Génesis 37

1Jakobi Kanaani pakaraspti irekani, enka táte jempa irekapka. 2I uantantskua Jakobiri márkuecheristi. José enka tempeni iumu tsimani uéxurhini jatiripka karichichani erankuaxapti, Bila ka Silpa uáp'echani jinkuni, enkaksï táte jemperi témpepka, Jose táte jempani aiankuntasïrempti enkaksï ima ampe ma no sési úempka.

José ka erachi jémpecha

3Israeli sánteru xenhchasïrempti Joseni, eska máteru uáp'a tatakechani, jimpoka Jose jimak'ani antap'eunspti enka ima t'arhepepkia, ima xáni xenchani, mámaru atantskata sïrit'akua ma úkuspti. 4Enkaksï erachi jempecha mítepka, imaksï eska táte jémpa sánteru xenchasïrempka imani, ikiasïremptiksï exeni ka nóteru jamperiksï uantap'asïrempti xáni ikiakuni.

5Chúrekua ma, José tsánharhispti ka erachi jempechani aiankuantaspti ampe enka tsánharhipka, imaksï sánteru uinhamentu ikikuspti. 6Arisï aiankuaspti: Kurhaa je, aiánkuaksïni na enkani tsánharika.

7Juchachinha tríju uarhoatani jamaxapka, ka jókukata úani, ka jucheti jókukata sési anhantetini pakarasïrempti ka chári jókukatechaksï urhipantansïrempti jucheti jókukatani ka mijesïksï ióntosïrempti enka jucheti jájpka.

8Imeri erachi jémpechaksï arhispti:

¿T'u juchari irecheua, ori juchari juramutiua?

Imaksï sánteru ikiaspti imani jimpo enka ima tsánharhipka ka aiánkuantani ampe enka tsánharhipka.

9José ménteru tsánharhispti, ka ménteru aiánkuantaspti imeri erachichani:

Ji tsánharhispka tata jurhiatani ka nana kutsïni ka tempeni ka ma ekuatse jóskuechaksï, jinteni janhanharhisïrempka.

10Ka táte ka erachi jempechani aiankuaspti ka táte jempa arhispti: ¿Amperisï arhikuekani ísï arhik'i?

¿Chéti nánte, ka chéti erachicha ka ji jatsiaksïni t'únkeni janhanharhini?

11Imeri erachi jémpechaksï epurhesïmpti, k'óru imeri táte méntku imani ampe miáni jarhasïrempti.

Joseniksï erachi jempecha atarantaspti

12Enkaksï imeri erachi jémpecha Sikemi nípka táte jempeni karichi erankukuani, 13Israeli arhispti Joseni:

Chéti erachichaksï Sikemi nirasti karichi erankuani.

Ju axu jimpokani imechani jinkuni axaaka. Ka Jose arhispti: Ixu jarhaska.

14Israeli arhispti: Ni chésti erachi ka karichichani exeani, eskaksï sési jamani jauaka, ka junkuarini aiankuntani. Israeli axaspti Jebroni uératini ka Jose Sikemi niraspti.

15Jose juátarhu tsïnchetini jámani jápka ka acheti ma exentaspti ka arhispti:

¿Amperi jirinhantani jámaxaki?

16Jose arhispti: Ji jucheti erachichani jámaxaka jirinhantaani. Enkari exeaka jimpoetakua ka arhirini naniksï jámaxaki.

17Ima achati arhispti: Ixuksï jarhaspti, ji ísï kurhaaska eskaksï Dotani nipirinka. Jose niraspti Dotani jirinhantaani ka jima exeantaspti.

18Enkaksï imaksï iauani uératini exepka, imaksï uantaxespti ka pakatperasptiksï eskaksï uántikupirinka. 19Arhip'erasptiksï: Exe je ixu jurhaxati tsanhariti.

20Ia je, uantikuakachi, p'orhotarhuchi ma k'uaninhaaka, ka ísïchi uantantaaka eska manakorheri ikimenhari ma ántaska. Ka jimachi exeaka ampeteru tsánharhia.

21Enka Rubeni ísï kurhaapka uarhikuarhu p'ímutantaspti ka arhiaspti: Nóchi uántikuaka.

22Ka ménteru arhiaspti imani uarhikuarhu p'imutantani ka eska ima táte jempa jinkuni k'uanhatsentapirinka: Ásï atanhe uántikuni, p'orhotarhu k'uanima je enka jima jaka enka no nema irekaka, k'óru ásï atanhe.

23Enka Jose niárapka jima enkaksï erachi jempecha jápka, imaksï xukuparhakua p'ikuspti imani enka mámaru jásï atantskatepka enka táte jempa úkupka, 24ka jupikasptiksï ka p'orhotarhuksï k'uanimaspti, jima nóma ampe jataspti. 25Imaksï tátsekua uaxakaspti t'ireni. Ka iauani uératiniksï uánekua k'uiripuni eraaspti Ismaeliri sïrukuechani enkaksï Galaadi uératini jurhani jápka imeri kameiuecha, p'untsumekua, ka sïpiati atarhekua ka p'untsurhekua enkaksï Ejiptu páni jápka.

26Tátsekua Juda erachi jempechani arhiaspti: ¿Ampechi antaa uantikutini juchari erachini ka tátsekua iurhiri jískani?

27Ju je Israeliri sïrukuechani atarakuntani ka nóchi uántikuaka, nótcha inte juchari erachiska anti, juchari iurhiri jatasti. Erachi jémpechaksï ísï sési exespti.

28Madiani anapuecha ampe atarantsticha jimesï nitamani jápka, Joseri erachi jémpecha p'orhotarhu p'inhantaspti ka k'uiripuechani Ismaeliri sïrukua jempechani atarakuantaaspti Joseni, ma ekuatse taiakata jimpo, ka imaksï Joseni Ejiptu pákorhespti.

29Enka Rubeni niántapka p'orhotarhu, no exentaspti Joseni, ima xáni p'ikuarherani karunhespti, 30tátsekua jima nintaspti enkaksï erachi jempecha jápka ka uantaspti:

¡Tumpi nóteru jima jarhastia! ¿Iásï néna jámaia?

31Tátsekua imaksï karichini ma kachuch'akuspti ka iurhiriksï Joseri xukuparhakuani atarhespti, 32ka xukuparhakua enka mámaru jásï atantskata jápka táte jempani axakupsti ka arhisptiksï: Íni exentaskachi, sési exekorhe, chéti tumpiri xukuparhekueski.

33Enka Jakobi mítentapka uantaspti: ¡Jucheti tumpiri xukuparhekuesti! ¡Manakorheri ikimenhari ma antati Joseniksï tsépunturhispti! 34Tátsekua karunhespti xáni p'ikuarherani, ka imani xukuntaspti enka jimak'ani jukanhak'a enka nema uarhiaka, ka ióni uekuspti imeri tumpini. 35Iámentu uáp'a tataka ka nanakechaksï niraspti sési arhintani, k'óru ima no uékaspti eska sési arhinhantapirinka, ka uantaspti: Xáni ióni míntakuaka na enkani xáni ji irekaka ka imani jinkuni niuaka jima enkaksï uarhiricha niántak'a. Ka táte jempa uéraspti.

36Ejiptuksï, Madiani anapuecha Potifarini atarakuntaspti, ima irecha jinkuni p'urhek'uticheri urhets'ïkurispti.

Currently Selected:

Génesis 37: BI-PURHE

Highlight

Copy