San Lucas 13

Diósïni jinguni k'uanhatsentani

1Ístuksï imani jurhiatekuechani niraspti máru Jesusini uandaxekuni, ka aiangusptiksï eska Pilatu Galilea anapuechani uándikuaspka, ka eskaksï imecheri iurhiri, karichi kéjtsïtakatecheri iurhiri jinguni jeuetaspka.

2Jesusi arhiaspti: “¿Andi cha eratsentasïnki eskaksï Galilea anapuecha xáni k'amanharhintskua jimbosï ísï úkorhencha; jimbokaksï jini anapuecha jinguni ima sánderu k'amanharhintstiska? 3Aianguxakaksïni eska no ísïska; ka ekajtsï chájtu Diósïni no andarhentaska, chájtujtsï uarhiaka. 4¿O cha jakajkuxaki eskaksï Jerusaleni ima témbeni iúmu tanimu sánderu k'amanharhintaspka enga ísï Siloeri k'umanchekua iótati jatajchakuapka? 5Aianguxakaksïni eska no ísïska ka ekajtsï chájtu Diósïni no andarhentaska, chájtujtsï uarhiaka.”

Jígusï enga no úempka jukani#13.6-9 Esta parábola solo aparece en Lc, que, en cambio, omite la “Parábola dramatizada” de la higuera, de Mt 21.18-22; Mc 11.12-14,20-25 (véase Mt 21.1-22 n.). Se refiere a la actitud negativa de Israel y de sus dirigentes. Cf. Is 5.1-7; Jer 2.21; 8.13.

6Jesusi íni uandantskua terukutarantskuani aianguaspti: “Acheti ma uba jukanchaspti ka jígusï ma jima anhaakuspti, ka niraspti erarhutani, ka nóma jukarhukurhaspti. 7Ísï jimbo arhispti imani achetini enga ubecheri kuáripka: ‘Exe, tanimu uéxurhini jurhaskia indeni jígusïni erarhutani, ka nómeni jukarhukurhastia. Ch'apaia; ¿Ambe úni ísku echeri úrani jaua?’ 8Ka kuári arhispti: ‘Tata, íni uéxurhinterku jurajkia; jurajkuni ji ambandukuni ka terendapu jatsindukuni. 9Nándika ambe ísï jámani úakia jukani; ka eka nómbe, ch'apaakaria.’ ”

Jesusi sábadu jurhiatekua uarhitini ma ambakerantaspti#13.10-17 Nótese la semejanza entre este relato y el de Lc 14.1-6.

10Sábadu ma jimbo, Jesusi k'umanchekua tángorhentskuarhu ma jurhentpeni uénaspti; 11ka jima jarhaspti uarhiti ma enga témbeni iúmu tanimu uéxurhini p'amenchani jápkia. Nósesi jásï espiritu ma juruparhataspti, ka nónena jásï jimbo úsïrempti jurhimbeparhantani. 12Enga Jesusi exepka, ióarhispti ka arhini:

–Nana, chéti p'amenchakuakini jurajkustia.

13Ka p'ájtsïkuspti, ka uarhiti jimajku jurhimbeparhantaspti, ka Diósïni uénaspti k'éri ambe arhini. 14Ka k'umanchekua tángorhentskuerhu juramuti ikiaspti, jimboka Jesusi sábadu jurhiatekua ambakerantaspka, ka arhijpespti:

–Kuímu jurhia ánchekorhekuesti; imani jurhiatekuechani ju je eskajtsï ambakeranhantaaka, ásï sábadu jurhiatekua ju je.

15Ka Acha arhispti:

–¡Ísku ísï uandari! ¿Andi no cha iámenduecha sábadujtu chári ch'anchakini o úakasïni pásïni itsïmatani? 16Ka ísï jimbo, íni uarhitini enga Abraniri sïrukueka ka enga nóambakiti íni p'amenchakua jimbo témbeni iúmu tanimu uéxurhini jótatini jápka, ¿Andi no uetarhexapi náuejki sábadueni eska kueratanhapiringa?

17Enga Jesusi ísï uandapka, ima engaksï ikiakuempka k'uratsenksï pakaraspti; ka máteruecha tsípenhasïrempti exeparini enga Jesusi xáni k'éri ambe úempka.

Mostasa ikarakueri uandantskua

(Mt 13.31-32; Mc 4.30-32)

18Ka ístu Jesusi uandaspti: “¿Ambeni jáxeski Diósïri irechekua ka ambe jingunichi úpirini terukutantani? 19Mostaseni jáxesti enga nema ikarakorhejka, ka enga p'ukutapueni k'éjka, xáni k'éni engaksï jamberi kuínicha újka jima xerekua úkorheni.”#13.19 Cf. Ez 17.23; 31.6; Dn 4.12,20-21 (9,17-18).

Xarhiperakueri uandantskua

(Mt 13.33)

20Ka ístu Jesusi uandaspti: “Irechekua Diósïrini ¿Ambe jinguni terukutasïnki? 21Xarhipitini jáxesti enga uarhiti ma újka tanimu ts'éretakua jarina jimbojku iámu tsïrerini xarhiperani.”#13.21 Levadura: Véase Mt 13.33 n.

Nani enga no kómukurhaka

(Mt 7.13-14,21-23)

22Xanhari jimbo Jerusaleni nirani jámani, Jesusi iámendu iretecharhu enga nitamempka jurhentpemaspti.

23Ka nema kurhamarhespti:

–Acha, ¿Namoniksï p'ímutanhantaa?

Ka ima arhispti:

24–Jángorhentsi je jimesï inchani enga no kómukurhaka, jimbokaksïni arhixaka eskaksï uánekua inchakuekaaka, ka nóksï úati. 25Tátsekua enga jima anapu jauaraaka ka míkani, cha engajtsï uérakua jaka, uámutaakajtsï ka uandaakajtsï: Tata, mítachejtsïni. Ka imaksïni arhiati: No míteska cha nani anapueski. 26Jimajkanijtsï uénaaka cha arhini: T'úngeni jingunichi t'ireska ka itsïmani ka t'úri juchari iretecharhu jurhentpeska. 27Ka imaksïni arhiati: No míteska cha nani anapueski. ¡Nósesi ambe úricha, kéndikuchejtsïni!#13.27 Cf. Sal 6.8 (9). 28Jimajkantsï uenhejchaaka ka no sésijtsï p'ikuarheraaka exeparini enga Abrani ka Isaaki ka Jacobu ka iámendu Diósïri uandakua páricha Diósïri irechekuarhu jarhaska, ka eskajtsï cha uérakua pakatanhaska. 29Jimboka karhamani ka kétsemani ísï uératini junhaaka, tata jurhiata andarakuarhu ka tata jurhiata inchajtsïkukuarhu uératini isï junhaati, ka Diósïri irechekuarhu uaxakanhaati t'irenhani. 30Jiánksï urheteuati máru engaksï iásï k'amarhunika, ka ima engaksï iásï urheteka, imaksï k'amarhuni jámaniuaati.

Jesusi Jerusaleni jimbo uerasti

(Mt 23.37-39)

31Jimajkanksï máru fariseouechajtu niáraspti, ka Jesusinksï arhispti:

–Uéakuntsï iretarhu jimbokakini Erodesi uándikukuekaxaka.

32Ka ima arhiaspti:

–Ni je arhini imani tandojchpirini: Exe, iásï ka pauani nóambakitichani petarhejpeantauaka ka p'amenchatichani ambakerantauaka, ka ísï pauani k'amaraaka. 33K'óru uétarhesïndi eskani xanharaakateruni, pauani ka ísï pauantu, jimboka nósesiska eska Diósïri uandakua pári ma no Jerusaleni uarhiaka.

34“¡Ákeru t'u Jerusaleni, engari Diósïri uandakua párichani uándikuajka, ka engari Diósïri ánchperata úrichani tsakapkueraajka! ¡Namoni xanhari uékaski chéti sapichani ísï kúndantaani eska tsíkata pipichu sapirhatichani na ójchakurantaajka, ka nóri uékaska! 35Exechka je ia, chári ireta jurarkunhaati ka arhixakaksïni eskajtsïni nóteru xéntaaka jiájkani jamberi enga niáraaka jurhiata enga cha uandaaka: ‘¡K'éri ambe arhikuesti ima enga Acheri jakangurhikua jimbo jurhani jaka!’ ”#13.35 Sal 118.26; Mt 21.9.

Currently Selected:

San Lucas 13: BI-PURHE

Highlight

Copy