Génesis 35

Diósï, Jakobini Beteli úch'akurasïnti

1Diósï arhispti Jakobini: Jaura, ka Beteli karhama ka jima pakara irekani, jimari Diósïni tiósta ma úkuaka, imani enkakini jimak'ani xarhachepka enkari Esaulini chéti eracheni jamani jápka sïpakorhekuni. 2Jakobi márku jempechani enkaksï imani jinkuni jápka arhiaspti: Jurak'ua je diósï eratakatechani enkats'ï káani jaka, p'ínpinhaxentsï je ka mórhekorhe je.

3Ka jinkunku ja je jimpokachi Beteli niuaka, jimachi Diósïni enkarini jarhuataka enkani uantanheani jápka, enkarini iápuru ísï pámpeta nani enkani xáni jámaka tiósta ma úkuaka.

4Imaksï Jakobini diósï eratakatechani íntsaaspti ka tirhintikua enkaksï mínta úrempka, ka Jakobi urhikuarhu jantukutini ma tuskuaspti enka Sikemi jápka. 5Nirasptiksï ka Diósï úspti eskaksï k'érati iretecha ma uirhipantani chépirinka, ka niraspti Jakobi uáp'echani antakuani.

6Jakobi ka iámentu enkaksï ima jinkuni jámani jápka Beteliksï niaraspti jima enka Kanaa echeri jaka, 7Jakobi jima tiósta ma úspti ka Beteli jakankurhitaspti, jimpoka Diósï jima xarhakuspka enka erachi jempani sïpakorhekuni jámani jápka. 8Débora, Rebekeri jántspiri jima uarhispti, ka Beteli no iótakuarhu jántaspti, urhikua jantukuni enkaksï jakankurhitapka Aloni Bakuti.

9Diósï ménteru Jakobini xarhakuspti enka Paddani Arami uératini junkuani jápka ka úch'akuraspti. 10Diósï arhispti:

T'úri Jakobi jakankurhisïnka,

iásï uératini nóteruri Jakobi jakankurhiaka,

iásï uératini Israeli jakankurhiaka. Ka ísï jakankurhitaspti.

11Diósï arhispti:

Ji Diósï sánteru uinhapitiska,

uánekua sapichani kaaje, uáneje

ka chéti sïrukua k'éri iretani ma uaxastaati,

chéti sïrukua máruksï irecha uéraati.

12Ka echeri enkani Abraami ka Isaakini íntskuka,

iásï t'únkeni íntskuaka

ka tátsekua chéti sïrukua.

13Tátsekua Diósï kéntikuspti jima enkaksï uantaxeni jápka. 14Jakobi anhamarhekua ma péraspti ka tamakua atarhespti. 15Jima enka Jakobi, Diósï jinkuni uantaxepka Beteli jakankurhitaspti.

Rakeliri uarhikua

16Tátsekuaksï Beteli niraspti, nótkiksï iáuani jarharesïrempti Efrata ireta enka Rakeli uinhamentu no sési p'ikuarherapka charhakuni nóna kámani. 17Enka ima uinhamentu p'amearhapka charhakuni no úni kámani, xurhik'i arhispti: Ásï jama chéti, ínturi charhakuni kámaaka. 18K'óru ima mátirku anhakuataspti jiret'ani ka uarhispti, Rakeli, Benoni jakankurhitaspti, ka charhakueri táte jempa Benjamini jakankurhitaspti.

19Rakeli uarhispti ka Efrata xanhari jimpo jatsinhantaspti, jimat'u Beleni jakankurhisïnti. 20Jima enka jántapka Jakobi anhamarhekua ma péraspti ka iásï jamperi ísï mítenhasti eska Rakeli jima jantaska.

21Israeli kéntikuspti jima uératini ka Ederi úntaspti imeri kuakuani. 22Enka Israeli jima echerirhu jápka irekani, Rubeni niraspti ka Bila jinkuni k'uispti ima enka táte jemperi nanachi jémpepka ka Israeli mítespti.

Jakobi uáp'echaksï tempeni tsimanispti.

23Jakobi, Lía jinkuni Rubenini kámaspti enka urhetipka ka Simeoni, Lebi, Juda, Isakari ka Sabulonini. 24Jakobi, Rakeli jinkuni Jose ka Bejaminini kámaspti. 25Jakobi, Bila jinkuni enka Rakeliri jántspiripka, Dani ka Neftalini kámaspti. 26Jakobi, Silpa jinkuni enka Líaueri jántspiripka Gadi ka Aserini kámaspti, íksï jintesti iámentu Jakobi uáp'echa enkaksï Paddani Arami antap'enupka.

Isaakiri uarhikua

27Jakobi niáraspti táte Isaakini p'urhempeni jima enka Mamre ka Arba ka Jebroni jakankurhik'a k'éri ireta, jima irekaspti Abraami ka Isaaki. 28Isaaki iumu t'amu ekuatse (180) uéxurhini jatirispti, 29ima mátirku anhakuataspti jiret'ani ka uarhispti enka t'arhepekia, sési jaarhaparini uarhispti ka imeri sïrukuechani jinkuni nintaspti ka Esau ka Jakobi jatsintaspti.

Currently Selected:

Génesis 35: BI-PURHE

Highlight

Copy