San Lucas 12

Arhijtsïkperakuecha

(Mt 10.26-27)

1Enga jamberi ísï úkorheni jápka, uánekua tángorhenhaspti, xáni uáni enga jamberi jatajchakperannhani jápkia. Jesusi uénaspti uandani ka imeri jurhengorherichani urheta arhiaspti: “Jinguntku je fariseouecheri xarhiperakua jinguni, engaksï ísku ísï arhijpejka. 2Jimboka nómbema no mítekorheaka enga sïpatekuarhku patsanhani jaka, ka imajtu mítekorheati enga jískakata jaka. 3Ísï jimbo, iámendu ambe engajtsï pájpakandu uandaka, jurhiakua t'íkjandu kurhakorheati; ka imani ambe engajtsï sïpatekuarhku ka mínhakorhetini uandaka, taiajtsïtakatarhu uératini uinhaparini uandanhantaati.”

Nésï chérhekue

(Mt 10.28-31)

4“Jucheti p'íchpiricha, chánksïnisï arhini jaka eskajtsï no chérheauaka imani engaksï anhanhatakuani atajka uándikuni, ka engaksï tátsekua nóteru ambe ma újka úni. 5Jíksïni arhiaka néntsïsï chérhea: Imantsïsï chérheaka enga juramukua jatsika tsípekua euajpentani ka útasï infiernurhu uekajpajpeni. Imani k'óru chérhe je.”

6“¿Andi nóksï iúmu kuinicha tsimani tumina jimbojku ataranhantasïnki? Ka Diósï nóma imani jurajkuasïndi. 7Diósïksïni jauiri jamberi sési mándani miucheatixati. Chájtsï kuínicha jinguni sánderu jukaparhaska, ísï jimbo ásï che je.”

Jesusiri ambe uandani

(Mt 10.32-33; 12.32; 10.19-20)

8“Arhixakaksïni enga nema uandakorhejka eska jíndeni jinguniska jima enga janhaaka, acheti Uájpajtu uandaati eska imani jinguniska Diósïri ánjelichani japarini; 9ka ne engarini no míteni uandaska jima enga janhaaka, no jiókorhenhaati Diósïri ánjelichani japarini.”

10“Diósï imani jamberi púakuntaati enga acheti Uájpani arhinhchaaka; k'óru imani no púakuntaati enga imeri uandakua jimbo Espiritu Sántuni arhinhchaaka.”

11“Engaksïni k'ératichani jinguni ka juramutichani jinguni k'umanchekua tángorhentskuarhu p'itajkorheaka, ásï uandanhea je nénajtsï kuájpekorhea, ka ambe engajtsï uandaaka, 12jimboka engajtsï uandaranhaakia, Espiritu Sántuksïni arhistacheati ambe engajtsï uandaaka.”

Jatsikorhekua nósesi pájpesïndi

13Nema teruakuni uératini Jesusini arhispti:

–Jurhentpiri, arhi jucheti erachini eskarini íntskuaaka eska xáni juchetika engani jucha pakatamenhaka.

14Ka Jesusi arhispti:

–P'íchpiri ¿Nérini jíndeni arhijkutpirini o arhungustpirini péraxaki?

15Kájtu uandaspti:

–Iámendu jásï jatsinchakorhekua jinguni, jingunku jáma je; jimboka tsípekua no jatsikorhekua jimboeska.

16Ka jimajku arini uandantskua terukutarantskua aianguaspti: “Jarhaspti ma acheti enga jatsikorheripka, ka imeri echerichaksï kánekua sési uéraspti. 17Ima jatsikorheri uénaspti eratsentani ‘¿Néna jámaa? No jatsiska nani patsani engani p'ikuntaaka.’ 18Ka jandiojku arhikorhespti: ‘Míteskia néna engani jámaaka. Xerentauaka p'ikuntskata jatakuechani ka sánderu k'érati úantauaka, ka jima patsaaka iámu engani xáni p'ikuntaaka ka eskani xáni ambe jatsikorheka. 19Ka jandiojkuni arhikorheni jauakia: P'íchpiri, uánekua amberisï jatsikia patsarini engakini ióni marhuacheaka; mintsikorheia, t'ire, kaui, íni irekuani tsípekorhe.’ 20Ka Diósï arhispti: ‘Inchandime, iásï chúrekuari uarhiaka, ka imani ambe engari patsani jaka, ¿Nériua?’ 21Ísï úkorhenchasïndi ima enga jatsikorhekua ambe kánerakorhejka, ka Diósïni japarini nóma ambe jatsikorheni.”

Diósï imeri uájpechani kuájchakuasïndi

(Mt 6.25-34)

22Tátsekua Jesusi jurhengorheri jémbechani arhiaspti: “Arhixakaksïni: Ásï uandanhea je akua ambe jimbo engajtsï nitamakorheraaka, xukuparhakua jimbojtu ásï uandanhea je. 23Tsípekua sánderu jukaparhasti eska t'ireni, ka anhanhatakua takusï jiguni sánderu jukaparhakuesti. 24Exea je k'uákichani: Nóksï tsíri jatsisïndi nóksï p'ikuntasïndi ka p'ikuntskata jatakuaksï no jatsisti, ka náuejki ísï, Diósï t'ireraasïndi. ¡Chájtsï k'uákicha jinguni sánderu jukaparhakueska! 25K'óru nónema úati juchari tsípekuani ióstarani náuejki sóndi, 26ka ekajtsï no újka xáni sapichu ambe úni, ¿Andijtsïsï máteru ambe uandanheajki?”

27“Exe je tsïtsïkichani néna engaksï tsikijka, nóksï ánchekorhesïndi, ka nójtuksï sïrikusïndi. Ka náuejki ísï, arhixakaksïni eska irecha Salomoni jamberi enga xáni sési xukuparhempka no xáni ísï kasïpesïrempka. 28Ka enga Diósï ísï kasïperajka uitsakuani enga juátarhu jukarini jaka, ka enga sóntku kurhinhantajka, ¡Náxanksïni chánksïni no sánderu sési xukutaa, engajtsï arisku jakajkutika! 29Ísï jimbo, ásï mískorheparini jámani ja je t'irekua ka itsïmakua jirinhani. 30Jimboka íni parhakpeni inde ambe uandanheanhasïnga, ka chájtsï Táteni ma jatsikorheska enga mítetini jakaia eskajtsï indeni ambe uétarhenchasïnga. 31Cha Diósïri juramukuani engajtsï míani jauaka, ka indeni ambejtsï intsïnhaaka. 32Jucheti karichicha, ásï che je, chájtsï namonkueska, ka Táte eratsetixatiia eskaksïni imeri irechekuani íntskuaka. 33Atarantsï je engajtsï xáni jatsikorheka, ka no jatsikorherichani intsïkorhea je; ambakiti sutupu kánhchaa je enga no jiángorheaka, jatsikorhekua enga auandarhu nómeni k'amakurhiaka, jima enga sïpajkurha no újka inchani o seperi arhani. 34Jimboka jima, enga chári jatsikorhekua jauaka, chári mintsitajtu jima jauati.”

Jinguntku jakuesti

35“Cha, jinguntku ja je ka erajkutarakuechani étskutini, 36ísï eskaksï ima jántspiricha engaksï jinguntku jarhajka imeri juramutini erontani enga tembuchakuarhu ma nika sési t'irekorheni, jinguntkuksï jarhasïndi enga janonguajka ka uámutani, ka mítakusïndiksï. 37Tsípeksï ima jántspiricha enga juramuti jémba no k'uítku exenunguauaka. Sési jimboksïni arhixaka eska juramuti uaxastakorheauaka t'ireraani. 38Tsípeksï imecha, enga ima tsínharhitini exenunguauaka náuejki terujkani chúrekua o erandepakua janonguani. 39Ka kurhangu je: Eska enga nema mítepiringa ambe jándu inchaakua sïpajkurha, kuáni japirindi ka no jiáretpeni eska inchamenhapiringa. 40Chájtu jingunku ja je; jimboka acheti Uájpa jiájkani juuaka enga cha sánderu no erokani jauaka.”

Jántspiri mintsinharhikua

(Mt 24.45-51)

41Jimajkani Pédru kurhamarhespti:

–Acha, ¿Indeni uandantskua terukutarantskuari juchantsïnkusï arhini jaki óri iámenduechanisï arhiani jaki?

42Acha uandaspti: “¿Náki jántspiricheri urhejtsïkuri mintsinharhikueski? Ima enga imeri k'umanchekuarhu anapuechani ánchetpirini jurajkukuajka eska t'irerauaka na enga jándu uétarheaka. 43Tsípe ima jántspiri enga ánchetpiri ánchekorheparini exenunguaska. 44Sési jimboksïni arhixaka eska ánchetpiri imani jinguni jéndaaka iámendu ambe enga xáni jatsikorheka. 45Ka eka ima jántspiri, eranhaskaparini eska ánchetpiri ióndaaka junguani, uénaska nósesi káani máteru uarhiti ka acheti jántspirichani, ka uénani jukari t'ireni ka itsïmani ka kauini, 46ánchetpiri ima jurhiatekua junguaati enga sánderu no erontani jauaka, ka ima jándu enga jántspiri no míteka ka maiampetaraati ka no mintsinharhikueni útamenhantaati.”

47“Ima jántspiri enga míteka ánchetpiri nénasï uéjki, ka no jinguntku jarhani, ka nójtu kurhandirakuni, kánekua nósesi kánhaati. 48Ka ima jántspiri enga no míteparini támisï ambe újka, no xáni nósesi kánhaati. Ne enga kánekua ambe intsïnhajka ístu kánekua ambe kurhamenhaati; ne enga uánekua ambe patsaranhajka, sánderu uánekua ambe uinhamarhemenhaati.”

Jesusini jimbo arhukurhinhasïndi

(Mt 10.34-36)

49“Ji parhakpeni úrhutani jurhaska ka ¡Náxani uékapirini eska úrhupiringia! 50No sési jásï ma uandanheata nitamaaka, ka ¡Násïni p'ikuarherani jaki enga jamberi ísï úkorheaka! 51¿Cha uandasïnki eskani ji íni parhakpeni sési jakuasïni juka juáni? Arhixakaksïni eska no ísïska, ikiatsperakuasïni juáka. 52Jimboka iásï uénatini, iúmuchani ikiatsperanhaati, tanimuksï arhirperaati máteru tsimani jinguni, ka tsimanksï máteru tanimu jinguni arhirperaati. 53Táte, uájpa tatakani ikiaakuati ka uájpa tataka, tátjembani ikiakuaati; nánde, uájpa nanaka jinguni ikiatsperaati ka uájpa nanaka, nánde jémbani jinguni ikiatsperaati; tarhampiri, tarhamba jinguni ikiatsperaati ka tarhamba, tarhampiri jinguni ikiatsperaati.”

Ambe enga Diósï xarhataaka

(Mt 16.1-4; Mc 8.11-13)

54Jesusi arhijpesptijtu: “Engajtsï exejka eska janikua jurhiata andarakuarhu ísï tángorhentani jarhasïnga, uandasïngajtsï eska janiaka, ka janisïndi. 55Ka enga kétsemani ísï uératini tarhiani jarhajka, uandasïngajtsï eska aparhekorheaka, ka aparhekorhesïndi. 56¡Jukari uandaricha! Engajtsï sési mítekuka arhini ambe enga auandarhu ka parhakpeni úkorheaka, ¿Néna jimbojtsï no úsïni uandani íni jurhiatekuechani ambe úkorhea?”

Ikiatspirichani jinguni teruatperantani

(Mt 5.25-26)

57“¿Andijtsïsï no erakukorhentajki ambe enga sésika? 58Engakini nema p'itajkorhejka juramukuarhu ka juramuti jinguni nirani jámantsï márku nirani jarhani, engari andajkorhejka, jángorhentsï je teruatperantani, ásïkini andajkorhe juramuti jinguni pérani; jimbokakini juramuti p'urhejkutichani intsïnharhitaaka ka imaksïni k'ataperakuarhu incharaati. 59Aianguxakakini eskari jima pakanheaka, nóri petanhaaka, urhetari iámu ambe maiampentaaka.”

Currently Selected:

San Lucas 12: BI-PURHE

Highlight

Copy