Génesis 34
34
Dinaniksï p'ap'aarhaspti ka k'urhatsetani
1Isï ióni jimpo, uátsï Dina, Lía uáp'a enka Jakobini jinkuni kámapka, ma jurhia uéraspti jima anapu nanakechani exeani. 2Sikemi exespti Dinani ka uinhapetarhu p'áp'aarhasti ka k'uratsetaspti, ima enka Jamori uáp'eka ka enka toá anapu Kanaani anapuepka ka jima anapu irecheni jápka, 3Sikemi kánekua xénchaspti Dinani, Lía uáp'ani ka jankorhespti eska imát'u mák'ueni uékapirinka. 4Sikemi táte jempani Jamorini arhispti:
Íni uátsïnirini kurhak'orhecheaka.
5Jakobi mítespti eska Sikemi p'áp'aarhaspka Dinani enka imeri uáp'epka. Ima nóma ampe uantaspti, eroantaspti imeri uáp'echani imaksï manakorherichani jámaxapti juatarhu erankuani. 6Jamori, Sikemiri táte jempa, niraspti Jakobini jirinhantani jimpoka ima jinkuni uékaxapka uantaxeni.
7Enkaksï Jakobi uáp'echa mítepka, ikiapantastiksï ka kómuksï p'ikuarherapantaspti imani jimpo enka Sikemi úkupka jini Israeli, Jakobu uáp'a nanakani enka kánekua nósesi kámapka k'uratsetani, ima no ísï kamapirinti. 8Jamori imechani jinkuni uantaxespti ka arhiaspti: Jucheti tataka Sikemi mintsita jinkuni xénchasïnti chári uátsïni, ka ji jimposïni juka kurhak'orheni.
9Jú je márku úkorheni, cháts'ï úak'a juchari uáts'ï nanakechani jinkuni tempuchani, ka jucha úaka chári uántsï nanakechani jinkuni tempuchani. 10Ixu pakara je irekani, ixu káEekua echeri jarhasti, kánera je jatsikorhekua ka míkorhea je echerichani.
11Sikemi arhispti Dinaeri táte ka erachi jempani: Enkats'ïni jaíapanhentaska, jíksïni íntskuaka ampe enkats'ïni kurhacheaka.
12Cha kurhak'orhe je ka jíksïni íntskuaka ampe ka na enka xáni chá uékaka, enkats'ïni jiák'utaska chári uátsï nananka jinkuni tempuchani.
13Jakobiri uáp'a tatakecha, Dinaeri erachicha chkuántirakusptiksï, imani jimpo enka ima p'áp'aapka ka k'uratsetani, 14ka arhisptiksï: Jucha no uáka juchari pirenchini imani íntskuni enka no pasïri p'ikuts'ïkutika, jimpoka juchari jimpo ísï, kánekua k'uratsekueska.
15Juchaksïni íntskuaka juchari uátsïni enkari juka kurhak'orheni, enkats'ï chá úska ísï eska na jánhak'a juchari p'intekuecharhu, eskaksï iámentu tatakecha pasïri p'ikuts'ïkuaka. 16Ekats'ï úska ísï jiániksïni íntskuaka juchari uátsï nanakechani, ka jucha uák'a chári uátsïchani jinkuni tempuchani, ka márkuchi irekaka ka mák'u ireteuakachi. 17K'óru ekats'ï no pasïri p'ikutsïkuska juchaksïni euántaka juchari uátsï nanakani ka mótseakachi.
18Jamori ka Sikemi jaiapanhentasptiksï imani uantakuani. 19Ka tumpi no ióntaspti ísï úni, jimpoka ima mintsita jinkuni uékasïrempka Jakobi uáp'a nanakani, ka Sikemi sánteru xénhchakatespti imecho. 20Jamori uáp'a Sikemi jinkuni, iretarhu jamukutiniksï niáraspti ka jimaksï iámentu tatakechani k'éri iretarhu anapuechani arhiaspti:
21Íksï k'uiripuecha, no nósesi jarhati k'uiripuesti ixuksï irekaati ka ixuksï ánchekorheati, ixu kánekua jarhasti echeri, juchachi úaka intecheri uátsï nanakechani tempu úani ka inteksï úati juchari uátsï nanakechani tempa úani. 22Inteksï ixu pakaraati enkachi iámentu ixu anapu tatakecha pasïri p'ík'uts'ïkuska eska na únhak'a intecheri p'intekuecharhu ka márkuchi irekaaka. 23Manakorhericha ka jatsikorhekua enkaksï inte juáni jaka, juchariuati enkachi úska ísï enka na únhak'a intecheri p'intekuarhu ka inteksï jucha jinkuni irekaati.
24Iámentuksï tumpicha Jamori ka Sikemini kurhach'aspti ka ima jurhia sïkuiriksï p'ikuts'ïkuspti. 25Tanimu jurhiatekua tátsekua, enkaksï ima kánekua p'amech'uni jápka, Simeoni ka Lebi, Jakobi uáp'echa ka Dinaeri erachicha, tiámu atáp'etarakuaksï p'ikuspti ka nirasptiksï iretarhu inchaakuni ka iámentu tatakechaniksï ataaspti uántikuni. 26Jamori ka Sikeminit'uksï ataaspti uántikuani ka Dinaniksï Sikemio petantaspti ka nirasptiksï sïpakorheni. 27Máteru Jakobi uáp'echa jima k'amach'akuaspti iámu ampe sïpakuani k'éri iretarhu xáni ikiani enkaksï pirenchi jempani p'ap'aapka ka k'uratsetani. 28Karichi, uákasï ka ch'anch'akichaniksï sïpakuaspti ka enka xáni ampe jápka iretarhu ka juatarhu. 29K'umanchekuarhu jatsikorhekua ampe imantuksï iámu ampe paspti, ka jupikataksï páaspti sapichani ka nanechani. 30Jakobi, Simeonini ka Lebini arhispti:
Cháts'ïni uantanheataska, Kanani ka Feresi anapuechats'ïni kánekua kurhunheati, ka ji no uánekua tatachichani káasïnka enkaksï uarhipeaka, intets'ïni imechani jinkuni kúnkorhechentaati ka k'amakuatits'ïni jinteni ka iámentu jucheti sïrukuani.
31Ka imaksï mókukuspti:
Ima no jatsispti anti xáni nósesi úkuni juchari pirenchini, ísï kámaspti eska ampe ima ísku jánti uarhitini.
Currently Selected:
Génesis 34: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
