbori uandanheaxaka ka uánekua ambe jimbori no andajkorhexaka, 42ka ma ambejkusï uétarhejti. Maria imani erakusti enga sánderu ambakiti ambeka, ka nónema euantaati.

Currently Selected:

San Lucas 10: BI-PURHE

Highlight

Copy