Génesis 38

Judá ka Tamari

1Ima jurhiatekua ísï Juda imeri erachichani kentikuaaspti ka Adulamita iretarhu irekani Jirao niraspti, 2Ka Juda jima Kana anapu uáp'a nanakani ma mítespti enka Súa jakankurhimpka, ka tempa úspti ka imani jinkuni k'uispti. 3Ima no ióni jimpo sóntku tataka sapichuni ma erokorhexapti, ka imani Eri jakankurhitaspti. 4Ka ménteru no ióni jimpo ménteru charhakuni ma erokorhexapti, enka antap'epunka ka Ona jakankurhitaspti. 5Ka ísï no ióni jimpo ménteru charhakuni ma erokorhexapti ka imani tatakani Sela jakankurhitaspti. Judá, Kuesibi jarhaspti enka sapichani káapka.

6Ióni jimpo Eri k'ésptia ima urhetispti, Juda enka nánte jémpepka, tempani jirinhakuspti ka tempuchataspti Tamari jinkuni. 7K'óru Eri enka Juda uáp'a urhetipka, ACHA no jaiapanhentasïrempti Erini jimpoka kánekua no kurhantiraspka, jimposï ACHA tsípekua euantapti. 8Tátsekua Juda arhispti Onani:

Chéti eracheri tempani kurhentsï, ima jinkuni k'ui eska na p'intekueka, ka chéti eracheri pakaraati sïrukua.

9Onani mítetixapti eska sïrukua no imeripirinka, mántani chúrekua enka imani jinkuni k'uimpka, jarharhesïrempti eska ima no sapini erokorhepirinka. 10ACHA ísï no sési exesïrempti ka imantu irekua euantaspti. 11Tátsekua Juda tarhaskua Tamarini arhispti: Tsïnti pakara ka chéti táteori irekaaka, erokorheakari eska jucheti sapi Sela k'éaka.

Ima ísï eratsespti eska imát'u uarhipirinka.

Tamara táte jémpo niraspti irekani.

12Ióni jimpo, Juderi tempa ima enka Súa uáp'a nanakepka uarhispti. Juda mintakuspti jurhiatechani, ka tátsekua Jira jinkuni niraspti enka imeri pámpiripka Timnati, jima enkaksï karichi xurhata p'ikuricha jápka. 13Tamara mítespti jimpokaksï arhispka: Chéti tatachiri táte jempa Timnati niraxati karichichani xurhata p'ikuani 14Ima exespti eska Sela k'éspkia ka eskaksï no uampuchatantaxapka imani jinkuni, p'iraspti imani xukuparhakua enkaksï tsïnticha jukak'a, takusï ma ónharhispti ísï eska imeri p'intekuarhu na xukuparhak'a ka niraspti Enaini uaxamukuni, enka Timnati xanhari jaka.

15Enka Juda exepka, ísï uantaspti eska ima ísku jánti uarhitispka, jimpoka ima tákusï ónharhitixapti. 16Jurhikua jásï niraspti imani antarherani, ka arhispti:

Ji t'únkini jinkuni k'uini uékasïnka ima no mítentaspti eska ima imeri tarhakuespka, ka ima arhispti: ¿Amperini maiamua enkani t'únkini jinkuni k'uiska?

17Ima arhispti: Jikini karichi sapichuni ma juácheaka ka ima arhispti:

Xukuparhakuarini ampe jurak'uche, ka enka na juácheakia karichini, pantakari xukuparhakua.

18Juda arhispti: ¿Náki xukuparhakua jurak'uchea? Ka ima arhispti: Jónkorhekua ka chéti jukak'urhakua enka chéti jakankurhikua karanharhika.

Ima íntskuspti ka niraspti ima jinkuni k'uini, ka charhakuni erokorhexapti.

19Tátsekua ima jauaraspti ka níntaspti; p'énonharhintaspti ka ménteru isï xukutantaspti enkaksï tsïnticha na xukuta'ka.

20Enka Juda imeri pámpiri Edullamite jinkuni axakupka karichi imani enka kánkuni jápka, ka euantani xukuparhakua enka jima pakatapka, ima nóteru exentaspti imani uarhitini. 21Jima anapuechani kurhamarheaspti:

¿Nani jarhaski uarhiti ísku jánti enka Enaimi jápka, íni xanharu jimpo?

Imaksï uantaspti: Ixu nóma ísku jánti jarhasïnti.

22Ima k'uanhatsentaspti Juda ka uantantaspti:

Nóteruni exentaskia, jima anapuechats'ïni arhispti: Ixu nóma ísku jánti jarhasïnti.

23Juda uantaspti:

Jurak'ia, mirikurhia, jurak'u pakatakorheni xukuparhakua, no uékasïnka enkats'ï teresamurhani jauaka k'uiripuecha, t'úri exekorheskia eskani axakuspka karichini.

24Tanimu kutsï nitamasptia, Judaniksï aiánkuspti:

Chéti tarhaskua, ísku jánti úkorhesti ka charhakuni ma erokorhexati.

Juda uantaspti: Jini peta je ka kurhintsï je.

25Enkaksï petani jápka, ima uantakua axakuspti imeri tatachiri táte jempani: Sési exe íni ampe, jónkorhekua, jukak'ukurhakua enka jakankurhikua karanharhika, charhaku enkani erokorheni jaka imeristi. 26Enka Juda mítentapka eska ima ampe imerispka uantaspti: Ima sánteru kaxumpesti eskani ji, ji jucheti uáp'a tatani Selani no íntskuska. Ka ima nóteru méni jinkuni k'uispti.

27Enka niárapka jurhia enka ima ampakentapirinka, tsimani tatakechani kaaspti, 28enka antap'enuni jámenkia, maechakua charhaku ják'i petataspti ka xurhik'i jupik'uspti ka piruakua charhapiti niáts'ï jók'uspti ka uantaspti: I urheta antap'enusti. 29Ima charhaku ják'i inchaatantaspti ka erachi jempa urhetatakorhespti antap'enuni. Ka xurhik'i uantaspti: ¡Nári jamaski enkari urheta antap'enuka ka Faresi jakankurhitaspti! 30Tátsekua ima antap'enuspti enka piruakua jók'utini jápka ka ima Sejari jakankurhitaspti.

Currently Selected:

Génesis 38: BI-PURHE

Highlight

Copy